MI TSƆƆMI MUNYUHI
Anɔkuale Nɛ Kɔɔ Tsɛ ɔ, Bi ɔ, Kɛ Mumi Klɔuklɔu ɔ He
NIHI nɛ a heɔ Triniti tsɔɔmi ɔ yeɔ deɔ ke, nihi etɛ lɛ a bla kɛ pee Mawu ɔ nɛ
Nihi babauu nɛ heɔ Triniti tsɔɔmi ɔ yeɔ kplɛɛɔ nɔ kaa a be nyɛe maa tsɔɔ nya. Se kɛ̃ ɔ, a heɔ yeɔ kaa e ji Baiblo tsɔɔmi. E sa nɛ wa kadi kaa munyungu “Triniti” ɔ be Baiblo ɔ mi. Se anɛ munyu ko ngɛ Baiblo ɔ mi nɛ e kɛ Triniti tsɔɔmi ɔ kɔ lo? Bɔ nɛ pee nɛ waa na sane bimi nɛ ɔ heto ɔ, ha nɛ wa susu ngmami ko nɛ nihi pɔɔ se tsɛmi kɛ fiɔ Triniti tsɔɔmi ɔ se ɔ he nɛ waa hyɛ.
‘MUNYU Ɔ JI MAWU’
Yohane 1:1 de ke: ‘Loko nɔ́ tsuaa nɔ́ je sisi ɔ, Munyu ɔ ngɛ momo. Munyu ɔ kɛ Mawu nɛ ngɛ, nɛ Munyu ɔ ji Mawu.’ Pee se ɔ, bɔfo Yohane tsɔɔ mi heii ngɛ jamɛ a yi ɔ nɔuu mi kaa, “Munyu ɔ” ji Yesu. (Yohane 1:14) Akɛnɛ a tsɛɛ Munyu ɔ ke Mawu he je ɔ, ni komɛ muɔ sane ɔ nya kaa, Bi ɔ kɛ Tsɛ ɔ tsuo ji Mawu kake too.
O hɛ nɛ ko je nɔ kaa a ngma Baiblo ɔ fã nɛ ɔ ngɛ Hela gbi mi. Pee se ɔ, gbi sisi tsɔɔli tsɔɔ sisi kɛ ya gbi slɔɔtohi a mi. Se Baiblo sisi tsɔɔli fuu kɛ munyu nɛ ji, ‘Munyu ɔ ji Mawu’ ɔ tsu we ní. Mɛni he je? Akɛnɛ gbi sisi tsɔɔli nɛ ɔmɛ le Hela gbi nɛ a kɛ ngma Baiblo ɔ he je ɔ, a na kaa e sa nɛ a tsɔɔ munyu nɛ ji ‘Munyu ɔ ji Mawu’ ɔ sisi ngɛ blɔ kpa nɔ. Ngɛ mɛni blɔ nɔ? Nɔ hyɛmi níhi bɔɔ komɛ ji nɛ ɔmɛ nɛ: Baiblo nɛ ji, A New Translation of the Bible tsɔɔ sisi ke, “Logos [Munyu] ɔ ngɛ kaa mawu.” Nɛ Baiblo sisi tsɔɔmi nɛ ji, The New Testament in an Improved Version tsɔɔ sisi kaa: “Munyu ɔ ji mawu ko.” Jehanɛ ɔ, Baiblo nɛ ji, The Translator’s New Testament tsɔɔ sisi ke: “Munyu ɔ kɛ Mawu lɛ ngɛ nɛ e kɛ Mawu hɛɛ su kake.” Gbi sisi tsɔɔli nɛ ɔmɛ tsɔɔ heii kaa, pi Mawu nitsɛnitsɛ ji Munyu ɔ. * Se mohu, akɛnɛ Munyu ɔ hɛɛ blɔ nya nɛ nɔ kuɔ ngɛ Yehowa adebɔ ní ɔmɛ a kpɛti he je nɛ a kale lɛ kaa “mawu ko” ɔ nɛ. Ngɛ hiɛ ɔ, biɛ “mawu” ɔ tsɔɔ “he walɔ.”
