1. Kɛ a ngɔ kusumi jami kɛ to yoku he ha kɛɛ?

A NGƆ Afrika kusumi jami hemi kɛ yemihi kɛ to nɔ́ ko kaa yoku he. Nɔ nɛ ngɛ yoku ɔ yi mi ji Mawu, nɛ ji nɔ nɛ hɛɛ mumi mi he wami pe kulaa. Nihi nɛ ngɛ yoku ɔ kasa nya amɛ ji mawu wawi, aloo mumihi, nɛ a ji Mawu tsɔli. Nɛ nihi nɛ́ piɛɛ a he ji blema nimeli nɛ́ kaiɔ a wekuli ngɛ zugba a nɔ, nɛ a yeɔ kɛ buaa mɛ. Yoku ɔ sisi ɔ lɛɛ mumi mi he wami tsɔwi kaa: kunya, klami, kɛ aze kpɛmi (hiami) lɛ ngɛ lejɛ ɔ.

2. Mɛni blɔ nɔ nɛ Afrika munyu ko nɛ a deɔ tsɔɔ kaa kusumi hemi kɛ yemihi ná jami nɔ he wami?

² Kusumihi nɛ ɔmɛ ná jami kpahi nɛ ngɛ Afrika a nɔ he wami wawɛɛ nitsɛ. Afrika munyu ko nɛ́ a deɔ ji: “Hemi kɛ yemi ɔ (Kristo aloo Klamɔ) se nyɛɛmi tsi we wa nya ngɛ wa jemɛawɔ ɔmɛ a jami he.”

3. Jije wa ma nyɛ maa kase anɔkuale nɛ kɔɔ nihi nɛ ngɛ mumihi a je ɔ he ngɛ?

³ Anɛ Afrika kusumi hemi kɛ yemi ɔmɛ da lo? Baiblo ɔ deɔ wɔ anɔkuale nɛ kɔɔ nihi nɛ ngɛ mumihi a je ɔ he.

4. Mɛni nɛ jamihi pɔtɛɛ ngɛ Afrika a kpaa gbi ngɛ he?

⁴ Afrika jami kuuhi pɔtɛɛ etɛ ɔmɛ kplɛɛɔ nɔ kaa Mawu ngɛ, nɛ lɛ ji Ope. Baiblo ɔ kale lɛ kaa “mawu ɔmɛ a Mawu kɛ nyɔmtsɛmɛ a Nyɔmtsɛ, Mawu nɛ kle, nɛ he wa nɛ he ngɛ gbeye.” (5 Mose 10:17, Ga Baiblo) Klamɔhi hu heɔ Mawu Ope kake nɔ yeɔ. Tsɔɔlɔ kpanaa ko nɛ a tsɛɛ lɛ Geoffrey Parrinder ngma kɛ kɔ Africa kusumi jami he ke: “Afrikabi babauu heɔ Mawu Ope ko, nɛ ji mawuhi kɛ adesahi a tsɛ, kɛ je ɔ bɔlɔ nɔ yeɔ.”

5. Mɛni ji biɛhi komɛ nɛ a kɛ tsɛɛ Mawu?

⁵ Hemi kɛ yemi ngɛ Mawu mi gbɛ fia Afrika, se kɛ̃ ɔ, nihi be sisi numi nɛ mi tɛ̃ ngɛ nɔ nɛ Mawu ji ɔ he. Loko o maa le nɔ ko ɔ, ja o le nɔ ɔ biɛ kekle. Jami ɔmɛ a yi mi futu ngɛ Mawu biɛ ɔ he. Sɔlemibi ɔmɛ pɔɔ lɛ tsɛmi ke Mawu, nɛ ji sablai nɛ sisi ji “Hewalɔ.” Klamɔ ɔmɛ tsɛɛ lɛ ke Allah. Nihi nɛ ngɛ kusumi jami mi tsɛɛ Ope ɔ kɛ biɛhi ekpaekpa, ngɛ gbi slɔɔtoslɔɔtohi a mi. John S. Mbiti ngma Afrika biɛhi kɛ sablaihi munomunohi nɛ́ a kɛ tsɛɛ Mawu ɔ, nɛ́ hiɛ pe 500 ngɛ e womi, nɛ ji Concepts of God in Africa a mi. Kaa nɔhyɛ nɔ́ ɔ, Yorubabi ngɛ Nigeria tsɛɛ Mawu Olodumare; Kikuyubi ngɛ Kenya tsɛɛ lɛ Ngai; nɛ Zulubi ngɛ South Africa hu tsɛɛ lɛ Unkulunkulu.

