1. Kaa bɔnɛ Mawu Munyu ɔ tsɔɔ ɔ, mɛni ji jami slɔɔtohi enyɔ pɛ nɛ́ ngɛ?

YESU de ke: “Nyɛɛ sɛ agbo tokofii ɔ mi, ejakaa agbo nɛ kɛ nɔ yaa hɛ mi kpatami mi ɔ mi bli. Blɔ nɛ yaa lejɛ ɔ hu ngɛ gbajaa, nɛ nihi babauu nyɛɛɔ nɔ kɛ sɛɛ mi. Se agbo nɛ kɛ nɔ yaa wami mi ɔ ngɛ tokofii; blɔ ɔ hu hí, nɛ nihi bɔɔ pɛ lɛ naa blɔ ɔ.” (Mateo 7:13, 14) Mawu Munyu ɔ tsɔɔ kaa, jami slɔɔtohi enyɔ pɛ lɛ ngɛ; anɔkuale kake kɛ lakpa kake; kake da, kake dɛ; kake kɛ nɔ yaa wami mi, nɛ kake hu kɛ nɔ yaa hɛ mi kpatami mi.

2. Mɛni blɔ nɔ nɛ Ngmami ɔ tsɔɔ ngɛ kaa pi jamihi tsuo nɛ sa Mawu hɛ mi?

² Ni komɛ susuu kaa jamihi tsuo sa Mawu hɛ mi. Baiblo mi ngmamihi komɛ nɛ ngɛ sisi ɔ tsɔɔ kaa susumi nɛ ɔ pi anɔkuale:

• ‘Israel ma a pee yayami kɛ si Yehowa ekohu. A ya sɔmɔ Baalhi, Ashtarot, kɛ Siria, Sidom, Moab, Amon kɛ Filisti bi ɔmɛ a mawu ɔmɛ. Se Yehowa nitsɛ lɛɛ a kua lɛ, nɛ a kpa lɛ sɔmɔmi. Enɛ ɔ heje ɔ Yehowa mi mi fu Israel.’ (Kojoli 10:6, 7) Ke wa ngɛ amagahi loo mawu kpahi komɛ jae pe anɔkuale Mawu ɔ, Yehowa be wa nɔ kplɛɛe.

• “Ma nɛ ɔ, a nya kɛkɛ a kɛ puaa imi Mawu ɔ, se a tsui lɛɛ e ngɛ se lokoo. Yaka gu a ke a ngɛ mi jae; nimli adesahi a mlaahi mohu a tsɔɔ!” (Marko 7:6, 7) Ke nihi nɛ a deɔ ke a ngɛ Mawu jae tsɔɔ mɛ nitsɛmɛ a susumihi ngɛ nɔ́ nɛ Baiblo ɔ tsɔɔ ɔ nane mi ɔ, lɛɛ a jami ɔ ji yaka tsuaa. Mawu kplɛɛ we nɔ.

• “Mawu ɔ, Mumi ji lɛ, nɛ nihi nɛ jaa lɛ ɔ, ja a já lɛ ngɛ mumi kɛ anɔkuale mi.” (Yohane 4:24) E sa kaa wa jami ɔ kɛ Mawu Munyu ɔ mi anɔkuale ɔ nɛ kpa gbi.

3. Mɛni ji blɔ kake nɛ wa ma nyɛ maa gu nɔ kɛ na anɔkuale jami kɛ lakpa jami kpɛ gbami?

³ Kɛ wa maa pee kɛ le keji kaa jami ko sa Mawu hɛ mi aloo e sɛ e hɛ mi kɛɛ? Yesu de ke: “Tso tsuaa tso nɛ ji tso kpakpa a woɔ yiblii kpakpahi; se tso yaya woɔ yiblii yayahi. . . . Lɔɔ he ɔ a yiblii ɔmɛ nyɛɛ kɛ maa le mɛ.” Enɛ ɔ tsɔɔ kaa ke jami ko je Mawu ngɔ ɔ, e maa wo yiblii kpakpa; se ke e je Satan ngɔ ɔ, lɛɛ yiblii yayahi e maa wo.—Mateo 7:15-20, Somi He Ɔ.

