1, 2. Mɛni Saulo to kaa e maa pee ngɛ Damasko?

 NYUMU komɛ ngɛ blɔ nɔ kɛ yaa Damasko, nɛ a hɛɛ susumi yaya ko nɛ a yaa tsu he ní. A yaa konɛ a ya nu Yesu kaseli ɔmɛ ngɛ a wehi a mi nɛ a fĩ mɛ, a pue a hɛ mi si, nɛ a gbla mɛ si kɛ ya Yerusalɛm ngɛ Sanhedri ɔ hɛ mi konɛ a gbla a tue.

² A hɛ mi nyɛɛlɔ nɛ ji Saulo ɔ piɛɛ he nɛ a kɛ gbe nɔ ko momo. a Benɛ Yuda bi komɛ nɛ a peeɔ kpɛii ngɛ Yuda jami ɔ he ɔ fiaa Steven nɛ ji Yesu kaselɔ nɛ yeɔ anɔkuale ɔ tɛ nɛ e gbo ɔ, Saulo daa si ngɛ hyɛe, nɛ e fĩ a ní peepee ɔ se. Nɔ́ nɛ ɔ ya nɔ kɛ we. (Níts. 7:57–8:1) Kɛkɛ nɛ Saulo bɔni Yesu kaseli nɛ a ngɛ Yerusalɛm ɔ yi mi wami, nɛ ngɛ lɔ ɔ se ɔ, e ya ma kpahi a mi nɛ e ya pee jã nɔuu. E suɔ nɛ́ e je jami kuu nɛ e he ngɛ gbeye nɛ a le lɛ kaa “Blɔ ɔ” kɛ je kulaa.​—Níts. 9:1, 2; hyɛ daka nɛ ji “ He Blɔ Nɛ́ Saulo Ná Ngɛ Damasko.”

3, 4. (a) Mɛni ba Saulo nɔ? (b) Mɛni sane bimihi a he wa ma susu?

³ Amlɔ nɔuu nɛ la ko nɛ́ nya wa kpɛ kɛ bɔle Saulo. Nyumuhi nɛ e kɛ mɛ ngɛ blɔ ɔ hiae ɔ nya kpɛ a he nɛ a li nɔ́ nɛ a ma de. La a ha nɛ Saulo hɛngmɛ yu, nɛ e nɔ si ngɛ zugba. Benɛ e hyɛ we nɔ́ hu ɔ, e nu gbi ko kɛ je hiɔwe ke: “Saulo, Saulo, mɛni he je nɛ o ngɛ mi yi mi wae ɔ?” E nya kpɛ e he nɛ e bi ke: “Nyɔmtsɛ, mo mɛnɔ?” Heto nɛ Saulo nu ɔ pee lɛ nyakpɛ wawɛɛ. Gbi ɔ de ke: “Imi ji Yesu, nɔ nɛ o ngɛ lɛ yi mi wae ɔ nɛ.”​—Níts. 9:3-5; 22:9.

⁴ Mɛni wa ma nyɛ maa kase kɛ je munyu nɛ Yesu de Saulo kekleekle ɔ mi? Ke wa susu níhi nɛ ya nɔ benɛ Saulo ba plɛ Yesu se nyɛɛlɔ ɔ he ɔ, kɛ wa ma ná he se ha kɛɛ? Nɛ mɛni wa ma nyɛ maa kase ngɛ bɔ nɛ asafo ɔ kɛ tue mi jɔmi be nɛ a ná a tsu ní ha ngɛ Saulo tsakemi se ɔ mi?

5, 6. Mɛni wa ma nyɛ maa kase kɛ je nɔ́ nɛ Yesu de Saulo ɔ mi?

⁵ Benɛ Yesu tsi Saulo nya be mi nɛ e ngɛ blɔ nɔ kɛ yaa Damasko ɔ,  Yesu bi we ke: “Mɛni he je nɛ o ngɛ ye kaseli ɔmɛ yi mi wae ɔ?” Kaa bɔ nɛ wa na ngɛ yi nɔ ɔ, e de ke: “Mɛni he je nɛ o ngɛ mi yi mi wae ɔ?” (Níts. 9:4) Ngɛ anɔkuale mi ɔ, ke Yesu se nyɛɛli ngɛ nɔ́ nae ɔ, e nuɔ he ha mɛ.​—Mat. 25:34-40, 45.

