NÍ KASEMI 54
Mɛnɔ Ji “Tsɔlɔ Anɔkualetsɛ Kɛ Ní Lelɔ ɔ,” Nɛ Mɛni E Tsuɔ?
Yesu ji Kristofohi asafo ɔ Yi. (Efeso Bi 5:23) Yesu nɛ e ji matsɛ ngɛ hiɔwe ɔ nyɛɛɔ e se nyɛɛli ɔmɛ a hɛ mi kɛ guɔ “tsɔlɔ anɔkualetsɛ kɛ ní lelɔ ɔ” nɔ mwɔnɛ ɔ. (Kane Mateo 24:45.) Yesu Kristo nitsɛ nɛ e hla “tsɔlɔ” nɛ ɔ, nɛ e ha lɛ he blɔ konɛ e mwɔ yi mi kpɔhi, se kɛ̃ ɔ, e sa nɛ tsɔlɔ ɔ nɛ bu Kristo blɔ tsɔɔmi tue nɛ e sɔmɔ Kristo nyɛmimɛ ɔmɛ. Mɛnɔ ji jamɛ a tsɔlɔ ɔ? Nɛ mɛni blɔ nɔ e guɔ kɛ hyɛɛ wa nɔ?
1. Mɛnɔ ji “tsɔlɔ anɔkualetsɛ kɛ ní lelɔ ɔ”?
Kɛ je blema nɛ Yehowa guɔ nyumu kake aloo nyumuhi a nɔ nɛ e kɛ blɔ tsɔɔmi haa e we bi. (Malaki 2:7; Hebri Bi 1:1) Ngɛ Yesu gbenɔ se ɔ, bɔfo ɔmɛ kɛ nikɔtɔma amɛ nɛ a ngɛ Yerusalem ɔ nyɛɛ Mawu we bi a hɛ mi. (Ní Tsumi 15:2) Jã nɔuu nɛ mwɔnɛ ɔ, nikɔtɔmahi bɔɔ ko nɛ a tsɛɛ mɛ Yehowa Odasefohi A Blɔ Tsɔɔmi Ajla Toli ɔ nyɛɛɔ Mawu we bi a hɛ mi, a haa mɛ mumi mi niye ní nɛ a kudɔɔ fiɛɛmi ní tsumi ɔ hulɔ. Mɛ ji “tsɔlɔ anɔkualetsɛ kɛ ní lelɔ ɔ nɛ [Yesu] ngɔ lɛ kɛ da e we mi bimɛ a nya” a nɛ. (Mateo 24:45a) Blɔ Tsɔɔmi Ajla Toli ɔmɛ ji Kristofohi nɛ a kɛ mumi klɔuklɔu ɔ pɔ mɛ nu, nɛ a maa piɛɛ Yesu Kristo he ngɛ e hiɔwe Matsɛ Yemi ɔ mi ke a si himi ngɛ zugba nɛ ɔ nɔ ɔ ba nyagbe.
2. Mɛni mumi mi niye ní nɛ tsɔlɔ anɔkualetsɛ ɔ haa wɔ?
Yesu de ke, tsɔlɔ anɔkualetsɛ ɔ ma “ha [nyɛmimɛ Kristofohi] a niye ní ngɛ be nɛ sa mi.” (Mateo 24:45b) Kaa bɔ nɛ niye ní nɛ wa yeɔ ɔ haa nɛ wa náa nɔmlɔ tso mi he wami kpakpa a, mumi mi niye ní nɛ ji blɔ tsɔɔmi nɛ je Mawu Munyu ɔ mi ɔ, woɔ wɔ he wami konɛ waa ya nɔ nɛ waa ye Yehowa anɔkuale, nɛ wa tsu ní tsumi nɛ Yesu kɛ wo wa dɛ ɔ. (1 Timoteo 4:6) Wa náa mumi mi niye ní nɛ ɔmɛ kɛ guɔ asafo mi kpehi, kpɔ mi kpehi kɛ kpokpa nɔ kpehi nɛ wa yaa, kɛ asafo ɔ womihi kɛ videohi nɛ́ yeɔ bua wɔ nɛ wa leɔ nɔ́ nɛ Mawu suɔ kaa waa pee, konɛ huɛ bɔmi kpakpa nɛ hi waa kɛ lɛ wa kpɛti ɔ nɔ.
MOO KASE BABAUU
Moo hyɛ nɔ́ he je nɛ wa hia “tsɔlɔ anɔkualetsɛ kɛ ní lelɔ ɔ” nɛ ji Blɔ Tsɔɔmi Ajla Toli ɔ.
