Ha nɛ a le nɔ́ he je nɛ o yaa kane ngmami ɔ. Ke o yaa kane ngmami ko ɔ, mo de nɔ́ ko nɛ ma ha nɛ tue buli ɔmɛ a juɛmi maa ya oti nɛ o suɔ nɛ o ma nɔ mi ngɛ ngmami ɔ mi ɔ nɔ.

Moo gbla tue buli ɔmɛ a juɛmi kɛ ya Baiblo ɔ nɔ. Ke o tue buli ɔmɛ he ye kaa Mawu ngɛ ɔ, ha nɛ a na kaa Baiblo ɔ ji Mawu Munyu, nɛ e mi nɛ nile nɛ nɔ kuɔ pe kulaa a ngɛ.

Mo tle tue buli ɔmɛ a bua jɔmi si ngɛ ngmami ɔ he. Mo bi sane ko nɛ ngmami ɔ ma ha heto, mo de nyagba ko nɛ ngmami ɔ ma nyɛ maa tsɔɔ bɔ nɛ a ma plɛ kɛ tsu he ní ha, aloo mo de sisi tomi mlaa ko nɛ Baiblo ɔ mi sane ko ma ha nɛ a nu sisi.