A FA Kristofohi kaa a kai Kristo gbenɔ ɔ. A tsɛɛ gbijlɔ nɛ ɔ hu ke “Nyɔmtsɛ ɔ Gbɔkuɛ Niye Ní.” (1 Korinto Bi 11:20, NW) Mɛni he je gbijlɔ nɛ ɔ he hia? Mɛni be e sa nɛ a ye, nɛ ngɛ mɛni blɔ nɔ?

Yesu to gbijlɔ nɛ ɔ sisi gbɔkuɛ benɛ Yuda bi ɔmɛ ngɛ Hetsɔmi ɔ yee ngɛ jeha 33 ɔ mi. A yeɔ Hetsɔmi nɛ ɔ si kake pɛ ngɛ jeha mi, ngɛ Yuda bi ɔmɛ a nyɔhiɔ nɛ ji Nisan we ligbi 14 ɔ nɔ. Yuda bi ɔmɛ jee be nɛ ɔ kanemi sisi kɛ jee hiɔmi nɛmi be, ligbi nɛ nyɔ kɛ pia mi kɛmi sɔ. Ngɛ ligbi nɛ ɔ nɔ ɔ, nyɔ kɛ pia tsuo hɛɛ ngmlɛfia 12, ngmlɛfia 12. Nyɔhiɔ ehe nɛ jee kpo kekle ngɛ hiɔmi nɛmi be mi benɛ nyɔ kɛ pia mi kɛmi sɔ ɔ peeɔ Nisan nyɔhiɔ ɔ kekleekle ligbi. Ligbi 13 se ɔ, a yeɔ Hetsɔmi ɔ.

Yesu kɛ e kaseli ɔmɛ ye Hetsɔmi ɔ, nɛ benɛ e fie Yuda Iskariot se ɔ, e to Nyɔmtsɛ ɔ Gbɔkuɛ Niye Ní ɔ sisi. Niye ní nɛ ɔ ba da Yuda bi ɔmɛ a Hetsɔmi gbijlɔ ɔ nane mi, lɔ ɔ he ɔ, e sa nɛ a ye Nyɔmtsɛ ɔ Gbɔkuɛ Niye Ní ɔ si kake pɛ ngɛ jeha mi.

A bɔ amaniɛ ngɛ Mateo Sane Kpakpa a mi ke: “Yesu kɛ̃ abolo, nɛ benɛ e jɔɔ nɔ ta a, e ku mi, nɛ e kɛ ha kaseli ɔmɛ, nɛ e de ke: ‘Nyɛ he nɛ nyɛɛ ye! Enɛ ɔ daa si kɛ ha ye nɔmlɔ tso ɔ.’ Nɛ e wo kplu, nɛ e sɔle, nɛ e kɛ ha mɛ nɛ e de ke: ‘Nyɛ tsuo nyɛɛ nu,  ejakaa enɛ ɔ daa si kɛ ha ye “muɔ nɛ a ngɔ kɛ sɔu somi ɔ nya” nɛ a kɛ ma pue si ha nihi babauu konɛ a ngɔ a he yayamihi kɛ pa mɛ.’”—Mateo 26:26-28, NW.

Ni komɛ susu kaa Yesu plɛ abolo ɔ ngɔ pee e he lo nitsɛ, nɛ e plɛ wai ɔ hu ngɔ pee e muɔ nitsɛ. Se benɛ Yesu ha e kaseli ɔmɛ abolo ɔ, e nɔmlɔ tso ɔ ngɛ bɔ nɛ e ngɛ ɔ nɔuu. Anɛ Yesu kaseli ɔmɛ ye e he lo nɛ a nu e muɔ nitsɛnitsɛ lo? Dɛbi, ejakaa lɔ ɔ maa pee mɛ nɔmlɔ lo yeli, nɛ e ji Mawu mlaa a nɔ tɔmi. (1 Mose 9:3, 4; 3 Mose 17:10) Kaa bɔ nɛ Luka 22:20 ɔ tsɔɔ ɔ, Yesu de ke: “Kplu nɛ ɔ ji Mawu somi he ɔ nɛ a ngɔ ye muɔ nɛ a plɛ ngɔ pue si ha nyɛ ɔ kɛ sɔu nya a nɛ.” Anɛ kplu ɔ ji nɔ́ nɛ plɛ “somi he ɔ” lo? E be nyɛe maa ba jã, ejakaa somi ji blɔ nya tomi se pi nɔ́ ko nɛ a naa kɛ hɛngmɛ.

