1. Mɛni se wa ma ná ke wa ‘hɛ kɛ su Mawu he’?

YEHOWA suɔ nihi nɛ sɔmɔɔ lɛ. Yehowa maa jɔɔ mo amlɔ nɛ ɔ kɛ hwɔɔ se tsuo, ke o ja lɛ. Baiblo ɔ de ke: ‘Nyɛɛ hɛ kɛ su Mawu he, nɛ e maa hɛ kɛ su nyɛ he.’—Yakobo 4:8.

2. Mɛni blɔ nɔ wa maa gu kɛ hɛ kɛ su Yehowa he, nɛ kɛ enɛ ɔ ma kɔ wa sɔlemi he kɛɛ?

² Bɔnɛ pee nɛ o hɛ kɛ su Mawu he ɔ, e sa nɛ o kase e munyu ɔ konɛ o kɛ tsu ní. Ke o sɔle, nɛ o sɔlemi ɔ kɛ Yehowa suɔmi nya ní kpa gbi ɔ, e maa bu mo tue nɛ e ma ha mo heto. Kristofono bɔfo Yohane ngma ke: ‘Enɛ ɔ ji kã nɛ wa ngɛ ngɛ́ Mawu hɛ mi, kaa ke wa ba nɔ́ ko ngɛ e suɔmi nya a, e buɔ wɔ tue. Nɛ ke wa le kaa nɔ́ tsuaa nɔ́ nɛ wa baa lɛ e buɔ wɔ tue ɔ, blɔɔ wa le kaa níhi nɛ wa baa lɛ ɔ wa nine su nɔ.’—1 Yohane 5:14, 15, Somi He Ɔ.

3-7. Kɛ wa maa pee kɛ ná hiɔwe níle kɛɛ, nɛ mɛni blɔhi a nɔ e maa ye bua wɔ ngɛ?

³ Jehanɛ se, ke o hɛ kɛ su Yehowa he ɔ, e ma ha mo níle konɛ o kɛ tsu si himi ɔ mi níhi a he ní ngɛ manye yemi mi. Baiblo ɔ de ke: “Ke nyɛ ti nɔ ko hia níle ɔ, e ya nɔ nɛ e bi Mawu.”—Yakobo 1:5, NW.

⁴ Mɛni blɔ nɔ nɛ níle nɛ je Mawu ngɔ ma nyɛ maa ye bua mo? Nɔ́ kake ji kaa, e ma nyɛ maa ye bua mo konɛ o le níhi nɛ sɛ́ Mawu hɛ mi. O ma nyɛ maa le nɔ́ heje nɛ ní nɛ ɔmɛ dɛ hulɔ, kɛ nɔ́ nɛ sa kaa o pee konɛ o ko ngɔ o he kɛ wo mi. Níle nɛ ɔ maa po o he piɛ kɛ je nyagbahi fuu nɛ nihi kɛ kpee ɔ he. Kaa nɔhyɛ nɔ́ ɔ, tue bumi nɛ a peeɔ ha Mawu ga womi kaa a hi si ngɛ jemiba nɛ he tsɔ nya a, haa nɛ Mawu webi yeɔ a he kɛ jee hɔ ngɔmi nɛ a sume, bɔmi nami mi hiɔhi, kɛ gba si himi nɛ bua jɔmi be mi aloo gba mi pomi he.

⁵ Mɛni hu níle nɛ je Mawu ngɔ ma nyɛ ma tsu ha mo? E ma nyɛ ma ha nɛ o na si himi ɔ he se ngɛ blɔ nɛ hi pee kulaa nɔ. E ma nyɛ maa ye bua mo konɛ o ngɔ níle kɛ mwɔ o yi mi kpɔ ngɛ sanehi a mi, kaa sika nɔ hyɛmi kikɛ. E ma ha o nyɛ nɛ o di níhi nɛ a he ngɛ se nami se, konɛ o kua níhi nɛ se nami kpakpa be a he ɔmɛ.

