1, 2. Mɛni ji nihi fuu a hemi kɛ yemi ngɛ nihi nɛ gbo ɔmɛ a he?

NIMLI akpeakpehi abɔ ngɛ Afrika heɔ yeɔ kaa gbenɔ pi wami nyagbe, mohu e ji blɔ ko kɛkɛ nɛ a guu nɔ kɛ yaa je kpa mi. Nihi fuu a susumi ji kaa, a blema nimeli nɛ gbo ɔmɛ si adesahi a je nɛ a naa nɔ ngɛ mi ɔ mi kɛ ho mumihi a je nɛ a nɛ́ nɔ ngɛ mi ɔ mi ya.

² A he ye kaa, blema nimeli a mumihi haa a wekuli nɛ ngɛ zugba a nɔ ɔ hii si ngɛ kplɔkɔtɔ mi. Ngɛ susumi nɛ ɔ nya a, nimeli a mumihi ji huɛmɛ nɛ́ ngɛ he wami, nɛ nyɛ haa zugba baa ní, a haa si himi peeɔ kpakpa, nɛ a buu a wekuli a he kɛ jee yobu he. Ke a kua mɛ, aloo a tɔ a nɔ ɔ, a ngɔɔ haomihi kaa hiɔ, ohia, kɛ amanehlu kɛ baa.

3. Mɛni blɔ nɔ nɛ nihi guu kɛ jaa blema nimeli nɛ gbo ɔ?

³ Nihi nɛ hɛ ngɛ ɔ peeɔ kusumihi konɛ a kɛ je bu kpo kɛ ha a nimeli nɛ gbo ɔmɛ, bɔnɛ pee nɛ wekukpa kpakpa nɛ hi a kpɛti. Ní peepee nɛ ɔmɛ jeɔ kpo ngɛ ya peemi kɛ nɔ pumi kusumihi a mi, kaa nyɔ fɔmi, kɛ ya si tlemi. Jami nɛ a kɛ haa blema nimeli jee kpo ngɛ blɔ kpahi fuu a nɔ. Nɔhyɛ nɔ́ ko ji, ke nihi maa nu dã a, a plɛɔ eko kɛ pueɔ zugba kɛ haa a nimeli. Nɛ ke a hoo ní hu ɔ, a siɔ eko ngɛ kutu ɔ mi konɛ ke nimeli ɔmɛ ba slaa we ɔ, a ná eko nɛ a ye.

4. Mɛni ji nihi fuu a hemi kɛ yemi ngɛ klaa he?

⁴ Ni komɛ hu heɔ yeɔ kaa adesa ngɛ klaa ko nɛ yaa nɔ hii si ngɛ e gbenɔ se. A deɔ kaa, ke nɔ ko ba e je mi saminya a, e klaa yaa hiɔwe, loo paradeiso, se nɔ nɛ́ bɛ e jemi nɛ hi ɔ, lɛɛ e yaa he nɛ ni komɛ tsɛɔ ke Abosiami la mi. Behi fuu ɔ, nihi ngɔɔ kusumi hemi kɛ yemihi kɛ futuɔ susumi nɛ ɔ. Kaa nɔhyɛ nɔ́ ɔ, be komɛ ke a ngɛ sɔlemibi a ya peemi he adafi fiae ɔ, a deɔ ke, “e ho je kpa mi ya” aloo “e ho nimeli a ngɔ ya.” Hemi kɛ yemi nɛ ɔ daa si ngɛ susumi kaa klaa hii si ngɛ nɔmlɔtso ɔ gbenɔ se ɔ nɔ. Mɛni Baiblo ɔ deɔ ngɛ enɛ ɔ he?

5, 6. Ngɛ Baiblo ɔ tsɔɔmi nya a, mɛni ji klaa?

⁵ Baiblo ɔ tsɔɔ kaa klaa pi nɔ́ ko nɛ ngɛ nɔmlɔ mi; klaa ji nɔ ɔ nitsɛ. Nɔhyɛ nɔ́ ji kaa, benɛ Mawu bɔ Adam ɔ, e ba “plɛ klaa nɛ ngɛ wami.” (1 Mose 2:7, NW) A ha we Adam klaa; e ji klaa, nɔmlɔ mluku.

⁶ Enɛ ɔ heje ɔ, wa kaneɔ kaa a fɔɔ klaahi. (1 Mose 46:18, Ga Baiblo) A ma nyɛ maa ye ní aloo a hiɔ ngma. (3 Mose 7: 20; La 35:13, Ga Baiblo) Klaahi foɔ ya nɛ a hɛliɔ hu. (Yeremia 13:17; Yona 2:7, Ga Baiblo) A ma nyɛ maa ju klaa, á nyɛɛ e se, aloo á wo lɛ  dade pã mi. (5 Mose 24:7, NW; La 7:5; 105:18, Ga Baiblo) Baiblo sisi tsɔɔmihi komɛ tsɔɔ munyungu nɛ ngɛ kekle gbi nɛ a kɛ ngma Baiblo ɔ sisi ngɛ ngmami nɛ ɔmɛ a mi ke “klaa,” nɛ ekomɛ hu ngɔ “nɔmlɔ,” aloo “bɔ nɔ́” kɛ “nɔ” kɛ tsu ní. Tsuo tsɔɔ nɔ́ kake ɔ nɔuu.