6, 7. Mɛni ji Mawu biɛ, nɛ mɛni blɔ nɔ wa gu kɛ le enɛ ɔ?

 ⁶ Mɛni Mawu nitsɛ de ngɛ e biɛ ɔ he? Benɛ Mawu tsɔ Mose kaa e ya nyɛɛ Israelbi ɔmɛ a hɛ mi kɛ je Mizraim ɔ, Mose bi Mawu ke: “Ke i ya Israelbi ɔmɛ a ngɔ, nɛ i ya de mɛ ke, ‘Mawu ɔ nɛ nyɛ nɛmɛ ja lɛ ɔ tsɔ mi nyɛ ngɔ,’ nɛ a bi mi ke, ‘Kɛ a tsɛɛ lɛ kɛɛ?’ ɔ, kɛ ma de mɛ kɛɛ?”—2 Mose 3:13.

⁷ Mawu ha lɛ heto ke: “Mo de Israelbi ɔmɛ ke: Yehowa, nyɛ nɛmɛ a Mawu ɔ . . . nɛ e tsɔ mi nyɛ ngɔ; enɛ ɔ ji ye biɛ kɛ yaa neneene, nɛ enɛ ɔ ji ye kaimi nɔ́ kɛ yaa yinɔhi tsuo.” (2 Mose 3:15, Ga Baiblo) E ngɛ mi kaa Baiblo sisi tsɔɔli komɛ ngɔ sablaihi kaa “Mawu” aloo “Nyɔmtsɛ” kɛ da Mawu biɛ ɔ nane mi mohu, se kɛ̃ ɔ, biɛ “Yehowa” a je kpo ngɛ Baiblo ɔ mi pe si 7,000.

8. Kɛ Yehowa ngɛ kɛɛ, nɛ mɛni e sa kaa waa pee konɛ wa ná e hɛ mi dloomi?

⁸ Kɛ Yehowa ngɛ kɛɛ? E ji mumi, e ngɛ he wami, kɛ anunyami. E ji Ope, nɛ nɔ ko be nɛ a ma nyɛ kɛ maa to e he; nɔ ko kɛ lɛ sɔɛ. (5 Mose 6:4; Yesaya 44:6) Yehowa de Mose ke: ‘Imi Yehowa o Mawu ɔ ji Mawu nɛ suɔ kaa a ja lɛ nɔ kake too pɛ.’ Nɛ tsɔɔ kaa ja wa já Yehowa nɔ kake too loko wa ma ná e hɛ mi dloomi. E sume kaa wa ja nɔ́ kpa ko aloo nɔ kpa ko.—2 Mose 20:3-5.

9. Mɛni heje wa ma nyɛ ma de kaa Yesu kɛ Yehowa sɔɛ?

⁹ Mwɔnɛ ɔ, nihi fuu a juɛmi futu ngɛ nɔ nɛ Yesu ji ɔ he. Sɔlemibi fuu heɔ yeɔ kaa Yesu ji Triniti “Klɔuklɔu” ko fa. Se Baiblo ɔ tsɔɔ we kaa Mawu ji nihi etɛ nɛ a bla mɛ kake. Nɛ e tsɔɔ we hu kaa Yesu kɛ Yehowa sɔ. Yesu nitsɛ de ke: ‘Tsɛ ɔ kle pe mi.’—Yohane 14:28.

10. Jije Yesu hi loko e ba zugba a nɔ ɔ?

¹⁰ Baiblo ɔ tsɔɔ kaa loko Yesu ba hi zugba a nɔ kaa adesa a, e hi hiɔwe kaa mumi mi bɔ nɔ́ hewalɔ. Yehowa bɔ mumi mi nihi ngɛ hiɔwe, kaa bɔnɛ e bɔ Adam kɛ Hawa ngɔ fɔ zugba a nɔ ɔ. Yesu ji mumi mi nɔ kekle nɛ Yehowa bɔ.—Yohane 17:5; Kolosebi 1:15.