MO HLA NÍHI A MI FITSOFITSO
Nihi babauu nui Hela gbi nɛ a kɛ ngma Baiblo ɔ. Lɛɛ, kɛ o maa pee kɛ le nɔ́ tutuutu nɛ bɔfo Yohane ngɛ tsɔɔe ɔ kɛɛ? Mo susu nɔ hyɛmi nɔ́ nɛ ɔ he nɛ o hyɛ: Sukuu tsɔɔlɔ ko tsɔɔ e sukuu bi ɔmɛ nɔ́ ko. Pee se ɔ, sukuu bi ɔmɛ ya nu nɔ́ nɛ a tsɔɔ mɛ ɔ sisi ngɛ blɔ munomuno nɔ. Mɛni sukuu bi ɔmɛ maa pee konɛ a nu sane ɔ sisi saminya? A ma nyɛ ma bi tsɔɔlɔ ɔ konɛ e ngɔ nya tsɔɔmi kpahi kɛ piɛɛ he ha mɛ. Nɔ́ jemi ko be he kaa nya tsɔɔmi fitsofitso nɛ a ma ná a ma ha nɛ a maa nu sane ɔ sisi saminya. Jã nɔuu ke o ngɛ hlae nɛ o nu sane nɛ ngɛ Yohane 1:1 sisi ɔ, o ma nyɛ maa kase blɔ nya nɛ Yesu hɛɛ ɔ he ní fuu ngɛ Yohane Sane Kpakpa a mi. Ke o kase sane nɛ ɔ he ní fuu ɔ, e maa ye bua mo nɛ o maa nu níhi a sisi saminya.
Kaa nɔ hyɛmi nɔ́ ɔ, mo susu nɔ́ nɛ Yohane ngma kɛ tsa nɔ ngɛ yi 1, kuku 18 ɔ he nɛ o hyɛ: “Mawu [Ope] ɔ, nɔ ko nɛ lɛ hyɛ.” Se Bi ɔ nɛ ji Yesu lɛɛ, adesahi na lɛ hyɛ, ejakaa Yohane de ke: “Munyu ɔ [Yesu] ba plɛ adesa, nɛ e kɛ wɔ hi si. . . . Wa na lɛ, nɛ a wo e hɛ mi nyami kaa lɛ pɛ ji Tsɛ ɔ Bi.” (Yohane 1:14) Lɛɛ, kɛ peeɔ kɛɛ nɛ Bi ɔ peeɔ Mawu Ope ɔ fã ko? Yohane de kɛ piɛɛ he hu ke, Munyu ɔ ‘kɛ Mawu nɛ ngɛ.’ Se, kɛ maa pee kɛɛ nɛ a ma de ke nɔ ko kɛ nɔ ko ngɛ nɛ jamɛ a be ɔ mi nɔuu, a ma pa de ke lɛ kɛ̃ ji nɔ ɔ? Jehanɛ ɔ se hu, Yesu ha nɛ slɔɔto peemi nɛ ngɛ e kɛ e hiɔwe Tsɛ ɔ a kpɛti ɔ pee heii kaa bɔ nɛ e jeɔ kpo ngɛ Yohane 17:3 ɔ. Yesu tsɛ e Tsɛ ɔ ke “anɔkuale Mawu ɔ.” Nɛ benɛ Yohane kɛ e Sane Kpakpa a ma nyagbe ɔ, e muɔ sane ɔ nya ke: “Se enɛ ɔmɛ lɛɛ a ngma, konɛ nyɛ he ye kaa Yesu ji Kristo, Mawu Bi ɔ.” (Yohane 20:31) Mo kadi kaa a tsɛ we Yesu ke Mawu, se Mawu Bi. Nya tsɔɔmi kpa nɛ ɔmɛ nɛ wa na ngɛ Yohane Sane Kpakpa a mi ɔ ha wa na bɔ nɛ e sa kaa waa nu Yohane 1:1 ɔ sisi ha. Yesu, aloo Munyu ɔ ji “mawu ko” ngɛ sisi numi nya kaa, e ngɛ blɔ nya nɛ nɔ kuɔ se e kɛ Mawu Ope ɔ sɔɛ.