⁶ Ke a ngɛ mo yi mi wae ngɛ hemi kɛ yemi nɛ o ngɛ ngɛ Kristo mi ɔ he je ɔ, mo ná nɔ mi mami kaa Yehowa kɛ Yesu tsuo le nyagba nɛ o kɛ ngɛ kpee ɔ. (Mat. 10:22, 28-31) Eko ɔ, Yehowa be nyagba a jee piɔ. Mo kai kaa Yesu ngɛ Saulo hyɛe nɛ́ e fĩ gbemi nɛ a gbe Steven ɔ se, kɛ benɛ e gbla kaseli anɔkualetsɛmɛ ɔmɛ kɛ je a we ɔmɛ a mi ngɛ Yerusalɛm ɔ. (Níts. 8:3) Se kɛ̃ ɔ, Yesu tsi we nihi nɛ a te si kɛ wo kaseli ɔmɛ ɔ a nya ngɛ jamɛ a be ɔ mi. Mohu ɔ, Yehowa gu Kristo nɔ nɛ e ha Steven kɛ kaseli kpa amɛ he wami nɛ́ a hia a konɛ a ya nɔ nɛ a ye anɔkuale.

7. Mɛni e sa nɛ o pee konɛ o nyɛ nɛ o fĩ si ngɛ yi mi wami mi?

⁷ Mo hu o ma nyɛ ma fĩ si ngɛ yi mi wami mi ke o pee níhi nɛ nyɛɛ se nɛ ɔmɛ: (1) Moo fia o pɛɛ si kaa o maa ya nɔ maa ye Yehowa anɔkuale ngɛ nɔ́ nɛ e maa ba a tsuo se. (2) Mo bi Yehowa nɛ e ye bua mo. (Filip. 4:6, 7) (3) Koo ye mo nitsɛ o he lue, mo si ha Yehowa. (Rom. 12:17-21) (4) Mo ná nɔ mi mami kaa Yehowa ma ha mo he wami nɛ o hia a nɛ o kɛ fĩ si kɛ ya si be nɛ e ma je ka a kɛ je.​—Filip. 4:12, 13.

8, 9. Kɛ Anania nu he ha kɛɛ ngɛ ní tsumi nɛ a kɛ wo e dɛ ɔ he?

⁸ Benɛ Saulo bi Yesu ke, “Nyɔmtsɛ, mo mɛnɔ?” nɛ́ Yesu ha lɛ heto se ɔ, e de lɛ ke: “Tee si nɛ o ho ma a mi ya, nɛ a maa tsɔɔ mo nɔ́ nɛ e sa kaa o pee.” (Níts. 9:6) Benɛ Saulo nyɛ we nɔ́ hyɛmi hu ɔ, nyumu ɔmɛ pɛtɛ e he kɛ ya Damasko, nɛ e ya sɔle nɛ e nyɛ ngma ngɛ lejɛ ɔ ligbi etɛ. Jamɛ a  be ɔ mi ɔ, Yesu tu Saulo he munyu kɛ ha kaselɔ ko ngɛ jamɛ a ma a mi. A tsɛɛ kaselɔ nɛ ɔ ke Anania, nɔ “nɛ Yuda bi ɔmɛ tsuo nɛ a ngɛ lejɛ ɔ tuɔ e he munyu kpakpa a.”​—Níts. 22:12.

