1, 2. Jije wa ma nyɛ ma ná wesa he kpakpa ngɛ mwɔnɛ ɔ?

NGƆƆ lɛ kaa o ngɛ gbɛjegbɛ nɔ nyɛɛe ligbi ko nɛ kɔɔhiɔ ngɛ fiae wawɛɛ. Je ɔ mi pee tuu. Hiɔmi bɔni la pãmi, nɛ oslabai hu ngɛ gbae, kɛkɛ nɛ hiɔmi bɔni nɛmi wawɛɛ. O bɔni fo tumi kɛ ngɛ he ko hlae nɛ́ o sa we ngɛ. Kɛkɛ nɛ o na tsu ko ngɛ blɔ ɔ he. E he wa, e dungɔ we, nɛ e mi ngɛ slɔkee. Nɔ́ jemi ko be he kaa o bua maa jɔ lejɛ ɔ he!

² Wa ngɛ be nɛ haomi hyi lɛ tɔ mi. Je ɔ si fɔfɔɛ ngɛ puɛe daa ligbi. Se wesa he ko nɛ ngɛ slɔkee nɛ́ ma nyɛ maa po wa he piɛ kɛ je níhi nɛ maa ye wɔ awi ɔ he ngɛ. Mɛni wesa he? Mo kadi nɔ́ nɛ Baiblo ɔ tsɔɔ: ‘Ma de Yehowa ke, “Mo ji ye wesa he, kɛ ye he bulɔ. Mo ji ye Mawu; i ngɔ ye hɛ kɛ fɔ o nɔ.”’—La 91:2.

3. Mɛni blɔ nɔ wa ma ha Yehowa maa pee wa wesa he?

³ Mo susu he nɛ o hyɛ! Yehowa nɛ ji Bɔlɔ kɛ je mluku ɔ tsuo Matsɛ ɔ ma nyɛ maa pee wa wesa he. E ma nyɛ ma ha nɛ waa hi si slɔkee, ejakaa e ngɛ he wami pe nɔ tsuaa nɔ loo  nɔ́ tsuaa nɔ́ nɛ maa ye wɔ awi. Ke nɔ́ ko ye wɔ awi po ɔ, Yehowa ma nyɛ ma dla nɔ́ tsuaa nɔ́ ekohu ha wɔ. Mɛni blɔ nɔ wa ma ha Yehowa maa pee wa wesa he? E sa nɛ waa ngɔ wa he kɛ fɔ e nɔ. Jehanɛ hu, Mawu Munyu ɔ woɔ wɔ he wami ke: “Nyɛɛ to nyɛ he ngɛ Mawu suɔmi ɔ mi.” (Yuda 21, NW) Niinɛ, e sa kaa waa hi Mawu suɔmi ɔ mi, nɛ wa ha huɛ bɔmi nɛ ngɛ waa kɛ wa hiɔwe Tsɛ ɔ kpɛti ɔ mi nɛ wa. Kɛkɛ ɔ, wa ma nyɛ ma ná he kɛ nɔ fɔmi kaa lɛ ji wa wesa he. Mɛni wa maa pee konɛ waa kɛ lɛ wa kpɛti huɛ bɔmi ɔ mi nɛ wa?

4, 5. Mɛni blɔhi a nɔ Yehowa gu kɛ je suɔmi kpo ha wɔ?

