1, 2. Mɛni ha nɛ Paulo ya Yerusalɛm ɔ, nɛ mɛni nyagbahi nɛ e kɛ ma ya kpe ngɛ lejɛ ɔ?

 PAULO ngɛ nyɛɛe ngɛ Yerusalɛm gbɛjegbɛ nɛ e nɔ bli we nɛ nihi babauu hu ngɛ nyɛɛe ngɛ nɔ ɔ nɔ! Ngɛ je ɔ mi tsuo ɔ, Yerusalɛm pɛ ji he nɛ Yehowa we bi ja lɛ ngɛ jehahi babauu. A ti nihi fuu kɛ he blɔ nɛ ɔ nɛ a ma nɛ ji Yerusalɛm ɔ ná be ko nɛ be ɔ fĩaa. Paulo le kaa Kristofohi nɛ a ngɛ Yerusalɛm ɔ a ti nihi fuu ngɔ a juɛmi kɛ ma Mose Mlaa a nɛ́ a maa ye nɔ ɔ nɔ wawɛɛ, nɛ a nyɛ we nɛ a kɛ Yehowa yi mi tomihi nɛ ngɛ hɛ mi yae ɔ nɛ nyɛɛ. Enɛ ɔ he ɔ, benɛ Paulo ngɛ Efeso ɔ, e ma e juɛmi nya si kaa e maa ya Yerusalɛm konɛ e ya ye bua Kristofo ɔmɛ ngɛ lejɛ ɔ. Pi sika a nɛ a bua nya a pɛ ji nɔ́ nɛ e suɔ kaa e kɛ ma ya ha mɛ, se e suɔ hu kaa e maa ye bua mɛ konɛ a tsake a susumi. (Níts. 19:21) E ngɛ mi kaa enɛ ɔ ma nyɛ maa pee oslaa kɛ ha lɛ mohu lɛɛ, se e bɔ mɔde nɛ e ya.

² Amlɔ nɛ ɔ, mɛni Paulo kɛ ma ya kpe ngɛ Yerusalɛm? Nyagba nɛ e kɛ maa kpe ɔ eko je Kristo se nyɛɛli ɔmɛ a ngɔ. A ti ni komɛ he lakpa munyuhi nɛ a tu ngɛ Paulo he ɔ ye. Se nyagba nɛ pe kulaa nɛ e kɛ maa kpe ɔ maa je Kristo he nyɛli ɔmɛ a ngɔ. A maa tu lakpa munyuhi kɛ po e nya, a maa kongo lɛ, nɛ a maa wo e he gbeye kaa a maa gbe lɛ. Nyagba nɛ ɔmɛ tsuo ma ha Paulo he blɔ konɛ e kɛ fã e hemi kɛ yemi ɔ he. E he si nɛ e ba, kɛ hemi kɛ yemi kɛ kã nɛ́ e kɛ da nyagba nɛ ɔmɛ tsuo a nya a ji nɔ hyɛmi nɔ́ nɛ se be kɛ ha wɔ mwɔnɛ ɔ. Nyɛ ha nɛ waa hyɛ blɔ nɔ nɛ wa maa gu kɛ kase lɛ.

3-5. (a) Mɛnɔmɛ nɛ Paulo kɛ mɛ ya pee kpe ngɛ Yerusalɛm ɔ, nɛ mɛni he a susu ngɛ kpe nɛ ɔ sisi? (b) Mɛni wa ma nyɛ maa kase ngɛ kpe nɛ Paulo kɛ nikɔtɔma amɛ pee ngɛ Yerusalɛm ɔ mi?

³ Benɛ a ya su Yerusalɛm ɔ, Paulo kɛ e huɛ ɔmɛ nɛ a piɛɛ e he ɔ ya na asafo mi nikɔtɔma amɛ ngɛ lejɛ ɔ. A wui bɔfo ɔmɛ a ta ngɛ sane nɛ ɔ nɛ́ ya nɔ ɔ mi; eko ɔ, mɛ tsuo a je konɛ a ya fiɛɛ ngɛ je ɔ mi he kpahi. Se Yesu nyɛminyumu Yakobo ngɛ lejɛ ɔ loloolo. (Gal. 2:9) Eko ɔ, Yakobo ji sɛnɔhilɔ kɛ ha kpe nɛ a pee benɛ Paulo kɛ ‘nikɔtɔma amɛ tsuo ngɛ lejɛ ɔ.’​—Níts. 21:18.