⁹ Hyɛ bɔ nɛ Anania maa nu he ha! Yesu Kristo nɛ́ a tle lɛ si kɛ gbeje, nɛ́ e ji asafo ɔ Yi ɔ kɛ Anania tu munyu nɛ e ha lɛ ní tsumi klɛdɛɛ ko. Enɛ ɔ ji ní tsumi ko nɛ e hɛ mi ngɛ nyami wawɛɛ, se kɛ̃ ɔ, e wo e he gbeye! Benɛ e de lɛ ke e kɛ Saulo ya tu munyu ɔ, Anania he nɔ ke: “Nyɔmtsɛ, i nu nyumu nɛ ɔ he sane ngɛ nihi fuu a nya kaa e pee o ni klɔuklɔu ɔmɛ nɛ a ngɛ Yerusalɛm ɔ yi wu tso níhi babauu. Nɛ hiɛ ɔ hu e ná he wami kɛ je osɔfo nikɔtɔma amɛ a ngɔ konɛ e ba nuu nihi tsuo nɛ a tsɛɔ o biɛ ɔ.”​—Níts. 9:13, 14.

10. Mɛni wa ma nyɛ maa kase ngɛ bɔ nɛ Yesu kɛ Anania ye ha a mi?

 ¹⁰ Yesu kã we Anania hɛ mi ngɛ bɔ nɛ e nu he ha a he. Se mohu ɔ, Yesu ha lɛ blɔ tsɔɔmi nɛ ngɛ heii. Yesu de lɛ nɔ́ he je nɛ e suɔ nɛ́ e ya tsu ní tsumi nɛ ɔ. Nɛ enɛ ɔ tsɔɔ kaa Yesu susuɔ Anania he. Yesu de kɛ kɔ Saulo he ke: “Nyumu nɛ ɔ ji buɛ nɛ a hla kɛ ha mi konɛ e ngɔ ye biɛ ɔ kɛ ya ha je ma amɛ, kɛ matsɛmɛ, kɛ Israel bi ɔmɛ. Ejakaa ma tsɔɔ lɛ amanehlu babauu nɛ e sa kaa e na ngɛ ye biɛ ɔ he ɔ heii.” (Níts. 9:15, 16) Anania bu Yesu tue oya nɔuu. E ya slaa Saulo yi mi walɔ ɔ, nɛ e de lɛ ke: “Saulo, ye nyɛmi, Nyɔmtsɛ Yesu, nɔ nɛ e je e he kpo kɛ tsɔɔ mo ngɛ gbɛjegbɛ ɔ nɔ benɛ o ma a tsɔ mi, bɔ nɛ pee nɛ o hyɛ nɔ́ ekohu konɛ mumi klɔuklɔu nɛ e hyi mo tɔ.”​—Níts. 9:17.

11, 12. Mɛni wa kaseɔ ngɛ Yesu, Anania kɛ Saulo a sane ɔ mi?

¹¹ Wa kase ní babauu ngɛ sane nɛ ɔ nɛ kɔɔ Yesu, Anania, kɛ Saulo he ɔ mi. Kaa nɔ hyɛmi nɔ́ ɔ, wa kase kaa Yesu ngɛ fiɛɛmi ní tsumi ɔ kudɔe kaa bɔ nɛ e wo si kaa e maa pee ɔ. (Mat. 28:20) E ngɛ mi kaa Yesu kɛ wɔ tu we munyu tɛ̃ɛ mwɔnɛ ɔ mohu lɛɛ, se e kudɔɔ fiɛɛmi ní tsumi ɔ kɛ guɔ tsɔlɔ anɔkualetsɛ kɛ ní lelɔ ɔ nɛ́ ji nɔ nɛ e hla kaa e hyɛ e we mi bimɛ a nɔ ɔ nɔ. (Mat. 24:45-47) Ngɛ Blɔ Tsɔɔmi Ajla Toli ɔmɛ a blɔ tsɔɔmi nya a, fiɛɛli kɛ blɔ gbali yaa konɛ a ya hla nihi nɛ a suɔ kaa a maa le babauu kɛ kɔ Kristo he ɔ. Kaa bɔ nɛ wa na ngɛ yi nɛ sɛ hlami ɔ mi ɔ, nihi kaa jã a kpɛti nihi babauu sɔle konɛ Mawu nɛ ha mɛ blɔ tsɔɔmi, nɛ ngɛ lɔ ɔ se ɔ, e kɛ we nɛ Yehowa Odasefohi ya slaa mɛ.​—Níts. 9:11.

