NÍ KASEMI 55
Mo Fĩ O We Asafo ɔ Se
Ngɛ je ɔ mi tsuo ɔ, nihi ayɔhi abɔ kɛ bua jɔmi sɔmɔɔ Yehowa ngɛ asafohi akpehi abɔ mi. A hɛ sa níhi nɛ a tsɔɔ mɛ kɛ blɔ tsɔɔmi nɛ a kɛ haa mɛ ɔ, nɛ a jeɔ a tsui mi kɛ yeɔ bua asafo nɛ a ngɛ mi ɔ ngɛ blɔ slɔɔtohi a nɔ. Anɛ mo hu o bua jɔɔ kaa o ngɛ asafo ɔ mi, nɛ o hɛ saa blɔ tsɔɔmihi nɛ o náa lo? Anɛ o suɔ kaa o maa je o tsui mi kɛ ye bua asafo ɔ lo?
1. Mɛni blɔ komɛ a nɔ nɛ o ma nyɛ maa ngɔ o be kɛ o he wami kɛ ye bua ngɛ asafo ɔ mi?
Wɔ tsuo wa ma nyɛ maa ye bua ngɛ asafo ɔ mi. Kaa nɔ hyɛmi nɔ́ ɔ, anɛ nyɛmimɛ komɛ ngɛ o we asafo ɔ mi nɛ a wa ngɛ jeha mi aloo a be nɔmlɔ tso mi he wami lo? Anɛ o ma nyɛ maa ye bua mɛ konɛ a nyɛ nɛ a ya asafo mi kpehi lo? Aloo o ma nyɛ maa pee ní komɛ kɛ ye bua mɛ, kaa niye ní kɛ ní kpahi nɛ a maa hia nɛ o ma he ba ha mɛ, aloo a we mi nɛ o maa ye bua mɛ kɛ dla lo? (Kane Yakobo 1:27.) Jehanɛ hu ɔ, wa ma nyɛ maa ngɔ wa he kɛ ha kɛ ye bua ngɛ Matsɛ Yemi Asa a nɔ dlami kɛ e nɔ hyɛmi mi. Nɔ ko nyɛ we wa nɔ kaa waa pee ní nɛ ɔmɛ. Suɔmi nɛ wa ngɛ kɛ ha Mawu kɛ wa nyɛmimɛ Kristofohi ji nɔ́ nɛ woɔ wɔ he wami nɛ wa ‘ngɔɔ wa he kɛ haa ngɛ wɔ nitsɛmɛ wa suɔmi nya.’—La 110:3.
Odasefohi nɛ a baptisi mɛ ɔ ma nyɛ maa ye bua asafo ɔ ngɛ blɔ kpahi hu a nɔ. Nyɛmimɛ nyumuhi nɛ a su hlami níhi nɛ ngmami ɔ tsɔɔ ɔ he ɔ ma nyɛ ma sɔmɔ kaa asafo mi sɔmɔli loo asafo mi nikɔtɔmahi. Nyɛmimɛ nyumuhi kɛ yihi tsuo ma nyɛ maa ye bua ngɛ fiɛɛmi ní tsumi ɔ mi kɛ gu blɔ gbami ní tsumi ɔ nɛ a kɛ a he maa wo mi ɔ nɔ. Nyɛmimɛ komɛ hu ma nyɛ maa ye bua kɛ ma asafo ɔ tsuhi aloo a maa hia kɛ ya he nɛ asafo ko hia yemi kɛ buami ngɛ.
2. Kɛ wa ma plɛ kɛ ngɔ wa he lo nya níhi kɛ ye bua asafo ɔ ha kɛɛ?
Wa ma nyɛ maa ngɔ wa “níhi nɛ a he jua wa a kɛ wo Yehowa hɛ mi nyami.” (Abɛ 3:9, NW) E ji he blɔ nɛ wa ná kaa wa maa ngɔ wa sika, kɛ he lo nya ní kpahi nɛ wa ngɛ ɔ kɛ ye bua asafo nɛ wa ngɛ mi ɔ, kɛ jehanɛ hu je kɛ wɛ fiɛɛmi ní tsumi ɔ. (Kane 2 Korinto Bi 9:7.) Jehanɛ hu ɔ, a ngɔɔ sika nɛ wa haa a eko kɛ yeɔ bua nyɛmimɛ ngɛ oslaa be mi. Nihi fuu ma a juɛmi nya si kaa a ma “je nɔ́ ko ngɔ to” be fɛɛ be konɛ a kɛ ye bua. (Kane 1 Korinto Bi 16:2.) Wa ma nyɛ maa ngɔ sika kɛ wo yemi kɛ buami dakahi nɛ a ngɛ hehi nɛ wa kpeɔ ngɛ kɛ jaa Mawu ɔ mi, aloo wa ma nyɛ ma ha ngɛ Intanɛti ɔ nɔ ke wa ya donate.pr418.com. Yehowa ha wɔ he blɔ konɛ wa kɛ tsɔɔ bɔ nɛ wa suɔ lɛ ha, kɛ gu nɔ́ nɛ wa suɔ kaa waa kɛ he lo nya níhi nɛ wa ngɛ ɔ maa pee ɔ nɔ.