⁴ Bɔ nɛ pee nɛ waa hi Mawu suɔmi ɔ mi ɔ, e he hia kaa wa yɔse bɔ nɛ Yehowa je suɔmi kpo ha wɔ ha. Mo susu Baiblo ɔ tsɔɔmi komɛ nɛ womi nɛ ɔ ye bua mo nɛ o kase ɔ he nɛ o hyɛ. Akɛnɛ Yehowa ji wa Bɔlɔ he je ɔ, e ngɔ zugba a kɛ ha wɔ kaa wa we nɛ ngɛ fɛu. E ha wɔ niye ní kɛ nyu babauu, zu mi ní kpakpahi, lohwehi nɛ a he ngɛ bua jɔmi, kɛ níhi nɛ ngɛ fɛu. Mawu nɛ ji Baiblo ɔ Ngmalɔ ɔ, gu e Munyu ɔ nɔ kɛ je e biɛ kɛ e su ɔmɛ kpo kɛ tsɔɔ wɔ. Jehanɛ se hu, e Munyu ɔ tsɔɔ kaa e tsɔ lɛ nitsɛ e suɔmi Bi nɛ ji Yesu kɛ ba zugba a nɔ, nɛ e ba na nɔ́ nɛ e gbo ngɛ wa he. (Yohane 3:16) Nɛ mɛni se nami ngɛ nike ní nɛ ɔ he ha wɔ? E haa wɔ hwɔɔ se hɛ nɔ kami kpakpa.

⁵ Wa hwɔɔ se hɛ nɔ kami ɔ daa si ngɛ nɔ́ kpa ko hu nɛ Mawu pee ɔ nɔ. Yehowa to hiɔwe nɔ yemi ko nɛ ji Mesia Matsɛ Yemi ɔ sisi. E be kɛe nɛ́ e maa po nɔ́ nami tsuo se, nɛ e ma tsake zugba a kɛ pee paradeiso. Mo susu he nɛ o hyɛ! Wa ma nyɛ maa hi lejɛ ɔ ngɛ tue mi jɔmi kɛ bua jɔmi mi kɛ ya neneene. (La 37:29) Se amlɔ nɛ ɔ, Mawu tsɔɔ wɔ bɔ nɛ wa maa hi si ha nɛ́ e maa hi ha wɔ. E ha wɔ nike ní nɛ ji sɔlemi, konɛ wa nyɛ nɛ waa kɛ lɛ nɛ sɛɛ ní faa. Blɔhi a nɔ nɛ Yehowa gu kɛ je suɔmi kpo kɛ ha adesahi tsuo kɛ mo nitsɛ hu ɔ, e mi bɔɔ pɛ ji enɛ ɔmɛ nɛ.

6. Mɛni o ma nyɛ maa pee ngɛ suɔmi nɛ Yehowa je kpo ha mo ɔ he?

 ⁶ Sane nɛ he hia nɛ e sa kaa o bi o he ji: Mɛni ma pee ngɛ suɔmi nɛ Yehowa je kpo ha mi ɔ he? Nihi fuu ma de ke, “E sa nɛ imi hu ma suɔ Yehowa.” Jã ji bɔ nɛ e peeɔ mo lo? Yesu tsɔɔ kaa kita nɛ ɔ ji kita nɛ pe kulaa: ‘Suɔ Yehowa, o Mawu ɔ kɛ o tsui tsuo, kɛ o klaa tsuo, kɛ o juɛmi tsuo.’ (Mateo 22:37) Nɔ́ jemi ko be he kaa o ngɛ yi mi tomihi fuu he je nɛ e sa kaa o suɔ Yehowa Mawu. Se ke e peeɔ mo kaa o suɔ Yehowa kɛkɛ ɔ, anɛ lɔ ɔ tsɔɔ kaa o suɔ lɛ kɛ o tsui, o klaa, kɛ o juɛmi tsuo lo?

