Benɛ Yesu ye ligbi enyɔ ngɛ Samaria se ɔ, e pue nɔ kɛ ho e ma mi ya. E ngɛ mi kaa Yesu fiɛɛ wawɛɛ ngɛ Yudea mohu lɛɛ, se pi nɛ e yaa Galilea kaa e yaa jɔɔ e he. Yesu yaa je fiɛɛmi ní tsumi ngua ko sisi ngɛ ma nɛ e hi mi kɛ wa a mi. E hyɛ we blɔ kaa e ma mi bi ɔmɛ maa bu lɛ tue ejakaa lɛ nitsɛ e de ke: “A bui gbalɔ ngɛ lɛ nitsɛ e ma mi.” (Yohane 4:44) Benɛ a ya su Galilea a, kaseli ɔmɛ si Yesu, nɛ a ho a wehi a mi ya, nɛ a ya tsa a ní tsumihi a nɔ.

Mɛni munyu nɛ Yesu bɔni fiɛɛmi? E fiɛɛ ke: ‘Be ɔ su; Mawu Matsɛ Yemi ɔ su si ta! Nyɛɛ kpale kɛ je nyɛ he yayami ɔmɛ a he, nɛ nyɛ he sane kpakpa a nyɛɛ ye.’ (Marko 1:15) Anɛ ni ɔmɛ a bu lɛ tue lo? Ngɛ anɔkuale mi ɔ, Galilea bi fuu he Yesu munyu ɔ ye, nɛ a wo e hɛ mi nyami. Pi e sɛ gbi ɔ pɛ he je nɛ a pee jã ngɛ. Galilea bi nɛ a ya ye Hetsɔmi ɔ ngɛ Yerusalem nyɔhiɔ bɔɔ nɛ be ɔ, a ti ni komɛ na nyakpɛ níhi nɛ Yesu pee ɔ.​​—Yohane 2:23.

Benɛ Yesu ya su Galilea kpokpa a nɔ ɔ, jije e je e fiɛɛmi ní tsumi ɔ sisi ngɛ? E maa pee kaa e je sisi ngɛ Kana, he nɛ e plɛ nyu kɛ pee wai ngɛ yo kpeemi ko sisi ɔ. Se jehanɛ ɔ nɛ e ya lejɛ ɔ, a de lɛ ke jokuɛ nyumuyo ko be he wami gbagblaa, nɛ e miɔ nɛ e ma gbo. E ji Matsɛ Herode Antipa nɛ pee se ɔ, e ha nɛ a po Yohane Nɔ Baptisilɔ ɔ yi ɔ tsɔlɔ nɔkɔtɔma ko binyumu. Ma nɔkɔtɔma nɛ ɔ nu kaa Yesu je Yudea kɛ ba Kana. Enɛ ɔ he ɔ, e hia blɔ kɛ je Kapernaum kɛ ya Kana konɛ e ya hla Yesu. Benɛ nyumu nɛ aywilɛho nu lɛ nɛ ɔ na Yesu ɔ, e kpa lɛ pɛɛ ke: “Nyɔmtsɛ, ha waa ho esɔ, ke pi jã a, ye bi ɔ ma gbo.”​​—Yohane 4:49.

Heto nɛ Yesu ha lɛ ɔ pee lɛ nyakpɛ. E de lɛ ke: “Yaa, o bi ɔ yi ná wami.” (Yohane 4:50) Herode tsɔlɔ ɔ he Yesu ye, nɛ e ma e we mi blɔ nɔ. Benɛ e ngɛ blɔ nɔ kɛ yaa a, e sɔmɔli ɔmɛ kɛ lɛ ya kpe, nɛ a de lɛ bua jɔmi sane ko. A de lɛ ke e bi ɔ yi ná wami, nɛ e ngɛ saminya! Bɔ nɛ pee nɛ e ná nɔ mi mami kaa Yesu lɛ tsa e bi ɔ, e bi mɛ ke: “Mɛni be hiɔ ɔ fani ha lɛ?”

A ha lɛ heto ke: “Hiɛ̃ piani ngmlɛ kake be mi nɛ aslã a po ngɛ e nɔ.”​​—Yohane 4:52.

Benɛ a de lɛ jã pɛ kɛkɛ nɛ nyumu ɔ kai kaa jamɛ a be ɔ mi tutuutu nɛ Yesu de lɛ ke: “O bi ɔ yi ná wami” ɔ nɛ. Pee se ɔ, nyumu niatsɛ nɛ ɔ nɛ e ngɛ nyɔguɛhi fuu ɔ kɛ e we ɔ tsuo ba pee Kristo kaseli.

Yesu pee nyakpɛ ní enyɔ ngɛ Kana. E plɛ nyu kɛ pee dã, nɛ e tsa jokuɛ nyumuyo ko nɛ e kɛ lɛ a kpɛti kɛmi maa pee si tomi 16. Pi nyakpɛ ní enyɔ nɛ ɔmɛ pɛ nɛ Yesu pee ngɛ Kana. Se bɔ nɛ e plɛ kɛ tsa jokuɛ ɔ ha a sa kadimi, ejakaa e tsɔɔ wɔ be tutuutu nɛ Yesu kpale kɛ ba Galilea. Enɛ ɔ ha nɛ e pee heii kaa e ji gbalɔ nɛ Mawu tsɔ. Se anɛ a ma ‘he gbalɔ nɛ ɔ ye ngɛ lɛ nitsɛ e ma mi’ lo?

Ke e ya su Nazaret loko wa maa na. Mɛni e kɛ ma ya kpe ngɛ lejɛ ɔ?