Atsinyɛ jemi ko be he kaa ke o nu sane kpakpa a, o bua jɔɔ. Ngɛ anɔkuale mi ɔ, sane kpakpa ko ngɛ kɛ ha mo kɛ o suɔli tsuo.

Sane kpakpa nɛ ɔ ngɛ Baiblo ɔ mi. Yehowa Mawu, nɛ e ji je ɔ tsuo Bɔlɔ ɔ lɛ ha nɛ a ngma jehahi babauu ji nɛ ɔ. Wa ma susu Baiblo ɔ mi womi eywiɛ nɛ a hɛɛ sane kpakpa kɛ ha adesahi tsuo ɔ he ngɛ womi nɛ ɔ mi. Mawu ha nɛ nyumuhi nɛ a ngma Baiblo mi womi nɛ ɔmɛ ɔ ngɔ mɛ nitsɛmɛ a biɛ kɛ fɔ womi ɔmɛ a nɔ. Mɛ ji Mateo, Marko, Luka, kɛ Yohane.

Nihi fuu tsɛɛ Baiblo mi womi nɛ ɔmɛ ke Sane Kpakpa eywiɛ ɔmɛ. Womi eywiɛ ɔmɛ tsuo sɛɛ sane kpakpahi nɛ kɔɔ Yesu he. Womi ɔmɛ tsuo tsɔɔ kaa Yesu ji Mawu Matsɛ Yemi ɔ nya Matsɛ, nɛ Mawu maa gu e nɔ kɛ he adesahi a yi wami. A tsɔɔ hu kaa Mawu maa jɔɔ nihi tsuo nɛ a ma ná Yesu mi hemi kɛ yemi ɔ kɛ maa ya neneene.​​—Marko 10:17, 30; 13:13.

Eko ɔ, o ma bi ke, mɛni he je nɛ Mawu ha nɛ nihi eywiɛ sɔuu lɛ a ngma Yesu si himi, kɛ níhi nɛ e ba tsɔɔ ɔ he sane ɔ?

Ngɛ anɔkuale mi ɔ, se nami ngɛ he kaa Mawu ha nɛ nihi eywiɛ ngma Yesu he sane. Kaa nɔ hyɛmi nɔ́ ɔ, ngɔɔ lɛ kaa nyumuhi eywiɛ daa si ngɛ tsɔɔlɔ ko nɛ e he biɛ wawɛɛ kasa nya. Nɔ nɛ daa si ngɛ e hɛ mi ɔ ji tó tsulɔ. Nɔ nɛ daa si ngɛ e hiɔ nɔ ɔ ji tsopa peelɔ. Nɔ nɛ daa si ngɛ e muɔ nɔ ɔ ji wo hɛlɔ, nɛ e ji tsɔɔlɔ ɔ huɛ nɛ e suɔ e sane. Nyagbe nɔ ɔ ji jokuɛyo kulaa ngɛ a kpɛti, nɛ lɛɛ e daa si ngɛ tsɔɔlɔ ɔ se nɛ e ngɛ nɔ́ hyɛe kɛkɛ. Nyumu eywiɛ nɛ ɔmɛ tsuo yeɔ anɔkuale, nɛ a ti nɔ tsuaa nɔ maa ngma níhi nɛ e susu kaa a he hia. Ke a ti nɔ tsuaa nɔ ngma tsɔɔlɔ ɔ he sanehi, kɛ níhi nɛ e tsu ɔ, womi eywiɛ ɔmɛ ma ha nɛ wa maa le e he sanehi, kɛ níhi nɛ ya nɔ ɔ fitsofitso. Ke wa susu níhi nɛ ni eywiɛ ɔmɛ ngma a he  kakaaka, nɛ wa kai kaa e slo juɛmi nɛ a ti nɔ tsuaa nɔ hɛɛ ɔ, e maa ye bua wɔ nɛ wa maa nu níhi nɛ tsɔɔlɔ ɔ pee, kɛ munyuhi nɛ e tu ɔ sisi saminya. Enɛ ɔ ha nɛ wa na kaa se nami ngɛ he kaa nihi eywiɛ ngma Yesu, nɛ ji Tsɔɔlɔ Ngua a si himi he sane.

