Wami senya plɛmi ji gbenɔ. Gbenɔ ngɛ kaa mahe nɛ a hwɔɔ vii. (Yohane 11:11-14) Gbogboehi nui nɔ́, a hyɛ we nɔ́, a tui munyu, nɛ a susuu we nɔ́ ko nɔ́ ko hu he. (Fiɛlɔ 9:5, 10) Lakpa jami tsɔɔ kaa gbogboehi yaa mumihi a je nɛ a kɛ blema nimeli ya hii si. Baiblo ɔ tsɔɔ we ja.

Nihi nɛ gbo ɔ be nyɛe maa ye bua wɔ, nɛ a be nyɛe maa ye wɔ awi. Nihi pɔɔ kusumihi peemi kɛ musu yemi kɛ ha gbogboehi, ejakaa a heɔ yeɔ kaa ja peemi maa sa a hɛ mi. Enɛ ɔ sɛ Mawu hɛ mi ejakaa e daa si ngɛ Satan lakpahi nɛ e ye ɔ a kpɛti kake nɔ. Jã kɛ̃ e be gbogboe ɔmɛ hu a hɛ mi nyɛe maa sa, ejakaa wami be a mi. E sɛ nɛ wa yeɔ gbogboe ɔmɛ gbeye aloo wa jaa mɛ. E sa nɛ wa ja Mawu pɛ.—Mateo 4:10.

Gbogboehi maa ba wami mi ekohu. Yehowa ma tle gbogboehi si kɛ ba wami mi ngɛ zugba nɛ a pee lɛ Paradeiso ɔ nɔ. Enɛ ɔ maa ba mi hwɔɔ se. (Yohane 5:28, 29; Bɔfo 24:15) Mawu ma nyɛ ma tle gbogboehi si kaa bɔnɛ o ma nyɛ ma tsiɛ nɔ ko kɛ je mahe mi ɔ.—Marko 5:22, 23, 41, 42.

Susumi kaa ke nɔ ko gbo ɔ, e gbo we nitsɛ ɔ ji lakpa nɛ́ Satan Abosiami gbɛ kɛ fia. Satan kɛ e daimonio ɔmɛ ha nihi susuɔ kaa gbogboehi a mumihi ngɛ, nɛ a ngɔɔ hiɔ kɛ haomi kpahi kɛ fɔɔ nihi a nɔ. Be komɛ hu, Satan guu nlamihi kɛ ninahi a nɔ kɛ sisiɔ nihi. Yehowa buu nihi nɛ bɔɔ mɔde kaa a kɛ gbogboehi maa tu munyu ɔ fɔ.—5 Mose 18:10-12.