MO HLA NYA TSƆƆMIHI KƐ MA ANƆKUALE Ɔ NƆ MI
Mo susu tsɔɔlɔ ɔ kɛ sukuu bi ɔmɛ a he ekohu nɛ o hyɛ. Ngɔɔ lɛ kaa benɛ a nu tsɔɔlɔ ɔ nya tsɔɔmi fitsofitso ɔ se ɔ, loloolo ɔ, a ti ni komɛ a yi mi tɛ̃ mɛ. Mɛni a ma nyɛ maa pee? A ma nyɛ ma bi nya tsɔɔmi nɛ kɔɔ jamɛ a sane ɔ nɔuu he kɛ je tsɔɔlɔ kpa ngɔ. Ke tsɔɔlɔ enyɔne ɔ ma kekle tsɔɔlɔ ɔ nya tsɔɔmi ɔ nɔ mi ɔ, sukuu bi ɔmɛ a ti nihi babauu a yi mi maa tɛ̃ mɛ ngɛ sane ɔ he. Jã kɛ̃ ke mo hu o yi mi tɛ̃ mo ngɛ nɔ́ nɛ Baiblo ngmalɔ Yohane de kɛ kɔ weku kpa nɛ ngɛ Yesu kɛ Mawu Ope ɔ a kpɛti ɔ he ɔ, o ma nyɛ maa hyɛ nɔ́ nɛ Baiblo ngmalɔ kpa de konɛ o na níhi a nya saminya. Kaa nɔ hyɛmi nɔ́ ɔ, mo susu nɔ́ nɛ Mateo ngma nɛ ɔ he nɛ o hyɛ. Benɛ Mateo ngɛ munyu tue kɛ kɔ je nɛ ɔ nyagbe ɔ he ɔ, e tsɛ Yesu munyu ɔmɛ a se nɛ e de ke: “Se jamɛ a ligbi ɔ, kɛ jamɛ a ngmlɛfia a, nɔ ko nɔ ko li. Hiɔwe bɔfo ɔmɛ li ɔ, Bi ɔ tete li; Tsɛ ɔ nɔ kake too lɛ le.” (Mateo 24:36) Mɛni blɔ nɔ munyu nɛ ɔmɛ maa nɔ mi kaa pi Yesu ji Mawu Ope ɔ?
Yesu tsɔɔ kaa Tsɛ ɔ le níhi fuu pe Bi ɔ. Nɛ kaa Yesu ji Mawu Ope ɔ fã a, jinɛ e ko le anɔkualehi tsuo nɛ e Tsɛ ɔ le ɔ. Enɛ ɔ he je ɔ, Bi ɔ kɛ Tsɛ ɔ be nyɛe maa sɔ. Se kɛ̃ ɔ, nɔ ko ma de ke: ‘Yesu ngɛ wami si himi enyɔ. Ngɛ hiɛ ɔ, e ngɛ munyu tue kaa nɔmlɔ adesa.’ Se ke jã po ɔ, mumi klɔuklɔu ɔ hu nɛɛ? Ke e ji Mawu ɔ fã kaa bɔ nɛ Tsɛ ɔ ji ɔ, mɛni he je Yesu de we ke mumi klɔuklɔu ɔ le nɔ́ nɛ Tsɛ ɔ le ɔ?
Ke o tsa nɔ nɛ o kase Baiblo ɔ, o ma ba le sane nɛ ɔ he ngmamihi fuu. Ngmami nɛ ɔmɛ maa anɔkuale nɛ kɔɔ Tsɛ ɔ, Bi ɔ, kɛ mumi klɔuklɔu ɔ he ɔ nɔ mi.
^ kk. 2 Ke o ngɛ nya tsɔɔmi fuu hlae ngɛ Yohane 1:1 ɔ he ɔ, hyɛ Munyu nɛ ji, “Was the Word ‘God’ or ‘a god’?”nɛ ngɛ November 1, 2008, Blɛfo gbi Hwɔɔmi Mɔ ɔ nɛ Yehowa Odasefohi pee ɔ mi.