¹² Anania bu Yesu tue, nɛ e kplɛɛ ní tsumi nɛ e kɛ wo e dɛ ɔ nɔ, nɛ a jɔɔ lɛ. Anɛ o kplɛɛ fami nɛ́ a kɛ ha wɔ kaa waa ye odase kɛ pi si ɔ nɔ ke ji kaa ní tsumi nɛ ɔ he wa ha mo po lo? Ngɛ ni komɛ a blɔ fa mi ɔ, wehi a mi nɛ a maa ya kɛ nibwɔhi nɛ a kɛ mɛ maa sɛɛ ní ɔ ma nyɛ maa wo a he gbeye. E yeɔ ha ni komɛ hu kaa a maa fiɛɛ kɛ ha nihi ngɛ a ní tsumi he, ngɛ magbɛ nɔ kɛ tɛlifoo nɔ aloo á ngma sɛ womi. Anania ye e gbeye yemi ɔ nɔ nɛ e ná he blɔ kaa e maa ye bua Saulo konɛ e nine nɛ́ su mumi klɔuklɔu ɔ nɔ. b Anania ye manye ejakaa e he Yesu ye, nɛ e na Saulo kaa e nyɛmi Kristofo no. Wa ma nyɛ maa ye wa gbeye yemi ɔ nɔ kaa bɔ nɛ Anania pee ɔ ke wa he ye kaa Yesu ngɛ fiɛɛmi ní tsumi ɔ kudɔe, nɛ wa nu he ha ni ɔmɛ, nɛ wa naa nihi nɛ a bui wɔ tue amlɔ nɛ ɔ kaa a ma nyɛ ma ba pee wa nyɛmimɛ.​—Mat. 9:36.

13, 14. Ke o ngɛ Baiblo ɔ kasee nɛ a baptisii we mo lolo ɔ, mɛni o ma nyɛ maa kase ngɛ Saulo nɔ hyɛmi nɔ́ ɔ mi?

¹³ Saulo pee tsakemi oya nɔuu ngɛ nɔ́ nɛ e kase ɔ he. Benɛ Saulo ngɛ nɔ́  hyɛe ekohu ɔ, e ha nɛ a baptisi lɛ nɛ e kɛ kaseli nɛ a ngɛ Damasko ɔ ya kpeɔ. Se e pee babauu pe jã. “Amlɔ nɔuu ɔ, e bɔni fiɛɛmi ngɛ kpe he ɔmɛ kaa Yesu ji Mawu Bi ɔ nɛ.”​—Níts. 9:20.

¹⁴ Ke o ngɛ Baiblo ɔ kasee nɛ a baptisii we mo lolo ɔ, anɛ o maa pee kaa Saulo konɛ o pee tsakemi ngɛ o si himi mi oya nɔuu nɛ́ o kɛ nɔ́ nɛ o ngɛ kasee ɔ nɛ́ tsu ní lo? E ji anɔkuale kaa Saulo na nyakpɛ nɔ́ ko nɛ Kristo pee, nɛ atsinyɛ jemi ko be he kaa lɔ ɔ lɛ wo Saulo he wami nɛ a baptisi lɛ ɔ nɛ. Se ni kpahi hu na nyakpɛ níhi nɛ́ Yesu pee, se kɛ̃ ɔ, lɔ ɔ wui mɛ he wami nɛ́ a pee tsakemi ngɛ a si himi mi. Kaa nɔ hyɛmi nɔ́ ɔ, Farisi bi ɔmɛ a kuu ko ngɛ hyɛe benɛ Yesu tsa nyumu ko nɛ e nine gbo ɔ, nɛ jehanɛ se hu Yuda bi babauu le kaa Yesu lɛ tle Lazaro si ɔ nɛ. Se loloolo ɔ, enɛ ɔ tsuo wui a ti nihi fuu he wami konɛ a nyɛɛ Yesu se, nɛ ni komɛ po te si kɛ wo lɛ. (Maak. 3:1-6; Yoh. 12:9, 10) Se ngɛ Saulo blɔ fa mi ɔ, e tsake e tsui. Mɛni he je nɛ Saulo ba pee Kristo kaselɔ, se ni kpa amɛ ba pee we jã a? Ejakaa e yeɔ Mawu gbeye pe nɔmlɔ, nɛ e hɛ sa mɔbɔ nami nɛ Kristo je kpo kɛ tsɔɔ lɛ ɔ he. (Filip. 3:8) Ke mo hu o pee jã nɔuu ɔ, nɔ́ ko be nyɛe maa tsi mo blɔ nɛ o kpa fiɛɛmi konɛ o he nɛ su kɛ ha baptisimi.

