Nɔ nitsɛ e fɔmi níhi a he fiɛmi ji ní peepee ko nɛ Mawu sume, ejakaa e haa nɛ nɔ foɔ lɛ pɛ e nɔ mi, nɛ́ e susuɔ ní yayamihi pɛ a he. * Nɔ nɛ fiɛɔ e fɔmi níhi a he ɔ naa ni kpahi kaa nihi nɛ a kɛ maa gbe bɔmi nami akɔnɔ kɛkɛ. Nɛ e bui bɔmi nami kaa ní peepee nɛ nihi enyɔ kɛ jeɔ suɔmi kpo kɛ tsɔɔ a sibi, se mohu nɔ́ nɛ a kɛ gbee akɔnɔ kɛkɛ. Se kɛ̃ ɔ, bua jɔmi nɛ nɔ nɛ fiɛɔ lɛ nitsɛ e fɔmi níhi a he náa a se kɛ we. Ngɛ be mi nɛ e sa kaa e gbe e nɔmlɔ tso ɔ he níhi kaa ‘nyumu kɛ yo yakayaka fiɛmi, mu ní tsumi, kɛ akɔnɔ yaya’ a, e fɔmi níhi a he nɛ e fiɛɔ ɔ tleɔ he numi nɛ ɔmɛ si mohu.​—Kolose Bi 3:5.

Bɔfo Paulo ngma ke: “Nyɛ ha wa je níhi tsuo nɛ woɔ wa nɔmlɔ tso, kɛ wa mumi he mu kɛ ya se, konɛ wa he nɛ tsɔ kulaa kɛ hi si ngɛ Mawu gbeye yemi nya.” (2 Korinto Bi 7:1) Ke munyu nɛ ɔ nɔ yemi he wa ha mo ɔ, o kɔni mi nɛ ko wo nyu. Yehowa pee klaalo be tsuaa be kaa ‘e kɛ o he yayami maa pa’ mo, nɛ e maa ye bua mo. (La 86:5; Luka 11:9-13) Ngɛ anɔkuale mi ɔ, ke o yi mi kojoɔ mo, nɛ o ngɛ mɔde bɔe kaa o ma kpa su yaya nɛ ɔ, se kɛ̃ ɔ, ke e ngɛ mi hluu ɔ, o kɛ o he woɔ mi ɔ, o kɔni mi nɛ jɔ̃, o ma nyɛ ma kpa. Mo ha nɛ e hi o juɛmi mi hu kaa ‘Mawu kle pe wa tsui ɔ nɛ e le nɔ́ tsuaa nɔ́ hulɔ.’ (1 Yohane 3:20) Mawu naa ní kpakpahi fuu ngɛ wa he pe bɔ  nɛ e naa wa he yayamihi. Nɛ akɛnɛ e le nɔ́ tsuaa nɔ́ nɛ ngɛ wa he he je ɔ, e kɛ mi mi sami buɔ wa pɛɛ kpami kaa e na wɔ mɔbɔ ɔ tue. Lɔ ɔ he ɔ, moo ba o he si nɛ o sɔle kɛ je o tsui mi ha Mawu daa kaa bɔ nɛ jokuɛ nɛ sɛ haomi mi yaa e tsɛ ngɔ ɔ. Yehowa ma ha nɛ o ná he nile kpakpa. (La 51:1-12, 17; Yesaya 1:18) Se e sa kaa o tsu o sɔlemi ɔ nya ní. Kaa nɔ hyɛmi nɔ́ ɔ, e sa kaa o yu o he ngɛ bɔmi nami he fonihi tsuo a hyɛmi kɛ huɛ bɔmi yayami he. *

Ke o nyɛ we nɛ o kpa o fɔmi níhi a he fiɛmi ɔ, wa kpa mo pɛɛ nɛ o bɔ fɔlɔ ko nɛ e ji Kristofo no loo o huɛ nɛ pi si ngɛ Mawu jami mi nɛ e suɔ o sane ɔ amaniɛ. *​—Abɛ 1:8, 9; 1 Tesalonika Bi 5:14; Tito 2:3-5.