⁶ Níle nɛ je Mawu ngɔ ma nyɛ maa ye bua mo ngɛ o kɛ ni kpahi nyɛ si himi mi. O ma nyɛ ma ná weku si himi nɛ ngɛ bua jɔmi. O ma nyɛ maa fia o kɛ ni kpahi nyɛ kpɛti huɛ bɔmi kpakpa nɛ ngɛ daa kɛ ma si, nɛ o ma ná bumi kɛ je nihi nɛ ja we Mawu po a ngɔ.

⁷ Kɛ piɛɛ he hu ɔ, níle nɛ je Mawu ngɔ nɛ o ma ná a, ma dla bɔnɛ o susuɔ si himi ɔ he ha. E maa ye bua mo konɛ o nyɛ si himi ɔ mi nyagbahi kɛ kɔni mi jɔmi níhi a nya nɛ o da. Jehanɛ se, o ma ná susumi kpakpa ngɛ hwɔɔ se si himi he. Susumi kpakpa nɛ ɔ ma ha nɛ o juɛmi kɛ o nɔmlɔtso mi he wami nami maa pee gbugbuugbu.—Abɛ 14:30; Yesaya 48:17.

8. Ke o ngɛ Mawu sɔmɔe ɔ, mɛni gbeye o be yee?

⁸ Ke o ngɛ anɔkuale Mawu ɔ sɔmɔe ɔ, o maa ye o he kɛ je gbeye yemihi nɛ haoɔ nihi nɛ sɔmɔ we lɛ ɔ he. Akɛnɛ o le kaa wami be gbogboehi a mi ngɛ yɔkɔ ɔmɛ a mi heje ɔ, o be nihi nɛ gbo ɔmɛ gbeye yee. Akɛnɛ o ngɛ he kɛ nɔ fɔmi ngɛ́ Mawu si womi kaa e ma tle gbogboehi a si ɔ mi  heje ɔ, o be gbenɔ gbeye yee. Nɛ akɛnɛ o le kaa Mawu ji hewalɔ kpetekpleenyɛ hu heje ɔ, o be aze loo nyuami gbeye yee.—Yohane 8:32.

9-11. Mɛnɔmɛ maa hi Paradeiso ɔ mi, nɛ mɛnɔmɛ be mi hie?

⁹ Ke o hɛ kɛ su Mawu he ɔ, o be hwɔɔ se gbeye yee. Kaa bɔnɛ wa na a, Baiblo ɔ gba haomihi nɛ waa kɛ ngɛ kpee mwɔnɛ ɔ ngɛ zugba a nɔ a kpɛti fuu kɛ fɔ si. Yehowa de wɔ kaa be kpiti pɛ nɛ ní nɛ ɔmɛ maa hi si; e be kɛe nɛ Mawu Matsɛ Yemi ɔ maa pee zugba nɛ ɔ Paradeiso.—Luka 21:10, 11, 31; 23:43.

¹⁰ Nihi nɛ hɛ kɛ su Yehowa he nɛ a ngɛ lɛ sɔmɔe pɛ nɛ maa hi Paradeiso ɔ mi. Baiblo ɔ de ke: ‘E piɛ bɔɔ kɛkɛ nɛ o be yayami peelɔ nae hu; o ma hla lɛ ngɛ e hi he se o be lɛ nae. Se nihi nɛ a he jɔ ɔ, mɛɛ zugba a ma plɛ a nɔ, nɛ a bua maa jɔ a he ngɛ tue mi jɔmi babauu mi.’—La 37:10, 11.

¹¹ Nihi nɛ maa ngɔ kuɛ timi kɛ kua Mawu dami mlaa amɛ a nɔ yemi ɔ, a wami maa je a dɛ kɛ maa ya neneene. (2 Tesalonika 1:8, 9) A be si hie hu. A ma kpata a kɛ Satan kɛ e daimonio ɔmɛ a hɛ mi pɛsɛpɛsɛ. (Kpojemi 20:10, 14) Se nihi nɛ kaseɔ Yehowa he ní nɛ a sɔmɔɔ lɛ ɔ, a ma ná bua jɔmi babauu ngɛ Paradeiso mi ngɛ zugba a nɔ.