Tó tsulɔ ɔ ngma e munyu ɔ bɔ nɛ e maa ta Yuda bi a tsui he. Lɔ ɔ he ɔ, e gba Yesu tsɔɔmi ɔmɛ, kɛ níhi nɛ ya nɔ ɔ mi ngɔ wo kuuhi a mi, konɛ e ye bua nihi nɛ a maa kane ɔ. Tsopa peelɔ ɔ hu tu hiɔtsɛmɛ kɛ glɔtsɛmɛ nɛ Yesu tsa mɛ ɔ a he munyu titli. E tui ní komɛ nɛ tó tsulɔ ɔ ngma a he munyu tsɔ, nɛ ekomɛ hu lɛɛ e tu a he munyu ngɛ blɔ kpa nɔ. Tsɔɔlɔ ɔ huɛ ɔ hu ngma tsɔɔlɔ ɔ suhi, kɛ bɔ nɛ e peeɔ e ní ha a he munyu titli. Nɔ nɛ e wɛ ngɛ a kpɛti ɔ ngma e munyu ɔmɛ kpitikpiti, nɛ a ngɛ tɛɛ. Se munyuhi nɛ a ti nɔ tsuaa nɔ ngma a da pɛpɛɛpɛ. Yesu he sane nɛ a ngma si eywiɛ sɔuu ɔ ha nɛ wa nu níhi nɛ e pee, kɛ níhi nɛ e tsɔɔ, kɛ suhi nɛ e je kpo ɔ sisi fitsofitso.

Ke nɔ ko de ke ‘Mateo Sane Kpakpa a,’ aloo ‘Yohane Sane Kpakpa a,’ tɔ̃mi ko be he. Ejakaa “sane kpakpa a nɛ kɔɔ Yesu Kristo” he ɔ lɛ a ngma a nɛ. (Marko 1:1) Se sane kpakpa nɛ kɔɔ Yesu he ɔ kake pɛ lɛ ngɛ, nɛ a ngma ngɛ womi slɔɔtohi eywiɛ mi, nɛ nɔ tsuaa nɔ ma nyɛ ma ná he se.

Mawu Munyu ɔ kaseli fuu ngɔ munyu nɛ Mateo, Marko, Luka, kɛ Yohane ngma a kɛ to a sibi a he, nɛ a da nɔ kɛ ngma Yesu he sanehi nyatsɔɔ. Maa pee jeha 170 ngɛ Kristo fɔmi se ɔ, Siria no ko nɛ e ji womi ngmalɔ nɛ a tsɛɛ lɛ ke Tatian ɔ bɔ mɔde kaa e maa pee jã. E na kaa sane kpakpa eywiɛ ɔmɛ tsuo je Mawu ngɔ, nɛ lɛ tsuo da. Enɛ ɔ he ɔ, ngɛ e womi nɛ ji Diatessaron ɔ mi ɔ, e to níhi nɛ ya nɔ ngɛ Yesu si himi mi, kɛ bɔ nɛ e tsu e sɔmɔmi ní tsumi ɔ ha a nya nyatsɔɔ.