7. Anɛ suɔmi nɛ o ma ná ha Mawu ɔ mi kuɔ pe he numi kɛkɛ lo? Moo tsɔɔ nya.

⁷ Kaa bɔ nɛ Baiblo ɔ tsɔɔ nya a, suɔmi nɛ o ma ná ha Mawu ɔ mi kuɔ pe he numi kɛkɛ. E ji anɔkuale kaa ke e peeɔ mo kaa o suɔ Yehowa a, e he hia mohu, se he numi kaa jã ji suɔmi nitsɛ nɛ o ma ná ha lɛ ɔ sisije kɛkɛ. Loko a ma nyɛ ma ná tso nɛ woɔ yiblii ɔ, ja a na e wu. Ke o ngɛ tso yiblii ko hlae, nɛ nɔ ko ha mo jamɛ a tso yiblii ɔ mi wu ɔ, o bua maa jɔ he lo? E fɔɔ si pãa kaa o bua be he jɔe. Jã nɔuu ke e peeɔ mo kaa o suɔ Yehowa Mawu ɔ, e ji suɔmi nitsɛ nɛ o ma ná ha lɛ ɔ sisije kɛkɛ. Baiblo ɔ deɔ ke: “Ke wa suɔ Mawu ɔ, wa yeɔ e mlaa amɛ a nɔ. Nɛ e mlaa amɛ a nɔ yemi wɛ kulaa.” (1 Yohane 5:3) E sa kaa wa ha suɔmi nɛ wa ngɛ ha Mawu ɔ nɛ wo yiblii kɛ tsɔɔ kaa e ji suɔmi nitsɛ. E sa nɛ wa je suɔmi ɔ kpo kɛ gu wa ní peepeehi a nɔ.—Kane Mateo 7:16-20.

8, 9. Mɛni blɔ nɔ wa maa gu kɛ tsɔɔ kaa wa suɔ Mawu nɛ wa ngɛ sina ha lɛ?

⁸ Wa tsɔɔ kaa wa suɔ Mawu ke wa yeɔ e kita amɛ a nɔ nɛ wa nyɛɛɔ ngɛ e sisi tomi mlaa amɛ a nya. Jã peemi he wɛ tsɔ. Yehowa mlaa amɛ pi tlomi, mohu ɔ, a yeɔ bua wɔ nɛ wa si himi peeɔ kpakpa, nɛ wa tsui nɔɔ wa mi. (Yesaya 48:17, 18) Ke wa nyɛɛ Yehowa blɔ tsɔɔmi se ɔ, lɛɛ wa ngɛ tsɔɔe kaa níhi tsuo nɛ wa hiɔwe Tsɛ ɔ pee ha wɔ ɔ sa wa hɛ mi. Se aywilɛho sane ji  kaa, mwɔnɛ ɔ, nihi bɔɔ pɛ nɛ a jeɔ sina kaa jã kpo ngɛ je ɔ mi. Wa sume kaa wɔ hu wa maa pee nihi nɛ li sina kaa bɔ nɛ ni komɛ pee benɛ Yesu ngɛ zugba a nɔ ɔ. Yesu tsa kpititsɛmɛ nyɔngma, se nɔ kake ngmelu pɛ lɛ kpale ba na Yesu si. (Luka 17:12-17) Nɔ́ jemi ko be he kaa wa suɔ kaa waa pee nɔ kake ɔ nɛ ba na Yesu si ɔ, se pi nimli nɛɛ ɔmɛ nɛ a li sina a!

⁹ Lɛɛ, mɛni ji Yehowa kita amɛ nɛ e sa kaa waa ye nɔ ɔ mɔ? Wa susu fuu he ngɛ womi nɛ ɔ mi momo, se mo ha nɛ wa nylɔ bɔɔ komɛ a mi nɛ waa hyɛ. Ke wa ye Mawu kita amɛ a nɔ ɔ, lɔ ɔ maa ye bua wɔ konɛ waa hi e suɔmi ɔ mi.