11. Mɛni blɔ nɔ a gu kɛ fɔ Yesu kaa adesa a?

¹¹ Yehowa je mumi mi bɔ nɔ́ nɛ ɔ wami kɛ ba wo yomiyo ko nɛ e biɛ ji Maria, fɔmi kotoku mi, maa pee jeha 2,000 ji nɛ ɔ. Bɔfo Gabriel de lɛ ke: “O ma na mi, nɛ o ma fɔ binyumu, nɛ o maa wo lɛ biɛ ke Yesu. E maa ye matsɛ . . . ; e matsɛ yemi ɔ se be poe gblegbleeble!”—Luka 1:31, 33. *

12. Mɛni yi mi tomi kake heje nɛ Yesu ba zugba a nɔ ngɛ?

¹² Lɔɔ heje ɔ, a fɔ Yesu, e ba wa kɛ su nyumu mi, nɛ e tsɔɔ nihi ní babauu kɛ kɔ Yehowa suɔmi nya ní kɛ e yi mi tomi he. E de Roma amlaalo ko ke: “Imi lɛɛ enɛ ɔ he a fɔ mi, nɛ enɛ ɔ he nɔuu i ba je ɔ mi ngɛ, konɛ ma ba ye anɔkuale ɔ he odase.” (Yohane 18:37, Somi He Ɔ) Níhi nɛ Yesu tsɔɔ ɔ he nɛ wa ma susu maa ye bua wɔ konɛ waa kase anɔkuale nɛ kɔɔ Mawu suɔmi nya ní kɛ e yi mi tomihi a he. Wa ma nyɛ maa kase bɔnɛ wa maa pee ha kɛ ná Mawu nɔ kplɛɛmi.

13. Mɛni ji yi mi tomi enyɔne heje nɛ Yesu ba zugba a nɔ ngɛ?

¹³ Yi mi tomi enyɔne he nɛ Yesu ba je ɔ mi ngɛ ji kaa, konɛ e ngɔ e wami kɛ ha kaa kpɔmi nɔ́ ngɛ adesahi a he.  (Mateo 20:28) E pee enɛ ɔ konɛ waa ye wa he kɛ je yayami nɛ wa ná kɛ je wa nɛnɛ Adam ngɔ ɔ he. Enɛ ɔ ma ha wɔ he blɔ konɛ waa hi si kɛ ya neneene. Bɔfo Yohane ngma ke: “Ejakaa Mawu suɔ je ɔ saminya, nɛ e ngɔ e Bi kake ɔ ngɔ ha, konɛ nɔ tsuaa nɔ nɛ heɔ lɛ yeɔ ɔ, e hɛ mi ko kpata, se mohu e na neneene wami.”—Yohane 3:16.

14. (a) Benɛ Yesu gbo kaa adesa se ɔ, mɛni ba e nɔ? (b) Mɛni ji Yesu blɔ he ngɛ hiɔwe amlɔ nɛ ɔ?

¹⁴ Yesu gbenɔ se ɔ, a tle lɛ si kɛ ho hiɔwe ya, nɛ e ya tsa e si himi nɔ ekohu kaa mumi mi bɔ nɔ́ nɛ ngɛ he wami. (Bɔfo 2:32, 33) Pee se ɔ, Yehowa ngɔ ‘nɔyemi, hɛ mi nyami kɛ matsɛ yemi kɛ wo e dɛ, konɛ jema amɛ, kɛ nihi nɛ tuɔ gbi slɔɔtoslɔɔto ɔmɛ nɛ a sɔmɔ lɛ.’ (Daniel 7:13, 14) A to Yesu Matsɛ hewalɔ; lɛ ji Yehowa hiɔwe nɔyemi ɔ nɔ Matsɛ. E be kɛe nɛ e ma je e he wami kpo ngɛ zugba a nɔ tsuo.

15. Mɛni be a bɔ bɔfo ɔmɛ, nɛ jije a bɔ mɛ ngɛ?

¹⁵ Pi Yehowa kɛ Yesu pɛ nɛ ngɛ mumihi a je ɔ. Yehowa bɔ mumi mi adebɔ ní kpahi hu, nɛ ji bɔfo ɔmɛ. Gabriel, nɔ nɛ e kɛ Maria ba tu munyu ɔ ji a kpɛti nɔ kake. Bɔfo ɔmɛ a wami ji sisi kaa adesahi ngɛ zugba a nɔ. A bɔ mɛ ngɛ hiɔwe hluu loko a bɔ adesahi. (Hiob 38:4-7) Bɔfohi ayɔhi abɔ ngɛ hiɔwe.—Daniel 7:10.

16. Mɛni heje e sɛ kaa adesahi jaa bɔfohi?

¹⁶ Bɔfo anɔkuafohi sume kaa wa ja mɛ. Si enyɔ nɛ́ Yohane ka kaa e ma ja bɔfohi ɔ, a gbɛ wo lɛ ke: “Ko ja mi! . . . Já Mawu mohu!”—Kpojemi 19:10; 22:8, 9.