MOO KASE BABAUU
Moo hyɛ blɔ komɛ a nɔ nɛ o ma nyɛ maa gu kɛ ye bua ngɛ asafo ɔ mi.
3. Wa ma nyɛ maa ngɔ he lo nya níhi nɛ wa ngɛ ɔ kɛ ye bua
Yehowa kɛ Yesu bua jɔɔ nihi nɛ a haa nɔ kɛ jeɔ a tsui mi ɔ a he. Kaa nɔ hyɛmi nɔ́ ɔ, Yesu je yalɔyo ohiatsɛ ko yi ejakaa e je e tsui mi nɛ e ngɔ sika nyafii nɛ lɔ ɔ pɛ lɛ ngɛ e dɛ ɔ kɛ wo sika tsumi daka a mi. Nyɛɛ kane Luka 21:1-4, nɛ́ nyɛ susu sane bimi nɛ ɔmɛ a he:
-
Anɛ, ja wa ha sika fuu kɛ ye bua loko e maa sa Yehowa hɛ mi lo?
-
Kɛ Yehowa kɛ Yesu nuɔ he ha kɛɛ ke wa jeɔ wa tsui mi kɛ haa yemi kɛ buami?
Bɔ nɛ pee nɛ o na níhi nɛ a kɛ yemi kɛ buamihi nɛ wa haa a tsuɔ ɔ, mo je VIDEO ɔ. Lɔ ɔ se ɔ, nyɛ susu sane bimi nɛ nyɛɛ se ɔ he.
-
Kɛ a kɛ yemi kɛ buamihi nɛ wa haa a yeɔ bua asafohi ngɛ je kɛ wɛ ha kɛɛ?
4. Wa ma nyɛ maa ngɔ wa he kɛ ha kɛ ye bua
Blema a, Yehowa sɔmɔli kɛ hɛdɔ tsuɔ ní wawɛɛ kɛ hyɛɛ hehi nɛ a kpeɔ ngɛ kɛ jaa lɛ ɔ nɔ saminya. Se enɛ ɔ biɔ babauu pe sika pɛ nɛ a kɛ maa ye bua. Nyɛɛ kane 2 Kronika 34:9-11, nɛ́ nyɛ susu sane bimi nɛ ɔ he:
-
Mɛni Israel bi ɔmɛ a ti nɔ fɛɛ nɔ pee kɛ ye bua kɛ hyɛ Yehowa we ɔ, aloo he nɛ a kpeɔ ngɛ kɛ jaa Yehowa a nɔ?
Bɔ nɛ pee nɛ o na blɔ nɔ nɛ Yehowa Odasefohi guɔ kɛ nyɛɛɔ nɔ hyɛmi nɔ́ nɛ ɔ se ɔ, mo je VIDEO ɔ. Lɔ ɔ se ɔ, nyɛ susu sane bimihi nɛ nyɛɛ se nɛ ɔmɛ a he.
-
Mɛni he je nɛ e he hia nɛ wa ha nɛ wa Matsɛ Yemi Asa amɛ a nɔ nɛ tsɔ, nɛ́ nɔ́ fɛɛ nɔ́ nɛ hi saminya ngɛ lejɛ ɔ?
-
Mɛni blɔhi a nɔ o ma nyɛ maa gu kɛ ye bua?
5. Nyɛmimɛ nyumuhi ma nyɛ maa ya a hɛ mi konɛ a he nɛ su kɛ ha blɔ nya ní tsumi fuu
Ngmami ɔ wo nyumuhi nɛ a ji Kristofohi ɔ he wami kaa a bɔ mɔde nɛ a ya a hɛ mi, konɛ a pee nɔ́ fɛɛ nɔ́ nɛ a ma nyɛ kɛ ye bua ngɛ asafo ɔ mi. Bɔ nɛ pee nɛ o na enɛ ɔ he nɔ hyɛmi nɔ́ ɔ, mo je VIDEO ɔ. Lɔ ɔ se ɔ, nyɛ susu sane bimi nɛ nyɛɛ se ɔ he.
-
Ngɛ Video ɔ mi ɔ, mɛni Ryan pee konɛ e nyɛ nɛ e ya e hɛ mi nɛ e kɛ e nyɛmi tsuo nɛ ye bua ngɛ asafo ɔ mi?