10. Moo tsɔɔ nɔ́ he je nɛ e he hia kaa o ya nɔ nɛ o kase Yehowa Mawu he ní.

¹⁰ Yehowa he ní nɛ o maa kase ɔ ji nɔ́ titli nɛ ma ha o hɛ mo kɛ su e he. E sɛ kaa o jɔɔ Yehowa he ní kasemi kɔkɔɔkɔ. Ngɔɔ lɛ kaa fĩɛ ngɛ yee wawɛɛ nɛ o ngɛ la hlue ngɛ kpo nɔ nyɔ mi. Anɛ o maa ngmɛɛ la a he nɛ e nya nɛ ba si nɛ e gbo lo? Dɛbi. O maa ngɔ lɛ kɛ hi la a mi woe bɔ nɛ pee  nɛ la a nɛ hi tsoe gegeege. Ejakaa ke la a gbo ɔ, fĩɛ ɔ ma nyɛ maa gbe mo! Kaa bɔ nɛ lɛ haa nɛ la tsoo ɔ, jã nɔuu “Mawu he nile” hu haa suɔmi nɛ wa ngɛ ha Yehowa a mi waa.—Abɛ 2:1-5.

11. Mɛni he wami Yesu ní tsɔɔmi ɔ ná ngɛ e se nyɛɛli ɔmɛ a nɔ?

¹¹ Yesu suɔ kaa suɔmi nɛ e se nyɛɛli ɔmɛ ngɛ ha Yehowa kɛ e Munyu ɔ nɛ ji anɔkuale ɔ nya nɛ ko jɔ, mohu ɔ, e mi nɛ wa daa. Benɛ Yesu te si kɛ je gbeje ɔ, e tsɔɔ e kaseli enyɔ gbami komɛ ngɛ Hebri Ngmami ɔ mi nɛ ba mi ngɛ e blɔ fa mi ɔ nya. Mɛni he wami enɛ ɔ ná ngɛ a nɔ? Pee se ɔ, a de ke: “Benɛ wa ngɛ blɔ ɔ nɔ kɛ ma nɛ e ngɛ wɔ ngmami ɔmɛ a sisi tsɔɔe ɔ, hyɛ bɔ nɛ wa nɔ gbagba te ha!”—Luka 24:32.

12, 13. (a) Ngɛ nihi fuu nɛ ngɛ je ɔ mi mwɔnɛ ɔ a blɔ fa mi ɔ, mɛni wa ma nyɛ ma de ngɛ suɔmi nɛ a ngɛ ha Mawu kɛ Baiblo ɔ he? (b) Mɛni wa maa pee konɛ wa suɔmi ɔ he nɛ ko jɔ?

¹² Benɛ o bɔni nɔ́ tutuutu nɛ Baiblo ɔ tsɔɔ ɔ kasemi ɔ, anɛ o to he hɛ kaa o nɔ gbagba te nɛ o tsui hyi kɛ bua jɔmi, kã, kɛ suɔmi ha Mawu lo? Atsinyɛ jemi ko be he kaa e pee mo jã. E pee nihi fuu hu jã. Amlɔ nɛ ɔ, o ní tsumi ji kaa o ma ha suɔmi nɛ ɔ nya nɛ ko jɔ, se mohu ɔ, e mi nɛ wa daa. Wa sume kaa waa kase su nɛ ngɛ je ɔ mi mwɔnɛ ɔ. Yesu gba kɛ fɔ si ke: ‘Nihi fuu a suɔmi ɔ he maa jɔ.’ (Mateo 24:12) Mɛni o ma nyɛ maa pee konɛ suɔmi nɛ o ngɛ ha Yehowa kɛ Baiblo mi anɔkuale munyu ɔ he nɛ ko jɔ?

¹³ Yaa nɔ nɛ o kase Yehowa Mawu kɛ Yesu Kristo he ní daa. (Yohane 17:3) Mo susu Mawu Munyu ɔ mi níhi nɛ o ngɛ kasee ɔ he saminya, nɛ o bi o he ke: ‘Mɛni ji nɔ́ nɛ enɛ ɔ tsɔɔ mi ngɛ Yehowa Mawu he? Mɛni ji yi mi tomi kpa nɛ i na nɛ ma ha nɛ́ ma suɔ Yehowa kɛ ye tsui, ye juɛmi, kɛ ye klaa tsuo?’ (Kane La 119:97.) Ke o susuɔ níhi a he jã a, lɔ ɔ ma ha suɔmi nɛ o ngɛ ha Yehowa he be jɔe.