Blɔ Tsɔɔmi Ajla Toli ɔmɛ haa Yehowa Odasefohi ngɛ je kɛ wɛ ɔ mumi mi niye ní, nɛ a haa mɛ blɔ tsɔɔmi kɛ yemi kɛ buami nɛ a hia a
3. E sa nɛ Yehowa we bi nɛ a pee kake kɛ tsu ní
Ngɛ Yesu blɔ tsɔɔmi nya a, Blɔ Tsɔɔmi Ajla Toli ɔmɛ toɔ ní tsumi nɛ Yehowa Odasefohi tsuɔ ɔ he blɔ nya. Blɔ nya tomi kaa kikɛ hi si ngɛ kaseli ɔmɛ a be ɔ mi. Mo je VIDEO ɔ.
Nyɛɛ kane 1 Korinto Bi 14:33, 40, nɛ́ nyɛ susu sane bimi nɛ ɔ he:
-
Kɛ ngmami nɛ ɔ ha nɛ wa na kaa Yehowa suɔ nɛ e we Odasefohi nɛ a pee kake kɛ tsu ní ha kɛɛ?
4. Tsɔlɔ anɔkualetsɛ ɔ toɔ wa fiɛɛmi ní tsumi ɔ he blɔ nya
Fiɛɛmi ji ní tsumi titli nɛ Kristofohi nɛ a hi si ngɛ kaseli ɔmɛ a be ɔ mi ɔ tsu. Nyɛɛ kane Ní Tsumi 8:14, 25, nɛ́ nyɛ susu sane bimi nɛ ɔmɛ a he:
-
Ngɛ kaseli ɔmɛ a be ɔ mi ɔ, mɛnɔmɛ a ngɔ nɛ blɔ tsɔɔmi nɛ tsɔɔ bɔ nɛ a ma tsu fiɛɛmi ní tsumi ɔ ha a je?
-
Kɛ Petro kɛ Yohane pee a ní ngɛ blɔ tsɔɔmi nɛ a nyɛmimɛ bɔfo ɔmɛ kɛ ha a he kɛɛ?
Fiɛɛmi ji ní tsumi nɛ he hia pe kulaa nɛ Blɔ Tsɔɔmi Ajla Toli ɔmɛ to he blɔ nya. Mo je VIDEO ɔ.
Yesu ma bɔ nɛ fiɛɛmi ní tsumi ɔ he hia ha a nɔ mi. Nyɛɛ kane Maako 13:10, nɛ́ nyɛ susu sane bimi nɛ ɔmɛ a he:
-
Mɛni he je nɛ fiɛɛmi ní tsumi ɔ he hia Blɔ Tsɔɔmi Ajla Toli ɔmɛ wawɛɛ ɔ?
-
Mɛni he je nɛ wa hia “tsɔlɔ anɔkualetsɛ kɛ ní lelɔ ɔ” konɛ e to ní tsumi nɛ ɔ nɛ a ngɛ tsue ngɛ je kɛ wɛ ɔ he blɔ nya a?
5. Tsɔlɔ anɔkualetsɛ ɔ kɛ blɔ tsɔɔmi haa wɔ
Blɔ Tsɔɔmi Ajla Toli ɔmɛ kɛ blɔ tsɔɔmi haa Kristofohi ngɛ je kɛ wɛ. Mɛni blɔ nɔ a guɔ kɛ mwɔɔ a yi mi kpɔ ngɛ blɔ tsɔɔmi nɛ a kɛ ma ha wɔ ɔ he? Moo hyɛ bɔ nɛ blɔ tsɔɔmi ajla toli ɔmɛ nɛ a hi si ngɛ kaseli ɔmɛ a be ɔ mi ɔ plɛ kɛ mwɔ yi mi kpɔhi ha. Nyɛɛ kane Ní Tsumi 15:1, 2, nɛ́ nyɛ susu sane bimi nɛ ɔmɛ a he:
-
Mɛni nya sami lɛ te si ngɛ Kristofohi nɛ a hi si ngɛ kaseli ɔmɛ a be ɔ mi ɔ a kpɛti?
-
Mɛnɔmɛ a ngɔ nɛ Paulo, Barnaba, kɛ ni kpa komɛ ya bi yemi kɛ buami ngɛ?
Nyɛɛ kane Ní Tsumi 15:12-18, 23-29, nɛ́ nyɛ susu sane bimi nɛ ɔ he:
-
Loko blɔ tsɔɔmi ajla toli ɔmɛ nɛ a hi si ngɛ kaseli ɔmɛ a be ɔ mi ɔ maa ma a juɛmi nya si ngɛ sane ɔ he ɔ, mɛni he nɛ a susu konɛ a kɛ na Mawu blɔ tsɔɔmi ngɛ sane ɔ he?—Hyɛ kuku 12, 15, kɛ 28.
