ANƆKUALE nɛ kɔɔ mɛni he? Anɔkuale nɛ kɔɔ sanehi nɛ a he hia nɛ adesahi biɔ ɔ he. Eko ɔ, o bi sane nɛ ɔmɛ hyɛ:

• Anɛ Mawu susuɔ wa he niinɛ lo?

• Anɛ ta kɛ nɔ́ nami se maa po ligbi ko lo?

• Ke nɔmlɔ gbo ɔ, jije e yaa?

• Anɛ hɛ kɛ nɔ fɔmi ko ngɛ ha ni gbogboe ɔmɛ lo?

• Kɛ ma plɛ kɛ sɔle konɛ Mawu nɛ bu mi tue kɛɛ?

• Kɛ ma pee kɛ ná bua jɔmi ngɛ si himi mi kɛɛ?

Jije o maa na sane bimi nɛ ɔmɛ a hetohi ngɛ? Ke o ya womihi a to he aloo womihi a juami he ɔ, o maa na womihi akpehi abɔ nɛ a tsɔɔ kaa a ngɛ sane bimi nɛ ɔmɛ a hetohi. Se behi fuu ɔ, womi ɔmɛ deɔ ní ekpaekpahi. E peeɔ kaa nɔ́ nɛ womi ɔmɛ ekomɛ hi ha be nɛ a ngma a, se e kɛ we nɛ a be beɔ, nɛ a tsakeɔ níhi ngɛ a mi aloo a peeɔ ekpa kɛ daa nane mi.

Se womi kake ko ngɛ nɛ sane bimi nɛ ɔmɛ a hetohi nɛ wa ma nyɛ maa ngɔ wa he kɛ fɔ nɔ ngɛ mi. E ji womi nɛ e mi munyu ɔmɛ da kɛ pi si. Yesu Kristo de Mawu ngɛ sɔlemi mi ke: ‘O munyu ɔ ji anɔkuale.’ (Yohane 17:17) Mwɔnɛ ɔ, wa ba le kaa Munyu nɛ ɔ ji Ngmami Klɔuklɔu ɔ nɛ. Ngɛ ba fahi nɛ nyɛɛ se ɔ mi ɔ, o maa na sane bimi nɛ ɔmɛ a hetohi kpitikpiti nɛ mi tɛ, nɛ a ji anɔkuale nɛ́ Baiblo ɔ kɛ ha.

NƆ́ HE JE NƐ NIHI BIƆ SANE NƐ Ɔ: Wa ngɛ je nɛ yi kpɛti wami kɛ dami sane yimi hyi lɛ tɔ mi. Jamihi fuu tsɔɔ kaa e ji Mawu suɔmi nya kaa waa na nɔ́.

NƆ́ NƐ BAIBLO Ɔ TSƆƆ: Mawu pee we nɔ́ yayami kɔkɔɔkɔ. Hiob 34:10 de ke: ‘Mawu pee we yi wu tso ní; Ope ɔ pee we nɔ́ nɛ dɛ blɔ.’ Mawu hɛɛ yi mi tomi kpakpa ha adesahi. Enɛ ɔ he je ɔ, Yesu tsɔɔ wɔ kaa waa sɔle ke: “Wa Tsɛ nɛ ngɛ hiɔwe . . . O Matsɛ Yemi ɔ nɛ ba; a pee nɔ́ nɛ o suɔ ngɛ zugba a nɔ kaa bɔ nɛ a peeɔ ngɛ hiɔwe ɔ.” (Mateo 6:9, 10) Mawu susuɔ wa he saminya, he je ɔ, e to blɔ nya konɛ bɔ tsuaa bɔ nɛ ji ɔ, e yi mi tomi ɔ nɛ ba mi.​—Yohane 3:16.

Moo hyɛ 1 Mose 1:26-28; Yakobo 1:13; kɛ 1 Petro 5:6, 7.

NƆ́ HE JE NƐ NIHI BIƆ SANE NƐ Ɔ: Ta hwumi ngɛ adesahi babauu a hɛ mi kpatae daa ligbi. Wɔ tsuo waa kɛ nɔ́ nami kpeɔ.

NƆ́ NƐ BAIBLO Ɔ TSƆƆ: Mawu gba kɛ fɔ si kaa be ko maa su nɛ tue mi jɔmi maa ba zugba a nɔ tsuo. Ngɛ e hiɔwe Matsɛ Yemi ɔ sisi ɔ, nihi “be a he dlae kɛ ha ta gblegbleegble hu.” Mohu ɔ, “a kɛ a ta hwumi klaate ɔmɛ maa sɔ kpakplaahi.” (Yesaya 2:4) Mawu maa po dami sane nɛ nihi yi kɛ nɔ́ nami tsuo se. Baiblo ɔ wo si ke: “Mawu ma tsu a hɛ mi vo nyu tsuo. Nɔ ko be gboe hu; nɔ ko be kɔmɔ yee hu; nɔ ko be ya foe hu, nɛ nɔ ko be nɔ́ nae hu. Ejakaa ní momo ɔmɛ [nɛ́ dami sane nɛ nihi yi kɛ nɔ́ namihi nɛ ngɛ mwɔnɛ ɔ hu piɛɛ he ɔ] a se po.”​—Kpojemi 21:3, 4.

