FÃ 3
Kɛ Paradeiso Nɛ Be ɔ Mi Si Himi Ngɛ Kɛɛ?
Yehowa ha Adam kɛ Hawa ní kpakpahi fuu. 1 Mose 1:28
Kekleekle yo nɛ Yehowa bɔ ji Hawa, e kɛ lɛ ha Adam kaa e yo.—1 Mose 2:21, 22.
Yehowa ha mɛ juɛmi kɛ nɔmlɔ tso nɛ hi kɛ pi si nɛ kpa ko be he.
A Paradeiso we mi ji Eden abɔɔ ɔ mi, lejɛ ɔ ji he ko nɛ ngɛ fɛu saminya nɛ́ pahi, kɛ tsohi nɛ a woɔ yiblii, kɛ lohwehi ngɛ.
Yehowa kɛ Adam kɛ Hawa tuɔ munyu, nɛ e tsɔɔ mɛ ní. Kaa a bu lɛ tue ɔ, jinɛ a ko hi si daa ngɛ Paradeiso ɔ mi ngɛ zugba a nɔ.
Mawu de mɛ ke a ko ye tso ɔmɛ a kpɛti kake ko nɔ yiblii. 1 Mose 2:16, 17
Yehowa tsɔɔ Adam kɛ Hawa tso kake ko ngɛ abɔɔ ɔ mi nɛ e de mɛ ke, ke a ye e nɔ yiblii ɔ, a ma gbo.
Mawu bɔfo ɔmɛ a kpɛti nɔ kake tsɔ Mawu hɛ mi atua. Bɔfo yayami nɛ ɔ ji Satan Abosiami.
Satan sume kaa Adam kɛ Hawa nɛ a bu Yehowa tue. Lɔ ɔ he ɔ, e gu sinɔ ko nɔ kɛ de Hawa kaa ke e ye tso yiblii nɛ a de mɛ ke a ko ye ɔ, e be gboe, se mohu e maa pee kaa Mawu. Ngɛ anɔkuale mi ɔ, nɔ́ nɛ e de lɛ ɔ ji lakpa.—1 Mose 3:1-5.