15, 16. Mɛni Saulo pee ngɛ kpe he ɔmɛ, nɛ kɛ Yuda bi nɛ a ngɛ Damasko ɔ pee a ní ha kɛɛ?

¹⁵ Moo po he foni benɛ nimli kpekpemi ɔ a nya maa kpɛ a he nɛ a mi mi ma fu ha benɛ Saulo bɔni fiɛɛmi kɛ kɔ Yesu he ngɛ sɔlemi we ɔ he nɛ o hyɛ. A bi ke: “Anɛ pi nyumu nɛ ɔ ji nɔ nɛ e tua nihi nɛ a ngɛ Yerusalɛm nɛ a tsɛɔ biɛ nɛ ɔ lo?” (Níts. 9:21) Benɛ Saulo tsɔɔ nɔ́ he je nɛ e tsake susumi nɛ e hɛɛ ngɛ Yesu ɔ he ɔ, “e ma nɔ mi heii kɛ tsɔɔ mɛ kaa nɔ nɛ ɔ ji Kristo ɔ nɛ.” (Níts. 9:22) Se tsa pi nɔ fɛɛ nɔ nɛ ke a tsɔɔ nɔ́ ko mi heii ɔ nɛ́ e maa kplɛɛ nɔ. E be nyɛe ma tsake nihi nɛ a woɔ a he nɔ ɔ aloo nihi nɛ a peeɔ kpɛii ngɛ a blema kusumihi a he ɔ a susumi. Se kɛ̃ ɔ, Saulo ya nɔ nɛ e fiɛɛ.

¹⁶ Jeha etɛ se ɔ, loloolo ɔ Yuda bi nɛ a ngɛ Damasko ɔ ya nɔ nɛ a te si kɛ wo Saulo. Nyagbenyagbe ɔ, a to nɛ́ a maa gbe lɛ. (Níts. 9:23; 2 Kor. 11:32, 33; Gal. 1:13-18) Benɛ Saulo ba le susumi nɛ a hɛɛ ngɛ e he ɔ, e ha nɛ a ngɔ lɛ kɛ wo kusii mi nɛ a ngmɛɛ e he bɔɔbɔɔbɔɔ kɛ gu puɔ ko nɛ a je ngɛ gbogbo ɔ mi ɔ mi kɛ ba zugba. Luka tsɛ nihi nɛ a ye bua Saulo kɛ tu fo jamɛ a nyɔ mi ɔ kaa a ji “e [Saulo] kaseli.” (Níts. 9:25) Munyu nɛ ɔ tsɔɔ kaa, nihi nɛ a bu Saulo tue ngɛ Damasko ɔ a kpɛti ni komɛ tsake a subai nɛ a ba pee Kristo se nyɛɛli.

17. (a) Kɛ nihi peeɔ a ní ha kɛɛ ngɛ Baiblo ɔ mi anɔkuale ɔ he? (b) Mɛni e sa nɛ waa ya nɔ nɛ waa pee, nɛ mɛni he je?

