Si himi ngɛ Paradeiso mi be pee kaa je nɛ wa ngɛ mi mwɔnɛ ɔ si himi. Pi Mawu suɔmi nya ji kaa zugba a nɔ nɛ́ hyi kɛ haomi kɛ aywilɛho, piimi kɛ nɔ́ nami. Mawu maa plɛ zugba a kɛ pee paradeiso hwɔɔ se. Kɛ paradeiso si himi ɔ maa hi kɛɛ? Ha waa hyɛ nɔ́ nɛ Baiblo ɔ deɔ ngɛ he:

Nimli kpakpahi. Paradeiso maa pee Mawu huɛmɛ a we mi. A maa pee ní kpakpahi kɛ ha a sibi. A maa hi si ngɛ Mawu dami blɔ ɔmɛ a nya.—Abɛ 2:21.

Niye ní babauu. Hwɔ be nɔ ko yee ngɛ Paradeiso ɔ mi. Baiblo ɔ de ke: “Zugba a . . . [maa] ba ní saminya, nɛ a [ma] ná blɛfo babauu.”—La 72:16.

Wehi nɛ́ ngɛ fɛu kɛ ní tsumi nɛ haa nɔ bua jɔmi. Wekuhi tsuo maa hi mɛ nitsɛmɛ a wehi a mi ngɛ Paradeiso zugba a nɔ. Nɔ fɛɛ nɔ ma tsu nítsumi nɛ haa nɔ bua jɔmi.—Yesaya 65:21-23.

 Tue mi jɔmi ngɛ́ je ɔ mi tsuo. Nimli be ta hwue nɛ a be gboe ngɛ ta mi hu. Mawu Munyu ɔ deɔ ke: “[Mawu] haa ta se poɔ ngɛ je ɔ mi tsuo.”—La 46:8, 9.

Nɔmlɔtso mi he wami nami. Baiblo ɔ wo si ke: “Nihi nɛ ngɛ [Paradeiso] zugba a nɔ ɔ, a ti nɔ ko nɔ ko be dee hu ke, ‘I be he wami.’” (Yesaya 33:24) Jehanɛ se ɔ, nɔ ko nɔ ko be akpaketsɛ aloo hɛyuyuilɔ, aloo tuekpokutsɛ aloo amuɛti pee hu.—Yesaya 35:5, 6.

Nɔ́ nami, aywilɛho kɛ gbenɔ maa ba nyagbe. Mawu munyu ɔ de ke: “Nɔ ko be gboe hu; nɔ ko be kɔmɔ yee hu; nɔ ko be ya foe hu, nɛ nɔ ko be nɔ́ nae hu. Ejakaa ní momo ɔmɛ a se po.”—Kpojemi 21:4.

Nimli yayamihi be si hie hu. Yehowa wo si ke: “Yiwutsotsɛmɛ, kɛ yayami peeli lɛɛ Mawu ma kpata a hɛ mi kaa bɔnɛ a hiaa tso ngɛ zu mi kɛ fɔɔ si ɔ.”—Abɛ 2:22.

Nimli ma ná bumi kɛ suɔmi ha a sibi. Dami sane nɛ a yi, yi mi wami, hɛkɔ̃ kɛ ninyɛ be si hie hu. Nimli maa pee kake kɛ hi si ngɛ Mawu dami blɔ ɔmɛ a nya.—Yesaya 26:9.