Jã a kɛ̃ nɛ a pee Yesu Ji Blɔ ɔ, Anɔkuale ɔ, Kɛ Wami ɔ womi ɔ. Se womi nɛ ɔ ngɛ slɔɔto, nɛ e mi munyu ɔmɛ hu da. E ngɛ slɔɔto ejakaa amlɔ nɛ ɔ, wa nu Yesu gbami ɔmɛ, kɛ e nɔ́ hetomi ní ɔmɛ, kɛ bɔ nɛ a ngɛ mi bae ha a sisi wawɛɛ. Enɛ ɔ ha nɛ wa nu munyuhi nɛ e tu ɔ sisi saminya, nɛ wa na bɔ nɛ níhi ya nɔ ha ngɛ Yesu be ɔ mi. Níhi nɛ si tsuali na a hu ye bua nɛ wa nu ní komɛ nɛ a he hia, kɛ nɔ́ he je nɛ Sane Kpakpa ngmali ɔmɛ ngma a womi ɔmɛ ngɛ blɔ ekpaekpa nɔ ɔ sisi. Ngɛ anɔkuale mi ɔ, wa be nyɛe maa pee kpɛii ngɛ bɔ nɛ níhi ya nɔ nyatsɔɔ ngɛ Yesu si himi mi ɔ he. Se bɔ nɛ a tsɔɔ kaa níhi ya nɔ ha ngɛ womi nɛ ɔ mi ɔ da, nɛ sisi numi hu ngɛ he.

Ke o ngɛ womi nɛ ɔ kanee ɔ, ha nɛ otihi nɛ ngɛ mi kɛ ha o kɛ o suɔli ɔ nɛ hi o juɛmi mi. Mo kai kaa Yesu Kristo nitsɛ de Toma ke: “Imi ji blɔ ɔ, kɛ anɔkuale ɔ, kɛ wami ɔ. Nɔ ko nɔ ko yɛ Tsɛ ɔ ngɔ kaa ja e gu ye nɔ.”​​—Yohane 14:6.

Yesu Ji Blɔ ɔ, Anɔkuale ɔ, Kɛ Wami ɔ maa ye bua mo konɛ o nu nɔ́ he je nɛ Yesu ji “blɔ ɔ” sisi saminya. Yesu pɛ nɛ wa ma nyɛ maa gu e nɔ kɛ hɛ wɔ kɛ su Yehowa Mawu he ngɛ sɔlemi mi. Jehanɛ hu ɔ, Yesu nɔ a maa gu kɛ dla waa kɛ Mawu wa kpɛti. (Yohane 16:23; Roma Bi 5:8) Lɔ ɔ he ɔ, Yesu nɔ pɛ wa ma nyɛ maa gu nɛ waa kɛ Mawu ma ná huɛ bɔmi kpakpa.

Yesu ji “anɔkuale ɔ.” E tu anɔkuale ɔ, nɛ e hi si ngɛ anɔkuale ɔ nya kaa nɔ́ nɛ e mi nɛ anɔkuale je kɛ ba. Ngmamihi fuu ‘ba mi kɛ gu Yesu Kristo nɔ.’ (2 Korinto Bi 1:20; Yohane 1:14) Jamɛ a gbami ɔmɛ yeɔ bua wɔ nɛ wa naa níhi nɛ Yesu ngɛ tsue konɛ Mawu yi mi tomi nɛ ba mi.​​—Kpojemi 19:10.

Jehanɛ se hu ɔ, Yesu Kristo ji “wami ɔ.” E ngɔ e wami kɛ e muɔ nɛ ye mluku ɔ kɛ sã afɔle kɛ kpɔ wɔ, nɛ e bli blɔ kɛ ha wɔ konɛ wa ná ‘wami nitsɛnitsɛ,’ nɛ ji “neneene wami.” (1 Timoteo 6:12, 19; Efeso Bi 1:7; 1 Yohane 1:7) Jehanɛ se hu ɔ, Yesu ji “wami ɔ,” ejakaa e ma tle nihi ayɔhi abɔ nɛ a gbo ɔ si, konɛ a hi si ngɛ Paradeiso zugba a nɔ kɛ ya neneene.​​—Yohane 5:28, 29.

E sa nɛ wɔ tsuo wa bua nɛ jɔ blɔ nya nɛ Yesu ngɛ ɔ he. Wa he ye kaa ke o ngɛ ‘Yesu ji blɔ ɔ, anɔkuale ɔ, kɛ wami ɔ’ kasee ɔ, o bua maa jɔ níhi babauu nɛ o maa na ngɛ mi ɔ he.