Baiblo ɔ tsɔɔ hlami níhi nɛ e sa kaa nyumuhi nɛ a ma sɔmɔ kaa asafo mi sɔmɔli loo nikɔtɔmahi ɔ nɛ a su he. Nyɛɛ kane 1 Timoteo 3:1-13, nɛ́ nyɛ susu sane bimi nɛ ɔmɛ a he:
-
Mɛni ji níhi nɛ a hyɛɛ blɔ kaa nyumuhi nɛ a ngɛ a hɛ mi yae konɛ a ba sɔmɔ kaa asafo mi sɔmɔli loo nikɔtɔmahi ɔ nɛ a su he?
-
Mɛni ji níhi nɛ a hyɛɛ blɔ ngɛ a weku mi bi ɔmɛ hu a dɛ?—Hyɛ kuku 4 kɛ 11.
-
Ke nyɛmimɛ nyumuhi bɔ mɔde nɛ a su hlami ní nɛ ɔmɛ a he ɔ, kɛ nɔ fɛɛ nɔ nɛ e ngɛ asafo ɔ mi ɔ ma ná he se ha kɛɛ?
NƆ KO MA BI KE: “Jije Yehowa Odasefohi náa sika ngɛ kɛ hyɛɛ a ní tsumi ɔ nɔ?”
-
Kɛ o ma ha heto kɛɛ?
NYA MWƆMI
Yehowa bua jɔɔ mɔde nɛ wa bɔɔ kaa wa maa ngɔ wa he wami, wa be, kɛ he lo nya níhi nɛ wa ngɛ ɔ kɛ ye bua asafo ɔ he wawɛɛ.
Mi Nylɔmi
-
Kɛ wa ma plɛ kɛ ngɔ wa be kɛ wa he wami kɛ ye bua asafo ɔ ha kɛɛ?
-
Kɛ wa ma plɛ kɛ ngɔ wa he lo nya níhi kɛ ye bua asafo ɔ ha kɛɛ?
-
Mɛni blɔhi a nɔ nɛ o maa suɔ nɛ o ye bua ngɛ asafo ɔ mi?
NÍ KPAHI NƐ MAA YE BUA MO
Moo hyɛ nɔ́ he je nɛ Mawu hyɛ we blɔ hu kaa e sɔmɔli nɛ a wo mi dlami nyɔngma a.
“Mɛni Baiblo ɔ De Ngɛ Mi Dlami Nyɔngma He?” (Munyu nɛ ɔ ngɛ Intanɛti ɔ nɔ)
Baiblo ɔ ngɔ blɔ nya ní tsumi komɛ kɛ wo nyumuhi nɛ a baptisi mɛ ɔ a dɛ. Se ke e he ba hia nɛ nyɛmiyo nɛ a baptisi lɛ ɔ nɛ́ tsu blɔ nya ní tsumi nɛ ɔmɛ a he ní ɔ hu nɛ?
“He Blɔ Nɛ Asafo Mi Nikɔtɔmahi Ngɛ Ngɛ Asafo ɔ Mi” (Hwɔɔmi Mɔ, February 2021)
Moo hyɛ bɔ nɛ nyɛmimɛ nyumu komɛ nɛ a ngɛ kã a ngɔ níhi kɛ sã afɔle ha konɛ a nyɛ nɛ a ngɔ asafo ɔ womihi kɛ ya ha a nyɛmimɛ ɔmɛ.
Bɔ nɛ wa haa yemi kɛ buami ha kɛ hyɛɛ wa ní tsumi ɔ nɔ ɔ je ekpa kulaa ngɛ bɔ nɛ jami kpa amɛ peeɔ lɛ ha a he. Moo hyɛ bɔ nɛ wa peeɔ lɛ ha.
“Jije Yehowa Odasefohi Náa Sika Ngɛ Kɛ Hyɛɛ A Ní Tsumi ɔ Nɔ?” (Munyu nɛ ɔ ngɛ Intanɛti ɔ nɔ)
Eko ɔ, O Bua Maa Jɔ Enɛ ɔ Hu He
SANEHI NƐ NIHI PƆƆ BIMI
Mɛni Blɔ Nya Yehowa Odasefohi To Nɛ́ Nihi Kɛ Kaseɔ Baiblo ɔ?
Yehowa Odasefohi kɛ nihi kaseɔ Baiblo ɔ nɛ a he we nɔ́ ko. Ke a kɛ mo ngɛ Baiblo ɔ kasee ɔ, o ma nyɛ maa ngɔ Baiblo sisi tsɔɔmi fɛɛ ko kɛ tsu ní. O ma nyɛ maa fɔ o weku ɔ, aloo o huɛmɛ nine nɛ a ba piɛɛ o he kɛ kase ní ɔ.