4. Mɛni su nihi nɛ jaa Yehowa jeɔ kpo?

⁴ Yiblii nɛ anɔkuale jami woɔ ji nihi nɛ suɔmi ngɛ a kpɛti, nɛ a jeɔ suɔmi kpo kɛ haa ni kpahi hu. Nɔ́ heje ji kaa Yehowa ji Mawu nɛ ngɛ suɔmi. Yesu de ke: “Ke nyɛ suɔ nyɛ sibi ɔ, kɛkɛ nɔ tsuaa nɔ maa le kaa ye kaseli ji nyɛ.” Mɛni blɔ nɔ jamihi guu kɛ suu anɔkuale jami he tɛ nɛ a po fɔ si nɛ ɔ he?—Yohane 13:35; Luka 10:27; 1 Yohane 4:8.

5. Kɛ womi ngua ko nɛ a tsɛɛ lɛ Encyclopædia a kale Afrika nyɔguɛ jua yemi ɔ ha kɛɛ?

⁵ Mo susu Afrika nyɔguɛ jua yemi ɔ he nɛ o hyɛ. Womi ngua ko nɛ ji The New Encyclopædia Britannica de ke: “Ngɛ jeha 650 kɛ 1905 kpɛ mi ɔ, a nuu Afrikabi maa pee 18,000,000 kɛ gu Sahara nga a nɔ kɛ India wo ɔ nɔ kɛ ho Klamɔhi a nyɔguɛ juami he ya. Europabi bɔni [nyɔguɛ] jua yemi kɛ je jeha lafa 15 kpɛti mi kɛ nyɛɛ Afrika Bonyoku wo ɔ nya, nɛ benɛ e suu 1867, a nuu Afrikabi nɛ a yibɔ su kɛ je 7,000,000 kɛ ya si 10,000,000 kɛ wo mele mi kaa nyɔguɛhi kɛ ho [Amerika Omleyi kɛ Leneyi] ya.”

6. Mɛni blɔ nɔ nɛ jami ngɔ e he kɛ wo nyɔguɛ jua yemi mi ngɛ?

⁶ Mɛni si dami lɛ jami ngɔ benɛ Afrika  tsuo pee hliihlii, nɛ a nuu nyumuhi, yihi, kɛ jokuɛwi pani nya kɛ je a wehi a mi, kɛ a wekuli a he, nɛ a fi mɛ kɔsɔkɔsɔhi, nɛ a ngɔ dade kala kɛ to a he sohi, nɛ a jua mɛ kaa a juaa nahi ɔ? Bethwell Ogot ngma ngɛ womi nɛ ji Daily Nation nɛ ngɛ Nairobi ngɛ́ Kenya a mi ke: “Kristofoli kɛ Klamɔhi tsuo heɔ adesahi kulaa a kake peemi tsɔɔmi ɔ yeɔ, se kɛ̃ ɔ, mɛ ji nihi nɛ a je nyɔguɛ ngɔmi kɛ juɛmi yaya nɛ a naa ngɛ ni kpahi a he ɔ sisi. . . . E sa nɛ waa kplɛɛ nɔ kaa Klamɔhi, Kristofoli, kɛ Bonyoku kɛ Beleku kpɛti bi tsuo ye fɔ ngɛ piimi babauu nɛ a kɛ ba Afrikabi a nɔ jeha lafahi abɔ, ngɛ jemiba su kpakpa nɛ́ a ma hɛ kɛ fɔ nɔ ɔ heje.”