14. Mɛni blɔ nɔ sɔlemi maa ye bua wɔ konɛ suɔmi nɛ wa ngɛ ha Yehowa a he nɛ ko jɔ?

¹⁴ Nɔ́ kpa ko hu nɛ maa ye bua wɔ nɛ suɔmi nɛ wa ngɛ ha Yehowa he be jɔe ji kaa wa maa sɔle daa. (1 Tesalonika Bi 5:17) Wa kase ngɛ womi nɛ ɔ Yi 17 ɔ kaa sɔlemi ji nike ní nɛ he  jua wa nɛ Mawu ha wɔ. Bɔ nɛ adesahi a huɛ bɔmi mi waa ke a pɔɔ ní sɛɛmi faa a, jã nɔuu ke wa sɔleɔ ha Yehowa daa a, waa kɛ lɛ huɛ bɔmi ɔ hu maa pee gbugbuugbu. E sɛ kaa wa ha nɛ wa sɔlemihi nɛ pee munyu komɛ nɛ sisi numi kpakpa ko be a he nɛ wa maa hi mi tie daa kɛkɛ. E sa nɛ waa kɛ Yehowa nɛ tu munyu kaa bɔ nɛ bi kɛ e tsɛ nɛ e suɔ tuɔ munyu ɔ. E biɔ nɛ waa je wa tsui mi faa kɛ anɔkuale yemi mi kɛ tu munyu, se kɛ̃ ɔ, e sa kaa waa kɛ bumi nɛ pee jã. (La 62:8) Niinɛ, Baiblo ɔ nɛ wa maa kase ngɛ wa dɛhe, kɛ wa tsui mi nɛ wa maa je kɛ sɔle ɔ piɛɛ wa jami ɔ he, nɛ a he hia saminya, nɛ a yeɔ bua wɔ nɛ wa hii Mawu suɔmi ɔ mi.

15, 16. Mɛni he je nɛ e da kaa wa maa bu Matsɛ Yemi ɔ he sane kpakpa fiɛɛmi ɔ kaa he blɔ agbo kɛ juetli nɛ wa ná?

¹⁵ Baiblo ɔ nɛ wa kaseɔ ngɛ wa dɛhe kɛ sɔlemi ji wa jami ɔ mi níhi nɛ wa peeɔ ngɛ kɔkɔɔ mi. Se jehanɛ ɔ, mo ha nɛ wa susu wa jami ɔ mi nɔ́ ko nɛ wa peeɔ ngɛ ma hɛ mi ɔ he: níhi nɛ wa heɔ yeɔ nɛ wa sɛɛɔ ha nihi. Anɛ o sɛɛ Baiblo mi anɔkuale munyu ɔmɛ eko ha nihi momo lo? Ke o pee jã a, lɛɛ e ji he blɔ nɛ se be nɛ o ná. (Luka 1:74) Ke wa sɛɛ Yehowa Mawu he anɔkuale ɔ nɛ wa kase ɔ ha nihi ɔ, blɔɔ wa ngɛ ní tsumi ko nɛ he hia saminya nɛ a kɛ wo Kristofohi tsuo a dɛ ɔ tsue. Lɔ ɔ ji Mawu Matsɛ Yemi ɔ he sane kpakpa a fiɛɛmi ɔ nɛ.—Kane Mateo 24:14; 28:19, 20.

