Yesu gba e kaseli ɔmɛ enyɔɔnyɔ nɛ e tsɔɔ mɛ bɔ nɛ a ma tsu fiɛɛmi ní tsumi ɔ ha. Se pi lɔ ɔ pɛ nɛ e tsɔɔ mɛ. Akɛnɛ e le kaa a kɛ si temi kɛ womi maa kpe he je ɔ, e de mɛ ke: ‘Hyɛ i ngɛ nyɛ tsɔe kaa jijɔhi kɛ yaa ogbeteehi a kpɛti. Nyɛ hɛ nɛ hi nyɛ he nɔ; ejakaa nihi maa nuu nyɛ, nɛ a maa kojo nyɛ, nɛ a maa fiaa nyɛ kpa ngɛ kpe he ɔmɛ. Ye he ɔ, a maa ngɔ nyɛ kɛ ya ganɔhi, kɛ matsɛmɛ a hɛ mi.’​​—Mateo 10:16-18.

Yesu se nyɛɛli ɔmɛ kɛ si temi kɛ womi nɛ nya wa maa kpe mohu lɛɛ, se Yesu wo mɛ si ke: “Ke a ngɔ nyɛ kɛ ho ɔ, nyɛ ko hao nyɛ he ngɛ nɔ́ nɛ nyɛ ma de, kɛ bɔ nɛ nyɛ ma plɛ kɛ de lɛ ha a he. Ke be ɔ su ɔ, a maa tsɔɔ nyɛ nɔ́ nɛ nyɛ ma de. Ejakaa pi nyɛ nitsɛmɛ nɛ nyɛ maa tu munyu ɔ, se mohu nyɛ Tsɛ ɔ mumi ɔ nɛ maa tu munyu kɛ gu nyɛ nɔ.” Yesu tsa nɔ ke: “Nyɛmi maa ngɔ e nyɛmi ngɔ ha nɛ a ya gbe lɛ, nɛ tsɛmɛ hu maa ngɔ a bimɛ ngɔ ha jã nɔuu. Bimɛ maa te si ngɔ wo a fɔli, nɛ a ma ha nɛ a gbe mɛ. Ye he ɔ, nihi tsuo maa nyɛ nyɛ. Se nɔ nɛ ma wlua lɛ kɛ yaa si nyagbe ɔ, a ma he e yi wami.”​​—Mateo 10:19-22.

Akɛnɛ fiɛɛmi ní tsumi ɔ he hia wawɛɛ he je ɔ, Yesu wo e kaseli ɔmɛ ga kaa a ha nɛ a hɛ mi nɛ tɛ̃, konɛ a nyɛ nɛ a tsa a ní tsumi ɔ nɔ. E de mɛ ke: “Ke a ngɛ nyɛ yi mi wae ngɛ ma ko mi ɔ, nyɛɛ tu fo kɛ ya ma kpa mi. Niinɛ, i ngɛ nyɛ dee ke, nyɛ be nyɛ ní tsumi ɔ nya gbee ngɛ Israel ma amɛ tsuo a mi, loko Nɔmlɔ Bi ɔ maa ba.”​​—Mateo 10:23.

Blɔ tsɔɔmi, kɛ he wami womi, kɛ kɔkɔ bɔmi nɛ sa nɛ Yesu kɛ ha kaseli 12 ɔmɛ ɔ maa ye bua mɛ nitsɛ! Se nihi nɛ a maa pee Yesu kaseli ngɛ e gbenɔ kɛ e si temi se ɔ tsuo ma ná blɔ tsɔɔmi nɛ ɔmɛ a he se wawɛɛ. Wa naa enɛ ɔ ngɛ nɔ́ nɛ Yesu de kɛ tsa nɔ ɔ mi. E de ke: “Nihi tsuo maa nyɛ nyɛ.” Enɛ ɔ tsɔɔ kaa pi nihi nɛ a maa fiɛɛ kɛ ha a pɛ nɛ a maa nyɛ mɛ. Jehanɛ hu ɔ, wa nɛ́ ngɛ Baiblo ɔ mi he ko kaa benɛ kaseli ɔmɛ ngɛ fiɛɛe ngɛ Galilea a, a ngɔ mɛ kɛ ya da ganɔhi kɛ matsɛmɛ a hɛ mi, aloo kaa a ti ni komɛ a weku li je mɛ kɛ ha kaa a gbe mɛ.

Atsinyɛ jemi ko be he kaa benɛ Yesu kɛ e bɔfo 12 ɔmɛ ngɛ munyu nɛ ɔ tue ɔ, e susu nihi nɛ a ma tsu fiɛɛmi ní tsumi ɔ hwɔɔ se ɔ hu a he. Mo susu nɔ́ nɛ e de kaa e kaseli ɔmɛ be fiɛɛmi ní tsumi ɔ nya gbee loko “Nɔmlɔ Bi ɔ maa ba” a he nɛ o hyɛ. Yesu ngɛ tsɔɔe kaa e kaseli ɔmɛ be Matsɛ Yemi ɔ he sane kpakpa a fiɛɛmi nya gbee loko e maa ba kaa kojolɔ nɛ Mawu hla.