7. Mɛni ji Baiblo mi ngmamihi komɛ nɛ tsɔɔ kaa klaa ma nyɛ ma gbo?

⁷ Akɛnɛ klaa ji nɔ ɔ nitsɛ heje ɔ, ke nɔ ɔ gbo pɛ klaa nɛ gbo. Ezekiel 18:4 (Ga Baiblo) de ke: “Klaa nɛ peeɔ yayami ɔ, lɛ nɔuu e ma gbo!” Bɔfo 3:23 (NW) hu de ke: “Klaa fɛɛ klaa nɛ be jamɛ a gbalɔ ɔ tue bue ɔ, a ma kpata e hɛ mi pɛsɛpɛsɛ kɛ je e mabi ɔmɛ a kpɛti.” Lɔɔ he ɔ, klaa pi nɔ́ ko nɛ yaa nɔ hii si ngɛ gbenɔ se.

8. Mɛni ji mumi ɔ nɛ ngɛ adesahi a mi ɔ?

⁸ Pi mumi ɔ nɔuu ji klaa a. Mumi ɔ ji wami he wami nɛ haa adesa nyɛ tsuɔ si himi ɔ mi nítsumihi slɔɔtohi. Mumi ɔ ngɛ kaa oslabai he wami. Oslabai he wami nyɛɔ haa fan aloo fridge tsuɔ ní, se e be nyɛe ma tsitsɛɛ kɔɔhiɔ aloo e ha níhi a mi nɛ jɔ ngɛ e dɛ he. Jã kɛ̃, wɔ hu wa mumi ɔ haa nɛ wa hyɛɔ nɔ́, wa nuɔ nɔ́ nɛ wa susuɔ wa yi mi. Se ke hɛngmɛ, tue, aloo kalegbɔ be ɔ, mumi ɔ be nyɛe ma tsu ní nɛ ɔmɛ. Enɛ ɔ he nɛ Baiblo ɔ de ngɛ adesa he ke: “Ke e mumi je e mi ɔ, e kpaleɔ kɛ yaa zu ɔ mi ekohu; jamɛ a ligbi ɔ nɔuu e yi mi tomi ɔmɛ laa.”—La 146:4, Ga Baiblo.

9. Mɛni klaa kɛ mumi ɔ pee we?

⁹ Lɔɔ he ɔ, ngɛ Baiblo ɔ tsɔɔmi nya a, ke nɔ gbo ɔ, klaa a aloo mumi ɔ jí nɔmlɔtso ɔ mi kɛ́ ya hi si ngɛ mumihi a je.

10. Mɛni Baiblo ɔ de ngɛ gbogboe ɔmɛ a si fɔfɔɛ he?

¹⁰ Lɛɛ mɛni ji gbogboe ɔmɛ a si fɔfɔɛ mɔ? Akɛnɛ Yehowa lɛ bɔ adesa heje ɔ, e le nɔ́ hu nɛ baa wa nɔ ke wa gbo. E munyu ɔ tsɔɔ wɔ kaa wami be gbogboe ɔmɛ a mi, a nui nɔ́, a hyɛ we nɔ́, a tui munyu, nɛ a susuu we nɔ́ ko he. Baiblo ɔ de ke:

• “Ni gbogboe ɔmɛ lɛɛ a li nɔ́ ko nɔ́ ko.”—Fiɛlɔ 9:5.

• “A gbo kɛ a suɔmi, ninyɛ kɛ hɛkɔ ɔ tsuo.”—Fiɛlɔ 9:6.

• “Gbeje, he nɛ o maa ya hwɔɔ se ɔ, ní tsumi, loo yi mi susumi, loo nile, loo ga be lejɛ ɔ.”—Fiɛlɔ 9:10.

11. Mɛni Yehowa de Adam, benɛ e pee yayami ɔ?

¹¹ Mo susu nɔ́ nɛ Baiblo ɔ de kɛ kɔ wa kekle nɛnɛ Adam he nɛ o hyɛ. Yehowa ngɔ “zugba zu” kɛ puɛ Adam. (1 Mose 2:7) Kaa Adam bu Yehowa tue jinɛ e ko hi si ngɛ bua jɔmi mi ngɛ zugba a nɔ kɛ ya neneene. Se, Adam gbo Yehowa mlaa a nɔ tue, nɛ tue gblami nɛ e ná ji gbenɔ. Benɛ Adam gbo ɔ jije e ho? Mawu de lɛ ke: “O maa . . . [kpale kɛ ya] zu ɔ nɛ i tĩ kɛ puɛ mo ɔ mi. Zu ji mo, nɛ o maa kpale kɛ ya zu mi ekohu.”—1 Mose 3:19.