¹⁶ Bɔfo Paulo bu e sɔmɔmi ɔ kaa nɔ́ ko nɛ he jua wa, nɛ e tsɛ lɛ ke juetli. (2 Korinto Bi 4:7) Yehowa Mawu kɛ e yi mi tomi ɔmɛ a he ní nɛ o maa sɛɛ ha nihi ɔ ji ní tsumi nɛ se be. Ní tsumitsɛ ɔ nɛ wa ngɛ lɛ sɔmɔe ɔ ji Nyɔmtsɛ nɛ pã nyɔmtsɛmɛ kulaa, nɛ se nami nɛ ngɛ ní tsumi ɔ he ɔ se be. Ke o ngɔ o he kɛ wo ní tsumi nɛ ɔ mi ɔ, o maa ye bua nihi nɛ hɛɛ tsui kpakpa a, nɛ a maa hɛ kɛ su wa hiɔwe Tsɛ ɔ he, nɛ a ma ba nyɛɛ blɔ nɛ yaa neneene wami mi ɔ nɔ! Mɛni ní tsumi ma nyɛ ma ha nɔ tsui maa nɔ e mi pe enɛ ɔ? Jehanɛ se ɔ, Yehowa kɛ e Munyu ɔ he ní nɛ o maa sɛɛ ha nihi ɔ ma ha o hemi  kɛ yemi mi maa wa nɛ suɔmi nɛ o ngɛ ha lɛ ɔ hu mi maa wa. Mo ná nɔ mi mami kaa Yehowa bua jɔ o mɔde bɔmi ɔ he. (Hebri Bi 6:10) Ke o ngɔ o he kɛ wo ní tsumi nɛ ɔ mi daa kɛ hɛdɔ ɔ, lɔ ɔ maa ye bua mo nɛ o maa hi Mawu suɔmi ɔ mi.—Kane 1 Korinto Bi 15:58.

17. Mɛni he je Kristofohi a sɔmɔmi ní tsumi ɔ he hia wawɛɛ mwɔnɛ ɔ?

 ¹⁷ E sa nɛ o hɛ nɛ hi nɔ kaa e he hia kaa waa ngɔ hɛdɔ kɛ fiɛɛ Matsɛ Yemi ɔ he sane kpakpa a. Baiblo ɔ de ke: “Yaa nɔ nɛ o fiɛɛ sɛ gbi ɔ be tsuaa be nɛ o ko kpa.” (2 Timoteo 4:2) Mɛni he je enɛ ɔ peemi he hia wawɛɛ mwɔnɛ ɔ? Mawu Munyu ɔ de ke: ‘Yehowa ligbi ngua a ma kɛ fo, e su si ta!’ (Zefania 1:14) Niinɛ, e be kɛe kulaa nɛ Yehowa maa ngɔ je nɛ ɔ blɔ nya tomi tsuo kɛ ba nyagbe. E sa nɛ waa bɔ nihi kɔkɔ! E sa nɛ a le kaa amlɔ nɛ ɔ ji be nɛ e sa kaa a ngɔ Yehowa kaa a Matsɛ. “E be kɛe” nɛ nyagbe ɔ maa ba.—Habakuk 2:3.

18. Mɛni he je e sa kaa waa kɛ anɔkuale Kristofohi nɛ pee kake kɛ ja Yehowa?

¹⁸ Yehowa suɔ kaa waa kɛ anɔkuale Kristofohi nɛ pee kake kɛ ja lɛ. Enɛ ɔ he ɔ, e Munyu ɔ de ke: “Nyɛ ha waa kɛ hɛdɔ nɛ susu he bɔ nɛ sa, nɛ waa suɔ wa sibi, nɛ waa pee wa sibi kpakpa. Nyɛ ko ha waa jɔɔ wa he nya buami kaa bɔ nɛ ni komɛ hlaa peemi ɔ. Mohu ɔ, nyɛ ha waa ya nɔ nɛ waa wo wa sibi he wami wawɛɛ, titli ɔ, akɛnɛ nyɛ le kaa Nyɔmtsɛ ɔ bami be ɔ su ta a.” (Hebri Bi 10:24, 25) Ke waa kɛ wa nyɛmimɛ nɛ heɔ yeɔ bua wa he nya ngɛ Kristofohi a kpehi a sisi ɔ, lɔ ɔ haa wɔ he blɔ kpakpa nɛ waa kɛ jeɔ wa Mawu nɛ wa suɔ lɛ ɔ yi, nɛ wa jaa lɛ. Jehanɛ se hu ɔ, wa woɔ wa sibi he wami nɛ wa fiaa wa hemi kɛ yemi ɔ kɛ maa si.

