Mawu henyɛlɔ nɛ pe kulaa ji Satan Abosiami. E ji mumi mi adebɔ nɛ́ e tsɔ Yehowa hɛ mi atua. Satan ngɛ ta hwue kɛ ngɛ Mawu sie nɛ e ngɔ haomihi babauu kɛ ngɛ adesahi hu a nɔ bae kpamisa. Yiwutsotsɛ ji Satan. Lakpatsɛ kɛ nɔ gbelɔ ji lɛ.—Yohane 8:44.

Mumi mi adebɔ kpahi piɛɛ Satan he kɛ tsɔ atua kɛ si Mawu. Baiblo ɔ tsɛɛ mɛ ke daimoniohi. Kaa bɔnɛ Satan ji ɔ, daimoniohi hu ji adesahi a henyɛli. A suɔ nɛ́ a ye nimli awi. (Mateo 9:32, 33; 12:22) Yehowa ma kpata Satan kɛ e daimonio ɔmɛ a hɛ mi pɛsɛpɛsɛ. Be bɔɔ pɛ kɛkɛ e piɛ ha mɛ nɛ a kɛ maa hao adesahi.—Kpojemi 12:12.

Ke o suɔ kaa o pee Mawu huɛ ɔ, lɛɛ e sɛ kaa o pee Satan suɔmi nya ní. Satan kɛ daimonio ɔmɛ nyɛɔ Yehowa. Mawu henyɛli ji mɛ, nɛ a suɔ nɛ mo hu o plɛ Mawu henyɛlɔ. E sa kaa o tsɔɔ nɔ nɛ o suɔ kaa o maa pee e suɔmi nya ní—Satan aloo Yehowa. Ke o suɔ nɛ́ o ná neneene wami ɔ, lɛɛ e sa nɛ o mwɔ o yi mi kpɔ kaa o maa pee Mawu suɔmi nya ní. Satan le gahi kɛ blɔhi fuu nɛ e guu nɔ kɛ sisiɔ nimli. Mwɔnɛ ɔ, e ngɛ nihi fuu sisie.—Kpojemi 12:9.