7. Mɛni jami hɛ mi nyɛɛli tsu ngɛ ta hwumi he?

⁷ Lakpa jami je yiblii sasɛhi nɛ e wo ɔmɛ kpo ngɛ blɔ kpahi a nɔ. Kaa nɔhyɛ nɔ́ ɔ, Baiblo ɔ de kaa, “suɔ o nyɛmi nɔmlɔ kaa bɔnɛ o suɔ mo nitsɛ o he,” se kɛ̃ ɔ, jami hɛ mi nyɛɛli ngɛ je ɔ mi tsuo kɛ kã wo ta hwumi mi he wami, nɛ a fi se hulɔ.—Mateo 22:39.

8. (a) Kɛ jami hɛ mi nyɛɛli plɛ kɛ wo nɔmlɔ gbemi mi he wami ngɛ Afrika tahi a mi ha kɛɛ? (b) Mɛni osɔfo ko de ngɛ jami hɛ mi nyɛɛli a he benɛ ta te si ngɛ wɛtsohi a kpɛti ngɛ Nigeria a?

⁸ Nihi le saminya kaa ngɛ 1994 mi ɔ, jami ko mi osɔfohi, kɛ yihi nɛ ngɔ a he kɛ ha jami ɔ ekomɛ piɛɛ he nɛ a kpata nimli babauu a hɛ mi ngɛ Rwanda. Jami kɛ e he wo Afrika pɛ kpahi a mi wawɛɛ. Nɔhyɛ nɔ́ ko ji kaa, benɛ wɛtsohi a kpɛti ta nɛ a kɛ pue muɔ si wawɛɛ ɔ te si ngɛ Nigeria a, jamihi nɛ ngɛ wɛtso enyɔ ɔmɛ a blɔ fa mi ɔ tsuo wo ni ɔmɛ he wami konɛ a nɔ kunɔ wawɛɛ. Benɛ ta a ngɛ nɔ yae ɔ, osɔfo ko de kaa sɔlemi hɛ mi nyɛɛli ɔmɛ “ngmɛɛ nítsumi  nɛ Mawu ngɔ wo a dɛ ɔ he.” E kɛ piɛɛ he hu ke: “Wɔ nɛ wa tsɛɛ wa he Mawu sɔmɔli ɔ, wa ba plɛ Satan sɔmɔli.”

9. Mɛni Baiblo ɔ de ngɛ Satan sɔmɔli ɔmɛ a he?

⁹ Enɛ ɔ nɔuu he munyu nɛ Baiblo ɔ tu ke: “Satan nitsɛ nyɛɔ tsakeɔ e he peeɔ bɔfo nɛ ngɛ kpɛe kaa la! Lɔɔ he ɔ, ke Satan tsɔli tsake a he pee kaa Mawu nɛ peeɔ kpakpa a tsɔli ɔ, nɔ́ nɛ ɔ be nyakpɛ kulaa.” (2 Korintobi 11:14, 15) Kaa bɔnɛ nimli yayamihi fuu peeɔ a he kaa nimli kpakpahi ɔ, jã nɔuu nɛ Satan hu guu e sɔmɔli nɛ jeɔ a he kpo kaa dali, se a tsuɔ ní yayamihi, nɛ a woɔ yiblii sasɛhi a nɔ kɛ sisiɔ nihi.

10. Mɛni blɔ nɔ jami hɛ mi nyɛɛli kua Mawu ngɛ?

¹⁰ Ngɛ je ɔ mi tsuo ɔ, jami hɛ mi nyɛɛli fiɛɛɔ suɔmi, tue mi jɔmi, kɛ kpakpa peemi, se kɛ̃ ɔ, níhi nɛ a kɛ a he woɔ mi ji, ta hwumi, ninyɛ, kɛ ní peepeehi nɛ Mawu gbeye yemi be mi. Baiblo ɔ tu a he munyu ngɛ blɔ nɛ́ da nɔ. E de ke: “A deɔ ke a le Mawu, se a kɛ a ní tsumihi kuaa lɛ.”—Tito 1:16, Somi He Ɔ.