19. Mɛni wa ma nyɛ maa pee konɛ suɔmi kɛ huɛ bɔmi nɛ ngɛ Kristofohi asafo ɔ mi ɔ mi nɛ wa?

¹⁹ Benɛ waa kɛ Yehowa jali kpahi ngɛ bɔe ɔ, lɔ ɔ haa suɔmi kɛ huɛ bɔmi nɛ ngɛ asafo ɔ mi ɔ mi waa. E sa kaa wa hla su kpakpahi ngɛ wa sibi a he kaa bɔ nɛ Yehowa hu hlaa ní kpakpahi ngɛ wa he ɔ. Mo ko hyɛ blɔ kaa o nyɛmimɛ nɛ ngɛ hemi kɛ yemi ɔ mi ɔ maa pee a ní kaa nihi nɛ ye mluku. Mo kai hu kaa e slo he nɛ nɔ tsuaa nɔ ní lemi su ngɛ Mawu jami ɔ mi, nɛ wa ti nɔ tsuaa nɔ hu tɔ̃ɔ. (Kane Kolose Bi 3:13.) O kɛ nihi nɛ suɔ Yehowa wawɛɛ ɔ nɛ bɔ huɛ, nɛ lɔ ɔ ma ha o maa wa ngɛ Mawu jami mi. Niinɛ, ke o kɛ nyɛmimɛ nyumuhi kɛ yihi nɛ ngɛ asafo ɔ mi ɔ pee kake kɛ ja Yehowa a, e maa ye  bua mo nɛ o maa hi Mawu suɔmi ɔ mi. Mɛni jɔɔmi Yehowa ma ha nihi nɛ jaa lɛ ngɛ anɔkuale mi nɛ a hii e suɔmi ɔ mi ɔ?

20, 21. Mɛni ji “wami nɛ ngɛ kɛ yaa neneene ɔ,” nɛ mɛni he je e ji hɛ nɔ kami nɛ ngɛ bua jɔmi?

²⁰ Jɔɔmi nɛ Yehowa haa e sɔmɔli anɔkualetsɛmɛ ji wami. Se mɛni wami? Yoo, anɛ o ngɛ wami nitsɛnitsɛ lo? Wa kpɛti nihi fuu ma de ke, ee. Ejakaa wa woɔ mumu, wa yeɔ ní, nɛ wa nuɔ ní. E ji anɔkuale kaa wa ngɛ wami mi. Nɛ ke benɛ wa bua jɔ ɔ, wa nyɛɔ deɔ ke, “Wa ngɛ wami yee nitsɛ!” Se, ngɛ anɔkuale mi ɔ, Baiblo ɔ tsɔɔ kaa adesa ko be nɛ ngɛ wami nitsɛnitsɛ.

²¹ Mawu Munyu ɔ woɔ wɔ he wami kaa waa bɔ mɔde nɛ wa ‘nine nɛ su wami nɛ ngɛ kɛ yaa neneene ɔ’ nɔ. (1 Timoteo 6:19) Munyu nɛ ɔ tsɔɔ kaa “wami nɛ ngɛ kɛ yaa neneene ɔ” ji nɔ́ ko nɛ wa hɛ ngɛ nɔ kaa wa ma ná hwɔɔ se. Niinɛ, ke wa ye mluku ɔ, kɛkɛ wa maa ba wami mi nitsɛnitsɛ, ejakaa wa maa hi si kaa bɔ nɛ Mawu to ɔ pɛpɛɛpɛ. Hwɔɔ se benɛ wa maa hi paradeiso mi ngɛ zugba a nɔ, ngɛ nɔmlɔ tso mi he wami kpakpa, tue mi jɔmi, kɛ bua jɔmi mi ɔ, kɛkɛ jamɛ a be ɔ, wa ma ná “wami nɛ ngɛ kɛ yaa neneene ɔ” mi bua jɔmi nitsɛ. (1 Timoteo 6:12) Anɛ pi hɛ nɔ kami nɛ ngɛ bua jɔmi ji nɛ ɔ lo?

