NÍ KASEMI 4
Bɔnɛ O Maa Pee Ha Konɛ O Kase Mawu He Ní
O ma nyɛ maa kase Yehowa he ní kɛ gu Baiblo ɔ kanemi nɔ. Blema a, Mawu hla adesahi komɛ nɛ a ngma e susumihi kɛ to. A tsɛɛ níhi nɛ a ngma nɛ ɔmɛ ke Baiblo. Mwɔnɛ ɔ, wa kaseɔ Mawu he ní kɛ guu Baiblo ɔ kanemi nɔ. Akɛnɛ Yehowa munyu aloo sɛgbi lɛ ngɛ Baiblo ɔ mi heje ɔ, a tsɛɛ lɛ ke Mawu Munyu hulɔ. Yehowa yi lakpa kɔkɔɔkɔ, heje ɔ wa ma nyɛ ma he nɔ́ nɛ Baiblo ɔ de ɔ maa ye. “Mawu be nyɛe maa ngɔ nya.” (Hebribi 6:18, Somi He Ɔ) Mawu Munyu ɔ ji anɔkuale.—Yohane 17:17.
Baiblo ɔ ji níke ní nɛ́ a he jua wa pe kulaa nɛ Mawu ngɔ ha wɔ ɔ a kpɛti kake. E ngɛ kaa womi nɛ tsɛ nɛ ngɛ suɔmi ngma e bimɛ. E deɔ wɔ si nɛ́ Mawu wo kaa e ma tsake zugba a kɛ pee he ko nɛ́ ngɛ bua jɔmi, nɛ ji paradeiso. E deɔ wɔ nɔ́ nɛ e pee blema, nɔ́ nɛ e ngɛ pee amlɔ nɛ ɔ, kɛ nɔ́ nɛ e maa pee hwɔɔ se kɛ ha e bimɛ nɛ́ yeɔ lɛ anɔkuale. Baiblo ɔ yeɔ bua wɔ hu nɛ wa tsuɔ wa nyagbahi a he ní nɛ wa náa bua jɔmi.—2 Timoteo 3:16, 17.
Yehowa Odasefoli ji Mawu huɛmɛ; a maa ye bua mo konɛ o nu nɔ́ nɛ Baiblo ɔ tsɔɔ sisi. Moo lɛɛ de mɛ kɛkɛ kaa o suɔ nɛ o kase Baiblo ɔ. A he we sika ngɛ enɛ ɔ he. (Mateo 10:8) Jehanɛ, o ma nyɛ maa ya ní kasemi nɛ a peeɔ ɔ hulɔ. A peeɔ ní kasemi ɔ ngɛ Matsɛ Yemi Asa nɔ, nɛ ji he ko nɛ a jaa ngɛ. Ke o ya Kristofoli a kpehi ɔ, o ma ná Mawu he níle mlamlaamla.
O ma nyɛ maa kase Mawu he ní kɛ je níhi nɛ e bɔ ɔmɛ a he. Kaa nɔhyɛ nɔ́ ɔ, Baiblo ɔ de ke: “Mawu bɔ hiɔwe kɛ zugba.” (1 Mose 1:1) Yehowa bɔ pu ɔ benɛ e bɔ “hiɔwe ɔ.” Mɛni enɛ ɔ deɔ wɔ ngɛ Mawu he? E tsɔɔ wɔ kaa Yehowa ngɛ he wami kpetekpleenyɛ. Lɛ pɛ ji nɔ nɛ ma nyɛ maa pee nɔ́ ko nɛ he wami ngɛ mi kaa pu ɔ. E tsɔɔ hu kaa Yehowa ngɛ níle, ejakaa e biɔ níle loko nɔ ko ma nyɛ maa pee pu ɔ nɛ́ haa wɔ la nɛ gbo we gblee, kɛ la dɔdɔɛ ɔ.
Níhi nɛ Yehowa bɔ ɔmɛ tsɔɔ kaa e suɔ wɔ. Mo susu tso yiblii slɔɔtoslɔɔtohi nɛ ngɛ zugba a nɔ he nɛ o hyɛ. Yehowa ko nyɛ ha wɔ tso yiblii henɔ kake pɛ, aloo e ko ha we wɔ eko kulaa. Se mohu ɔ, Yehowa ha wɔ tso yiblii munomunohi fuu nɛ slo eko tsuaa eko bɔbɔɛ, klemi, su kɛ ngɔmi. Enɛ ɔ tsɔɔ kaa Yehowa ji Mawu nɛ pi suɔmi pɛ kɛkɛ nɛ e ngɛ, se mohu e mi mi hi, nɛ e susuɔ nɔ he.—La 104:24.
Eko ɔ, O Bua Maa Jɔ Enɛ ɔ Hu He
ESSENTIAL BIBLE TEACHINGS
Mɛnɔ Ji Baiblo ɔ Ngmalɔ?
Ke adesahi lɛ a ngma Baiblo ɔ, anɛ e da blɔ kaa a tsɛɔ Baiblo ɔ ke Mawu Munyu lo? Mɛnɔ munyu lɛ ngɛ Baiblo ɔ mi?
WA HE SANEHI
Mɛni He Je Nɛ E Sa Kaa Waa Kase Baiblo ɔ?
Baiblo ɔ ngɛ nihi ayɔhi abɔ nɛ a ngɛ je ɔ mi tsuo ɔ si himi mi sane bimihi nɛ a he hia a heto hae. Anɛ mo hu o suɔ kaa a ha mo sane bimi nɛ ɔmɛ a heto lo?
MOO PEE YEHOWA HUƐ
“Yehowa Lɛ Bɔ Níhi Tsuo”
O le nɔ́ nɛ Mawu bɔ kekle lo? Moo piɛɛ Kaleb he kɛ kase níhi nɛ Mawu bɔ ke je sisije kɛ ya si nyagbe ɔ a he ní.