¹⁷ Kekleekle be nɛ o kɛ o weku li, o huɛmɛ kɛ ni kpahi sɛɛ níhi nɛ o ngɛ kasee ngɛ Baiblo ɔ mi ɔ he ní ɔ, eko ɔ, o hyɛ blɔ kaa nɔ fɛɛ nɔ maa kplɛɛ Baiblo ɔ mi anɔkuale ɔ nɔ. Eko ɔ, a ti ni komɛ bu tue nɛ ni komɛ hu bui tue. E ji anɔkuale kaa, wa weku mi bimɛ ma nyɛ maa nyɛ wɔ. (Mat. 10:32-38) Se kɛ̃ ɔ, ke o ya o hɛ mi ngɛ blɔ nɔ nɛ o guɔ nɛ o kɛ nihi susuɔ níhi a he kɛ jeɔ Ngmami ɔ mi, nɛ o ya nɔ nɛ o ba o je mi kaa Kristofo no ɔ, eko ɔ, lɔ ɔ ma ha nɛ pee  se ɔ, nihi nɛ a teɔ si kɛ woɔ mo ɔ po ma nyɛ ma tsake.​—Níts. 17:2; 1 Pet. 2:12; 3:1, 2, 7.

18, 19. (a) Benɛ Banaba ye Saulo he odase ɔ, mɛni je mi kɛ ba? (b) Kɛ wa ma plɛ kɛ kase Banaba kɛ Saulo ha kɛɛ?

¹⁸ Benɛ Saulo ya Yerusalɛm ɔ, kaseli ɔmɛ he we yi kaa Saulo ba pee kaselɔ amlɔ nɛ ɔ, nɛ sisi numi ngɛ he kaa a nu he jã. Se benɛ Banaba ye Saulo he odase ɔ, bɔfo ɔmɛ kplɛɛ e nɔ, nɛ e kɛ mɛ hi si be bɔɔ. (Níts. 9:26-28) Saulo kɛ hɛ si kami tsu ní, se kɛ̃ ɔ, sane kpakpa a nɛ́ e maa fiɛɛ ɔ he zo pee we lɛ. (Rom. 1:16) E kɛ kã fiɛɛ ngɛ Yerusalɛm, he nɛ be ko nɛ be ɔ e wa Yesu kaseli ɔmɛ yi mi ngɛ ɔ. Benɛ Yuda bi nɛ a ngɛ Yerusalɛm ɔ na kaa Saulo nɛ́ a susu kaa e maa nyɛɛ a hɛ mi kɛ gbe Kristofo ɔmɛ ba pee Kristofo no ɔ, a mi mi fu wawɛɛ nɛ a to kaa a maa gbe lɛ. “Benɛ nyɛmimɛ ɔmɛ ná le enɛ ɔ, a kɛ [Saulo] kple kɛ ya Kaisarea, nɛ a wo lɛ blɔ kɛ ho Taaso ya.” (Níts. 9:30) Saulo kɛ blɔ tsɔɔmi nɛ Yesu gu asafo ɔ nɔ kɛ ha a tsu ní. Nɛ Saulo kɛ asafo ɔ tsuo ná he se.

¹⁹ Mo kadi kaa Banaba nitsɛ je e suɔmi mi kɛ ye bua Saulo. Atsinyɛ jemi ko be he kaa, mi mi jɔmi nɛ Banaba je kpo kɛ tsɔɔ Saulo ɔ ha nɛ huɛ bɔmi kpakpa ba hi Yehowa sɔmɔli nɛ a ngɛ kã nɛ ɔ a kpɛti. Kaa bɔ nɛ Banaba pee ɔ, anɛ mo hu o jeɔ o tsui mi kɛ yeɔ bua nihi nɛ a ba asafo ɔ mi kɛ we ɔ, nɛ o kɛ mɛ yaa fiɛɛmi nɛ o yeɔ bua mɛ konɛ a ya a hɛ mi ngɛ Mawu jami mi lo? Ke o peeɔ jã a, o ma ná jɔɔmihi fuu. Ke fiɛɛlɔ ehe ji mo ɔ, anɛ o kplɛɛɔ yemi kɛ buami nɛ ni kpahi kɛ haa mo ɔ nɔ kaa bɔ nɛ Saulo pee ɔ lo? Ke o kɛ nihi nɛ a ngɛ níhi a si kpami babauu ɔ bla kɛ tsu ní ngɛ fiɛɛmi mi ɔ, o maa ya o hɛ mi ngɛ fiɛɛmi ní tsumi ɔ mi, o ma ná bua jɔmi babauu, nɛ huɛ bɔmi kpakpa maa hi nyɛ kpɛti be fɛɛ be.