 ⁴ Paulo fɔ nikɔtɔma amɛ “nɛ e bɔni mɛ níhi nɛ Mawu gu e sɔmɔmi ní tsumi ɔ nɔ kɛ pee ngɛ je ma amɛ a mi ɔ bɔmi fitsofitso.” (Níts. 21:19) Níhi a si kpami nɛ ɔ nɛ nyɛmimɛ ɔmɛ nu ɔ maa wo mɛ he wami wawɛɛ. Wɔ hu wa bua jɔɔ ke wa nu bɔ nɛ fiɛɛmi ní tsumi ɔ ngɛ hɛ mi yae ha ngɛ ma kpahi a nɔ mwɔnɛ ɔ.​—Abɛ. 25:25.

⁵ Eko ɔ benɛ a ngɛ kpe ɔ pee nɛ́ e su he ko ɔ, Paulo wo yemi kɛ buamihi nɛ e kɛ je Yuropa kɛ ba a nɔ ta. Nyɛmimɛ nɛ ɔmɛ a bua jɔ wawɛɛ kaa a nyɛmimɛ nɛ a ngɛ hehi nɛ a kɛ ɔ susuɔ a he. Benɛ nyɛmimɛ ɔmɛ nu Paulo níhi a si kpami ɔ, ngmami ɔ de ke: “A [nɛ́ ji nikɔtɔma amɛ] bɔni Mawu hɛ mi nyami womi”! (Níts. 21:20a) Jã nɔuu kɛ̃ nɛ mwɔnɛ ɔ, ke nyɛmimɛ nɛ a kɛ oslaahi kpe aloo hiɔ nɛ nya wa ko fia mɛ ɔ nine su yemi kɛ buami, kɛ he wami womi munyuhi a nɔ kɛ je a nyɛmimɛ a ngɔ ɔ, e taa a tsui he wawɛɛ.

6. Mɛni nyagba nɛ nikɔtɔma amɛ de Paulo?

⁶ Nikɔtɔma amɛ de Paulo kaa, nyɛmimɛ nɛ a ngɛ Yudea a nu munyu komɛ ngɛ e he, nɛ lɔ ɔ gba a nya wawɛɛ. A de lɛ ke: “Nyɛminyumu, hyɛ, Yuda bi ɔmɛ a kpɛti nihi akpehi abɔ nɛ a he ye ɔ, mɛ tsuo a hɛ dɔɔ wawɛɛ ngɛ Mlaa a he. Se a nu akeake munyu ngɛ o he kaa o ngɛ Yuda bi tsuo nɛ a ngɛ je ma amɛ a mi ɔ tsɔɔe kaa a kua Mose, nɛ o ngɛ mɛ dee kaa a ko po a bimɛ, nɛ a ko nyɛɛ kusumi ní peepee ɔmɛ hu a se.” a​—Níts. 21:20b, 21.

7, 8. (a) Mɛni susumi nɛ dɛ nɛ Yuda bi fuu nɛ a ji Kristofohi ɔ hɛɛ? (b) Mɛni he je nɛ susumi nɛ dɛ nɛ Yuda bi nɛ ɔmɛ hɛɛ ɔ tsɔɔ we kaa a ji hemi kɛ yemi kuali ɔ?