Moo hyɛ La 37:10, 11; 46:9; kɛ Mika 4:1-4.

NƆ́ HE JE NƐ NIHI BIƆ SANE NƐ Ɔ: Je ɔ mi jamihi fuu tsɔɔ kaa nɔ́ ko ngɛ nɔmlɔ mi nɛ yaa nɔ hii si ngɛ e gbenɔ se. Ni komɛ heɔ yeɔ kaa ni gbogboe ɔmɛ ma nyɛ maa ye hɛ kali awi aloo Mawu piiɔ yayami peeli ngɛ hɛl la nɛ ngɛ tsoe gegeege mi.

NƆ́ NƐ BAIBLO Ɔ TSƆƆ: Ke nɔmlɔ gbo ɔ, e wami se po. Fiɛlɔ 9:5 de ke: ‘Ni gbogboe ɔmɛ li nɔ́ ko nɔ́ ko.’ Akɛnɛ ni gbogboe ɔmɛ li nɔ́ ko, nɛ a nui nɔ́ ko he, nɛ́ a tsu we nɔ́ ko hu he je ɔ, a be nyɛe maa ye hɛ kali awi aloo a ye bua mɛ.​—La 146:3, 4.

Moo hyɛ 1 Mose 3:19 kɛ Fiɛlɔ 9:6, 10.

NƆ́ HE JE NƐ NIHI BIƆ SANE NƐ Ɔ: Wa suɔ kaa waa hi si, konɛ waa kɛ wa suɔli nɛ ná bua jɔmi ngɛ je mi. Wɔ tsuo wa suɔ kaa waa na wa suɔli nɛ gbo ɔ ekohu.

NƆ́ NƐ BAIBLO Ɔ TSƆƆ: A ma tle nihi fuu nɛ a gbo ɔ si. Yesu wo si ke “gbogboehi . . . maa je kpo kɛ je a yɔkɔ ɔmɛ a mi.” (Yohane 5:28, 29) Nihi nɛ a ma tle mɛ si kaa adesahi ma ná he blɔ kɛ hi paradeiso mi ngɛ zugba a nɔ kaa bɔ nɛ Mawu sisije yi mi tomi ji ɔ. (Luka 23:43) Nɔ́ nɛ piɛɛ hwɔɔ se si womi nɛ ɔ he ji kaa adesahi nɛ peeɔ tue bumi ɔ ma ná nɔmlɔtso mi he wami kpakpa kɛ neneene wami. Baiblo ɔ de ke: “Nihi nɛ peeɔ nɔ́ nɛ da a, zugba a maa pee a nɔ, nɛ a maa hi nɔ daa.”​—La 37:29.

Moo hyɛ Hiob 14:14, 15; Luka 7:11-17; kɛ Bɔfo Ɔmɛ A Ní Tsumi 24:15.

NƆ́ HE JE NƐ NIHI BIƆ SANE NƐ Ɔ: Nihi nɛ ngɛ jamihi fuu a mi ɔ sɔleɔ. Se kɛ̃ ɔ, e peeɔ a kpɛti nihi fuu kaa a ha we a sɔlemi ɔmɛ a heto.

NƆ́ NƐ BAIBLO Ɔ TSƆƆ: Yesu tsɔɔ wɔ kaa ke wa ngɛ sɔlee ɔ, wa ko ti munyu kake too mi si abɔ. E de ke: “Ke nyɛ ngɛ sɔlee ɔ, nyɛ ko tu munyu putɛputɛɛ.” (Mateo 6:7) Ke wa suɔ kaa Mawu nɛ bu wa sɔlemi tue ɔ, e sa nɛ waa sɔle bɔ nɛ maa sa e hɛ mi. Nɛ loko wa ma nyɛ maa pee enɛ ɔ, e he hia kaa waa kase Mawu suɔmi nya ní nɛ waa sɔle ngɛ nya. A tsɔɔ nya ngɛ 1 Yohane 5:14 ke: ‘Ke wa ba nɔ́ ko ngɛ Mawu suɔmi nya a, e buɔ wɔ tue.’

Moo hyɛ La 65:2; Yohane 14:6, 14; kɛ 1 Yohane 3:22.