20, 21. Kɛ Mawu sɔmɔli nɛ a hi si blema a kɛ mwɔnɛ ɔ ngɔ ‘tue mi jɔmi behi’ nɛ a ná a kɛ tsu ní ha kɛɛ?

²⁰ Benɛ Saulo ba pee Kristofo no nɛ́ a ha nɛ e je Yerusalɛm slɔkee se ɔ, “asafo ɔ nɛ ngɛ Yudea, kɛ Galilea, kɛ Samaria ní ɔmɛ a mi ɔ tsuo sɛ tue mi jɔmi be ko mi.” (Níts. 9:31) Kɛ kaseli ɔmɛ kɛ tue mi jɔmi be nɛ ɔ tsu ní ha kɛɛ? (2 Tim. 4:2) Ngmami ɔ de ke “a he ngɛ wae.” Bɔfo ɔmɛ kɛ nikɔtɔma kpa amɛ wo kaseli ɔmɛ a hemi kɛ yemi ɔ mi he wami, nɛ a ye bua asafo ɔ bɔ nɛ pee nɛ nyɛmimɛ ɔmɛ nɛ a ‘nyɛɛ ngɛ Yehowa gbeye yemi kɛ mumi klɔuklɔu ɔ bua womi mi.’ Kaa nɔ hyɛmi nɔ́ ɔ, Petro ngɔ jamɛ a be ɔ kɛ wo kaseli ɔmɛ nɛ a ngɛ Lida nɛ́ ngɛ Sharon Nga a nɔ ɔ he wami. E mɔde bɔmi ɔ ha nɛ nihi babauu nɛ a ngɛ lejɛ ɔ kpɔ ɔ mi ɔ ba “Nyɔmtsɛ ɔ ngɔ.” (Níts. 9:32-35) Kaseli ɔmɛ ha we nɛ ní kpahi nɛ gbla a juɛmi, mohu ɔ, a bɔ mɔde wawɛɛ nɛ a ye bua a sibi, nɛ a fiɛɛ sane kpakpa a. Enɛ ɔ ha nɛ asafo ɔ ‘yi ba bli.’

²¹ Maa pee jeha 1990 ɔ mi ɔ, Yehowa Odasefohi nɛ a ngɛ mahi fuu a nɔ ɔ sɛ “tue mi jɔmi be ko” kaa kikɛ mi. Nɔ yeli nɛ a te si kɛ wo Mawu we bi jehahi babauu ɔ a nɔ yemi ɔ ba nyagbe si kake too, nɛ nya tsimi komɛ nɛ a kɛ fɔ wa  fiɛɛmi ní tsumi ɔ nɔ ɔ hu a je. Odasefohi akpehi abɔ ngɔ he blɔ ɔ kɛ fiɛɛ kɛ ha nihi, nɛ enɛ ɔ ha nɛ nihi babauu nu sane kpakpa a.

22. Mɛni o maa pee konɛ o kɛ he jɔmi be nɛ o ngɛ amlɔ nɛ ɔ nɛ tsu ní saminya?

²² Anɛ o kɛ he jɔmi be nɛ o ngɛ amlɔ nɛ ɔ ngɛ ní tsue saminya lo? Ke o ngɛ ma ko nɛ nihi ngɛ he blɔ nɛ a kɛ a he woɔ Mawu jami mi faa a mi ɔ, Satan maa bɔ mɔde kaa e ma ha nɛ o ngɔ o be kɛ di he lo nya níhi fuu a se pe nɛ o maa ngɔ o juɛmi kɛ ma Yehowa sɔmɔmi nɔ. (Mat. 13:22) Ko ha nɛ nɔ́ ko nɛ gbla o juɛmi. Moo bɔ mɔde kaa o kɛ tue mi jɔmi be nɛ o ngɛ amlɔ nɛ ɔ ma tsu ní saminya. Moo na jamɛ a be ɔ kaa he blɔ nɛ o ná nɛ o kɛ maa ye odase kɛ pi si, nɛ́ o kɛ wo asafo ɔ he wami. Kai kaa si fɔfɔɛ nɛ o ngɛ mi ɔ ma nyɛ ma tsake tlukaa.