11. Kɛ Baiblo ɔ tu lakpa jami he munyu ha kɛɛ?

¹¹ Ke wa kane Baiblo mi womi nɛ ji Kpojemi ɔ, wa maa na Yehowa juɛmi ngɛ lakpa jami he. A tu lakpa jami he munyu kaa okadi peemi mi yo ko, nɛ ji “Babilon Kpetekpleenyɛ.” (Kpojemi 17:5) Mo kadi bɔnɛ Mawu tu e he munyu ha:

• ‘Ajuama kpanaku ɔ nɛ́ zugba a nɔ Matsɛmɛ ɔmɛ kɛ lɛ bɔ ajuama a.’ (Kpojemi 17:1, 2) Benɛ e sa kaa lakpa jami nɛ ye Mawu anɔkuale ɔ, e kɛ e he wo ma kudɔmi sanehi a mi, nɛ behi fuu po ɔ, e deɔ nɔyeli nɔ́ nɛ sa kaa a pee.

• ‘Babilon mi a na gbali kɛ klɔuklɔubi kɛ nihi tsuo nɛ a gbe ngɛ zugba a nɔ ɔ a muɔ ngɛ.’ (Kpojemi 18:24, Somi He Ɔ) Lakpa jami wa Mawu jali anɔkuafohi yi mi nɛ a gbe mɛ, nɛ a ye nihi ayɔhi abɔ nɛ a gbo ngɛ tahi a mi ɔ a muɔ he fɔ.

• “E pee ní nguahi, nɛ e fiɛ e yi nɔ.” (Kpojemi 18:7) Lakpa jami ngɛ ní nguanguahi nɛ́ e hɛ mi nyɛɛli ɔmɛ kɛ fiɛɔ a yi nɔ.

• ‘E ngɔ e kunya yemi ɔ kɛ sisi jema amɛ tsuo.’ (Kpojemi 18:23) Lakpa jami gu lakpa tsɔɔmi kaa klaa gbo we ɔ nɔ, nɛ e kɛ bli blɔ ha mumihi a tsɛmi slɔɔtohi kɛ nyuami, nɛ e wo gbogboehi a gbeye yemi kɛ nimeli nɛ gbo a jami mi he wami.

12. Mɛni kɔkɔ bɔmi nɛ Baiblo ɔ kɛ ha ngɛ lakpa jami he?

¹² Baiblo ɔ ngɔ kɔkɔ bɔmi nɛ mi wa kɛ ngɛ nihi hae konɛ a tsɔ a he kɛ je lakpa jami he ke: “Nyɛɛ je e mi, ye ma, konɛ nyɛɛ kɛ lɛ ko pee kake ngɛ e he yayami ɔmɛ a mi, nɛ nyɛ ko ná e haomi ɔ eko.”—Kpojemi 18:4, 5, Somi He Ɔ.

13. Mɛni maa ba lakpa jami kɛ nihi nɛ ngɛ e mi ɔ nɔ?

¹³ A ma kpata Babilon Kpetekpleenyɛ, nɛ ji je ɔ lakpa jami kuu ɔ hɛ mi pɛsɛpɛsɛ, ngɛ hwɔɔ se be nɛ su si ta a mi. Baiblo ɔ deɔ ke: ‘Ligbi kake nɔ e haomi ɔmɛ maa ba, gbenɔ kɛ aywilɛho kɛ hwɔ, nɛ a kɛ la maa sã lɛ, ejakaa Yehowa Mawu ɔ nɛ́ kojo lɛ ɔ he wa.’ (Kpojemi 18:8, Somi He Ɔ) Bɔnɛ pee nɛ wa ko ná lakpa jami haomi ɔmɛ eko ɔ, e sa kaa waa kɛ lɛ nɛ po tako mi, nɛ wa ko ná blɔ fa mi nɔ́ ko kulaa ngɛ e ní peepeehi, e gbijlɔ yemihi, kɛ e hemi kɛ yemihi nɛ sɛ Mawu hɛ mi ɔ mi. Sane nɛ ɔ biɔ esɔ yemi nitsɛ. Wa wami ngɛ oslaa mi!—2 Korintobi 6:14-18.