Moo ye bua o tue buli ɔmɛ nɛ a susu níhi a he kɛ ya tsitsaa. Ngɔɔ sane bimihi nɛ ma ha nɛ tue buli ɔmɛ ma susu níhi a he ɔ kɛ tsu ní.

Ha nɛ o tue buli ɔmɛ nɛ a na kaa o he mɛ ye. Moo wo tue buli ɔmɛ he wami nɛ a susu nɔ́ he je nɛ e sa kaa a ya nɔ nɛ a pee ní kpakpahi ɔ he. Moo ye bua mɛ nɛ a ná suɔmi kɛ ha Yehowa, a nyɛmi nɔmlɔ kɛ Baiblo tsɔɔmi ɔmɛ. Enɛ ɔ maa ye bua mɛ nɛ a maa ya nɔ maa pee ní kpakpahi. Ko de mɛ nɔ́ nɛ e sa kaa a pee, mohu ɔ, o kɛ mɛ nɛ susu níhi a he. Ha nɛ munyu ɔ nɛ wo mɛ he wami nɛ a ya a hɛ mi, mohu pe nɛ o maa gbe mɛ zo.

Gblaa a juɛmi kɛ ya Yehowa nɔ. Ha nɛ a na bɔ nɛ Mawu mlaa amɛ, Baiblo tsɔɔmihi, kɛ sisi tomi mlaahi jeɔ Mawu su ɔmɛ kpo ha konɛ a na kaa e suɔ wɔ. Moo ye bua tue buli ɔmɛ nɛ a susu Yehowa he kekle ngɛ nɔ́ fɛɛ nɔ́ mi konɛ a pee e suɔmi nya ní.