⁷ Mɛni he je nɛ loloolo ɔ, nihi fuu a hɛ dɔɔ ngɛ Mose Mlaa a he, pohu Mlaa nɛ ɔ ba nyagbe jeha 20 kɛ se sɔuu ɔ? (Kol. 2:14) Ngɛ jeha 49 K.F.S. ɔ, bɔfo ɔmɛ, kɛ nikɔtɔma amɛ nɛ́ a kpe ngɛ Yerusalɛm ɔ ngma sɛ womi kɛ mane asafo ɔmɛ,  nɛ a tsɔɔ kaa, e he hia we nɛ nihi nɛ a je je ma amɛ a mi ɔ nɛ a ye Mose Mlaa a nɛ́ nɔ pomi ɔ hu piɛɛ he ɔ nɔ. (Níts. 15:23-29) Se kɛ̃ ɔ, a wui Yuda bi nɛ a ji Kristofohi ɔ a ta ngɛ sɛ womi ɔ mi. Nimli nɛ ɔmɛ a ti nihi fuu nui sisi kaa e he hia we hu nɛ a ye Mose Mlaa a nɔ.

⁸ Anɛ susumi nɛ dɛ nɛ ɔ nɛ Yuda bi nɛ a ji Kristofohi ɔ hɛɛ ɔ ha nɛ a he sui hu kaa Kristofohi lo? Dɛbi. Loko nimli nɛ ɔmɛ ma ba pee Kristofohi ɔ, pi lakpa mawuhi nɛ a jaa nɛ́ e maa ba lɛ kaa benɛ a ba pee Kristofohi se ɔ, a kpale ya ngɛ a blema kusumi ɔmɛ a se nyɛɛe ekohu. Mlaa nɛ Yuda bi nɛ ɔmɛ buɔ wawɛɛ ɔ ji Mlaa nɛ je Yehowa nitsɛ ngɔ. Nɔ́ ko be Mlaa nɛ ɔ mi nɛ e je wɔ jami mi aloo e dɛ. Se somi momo ɔ he Mlaa ji lɔ ɔ nɛ, nɛ amlɔ nɛ ɔ, Kristofohi ngɛ somi ehe ɔ sisi. Lɔ ɔ he ɔ, Yehowa hyɛ we blɔ kaa a ye Mlaa somi ɔ nɔ loko e maa kplɛɛ a jami ɔ nɔ. Hebri bi nɛ ɔmɛ nɛ a ji Kristofohi ɔ be hemi kɛ yemi ngɛ blɔ nya tomi ehe nɛ Yehowa to konɛ a gu nɔ kɛ ja lɛ ɔ mi. Yehowa ngɛ anɔkuale ehehi kpo jee ngɛ blɔ nɛ e sa kaa a gu nɔ kɛ ja lɛ ɔ he, nɛ e he ba hia nɛ Yuda bi nɛ ɔmɛ nɛ a kplɛɛ anɔkuale nɛ ɔmɛ a nɔ. b​—Yer. 31:31-34; Luka 22:20.

9. Mɛni nɛ Paulo tsɔɔ nihi kɛ kɔ Mose Mlaa a he?

⁹ Nihi nu akeake munyu kaa Paulo ngɛ Yuda bi nɛ a ngɛ a kpɛti ɔ tsɔɔe kaa “a ko po a bimɛ, nɛ a ko nyɛɛ kusumi ní peepee ɔmɛ hu a se.” A hla Paulo kaa bɔfo kɛ ha Ma Je Li ɔmɛ, nɛ e tsɔɔ mɛ yi mi kpɔ nɛ a mwɔ kaa e he hia we nɛ Ma Je Li ɔmɛ nɛ a ye Mose Mlaa a nɔ ɔ. Jehanɛ hu ɔ, e tsɔɔ kaa nihi nɛ a ngɛ  tsɔɔe doo kaa e sa nɛ a po Ma Je Li ɔmɛ nɛ́ a ye Mose Mlaa a nɔ ɔ a ní peepee ɔ dɛ. (Gal. 5:1-7) Paulo fiɛɛ sane kpakpa a kɛ ha Yuda bi hulɔ ngɛ mahi nɛ e ya a mi. E ngɛ heii kaa Paulo maa tsɔɔ nihi nɛ a hɛɛ tsui kpakpa a kaa Yesu gbenɔ ɔ ha nɛ Mlaa a ba nyagbe, enɛ ɔ he ɔ, Mawu hyɛ we blɔ hu kaa á bu Mlaa a tue loko a ma nyɛ maa pee dali.​—Rom. 2:28, 29; 3:21-26.

