Matsɛ Yemi Fiɛɛlɔ Nɛ Wa Suɔ:

Poo he foni kaa o piɛɛ Yesu bɔfo ɔmɛ a he kɛ daa si ngɛ Oliv Yoku ɔ nɔ. Yesu daa si ngɛ nyɛ hɛ mi. Benɛ e piɛ bɔɔ nɛ e maa je kɛ ho hiɔwe ya a, e de ke: “Se ke mumi klɔuklɔu ɔ ná ba nyɛ nɔ ɔ, nyɛ ma ná he wami nɛ nyɛ maa pee ye we odasefohi ngɛ Yerusalɛm, kɛ Yudea tsuo, kɛ Samaria, kɛ yaa su zugba a nɔ hehi nɛ a kɛ wawɛɛ ɔ.” (Níts. 1:8) Kɛ o maa nu he ha kɛɛ?

Eko ɔ, o maa nu he kaa ní tsumi nɛ Yesu kɛ ngɛ nyɛ dɛ woe ɔ he maa wa tsɔ. Eko ɔ, o maa hi o he bie ke, ‘Kɛ wɔ kaseli bɔɔ nɛ wa ngɛ hiɛ ɔ ma plɛ kɛ ye odase kɛ ya “su zugba a nɔ hehi nɛ a kɛ wawɛɛ ɔ” ha kɛɛ?’ Eko ɔ, o ma kai munyu nɛ Yesu tu gbɔkuɛ nɛ e nɔ jena loko e ma gbo ɔ. E de ke: “Nyɔguɛ nɔ kuɔ we pi e nyɔmtsɛ. Ke a wa mi yi mi ɔ, nyɛ hu a maa wa nyɛ yi mi; ke a ye ye munyu ɔ nɔ ɔ, nyɛ hu a maa ye nyɛ nɔ́ ɔ nɔ. Se ye biɛ ɔ he je ɔ, a maa pee ní nɛ ɔmɛ tsuo kɛ si nyɛ, ejakaa a li Nɔ nɛ e tsɔ mi ɔ.” (Yoh. 15:20, 21) Ke o susu munyu nɛ ɔmɛ a he ɔ, eko ɔ, lɔ ɔ ma ha nɛ o bi o he ke, ‘Kɛ ma plɛ kɛ ye odase kɛ pi si be mi nɛ i kɛ yi mi wami maa kpe ɔ ha kɛɛ?’

Mwɔnɛ ɔ, waa kɛ si fɔfɔɛ kaa jã nɔuu lɛ ngɛ kpee. Ní tsumi nɛ a kɛ wo wa dɛ kaa Yehowa Odasefohi ɔ biɔ nɛ waa ye nihi nɛ a ngɛ “je ma amɛ tsuo a mi ɔ” odase kɛ pi si ‘kɛ ya su zugba a nɔ hehi nɛ a kɛ wawɛɛ ɔ.’ (Mat. 28:19, 20) Kɛ wa ma plɛ kɛ gbe ní tsumi nɛ ɔ nya ha kɛɛ, titli ɔ, be mi nɛ nihi maa te si kɛ wo wɔ ɔ?

Bɔfo Ɔmɛ A Ní Tsumi ɔ he sane ɔ haa nɛ wa naa nɔ hyɛmi níhi nɛ ngɛ bua jɔmi, nɛ́ tsɔɔ bɔ nɛ Yehowa ye bua Yesu bɔfo ɔmɛ kɛ a nyɛmimɛ Kristofo ɔmɛ nɛ a hi si ngɛ jamɛ a be ɔ mi, nɛ́ a nyɛ nɛ́ a tsu fiɛɛmi ní tsumi ɔ ha. Womi nɛ ɔ nɛ o ngɛ kanee amlɔ nɛ ɔ maa ye bua mo nɛ́ o kase níhi fuu nɛ ya nɔ ngɛ Kristofohi nɛ ɔmɛ a si himi mi ɔ he ní, nɛ́ o na bɔ nɛ a bua jɔ kaa fiɛɛmi ní tsumi ɔ ya hɛ mi mlamlaamla ha. Ke o na bɔ nɛ níhi nɛ́ ya nɔ ngɛ kaseli ɔmɛ a be ɔ mi, kɛ níhi nɛ ngɛ nɔ yae ngɛ Mawu we bi a kpɛti mwɔnɛ ɔ kɔ ha a, e maa pee mo nyakpɛ. O maa na kaa ní tsumi nɛ wa ngɛ tsue mwɔnɛ ɔ, kɛ bɔ nɛ a to wa he blɔ nya ha konɛ wa tsu ní tsumi ɔ kɛ a nɔ́ ɔ kɔ pɛpɛɛpɛ. Ke o susu munyu nɛ ɔmɛ a he ɔ, e ma ha nɛ o ná nɔ mi mami nɛ mi wa kaa Yehowa Mawu ya nɔ nɛ e ngɛ e blɔ nya tomi ɔ fã nɛ ngɛ zugba a nɔ ɔ kudɔe.

Wa hɛ kɛ nɔ fɔmi, kɛ wa sɔlemi ji kaa Ní Tsumi womi ɔ he nɛ o ma susu ɔ, ma ha nɛ nɔ mi mami nɛ o ngɛ kaa Yehowa maa ye bua mo, nɛ e maa wo mo he wami kɛ gu e mumi klɔuklɔu ɔ nɔ konɛ o nyɛ nɛ o fĩ si ɔ mi maa wa. E ba lɛ kaa ní kasemi nɛ ngɛ womi nɛ ɔ mi nɛ́ o kɛ ma tsu ní ɔ nɛ́ wo mo he wami, nɛ́ o ya nɔ nɛ o ye Mawu Matsɛ Yemi ɔ he “odase kɛ pi si,” nɛ o ye bua ni kpahi nɛ a ba le Yehowa nɛ́ a ná hɛ nɔ kami kaa a maa hi si kɛ ya neneene.​—Níts. 28:23; 1 Tim. 4:16.