Nyɛɛ kane Ní Tsumi 15:30, 31 kɛ 16:4, 5, nɛ́ nyɛ susu sane bimi nɛ ɔmɛ a he:
-
Kɛ Kristofohi nɛ a hi si ngɛ kaseli ɔmɛ a be ɔ mi ɔ pee a ní ngɛ blɔ tsɔɔmi nɛ blɔ tsɔɔmi ajla toli ɔmɛ kɛ ha mɛ ɔ he ha kɛɛ?
-
Kɛ Yehowa jɔɔ mɛ ha kɛɛ benɛ a bu blɔ tsɔɔmi ɔ tue ɔ?
Nyɛɛ kane 2 Timoteo 3:16 kɛ Yakobo 1:5, nɛ́ nyɛ susu sane bimi nɛ ɔ he:
-
Mwɔnɛ ɔ, jije Blɔ Tsɔɔmi Ajla Toli ɔmɛ hlaa blɔ tsɔɔmi kɛ jeɔ loko a mwɔɔ yi mi kpɔhi?
NI KOMƐ DEƆ KE: “Ke o bu Blɔ Tsɔɔmi Ajla Toli ɔmɛ tue ɔ, lɛɛ nimli adesahi a se o ngɛ nyɛɛe ɔ nɛ.”
-
Mɛni ha nɛ o ná nɔ mi mami kaa Yesu lɛ ngɛ Blɔ Tsɔɔmi Ajla Toli ɔmɛ kudɔe ɔ?
NYA MWƆMI
Blɔ Tsɔɔmi Ajla Toli ɔmɛ ji “tsɔlɔ anɔkualetsɛ kɛ ní lelɔ ɔ” nɛ́ Yesu hla a nɛ. E kɛ blɔ tsɔɔmi kɛ mumi mi niye ní haa Kristofohi ngɛ je kɛ wɛ.
Mi Nylɔmi
-
Mɛnɔ lɛ hla “tsɔlɔ anɔkualetsɛ kɛ ní lelɔ ɔ”?
-
Mɛni blɔ nɔ nɛ Blɔ Tsɔɔmi Ajla Toli ɔmɛ guɔ kɛ hyɛɛ wa nɔ?
-
Anɛ o he ye kaa Blɔ Tsɔɔmi Ajla Toli ɔmɛ ji “tsɔlɔ anɔkualetsɛ kɛ ní lelɔ ɔ” lo?
NÍ KPAHI NƐ MAA YE BUA MO
Moo hyɛ bɔ nɛ Blɔ Tsɔɔmi Ajla Toli ɔmɛ tsuɔ a ní tsumi ɔ ha.
“Mɛni Ji Yehowa Odasefohi A Blɔ Tsɔɔmi Ajla Toli ɔ?” (Munyu nɛ ɔ ngɛ Intanɛti ɔ nɔ)
Moo kase bɔ nɛ Blɔ Tsɔɔmi Ajla Toli ɔmɛ hyɛɛ konɛ wa ná mumi mi niye ní nɛ hi saminya a he ní.
Kɛ Blɔ Tsɔɔmi Ajla Toli ɔmɛ nuɔ he ha kɛɛ ngɛ ní tsumi nɛ Yesu kɛ wo a dɛ kaa a tsu ɔ he?
Ngɛ mɛni blɔ nɔ nɛ kpe slɔɔtohi nɛ wa peeɔ ɔ maa nɔ mi kaa Yehowa ngɛ Blɔ Tsɔɔmi Ajla Toli ɔmɛ blɔ tsɔɔe?
Eko ɔ, O Bua Maa Jɔ Enɛ ɔ Hu He
SANEHI NƐ NIHI PƆƆ BIMI
Mɛni Blɔ Nya Yehowa Odasefohi To Nɛ́ Nihi Kɛ Kaseɔ Baiblo ɔ?
Yehowa Odasefohi kɛ nihi kaseɔ Baiblo ɔ nɛ a he we nɔ́ ko. Ke a kɛ mo ngɛ Baiblo ɔ kasee ɔ, o ma nyɛ maa ngɔ Baiblo sisi tsɔɔmi fɛɛ ko kɛ tsu ní. O ma nyɛ maa fɔ o weku ɔ, aloo o huɛmɛ nine nɛ a ba piɛɛ o he kɛ kase ní ɔ.