10. Mɛni juɛmi nɛ da nɛ Paulo hɛɛ ngɛ sanehi nɛ kɔɔ Mlaa a kɛ nɔ pomi ɔ he?

¹⁰ Se kɛ̃ ɔ, Paulo bui nihi nɛ a suɔ kaa a maa nyɛɛ Yuda bi ɔmɛ a kusumi ɔmɛ ekomɛ a se ɔ fɔ. Ekomɛ ji, ní nɛ a be tsue ngɛ Hejɔɔmi ligbi ɔ nɔ, kɛ niye ní komɛ nɛ a be yee. (Rom. 14:1-6) Nɛ e wui mlaahi ha nihi ngɛ nɔ pomi ɔ he. Ngɛ anɔkuale mi ɔ, Paulo ha nɛ a po Timoteo, ejakaa e sume nɛ Yuda bi ɔmɛ a yi mi nɛ pee mɛ enyɔɔnyɔ ngɛ e he akɛnɛ Timoteo papaa ji Hela no ɔ he je. (Níts. 16:3) Nɔ fɛɛ nɔ maa mwɔ lɛ nitsɛ e yi mi kpɔ ke ji e ma ha nɛ a po lɛ loo a ko po lɛ. Paulo de Galatia bi ɔmɛ ke: “A po nɔ jio, a pui nɔ jio, pi lɔ ɔ nɛ e he hia, mohu ɔ, hemi kɛ yemi nɛ́ tsuɔ ní kɛ guɔ suɔmi nɔ ɔ lɛ e he hia.” (Gal. 5:6) Se kɛ̃ ɔ, e ji tɔmi kaa nɔ ko ma susu kaa ja a po lɛ loko lɔ ɔ maa tsɔɔ kaa e ngɛ Mlaa a nɔ yee aloo ja a po lɛ loko Yehowa maa kplɛɛ e nɔ. Jã peemi ɔ tsɔɔ kaa jamɛ a nɔ ɔ be hemi kɛ yemi.

11. Mɛni blɔ tsɔɔmi nɛ nikɔtɔma amɛ kɛ ha Paulo, se mɛni nɛ jinɛ e ko pee we? (Hyɛ sisi ningma a hulɔ.)

¹¹ E ngɛ mi kaa munyuhi nɛ Yuda bi ɔmɛ nu ngɛ Paulo he ɔ be mi mohu lɛɛ, se loloolo ɔ munyu nɛ ɔmɛ gba a nya wawɛɛ. Enɛ ɔ he je ɔ, nikɔtɔma amɛ kɛ blɔ tsɔɔmi nɛ ɔ ha Paulo: ‘Wa ngɛ nyumuhi eywiɛ nɛ a kã kita. Ngɔɔ nyumu nɛ ɔmɛ kɛ piɛɛ o he nɛ o kɛ mɛ nɛ ya nɛ nyɛ ya tsukɔ nyɛ he ngɛ kusumi nya, nɛ o wo hiɔ nɛ a ma bɔ ɔ ha mɛ, konɛ a ha nɛ a sɛ a yi ɔmɛ. Kɛkɛ ɔ, nɔ fɛɛ nɔ maa le kaa akeake  munyu nɛ a ngɛ nue ngɛ o he ɔ be mi, mohu ɔ, o ngɛ nyɛɛe pɛpɛɛpɛ, nɛ o ngɛ Mlaa a hu nɔ yee.’ c​—Níts. 21:23, 24.

