O KƐ O Baiblo kaselɔ ko kane ngmami ko nɛ e nu sisi, nɛ o na kaa e bua jɔ. Kɛkɛ nɛ e bi mo ke, “Lɔ ɔ o ngɛ tsɔɔe kaa Baiblo ɔ tsɔɔ kaa wa ma hi si ngɛ Paradeiso ngɛ zugba a nɔ kɛ maa ya neneene lo?” Nɔ nɛ o kɛ lɛ ya fiɛɛmi ɔ muɔ hɛlii nɛ e de ke, “Kɛ o na ngɛ Baiblo ɔ mi kɛɛ?” Baiblo Kaselɔ ɔ mimiɛ e yi nɛ e de ke, “E ngɛ mi nyakpɛ pee kaa a tsɔɔ we mi ní nɛ ɔ gblee!” O kai kaa e de mo nɔ́ ko kaa jã lingmi nɛ ɔ benɛ e ba le kaa Mawu biɛ ji Yehowa a.

O ná níhi a si kpami kaa kikɛ hyɛ lo? Mawu we bi fuu ná níhi a si kpami kaa jã hyɛ. Níhi bɔɔ ko ma nyɛ ma kai wɔ kaa anɔkuale nile nɛ wa ná a he jua wa saminya! Mo susu he nɛ o hyɛ: Kɛ o plɛ kɛ na anɔkuale ɔ ha kɛɛ? Ngɛ fã nɛ ɔ mi ɔ, wa ma susu sane bimi nɛ ɔ he. Bɔ nɛ Mawu we bi nu Baiblo mi anɔkuale ɔ sisi bɔɔbɔɔbɔɔ ɔ ji odase nɛ tsɔɔ kaa Mawu Matsɛ Yemi ɔ ji nɔ́ nitsɛnitsɛ. Jeha lafa ji nɛ ɔ, Yesu Kristo nɛ ji Matsɛ Yemi ɔ nya Matsɛ ɔ bɔ mɔde nɛ e ha nɛ a ngɛ Mawu we bi anɔkuale ɔ tsɔɔe.