12. Mɛni Baiblo ɔ de ngɛ hwɔɔ se be he?

¹² Yehowa dla níhi saminyayoo kɛ fɔ si ha nihi nɛ suɔ lɛ ɔ! Hyɛ nɔ́ nɛ e Munyu ɔ de ngɛ Paradeiso zugba a nɔ si himi ɔ he ha:

• Niye ní maa pɔ he: ‘Zugba a maa ba ní saminya, nɛ a ma ná blɛfo babauu ngɛ yo ɔmɛ tsuo pɛpɛɛpɛ a nɔ.’—La 72:16.

• Hwɔ he kpakpa: “A maa po wehi, nɛ mɛ nitsɛmɛ a maa hi mi.”—Yesaya 65:21.

• Nítsumi nɛ haa nɔ bua jɔmi: “A ma ná mɛ nitsɛmɛ a nine nya ní tsumi mi ní maa ye, . . . A be yaka dengme gboe.”—Yesaya 65:22, 23.

• Hiɔ be hu: “Nihi nɛ ngɛ zugba a nɔ ɔ, a ti nɔ ko nɔ ko be dee hu ke, ‘I be he wami.’”—Yesaya 33:24.

• Kpá jemi be hu: “Hɛ yuyuili maa hyɛ nɔ́ ekohu, nɛ tue kpokutsɛmɛ maa nu nɔ́. Glɔtsɛmɛ maa hlu kaa odabɔ [afugbɛ], nɛ amuɛtihi ma la kɛ bua jɔmi.”—Yesaya 35: 5, 6.

• Nɔ nami, aywilɛho yemi, kɛ gbenɔ be hu: “Mawu ma tsu a hɛ mi vonyu kulaa, nɛ gbenɔ be si hie hu, nɛ kɔmɔ yemi ko kɛ ya fomi ko kɛ nɔ nami ko hu be si hie hu, ejakaa kekle ni ɔmɛ be kɛ ho.”—Kpojemi 21:4, Somi He Ɔ.

• A be ta hwue hu: “[Mawu] haa ta se poɔ ngɛ je ɔ mi tsuo.”—La 46:9.

• Neneene wami: ‘Dali ɔmɛ lɛɛ, zugba a maa pee a nɔ́ nɛ a maa hi nɔ daa.’—La 37:29.

13. Mɛnɔ pɛ ma nyɛ maa pee zugba nɛ ɔ paradeiso, nɛ mɛni heje?

¹³ Adesahi be nyɛe maa ngɔ tsakemihi kaa kikɛ kɛ ba kɔkɔɔkɔ, se Yehowa lɛɛ e ngɛ he wami nɛ e kɛ tsuɔ nɔ́ fɛɛ nɔ nɛ e deɔ kaa e maa pee ɔ. Nɔ́ ko nɔ́ ko be e nya nyɛe maa tsi ngɛ́ nɔ́ nɛ e suɔ kaa e maa pee ɔ he. Baiblo ɔ de ke: “Mawu lɛɛ nɔ́ ko nɔ́ ko be nɛ e be nyɛe maa pee.”—Luka 1:37.

14. Mɛni e sa kaa o pee konɛ o ba nyɛɛ blɔ nɛ yaa neneene wami mi ɔ nɔ?

¹⁴ Yehowa gu e we Odasefoli ɔmɛ a nɔ, nɛ e ngɔ he blɔ kɛ ngɛ nihi nɛ ngɛ he tsuaa he hae konɛ a ba “sɛ agbo tokofii ɔ mi,” nɛ a nyɛɛ blɔ nɛ kɛ nɔ yaa neneene wami mi ɔ nɔ. É ba mi kaa o maa piɛɛ nihi nɛ ngɛ bua jɔmi, nɛ kplɛɛ nine fɔmi nɛ ɔ nɔ ɔ he. E ba mi kaa o maa ngɔ o he kɛ wo anɔkuale jami ɔ mi konɛ o ná Yehowa jɔɔmi kɛ ya neneene!—Mateo 7:13, 14.