23, 24. (a) Mɛni otihi wa kaseɔ ngɛ Tabita sane ɔ mi? (b) Mɛni e sa nɛ waa fia wa pɛɛ si kaa wa maa pee?

²³ Mo susu nɔ́ nɛ ba kaselɔ ko nɛ a tsɛɛ lɛ Tabita, aloo Dɔkas nɔ ɔ he nɛ o hyɛ. E hi Yopa, nɛ ji ma ko nɛ e kɛ Lida he kɛ we ɔ mi. Nyɛmiyo anɔkualetsɛ nɛ ɔ kɛ e be kɛ he lo nya níhi nɛ e ngɛ ɔ tsu ní ngɛ nile mi, nɛ “kpakpa peemi hyi lɛ tɔ, nɛ nihi a he peeɔ lɛ mɔbɔ nɛ e keɔ mɛ ní.” Tlukaa a, e ba nu hiɔ nɛ e gbo. c E gbenɔ ɔ ha nɛ kaseli nɛ a ngɛ Yopa a ye aywilɛho, titli ɔ, yalɔyi nɛ e je mi mi jɔmi kpo kɛ tsɔɔ mɛ ɔ. Benɛ Petro ya su we ɔ mi ngɛ he nɛ a kɛ e gbogboe ɔ fɔ ɔ, e pee nyakpɛ nɔ́ ko nɛ Yesu Kristo bɔfo ɔmɛ a kpɛti nɔ ko pee we nɔ́ ko kaa jã hyɛ. Petro sɔle nɛ e tle Tabita si! Moo po bua jɔmi nɛ yalɔyi ɔmɛ kɛ kaseli ɔmɛ ma ná benɛ Petro tsɛ mɛ kɛ ba tsu ɔ mi nɛ e kɛ Tabita tsɔɔ mɛ ɔ he foni nɛ o hyɛ. Hyɛ bɔ nɛ nɔ́ nɛ ya nɔ nɛ ɔ maa wo mɛ he wami kɛ ha kahi nɛ e be kɛe nɛ a kɛ maa kpe ɔ ha! A nu nyakpɛ “nɔ́ nɛ ɔ he ngɛ Yopa tsuo, nɛ nihi fuu ba he Nyɔmtsɛ ɔ ye.”​—Níts. 9:36-42.

²⁴ Wa ma nyɛ maa kase otihi enyɔ nɛ a he hia ngɛ Tabita sane nɛ́ e taa nɔ tsui he ɔ mi. (1) Wa wami ma nyɛ maa je wa dɛ ngɛ be kpiti mi. Hyɛ bɔ nɛ e he hia ha kaa wa ma ná biɛ kpakpa ngɛ Mawu hɛ mi amlɔ nɛ ɔ nɛ́ wa ngɛ he blɔ nɛ waa kɛ maa pee jã a! (Fiɛlɔ 7:1) (2) Gbogboehi a si tlemi ɔ maa ba mi kokooko. Yehowa na ní kpakpahi nɛ́ Tabita pee ɔ, nɛ Yehowa jɔɔ lɛ ngɛ he. E ma kai ní kpakpahi nɛ́ wɔ hu wa pee ɔ, nɛ e ma tle wɔ si ke e ba lɛ kaa wa gbo loko Harmagedon su  po. (Heb. 6:10) Lɔ ɔ he ɔ, ke wa ngɛ ‘behi nɛ a mi wa mi’ aloo ‘tue mi jɔmi behi’ a mi amlɔ nɛ ɔ, nyɛ ha nɛ waa ya nɔ nɛ waa ye Kristo he odase kɛ pi si.​—2 Tim. 4:2.