NƆ́ HE JE NƐ NIHI BIƆ SANE NƐ Ɔ: Nihi fuu heɔ yeɔ kaa sika, biɛ hemi, aloo he fɛu ji nɔ́ nɛ ma ha mɛ bua jɔmi. Lɔɔ he ɔ, a dii jamɛ a ní ɔmɛ a se, se a ná we bua jɔmi ko kulaa.

NƆ́ NƐ BAIBLO Ɔ TSƆƆ: Yesu tsɔɔ nɔ́ tutuutu nɛ haa nɔ bua jɔmi benɛ e de ke: “A gbaa nihi nɛ le kaa mumi mi ohiatsɛmɛ ji mɛ.” (Mateo 5:3) Wa ma ná gbaami aloo bua jɔmi nitsɛ ke wa le anɔkuale nɛ kɔɔ Mawu kɛ e yi mi tomi ɔ he, nɛ ji wa hiami nɔ́ titli ɔ. Anɔkuale nɛ ɔ ngɛ Baiblo ɔ mi. Anɔkuale nɛ ɔ nɛ wa maa le ɔ maa ye bua wɔ konɛ wa yo nɔ́ nɛ he hia titli kɛ nɔ́ nɛ se nami be he. Ke wa ha nɛ Baiblo ɔ mi anɔkuale ɔ kudɔ wa juɛmi peemihi kɛ wa ní peepeehi ɔ, wa ma ná bua jɔmi ngɛ je mi.​—Luka 11:28.

Moo hyɛ Abɛ 3:5, 6, 13-18; kɛ 1 Timoteo 6:9, 10.

 Sane bimihi ekpa amɛ a hetohi kpiti nɛ Baiblo ɔ ha ji nɛ ɔ nɛ. Anɛ o suɔ nɛ o le babauu lo? Ke o piɛɛ nihi nɛ le kaa ‘mumi níhi a he hia mɛ’ ɔ a he ɔ, nɔ́ jemi ko be he kaa o maa suɔ. Eko ɔ, o susuɔ sane bimi kpahi hu a he, kaa: ‘Ke Mawu susuɔ wa he ɔ, mɛni he je nɛ e ngmɛ yayami peemi kɛ nɔ́ nami babauu blɔ hluu kɛ ba si mwɔnɛ ɔ? Mɛni ma pee nɛ ye weku si himi nɛ pee kpakpa?’ Baiblo ɔ ngɛ sane bimi nɛ ɔmɛ kɛ ekpahi fuu a hetohi nɛ haa nɔ tsui nɔɔ e mi.

Se mwɔnɛ ɔ, nihi fuu sume kaa a maa kase Baiblo ɔ. A naa lɛ kaa womi ngua ko nɛ e sisi numi yee. Anɛ o maa suɔ kaa a ye bua mo kɛ hla heto ɔmɛ ngɛ Baiblo ɔ mi lo? Yehowa Odasefohi ma nyɛ maa ye bua mo ngɛ blɔhi enyɔ nɔ.

Kekleekle ɔ, a pee womi nɛ ji Mɛni Baiblo ɔ Ma Nyɛ Maa Tsɔɔ Wɔ? nɛ a kɛ ye bua nihi nɛ a be deka konɛ a kɛ hla sane bimihi nɛ he hia amɛ a heto ngɛ Baiblo ɔ mi. Blɔ enyɔne ɔ ji, a to we mi Baiblo mi ní kasemi he blɔ nya nɛ a he we nɔ́ ko nɔ́ ko. Yehowa Odasefo no nɛ le Baiblo ɔ mi ma nyɛ maa ba o ngɔ ngɛ we mi aloo he nɛ maa hi ha mo daa otsi konɛ e kɛ mo nɛ ngɔ be bɔɔ kɛ sɛsɛ Baiblo ɔ he. Nimli ayɔhi abɔ ngɛ́ je ɔ mi ná blɔ nya tomi nɛ ɔ he se. Nɛ nɔ́ nɛ a ti nihi babauu de kɛ bua jɔmi ji: “I na anɔkuale ɔ!”

Weto ní ko be nɛ o maa na nɛ he jua wa kaa enɛ ɔ. Baiblo mi anɔkuale ɔ haa wa yeɔ wa he kɛ jeɔ hemi kɛ yemi yayahi, yi mi futumihi, kɛ gbeye yemihi a he. E haa wa náa hɛ kɛ nɔ fɔmi, yi mi tomi kpakpa, kɛ bua jɔmi. Yesu de ke: “Nyɛɛ maa le anɔkuale ɔ; nɛ anɔkuale ɔ ma ha nyɛ maa ye nyɛ he.”​—Yohane 8:32.