E sɛ nɛ e pee kaseli ɔmɛ nyakpɛ kaa nihi maa te si kɛ wo mɛ ngɛ a fiɛɛmi ní tsumi ɔ mi, ejakaa Yesu de mɛ ke: “Kaselɔ pã we e tsɔɔlɔ, nɛ  nyɔguɛ hu pã we e nyɔmtsɛ.” Pee se ɔ, Yesu munyu ɔ mi ba tɛ̃ heii. A wa lɛ yi mi nɛ a pee lɛ ní sɛ níhi ngɛ Matsɛ Yemi ɔ he sane kpakpa a nɛ e fiɛɛ ɔ he, nɛ jã a kɛ̃ nɛ a maa pee e kaseli ɔmɛ. Lɔ ɔ he ɔ, e de mɛ ke: ‘Nihi nɛ gbeɔ nɔmlɔ tso ɔ, se klaa a lɛɛ a nyɛ we lɛ gbemi ɔ, nyɛ ko ye mɛ gbeye. Mawu nɛ nyɛɔ kpataa nɔmlɔ tso ɔ, kɛ klaa a tsuo a hɛ mi ngɛ Gehena a, lɛ mohu nyɛɛ ye gbeye.’​​—Mateo 10:24, 28.

Yesu pee enɛ ɔ he nɔ hyɛmi nɔ́ kpakpa. E hla kaa e maa gbo mohu pe nɛ e ma kua Yehowa nɛ ngɛ he wami pe nɔ tsuaa nɔ ɔ. Mawu Ope ɔ pɛ nɛ e ma nyɛ ma kpata “klaa” (nɛ ji wami nɛ nɔ ko ma nyɛ ma ná hwɔɔ se ɔ) hɛ mi, aloo e ma tle nɔ ɔ si nɛ e ná neneene wami. Hyɛ bɔ nɛ munyu nɛ ɔ maa wo bɔfo 12 ɔmɛ he wami ha!

Yesu ngɔ nɔ́ hetomi nɔ́ kɛ tsɔɔ mɛ bɔ nɛ Mawu jeɔ suɔmi mi nɛ e hyɛɛ e we bi a nɔ ɔ mi. E de ke: ‘Otoklii enyɔ ɔ, anɛ pi sika nɛ a yeɔ ɔ mi nyafii pe kulaa kake pɛ nɛ a juaa mɛ lo? Se a ti nɔ kake nɔɛ zugba nɛ nyɛ Tsɛ ɔ li. Lɔ ɔ he ɔ, nyɛ ko ye gbeye; nyɛ he jua wa hluu pe otokliihi babauu.’​​—Mateo 10:29, 31.

Sɛ gbi nɛ Yesu kaseli ɔmɛ maa fiɛɛ ɔ kɛ mi gbami maa ba weku li a kpɛti, ejakaa ni komɛ maa kplɛɛ sɛ gbi ɔ nɔ, se ni komɛ hu be nɔ kplɛɛe. Yesu de ke: “Nyɛ ko susu kaa i ba konɛ ma ha nɛ he jɔmi nɛ ba je ɔ mi.” Ke nɔ ko weku li sume anɔkuale ɔ, jã nɔ ɔ ná kã loko e ma nyɛ maa pɛtɛ anɔkuale ɔ he. Yesu ya nɔ nɛ e de ke: “Nɔ nɛ suɔ e nyɛ loo e tsɛ pe imi ɔ, e sɛ kaa e ba peeɔ ye kaselɔ. Nɔ nɛ suɔ binyumu loo biyo pe imi ɔ, e sɛ kaa e ba peeɔ ye kaselɔ.”​​—Mateo 10:34, 37.

Se kɛ̃ ɔ, Yesu tsɔɔ kaa ni komɛ maa bu kaseli ɔmɛ tue. E de ke: “Nɔ tsuaa nɔ nɛ ma ha ni tsɔwi nɛ ɔmɛ a ti nɔ kake nyu nɛ mi jɔ nɛ e nu akɛnɛ ye kaselɔ ji lɛ he je ɔ, e hiɔwo be lɛ bɔe gblegbleegble.”​​—Mateo 10:42.

Benɛ kaseli ɔmɛ a nine su tsɔsemi, kɛ he wami womi kɛ kɔkɔ bɔmi munyu nɛ ɔmɛ a nɔ ɔ, a pue nɔ kɛ ho, ‘nɛ a ya fiɛɛ manye munyu ɔ kɛ kpa kɔpe ɔmɛ tsuo, nɛ a tsa hiɔtsɛmɛ ngɛ he tsuaa he.’​​—Luka 9:6.