17. Mɛni tsɔɔ kaa Mawu bɔfohi nyɛɔ nɛ a buu Mawu sɔmɔli a he, nɛ mɛni heje nɛ enɛ ɔ ji bua womi nɔ́ ha wɔ?

¹⁷ Bɔfohi je we a he kpo kɛ tsɔɔ adesahi ngɛ zugba a nɔ hu, kaa bɔnɛ a pee benɛ a ya je Yesu kaseli ɔmɛ kɛ je tsu mi ɔ. (Bɔfo 5:18, 19) Se kɛ̃ ɔ, ke wa ngɛ Yehowa jae ngɛ e Munyu ɔ nɛ ji Baiblo ɔ nya a, wa ma nyɛ ma ná nɔ mi mami kaa Mawu bɔfohi nɛ ngɛ he wami nɛ a nɛ́ mɛ ɔ maa bu wa he. Baiblo ɔ de ke: ‘Yehowa bɔfo ɔ buɔ nihi nɛ yeɔ Yehowa gbeye ɔ a he, nɛ e heɔ a yi wami.’ (La 34:7; 91:11) Mɛni heje e sa kaa enɛ ɔ nɛ́ wo wa bua? Ejakaa henyɛli nɛ a he ngɛ oslaa nɛ́ a ngɛ hlae kaa a ma puɛ wɔ ngɛ mumihi a je ɔ!

18. (a) Mɛni heje bɔfo kake tsɔ atua kɛ si Mawu ɔ? (b) Mɛni ji biɛhi nɛ a kɛ tsɛɛ bɔfo atua tsɔlɔ nɛ ɔ?

¹⁸ Pi Mawu bɔfo ɔmɛ tsuo nɛ hi si ngɛ anɔkuale yemi mi ha Mawu. A ti ni komɛ tsɔ e hɛ mi atua. A pee a he Mawu kɛ nihi nɛ ngɛ zugba a nɔ a henyɛli. Mɛni blɔ nɔ enɛ ɔ gu kɛ ba. Bɔfo ɔmɛ tsuo nɛ́ Mawu  bɔ ɔ hi kɛ pi si nɛ a da. Se, bɔfohi nɛ ye mluku ɔ a kpɛti nɔ kake hla kaa nihi nɛ́ ja lɛ, nɛ e tsu akɔnɔ yaya nɛ ɔ nya ní. Mumi mi adebɔ nɛ ɔ ba ná biɛ Satan, nɛ́ sisi ji, “Nɔ nɛ teɔ si kɛ woɔ Mawu.” A tsɛɛ lɛ hu ke Abosiami, nɛ́ sisi ji, “Nɔ he guɛ gbelɔ,” ejakaa e tu nyangɔ munyuhi kɛ si Yehowa.

19. Mɛni heje Satan pii Hiob, nɛ mɛni blɔ nɔ e gu kɛ pee enɛ ɔ?

¹⁹ Satan nyɛɔ adesahi a nɔ konɛ a ba piɛɛ e he ngɛ atua nɛ e tsɔ kɛ si Mawu ɔ mi. Mo susu nɔ́ nɛ e pee Mawu sɔmɔlɔ anɔkuafo Hiob ɔ he nɛ o hyɛ. Hiob ji niatsɛ kpanaa. E ngɛ jijɔhi 7,000, kɛ afukpɔngɔhi 3,000, kɛ nahi 1,000, kɛ tejihi 500. E ngɛ bimɛ hu nyɔngma kɛ tsɔli babauu. Kekleekle ɔ, Satan gbe Hiob lohwehi kɛ e tsɔli ɔmɛ. Lɔɔ se, e ha “kɔɔhiɔ nɛ nya wa” hule tsu kɛ gbe Hiob bimɛ ɔmɛ tsuo. Jehanɛ se, Satan pii Hiob kɛ gu ‘tslɔ nɛ e ha e fuu e nɔmlɔtso ɔ tsuo’ nɔ.—Hiob 1:3-19; 2:7.

20. (a) Mɛni blɔ nɔ Yehowa gu kɛ wo Hiob hiɔ ngɛ e we anɔkuale yemi ɔ he? (b) E ngɛ mi kaa Hiob ye anɔkuale ha Mawu mohu, se mɛni Satan pee ni kpahi fuu?