12. Mɛni Paulo pee kɛ tsɔɔ kaa e suɔ nɛ e kɛ nikɔtɔma amɛ nɛ a ngɛ Yerusalɛm ɔ nɛ pee kake?

¹² Jinɛ Paulo ko nyɛ ko de ke, pi akeake munyu nɛ nihi ngɛ tue ɔ ji nyagba a tutuutu, se mohu ɔ, nɔ́ nɛ Yuda bi ɔmɛ ngɛ tsɔɔe kaa doo ɔ e sa nɛ a ye Mose Mlaa a nɔ ɔ ji nyagba a nɛ. Se kɛ̃ ɔ, e suɔ kaa e maa pee nɔ́ nɛ nikɔtɔma amɛ de lɛ ɔ, ejakaa e le kaa lɔ ɔ ti si kɛ wui Mawu sisi tomi mlaahi. Be ko nɛ be ɔ, e ngma ke: “I ba pee kaa nɔ ko nɛ e ngɛ mlaa sisi kɛ ha ni nɛmɛ nɛ a ngɛ mlaa sisi ɔ konɛ ye nine nɛ su a nɔ, pohu imi nitsɛ lɛɛ i be mlaa sisi.” (1 Kor. 9:20) Ngɛ si fɔfɔɛ nɛ ɔ mi ɔ, Paulo pee nɔ́ nɛ nikɔtɔmahi nɛ a ngɛ Yerusalɛm ɔ de lɛ ke e pee ɔ, nɛ e “ba pee kaa nɔ ko nɛ e ngɛ mlaa sisi.” Jã nɛ e pee ɔ ji nɔ hyɛmi nɔ́ kpakpa kɛ ha wɔ mwɔnɛ ɔ kaa e sa nɛ waa bu blɔ tsɔɔmi nɛ asafo mi nikɔtɔma amɛ kɛ ma ha wɔ ɔ tue nɛ wa ko hla kaa doo ɔ, e sa nɛ a pee níhi kaa bɔ nɛ wɔɔ wa suɔ.​—Heb. 13:17.

13. (a) Mɛni he je nɛ Yuda bi komɛ pee basabasa ngɛ sɔlemi we ɔ? (b) Mɛni blɔ nɔ nɛ a gu kɛ po Paulo he piɛ?

¹³ Níhi yɛ nɔ saminya ngɛ sɔlemi we ɔ. Benɛ be su nɛ kita nɛ nyumu eywiɛ ɔmɛ kã a maa ba nyagbe ɔ, Yuda bi komɛ nɛ a je Asia a na Paulo, nɛ a po e nya kaa e ngɔ Ma Je Li kɛ ba sɔlemi we ɔ, nɛ a bɔni basabasa peemi. Ke pi nɛ́ Roma Ta bulɔ nɔkɔtɔma a ba sɔlemi we ɔ konɛ e ba hyɛ nɔ́ nɛ ngɛ nɔ yae ɔ, jinɛ a ko kongo Paulo kɛ ya si e ko gbo. Roma ta bulɔ nɔkɔtɔma a ha nɛ e ta buli ɔmɛ nu Paulo. E ma he Paulo jeha eywiɛ kɛ se loko a maa ngmɛɛ e he. Ngɛ lɔ ɔ tsuo se ɔ, Paulo be slɔkee lolo. Benɛ ta bulɔ nɔkɔtɔma a bi Yuda bi ɔmɛ kaa mɛni he je nɛ a ngɛ Paulo kongoe ɔ, a kɛ gbi nɛ he wa tu munyuhi fuu kɛ po e nya. Akɛnɛ a ngɛ huhui kpae he je ɔ, ta bulɔ nɔkɔtɔma a nui níhi nɛ a ngɛ dee ɔ sisi. Nyagbenyagbe ɔ, ta buli ɔmɛ ngɔ Paulo kɛ je Yuda bi ɔmɛ nɛ a ngɛ basabasa pee ɔ a he. Benɛ e piɛ bɔɔ nɛ Paulo kɛ Roma ta bulɔ nɔkɔtɔma a maa su ta buli ɔmɛ a hi he ɔ, Paulo de lɛ ke: “I kpa mo pɛɛ, mo ha nɛ ma tu munyu kɛ tsɔɔ ni ɔmɛ.” (Níts. 21:39) Ta bulɔ nɔkɔtɔma a kplɛɛ, nɛ Paulo kɛ kã fã e hemi kɛ yemi ɔ he.

