Benɛ Nazaret bi ɔmɛ ka kaa a maa gbe Yesu se ɔ, Yesu ho Kapernaum ya. Kapernaum ngɛ Galilea Wo ɔ nɛ a tsɛɛ lɛ hu ke “Genesaret taku ɔ” kasa mi. (Luka 5:1) Enɛ ɔ ha nɛ nɔ́ nɛ Yesaya gba kaa la kpetekpleenyɛ ko ma kpɛ ha nihi nɛ a ngɛ Galilea wo ɔ he ɔ ba mi.​—Yesaya 9:1, 2.

Benɛ Yesu ya su Galilea a, e bɔni fiɛɛmi ke “hiɔwe matsɛ yemi ɔ su si ta.” (Mateo 4:17) Yesu na e kaseli eywiɛ ngɛ lejɛ ɔ. Jinɛ a kɛ Yesu lɛ je Yudea kɛ ba, se benɛ a ba su Galilea a, a si Yesu nɛ a kpale ya tsa wo hɛmi ní tsumi ɔ nɔ. (Yohane 1:35-42) Amlɔ nɛ ɔ lɛɛ e sa kaa a kɛ Yesu nɛ nyɛɛ konɛ e tsɔse mɛ ngɛ fiɛɛmi ní tsumi ɔ mi, bɔ nɛ pee nɛ ke e ho hiɔwe ya a, a tsa fiɛɛmi ɔ nɔ.

Benɛ Yesu ngɛ nyɛɛe ngɛ wo ɔ nya a, e na Simon Petro kɛ e nyɛmi Andrea kɛ a huɛmɛ nɛ a ngɛ a yahi a he fɔe. Yesu ya a ngɔ, nɛ e ya kuɔ kɛ da Petro lɛ ɔ mi, nɛ e de lɛ ke e hlui lɛ ɔ kɛ ya se bɔɔ. Benɛ a ya bɔɔ ɔ, Yesu hi si nɛ e bɔni nihi nɛ a ngɛ wo ɔ nya a anɔkualehi nɛ kɔɔ Matsɛ Yemi ɔ he ɔ tsɔɔmi.

Lɔ ɔ se ɔ, Yesu de Petro ke: ‘Hlui kɛ ya pa a nɔ he nɛ mi kuɔ, nɛ nyɛ pue nyɛ ya a ngɛ lejɛ ɔ konɛ nyɛɛ gbe lo.’ Petro he nɔ ke: ‘Tsɔɔlɔ, wa tsu ní wawɛɛ nyɔ nɛ ɔ mi tsuo, nɛ wa nɛ nɔ́ ko nɔ́ ko. Se kɛ̃ ɔ, akɛnɛ mo lɛ o de ɔ, ma pue ya a.’​—Luka 5:4, 5.

A pue ya a nɛ a gbe lo babauu, nɛ ya a bɔni hiami! Oya nɔuu nɛ a fɔ a huɛmɛ nɛ a ngɛ lɛ kpa mi nine konɛ a ba ye bua mɛ. E kɛ we kulaa nɛ lɛ enyɔ ɔmɛ tsuo hyi tɔtɔɔtɔ nɛ a bɔni mumi. Benɛ Simon Petro na nɔ́ nɛ ba a, e kpla si ngɛ Yesu hɛ mi, nɛ e de ke: “Nyɔmtsɛ! Jee ye kasa nya, ejakaa yayami peelɔ ji mi.” Kɛkɛ nɛ Yesu de lɛ ke: “Koo ye gbeye! Kɛ je mwɔnɛ ɔ kɛ yaa a, o maa hɛ nimli ha mi kaa bɔ nɛ a hɛɛ lo.”​—Luka 5:8, 10.

Yesu de Petro kɛ Andrea ke: “Nyɛ ba nyɛɛ ye se, nɛ ma ha nyɛ maa hɛ nimli kaa a hɛɛ lo.” (Mateo 4:19) E tsɛ Zebedeo binyumuhi Yakobo kɛ Yohane nɛ mɛ hu a ji wo hɛli ɔ kɛ piɛɛ a he. Mɛ hu a mimiɛ we a yi. Oya nɔuu nɛ a nyɛɛ Yesu se. Lɔ ɔ he ɔ, nihi eywiɛ nɛ ɔmɛ je a ní tsumihi a he nɛ a ba nyɛɛ Yesu se kulaa.