Enɛ ɔ he je ɔ, abolo ɔ kɛ wai ɔ tsuo daa si ha ní komɛ. Abolo ɔ daa si ha Yesu nɔmlɔ tso nɛ ye mluku ɔ. Abolo nɛ a kɛ ye Hetsɔmi ɔ nɛ piɛ ɔ, eko Yesu ngɔ kɛ to kaimi ɔ sisi ɔ nɛ. Masa be jamɛ a abolo ɔ nɛ a sã a mi. (2 Mose 12:8) Behi fuu ɔ, Baiblo ɔ ngɔɔ masa kɛ daa si ha yayami loo puɛmi. Enɛ ɔ he je ɔ, abolo ɔ peeɔ Yesu nɔmlɔ tso nɛ ye mluku nɛ e kɛ sã afɔle ɔ he okadi. Yayami ko be e he.—Mateo 16:11, 12; 1 Korinto Bi 5:6, 7; 1 Petro 2:22; 1 Yohane 2:1, 2.

Wai ɔ daa si ha Yesu muɔ. E muɔ ɔ lɛ a kɛ sɔu somi he ɔ nya. Yesu de ke a plɛ e muɔ kɛ pue si konɛ a ngɔ nihi a “he yayami ngɔ pa mɛ.” Lɔ ɔ ji nɔ́ nɛ ma ha adesahi a he ma tsɔ ngɛ Mawu hɛ mi, konɛ a nyɛ nɛ a sɛ Yehowa somi he ɔ mi. (Hebri Bi 9:14; 10:16, 17) Somi nɛ ɔ bli blɔ konɛ Kristofohi anɔkualetsɛmɛ 144,000 nɛ ya hiɔwe. A ma ya sɔmɔ kaa matsɛmɛ kɛ osɔfohi ngɛ lejɛ ɔ, nɛ e maa pee jɔɔmi ha adesahi tsuo.—1 Mose 22:18; Yeremia 31:31-33; 1 Petro 2:9; Kpojemi 5:9, 10; 14:1-3.

Mɛnɔmɛ lɛ sa nɛ a ye Kaimi ní ɔ eko? Sisi numi ngɛ he kaa, nihi nɛ ngɛ somi he ɔ mi nɛ a ngɛ hɛ nɔ kami kaa a maa ya hiɔwe ɔ pɛ lɛ sa nɛ a ye abolo ɔ nɛ a nu wai ɔ eko. Mawu mumi klɔuklɔu ɔ ma nɔ mi ha nimli nɛ ɔmɛ kaa a hla mɛ kaa a ya ye matsɛ ngɛ hiɔwe. (Roma Bi 8:16) Yesu hu kɛ mɛ pee Matsɛ Yemi he somi.—Luka 22:29.

 Nɛ nihi nɛ ngɛ hɛ nɔ kami kaa a maa hi Paradeiso mi ngɛ zugba a nɔ kɛ ya neneene ɔ hu nɛɛ? A buɔ Yesu fami ɔ tue nɛ a yaa Nyɔmtsɛ ɔ Gbɔkuɛ Niye Ní ɔ sisi kaa odase yeli nɛ ngɛ bumi ha blɔ nya tomi ɔ, se a yi eko. Daa jeha a, Yehowa Odasefohi kpeɔ si kake ngɛ Nisan we ligbi 14 ɔ nɔ benɛ pu nɔ si, nɛ a yeɔ gbijlɔ nɛ ji Nyɔmtsɛ ɔ Gbɔkuɛ Niye Ní ɔ. E ngɛ mi kaa ngɛ je ɔ mi tsuo ɔ, nimli akpe bɔɔ ko pɛ lɛ ngɛ hiɔwe hɛ nɔ kami ɔ mohu, se kaimi nɛ ɔ he ngɛ se nami ha Kristofohi kulaa. E ji be nɛ nɔ tsuaa nɔ kɛ susuɔ suɔmi nɛ se be nɛ Yehowa Mawu kɛ Yesu Kristo je kpo ha wɔ ɔ he.—Yohane 3:16.