14, 15. (a) Mɛni níhi nɛ Paulo tu a he munyu kɛ tsɔɔ Yuda bi ɔmɛ? (b) Mɛni nɛ Roma ta bulɔ nɔkɔtɔma a pee konɛ e kɛ hlá nɔ́ he je nɛ Yuda bi ɔmɛ po Paulo nya a mi?

¹⁴ Paulo je e munyu ɔ sisi ke, “nyɛɛ bu ye nya nɛ i ma jemi ɔ tue.” (Níts. 22:1) Paulo kɛ asafo kuu ɔ tu munyu ngɛ Hebri gbi mi, nɛ enɛ ɔ ha nɛ a pee dii.  E tsɔɔ mɛ nɔ́ he je nɛ amlɔ nɛ ɔ e ba pee Kristo kaselɔ ɔ heii. Ngɛ e munyu ɔ mi ɔ, Paulo tu ní komɛ nɛ́ ke Yuda bi ɔmɛ suɔ ɔ, a ma nyɛ ma hlá mi konɛ a ná nɔ mi mami ɔ ngɛ mi ɔ he munyu. Gamaliɛl nɛ́ e ji tsɔɔlɔ nɛ nihi buu lɛ wawɛɛ ɔ ji nɔ nɛ tsɔɔ Paulo ní, nɛ jehanɛ hu Yuda bi ɔmɛ ekomɛ nɛ a ngɛ lejɛ ɔ le kaa Paulo wa Kristo se nyɛɛli ɔmɛ yi mi be ko nɛ be ɔ. Se benɛ e ngɛ blɔ ɔ nɔ kɛ yaa Damasko ɔ, e na nina ko nɛ kɔɔ Kristo nɛ a tle lɛ si ɔ he, nɛ e kɛ lɛ tu munyu. Nihi nɛ a piɛɛ Paulo he jamɛ a ligbi ɔ na nɛ la ko nɛ nya wa kpɛ, nɛ a nu gbi ko hulɔ, se a li nɔ́ nɛ gbi ɔ de. (Hyɛ study note nɛ ngɛ Ní Tsumi 9:7; 22:9, nwtsty.) Lɔ ɔ se ɔ, e he ba hia nɛ nihi nɛ a piɛɛ Paulo he ɔ nɛ́ á ye bua lɛ kɛ ya Damasko akɛnɛ nina a ha nɛ e hɛngmɛ yu ɔ he je. Benɛ a su lejɛ ɔ, Anania, nɛ́ Yuda bi nɛ a ngɛ lejɛ ɔ le lɛ wawɛɛ ɔ ji nɔ nɛ ha nɛ Paulo bɔni nɔ́ hyɛmi ekohu.

¹⁵ Paulo ya nɔ nɛ e de kaa, benɛ e kpale e se kɛ yaa Yerusalɛm ɔ, Yesu je e he kpo kɛ tsɔɔ lɛ ngɛ sɔlemi we ɔ. Benɛ Yuda bi ɔmɛ nu nɔ́ nɛ ɔ, a mi mi fu wawɛɛ nɛ a kpa ngmlaa ke: “Je nyumu kaa kikɛ nɛ ɔ kɛ je zugba a nɔ, ejakaa e sɛ kaa e hiɔ wami mi!” (Níts. 22:22) Ta bulɔ nɔkɔtɔma a ngɔ Paulo kɛ ba ta buli a hi he ɔ konɛ e kɛ po e he piɛ. Ta bulɔ nɔkɔtɔma a suɔ nɛ e le nɔ́ he je nɛ Yuda bi ɔmɛ a mi mi fu Paulo jã a, enɛ ɔ he ɔ, e fã ta buli ɔmɛ kaa a fiaa Paulo kpa, konɛ a kɛ hla nɔ́ nɛ kɛ sane nɛ ɔ ba. Benɛ ta buli ɔmɛ pee klaalo nɛ a maa fiaa Paulo kpa a, e de mɛ ke Roma no ji lɛ, nɛ e bi mɛ ke ji a ngɛ he blɔ nɛ a fiaa lɛ kpa ngɛ Roma mlaa a nya. Mwɔnɛ ɔ hu ɔ, Yehowa Odasefohi da ma mlaahi fuu a nɔ kɛ fã a hemi kɛ yemi ɔ he. (Hyɛ dakahi nɛ ji “ Roma Mlaa a, Kɛ Roma Bi Ɔmɛ” kɛ “ Sanehi Nɛ A Ye Ngɛ Kojomi Hehi Ngɛ Wa Be Nɛ ɔ  Mi.”) Benɛ Roma ta bulɔ nɔkɔtɔma a nu nɛ Paulo de ke Roma no ji lɛ ɔ, e yɔse kaa e sa nɛ e gu blɔ kpa nɔ kɛ hlá sane ɔ mi. E nɔ jena a, e ha nɛ Sanhedri ɔ nɛ ji Yuda bi ɔmɛ a kojomi he ngua a mi bi ɔmɛ kpe konɛ a hla sanehi nɛ Yuda bi ɔmɛ kɛ po Paulo nya a mi.