²⁰ Hiob ye anɔkuale ha Yehowa ngɛ ka nɛ nya wa nɛ ɔ tsuo mi. Enɛ ɔ ha Yehowa tsa lɛ, nɛ ‘níhi tsuo nɛ Hiob hi sa a, Yehowa bɔ he totoe enyɔ ha lɛ.’ (Hiob 42:10) Satan nyɛ we nɛ e puɛ Hiob anɔkuale yemi ɔ, se e nyɛ nɛ e gbla ni kpahi fuu kɛ je Mawu he. Baiblo ɔ de ke: “Je mluku ɔ tsuo ngɛ nɔ yayami ɔ sisi.”—1 Yohane 5:19, Somi He Ɔ.

21. (a) Mɛni blɔ nɔ Satan tsɔɔ ngɛ kaa e suɔ nɛ a ja lɛ? (b) Mɛni heje nɛ Yesu kua Satan jami ɔ?

²¹ Satan suɔ kaa wa ja lɛ. Enɛ ɔ je kpo heii ngɛ ka nɛ e kɛ ba Yesu nɔ maa pee jeha 2,000 ji nɛ ɔ mi. Baiblo ɔ de ke: “Abosiami ngɔ Yesu kɛ ya yo gagaaga ko nɔ. E tsɔɔ Yesu matsɛ yemihi tsuo nɛ ngɛ je ɔ mi, kɛ bɔnɛ a he mi ngɛ nyami ha, nɛ e de Yesu ke, ‘Ke o kpla si nɛ o jami ɔ, ma ngɔ enɛ ɔmɛ tsuo kɛ ha mo.’” Yesu kua lɛ jami, nɛ e de lɛ ke: “Satan jee hiɛmɛ nɛ ɔ! Ngmami ɔ ke, ‘Ja [Yehowa, NW] o Mawu ɔ, nɛ o sɔmɔ lɛ pɛ!’” (Mateo 4:8-10) Yesu le Yehowa mlaa a fitsofitso, lɔɔ he e pee we nɔ́ nɛ Satan ngɛ hlae ɔ.

22. Mɛni daimonio ɔmɛ pee adesahi?

²² Bɔfo kpahi piɛɛ Satan he kɛ tsɔ Mawu hɛ mi atua. Bɔfo yayamihi nɛ ɔmɛ ji nihi nɛ ngɛ zugba a nɔ henyɛli. A ji yiwutsotsɛmɛ. Ngɛ blema a, a pee nihi amuɛtihi kɛ hɛngmɛ yuyuili. (Mateo 9:32, 33; 12:22) A ha hiɔ nu nihi, nɛ a ha nihi hu pee a ní kaa godotsɛmɛ. (Mateo 17:15, 18; Marko 5:2-5) A hao jokuɛwi tete po.—Luka 9:42.

23. (a) Mɛni ji nɔ́ nɛ mumi yayami ɔmɛ hlaa ngɛ adesahi a dɛ? (b) Satan kɛ e daimonio ɔmɛ sisi nihi kɛ wo mɛni peemi mi?

²³ Mumi yayamihi nɛ ɔmɛ suɔ kaa a ja mɛ, kaa bɔnɛ Satan hu suɔ nɛ a ja lɛ ɔ. Benɛ e sa kaa a kua jami nɛ jee adesahi a ngɔ, akɛnɛ a le kaa Yehowa pɛ ji nɔ nɛ sa jami ɔ, a ha e jlo mɛ, nɛ a hla se blɔ, nɛ a wo e peemi mi he wami mohu. Satan kɛ e daimonio ɔmɛ gu sisimi, nyangɔ, kɛ he gbeye womi nɔ nɛ a ha nihi ja mɛ. E ngɛ faii kaa, pi nihi fuu nɛ le kaa Satan kɛ e daimonio ɔmɛ nɛ a ngɛ jae. Nihi fuu ngɛ nɛ ke a ná le kaa a jami woɔ Satan hɛ mi nyami ɔ, e maa pee mɛ nyakpɛ. Kɛ̃ ɔ, Baiblo ɔ bɔ wɔ kɔkɔ ke: “Bɔ nɛ wɔ jali sãa a, mumi yayamihi a sãa ngɔ haa, se pi Mawu.”—1 Korintobi 10:20.

24. Mɛni ji ga tsɔmi kake ko nɛ Satan gu nɔ kɛ ngɛ nihi sisie?

²⁴ Blɔ kake nɔ nɛ Satan kɛ e daimonio ɔmɛ gu kɛ ngɛ nihi sisie konɛ a ja mɛ ji, gbogboehi a he susumihi nɛ dɛ́ nɛ a ngɛ gbɛe kɛ ngɛ fiae ɔ. Waa hyɛ nɔ́ nɛ Baiblo ɔ tsɔɔ ngɛ enɛ ɔ he ha.