12. Mɛni ba Adam nɔ ngɛ e gbenɔ mi?

¹² Jije Adam ngɛ loko Yehowa ngɔ zu kɛ bɔ lɛ ɔ? E be he ko he ko. E be si himi mi. Lɔɔ he benɛ Yehowa de Adam ke e “maa kpale kɛ ya zu mi” ɔ, nɔ́ nɛ E ngɛ tsɔe ji kaa Adam ma plɛ nɔ́ nɛ wami be mi ekohu, kaa zu ɔ. Adam yɛ nɔ nɛ e hi si ngɛ mumihi a je. E ‘yɛ je kpa mi’ ngɛ nimeli a mumi si himi he. E yɛ hiɔwe aloo he nɛ ni komɛ tsɛɔ ke Abosiami la mi ɔ. E kpale kɛ ho si fɔfɔɛ nɛ wami be mi mi ya; e si himi se po.

13. Mɛni baa nimli kɛ lohwehi tsuo a nɔ ngɛ gbenɔ mi?

¹³ Anɛ nɔ́ kake nɛ ɔ nɔuu nɛ baa adesahi tsuo a nɔ lo? Ee, jã nɛ e ji. Baiblo ɔ tsɔɔ nya kaa: “[Nimli kɛ lohwehi] tsuo he kake ɔ lɛ a yaa; mɛ tsuo zu mi lɛ a je, nɛ zu mi lɛ mɛ tsuo a maa kpale kɛ ya.”—Fiɛlɔ 3:19, 20.

14. Mɛni hɛ nɔ kami lɛ ngɛ kɛ ha nihi nɛ gbo ɔ?

¹⁴ Baiblo ɔ wo si kaa, Mawu maa tsiɛ gbogboehi kɛ ba wami mi ngɛ zugba nɛ  a pee lɛ paradeiso nɔ. (Yohane 5:28, 29; Bɔfo 24:15) Se, hwɔɔ se loko kikɛmɛ a siwo nɛ ɔ maa ba mi. Amlɔ nɛ ɔ lɛɛ, a ya hwɔ ngɛ gbenɔ mi. (Yohane 11:11-14) Akɛnɛ a be nyɛe maa ye bua wɔ, aloo a ye wɔ awi heje ɔ, e sɛ kaa waa ye mɛ gbeye aloo wa ja mɛ.

15, 16. Mɛni blɔhi a nɔ nɛ Satan bɔɔ mɔde kaa e maa gu konɛ nihi nɛ he ye kaa gbogboe ɔmɛ gbo we nitsɛ?

¹⁵ Susumi kaa ke nɔ ko gbo ɔ, e gbo we nitsɛ ɔ ji lakpa nɛ́ Satan Abosiami ngɛ gbɛe kɛ ngɛ fiae. Bɔnɛ pee nɛ nihi nɛ he susumi nɛ ɔ ye heje ɔ, Satan kɛ e daimonio ɔmɛ bɔɔ mɔde konɛ a ha nihi nɛ́ ná juɛmi kaa gbogboehi a mumihi lɛ ngɔɔ hiɔ kɛ haomi kpahi nɛ a kɛ kpeɔ ɔ kɛ baa. E ji anɔkuale kaa haomihi komɛ ngɛ nɛ daimonio ɔmɛ lɛ a ngɔɔ kɛ baa. Nɛ e ji anɔkuale hu kaa haomihi komɛ ngɛ nɛ mumi yayami ko hɔɛ si ngɛ se. Nɛ e pi anɔkuale kaa nihi nɛ́ ya hwɔ ngɛ gbenɔ mi ma nyɛ maa ye wɔ awi ko.

¹⁶ Blɔ kpa ko ngɛ nɛ daimonio ɔmɛ bɔɔ mɔde kaa a maa gu nɔ konɛ a ha nihi nɛ bu nɔ́ nɛ Baiblo ɔ de ngɛ gbenɔ he ɔ kaa e dɛ. A sisiɔ nihi nɛ a susuu kaa a naa nihi nɛ́ gbo ɔmɛ aloo a kɛ mɛ tuɔ munyu. Daimonio ɔmɛ peeɔ enɛ ɔ kɛ guu ninahi, nlamihi, klali, kɛ blɔ kpahi a nɔ. Kɛ̃ ɔ, pi nihi nɛ gbo ɔmɛ nɛ a naa, aloo a kɛ mɛ tuɔ munyu se mohu daimoniohi nɛ a bua pee a he kaa nihi nɛ gbo ɔmɛ. Enɛ ɔ heje nɛ Yehowa buu klali kɛ nihi nɛ biɔ gbogboehi ní fɔ ɔ nɛ.—5 Mose 18:10-12; Zakaria 10:2.