16, 17. (a) Moo tsɔɔ nɔ́ nɛ ya nɔ benɛ Paulo kɛ Sanhedri ɔ tu munyu ɔ. (b) Mɛni nɔ hyɛmi nɔ́ Paulo pee ngɛ he si bami he benɛ a gba e nya nɔ ma a?

¹⁶ Paulo je munyu nɛ e tu kɛ fã e he ngɛ Sanhedri ɔ sisi ke: “Nyumuhi, nyɛmimɛ, i kɛ he nile nɛ bui mi fɔ kulaa ba ye je mi ngɛ Mawu hɛ mi kɛ ba si mwɔnɛ ɔ ligbi nɛ ɔ.” (Níts. 23:1) E de we nɔ́ kpa ko hu kɛ piɛɛ he. Ngmami ɔ de ke: “Kɛkɛ nɛ Anania nɛ ji osɔfo nɔkɔtɔma pe kulaa a fã nihi nɛ a daa si ngɛ e kasa nya a ke a gba e nya nɔ ma.” (Níts. 23:2) Jɛmi ji nɛ ɔ nɛ! Enɛ ɔ hu tsɔɔ kaa osɔfo nɔkɔtɔma pe kulaa a sume Paulo kulaa, nɛ e susu kaa Paulo ji lakpatsɛ be mi nɛ e tu we munyu kɛ fã e he po! E be nyakpɛ kaa Paulo hu ha lɛ heto ke: “Mawu maa fia mo nɔ́, mo gbogbo nɛ a kpa he kalo. Mo nɛ́ o hii si nɛ o ngɛ mi kojoe ngɛ Mlaa a nya a, anɛ mo nɔuu o ngɛ Mlaa a nɔ tɔ̃e nɛ o ngɛ fãe ke a fia mi nɔ́ lo?”​—Níts. 23:3.

¹⁷ Ni komɛ nɛ a daa si ngɛ lejɛ ɔ a he mi po ngɛ nɔ́ nɛ Paulo de ɔ he, se pi ngɛ e nya nɔ ma nɛ a gba a he! A de ke: “Anɛ o ngɛ Mawu we osɔfo nɔkɔtɔma pe kulaa a jɛe lo.” Paulo ba e he si oya nɔuu, nɛ je bumi kpo kɛ ha Mlaa a. E de ke: “Nyɛmimɛ, i li kaa osɔfo nɔkɔtɔma pe kulaa ji lɛ. Ejakaa a ngma ke, ‘E sɛ nɛ o tu o ma mi bi ɔmɛ a nɔ yelɔ ko he munyu yayami.’” d (Níts. 23:4, 5; 2 Mose 22:28) Kɛkɛ nɛ Paulo kɛ mɛ susu níhi a he ngɛ blɔ kpa nɔ jehanɛ. E le kaa nihi nɛ a ji Sanhedri bi ɔmɛ ɔ ji Saduki bi kɛ Farisi bi. Enɛ ɔ he ɔ, e de ke: “Nyumuhi, nyɛmimɛ, Farisi no ji mi, nɛ Farisi bi a binyumu ji mi. Gbogboehi a si tlemi ɔ he hɛ kɛ nɔ fɔmi he je nɛ a ngɛ mi kojoe ngɛ nɛ ɔ nɛ.”​—Níts. 23:6.