22. Mɛni e sa kaa o pee konɛ o ‘nine nɛ su wami nɛ ngɛ kɛ yaa neneene ɔ nɔ’?

²² Mɛni wa maa pee konɛ wa ‘nine nɛ su wami nɛ ngɛ kɛ yaa neneene ɔ nɔ’? Benɛ Paulo tu munyu nɛ ɔ, e de hu kaa Kristofohi nɛ a “pee kpakpa nɛ a plɛ niatsɛmɛ ngɛ kpakpa peemi blɔ fa mi.” (1 Timoteo 6:18, NW) E ngɛ heii kaa bɔ nɛ wa maa nyɛɛ ngɛ Baiblo mi anɔkuale ɔ nɛ wa kase ɔ nya ha lɛ maa tsɔɔ. Se anɛ Paulo ngɛ tsɔɔe kaa wa ní tsumi kpakpa amɛ ji nɔ́ nɛ ma ha wa nine maa su “wami nɛ ngɛ kɛ yaa neneene ɔ” nɔ lo? Dɛbi, ejakaa hɛ nɔ kami kpakpa nɛ ɔ daa si ngɛ Mawu “dloomi” nɛ wa ma ná a nɔ. (Roma Bi 5:15) Se kɛ̃ ɔ,  Yehowa suɔ kaa e ma ha nihi nɛ sɔmɔɔ lɛ ngɛ anɔkuale mi ɔ hiɔwo. E suɔ nɛ o nine nɛ su “wami nɛ ngɛ kɛ yaa neneene ɔ” nɔ. Nihi nɛ hii Mawu suɔmi ɔ mi ɔ ma nyɛ maa hyɛ blɔ kaa, a nine maa su neneene wami nɛ bua jɔmi kɛ tue mi jɔmi ngɛ mi ɔ nɔ.

23. Mɛni he je e he hia kaa o hi Mawu suɔmi ɔ mi?

²³ E sa kaa wa ti nɔ tsuaa nɔ nɛ bi e he ke, ‘Anɛ i ngɛ Mawu jae kaa bɔ nɛ e tsɔɔ ngɛ Baiblo ɔ mi kaa a ja lɛ ɔ lo?’ Ke wa kaa wa he daa ligbi nɛ wa na kaa wa ngɛ lɛ jae bɔ nɛ e suɔ ɔ, lɛɛ wa ngɛ blɔ nɛ da nɔ nyɛɛe. Wa ma nyɛ ma ná he kɛ nɔ fɔmi kaa Yehowa ji wa wesa he. E maa baa e we bi anɔkualetsɛmɛ ɔmɛ a yi slɔkee kɛ gblee je nɛ ɔ nyagbe ligbi yaya amɛ a mi. Jehanɛ ɔ, Yehowa ma kpɔ wɔ kɛ sɛ je he nɛ ngɛ nyami nɛ su si ta a mi. Jamɛ a be ɔ maa pee bua jɔmi be nitsɛ ha wɔ! Nɛ wa bua maa jɔ hu kaa wa nyɛɛ blɔ nɛ da a nɔ ngɛ nyagbe ligbi nɛ ɔmɛ a mi! Ke o nyɛɛ blɔ nɛ ɔ nɔ mwɔnɛ ɔ, o ma ná bua jɔmi ngɛ “wami nɛ ngɛ kɛ yaa neneene ɔ” mi kaa bɔ nɛ Yehowa Mawu to ɔ daa kɛ daa!