18. Mɛni he je nɛ Paulo de ke Farisi no ji lɛ ɔ, nɛ mɛni blɔ nɔ nɛ wa ma nyɛ maa gu nɛ waa kɛ nihi ma susu níhi a he kaa bɔ nɛ Paulo pee ɔ?

¹⁸ Mɛni he je nɛ Paulo de ke Farisi no ji lɛ ɔ? Ejakaa e ji “Farisi binyumu,”  enɛ ɔ he je ɔ, e ji Farisi no. Lɔ ɔ he ɔ, nihi babauu naa lɛ kaa loloolo ɔ Farisi no ji lɛ. e Mɛni he je nɛ Paulo tsɛ e he ke Farisi no, be mi nɛ e le kaa Farisi bi ɔmɛ hɛɛ susumi nɛ dɛ ngɛ gbogboehi a si tlemi ɔ he ɔ? A tsɔɔ kaa, Farisi bi ɔmɛ he ye kaa susuma gbo we, nɛ lɔ ɔ he ɔ, dalɔ susuma a maa kpale ba hi adesahi a nɔmlɔ tso ɔ mi ekohu. Paulo he we jamɛ a tsɔɔmi ɔ yi. E he ye kaa gbogboehi maa te si kaa bɔ nɛ Yesu tsɔɔ ɔ. (Yoh. 5:25-29) Se kɛ̃ ɔ, Paulo kɛ Farisi bi ɔmɛ kpaa gbi kaa hɛ nɔ kami ngɛ kaa wami ko ngɛ nɛ́ a ma ná hwɔɔ se. Wa ma nyɛ maa gu blɔ nɛ ɔ nɔ ke waa kɛ Katoliki bi kɛ Protestant bi ngɛ níhi a he susue. Wa ma nyɛ ma de ke wɔ hu wa he Mawu ye kaa mɛ. Se ngɛ anɔkuale mi ɔ, eko ɔ, a he Triniti tsɔɔmi ɔ ye, be mi nɛ wɔɔ lɛɛ wa he Mawu nɛ́ e nɔ́ ji Baiblo ɔ ye. Se kɛ̃ ɔ, waa kɛ mɛ tsuo wa he ye kaa Bɔlɔ ko ngɛ.

19. Mɛni he je nɛ pɛ sɛ Sanhedri bi ɔmɛ a kpɛti benɛ a kpe ɔ?

¹⁹ Paulo munyu ɔ ha nɛ Sanhedri ɔ mi gba. Ngmami ɔ de ke: “Hoo peemi nɛ nya wa te si, Farisi bi ɔmɛ a kuu ɔ mi womi ngmali komɛ te si nɛ a bɔni atsinyɛ jemi wawɛɛ ke: ‘Wa nɛ tɔmi ko ngɛ nyumu nɛ ɔ he, se ke mumi ko loo hiɔwe bɔfo ko kɛ lɛ tu munyu ɔ​—.’” (Níts. 23:9) Saduki bi ɔmɛ he we yi kaa hiɔwe bɔfohi ngɛ, enɛ ɔ he ɔ benɛ a nu munyu nɛ ɔ, a mi mi fu wawɛɛ! (Hyɛ daka nɛ ji “ Saduki Bi Ɔmɛ Kɛ Farisi Bi Ɔmɛ.”) Nya sami ɔ nya wa wawɛɛ hluu kaa Roma ta bulɔ nɔkɔtɔma a ba po Paulo he piɛ ekohu. (Níts. 23:10) Se loloolo ɔ, Paulo yí e he. Mɛni lɛ maa ba bɔfo Paulo nɔ jehanɛ? Wa maa na enɛ ɔ he ní fuu ngɛ yi nɛ nyɛɛ se ɔ mi.