Yesu tsɛ Petro, Andrea, Yakobo, kɛ Yohane kaa a ba hɛ nimli kaa bɔ nɛ a hɛɛ lo ɔ. Ngɛ Hejɔɔmi ligbi ɔ nɔ ɔ, mɛ tsuo a ya kpe he ɔ ngɛ Kapernaum. Yesu ya tsɔɔ ní ngɛ kpe he ɔ, nɛ ni ɔmɛ a nya kpɛ a he ngɛ bɔ nɛ e tsɔɔ ní ha a he. E tu we munyu kaa bɔ nɛ mlaa tsɔɔli ɔmɛ tuɔ munyu ɔ, mohu ɔ, e tu munyu kaa nɔ nɛ ngɛ he wami.

Jamɛ a ligbi ɔ, Yesu na nyumu ko nɛ mumi yayami ngɛ e mi ngɛ kpe he ɔ. Nyumu ɔ kpa ngmla wawɛɛ ngɛ kpe he ɔ ke: “Yesu Nazaret no, mɛni sane waa kɛ mo ngɛ? O ba nɛ o ba kpata wa hɛ mi; pi jã? I le mo tsɔ! Mo ji Mawu tsɔlɔ klɔuklɔu ɔ nɛ!” Yesu nga mumi yayami ɔ nɛ ngɛ nyumu ɔ mi ɔ yi ke: “Ma o nya! Jee kpo ngɛ e mi!”​​—Marko 1:24, 25.

Benɛ Yesu de jã a pɛ kɛkɛ nɛ mumi yayami ɔ sake nyumu ɔ ngɔ fia si nɛ e kpa huhui wawɛɛ. Se mumi yayami ɔ “yí lɛ awi.” (Luka 4:35) Nɔ́ nɛ ɔ pee nihi tsuo nɛ a ngɛ lejɛ ɔ nyakpɛ! A bi a sibi ke “Mɛni ji nɛ ɔ?” A ya nɔ nɛ a de ke: “Nɔmlɔ nɛ ɔ ngɛ he wami nɛ e kɛ ngaa mumi yayamihi a yi nɛ a buɔ lɛ tue.” (Marko 1:27) Nihi tsuo nɛ a ngɛ Galilea a nu nyakpɛ ní nɛ Yesu pee nɛ ɔ he.

Yesu kɛ e kaseli ɔmɛ je kpe he ɔ nɛ a ho Simon Petro we ɔ mi ya. A ya na Petro nganyɛ nɛ asla nɛ nya wa nu lɛ. A kpa Yesu pɛɛ kaa e ye bua lɛ. Enɛ ɔ he ɔ, Yesu ya pɛtɛ e nine he nɛ e wo e nɔ. Nɔuu nɛ e ná he wami, nɛ e bɔni Yesu kɛ e kaseli ɔmɛ a nɔ hyɛmi. Eko po ɔ, e hoo ní ha mɛ nɛ a ye.

Benɛ pu nɔ si ɔ, nihi babauu kɛ a hiɔtsɛmɛ ba Yesu ngɔ ngɛ Petro we ɔ mi. E kɛ we kulaa nɛ ma a mi bi ɔmɛ tsuo ba bua a he nya ngɛ we ɔ nya. Mɛni he je? A ba konɛ Yesu nɛ tsa mɛ. Ngɛ anɔkuale mi ɔ, “nihi nɛ ngɛ nyɛmimɛ nɛ hiɔ slɔɔtohi ngɛ a he ɔ, ngɔ mɛ kɛ ba Yesu ngɔ. Yesu ngɔ e nine pue a nɔ kakaaka, nɛ e tsa mɛ tsuo.” (Luka 4:40) Yesu tsa hiɔ saisaa nɛ ngɛ ni ɔmɛ a he ɔ, nɛ e ha nɛ ngmami ɔ ba mi. (Yesaya 53:4) E ha nɛ nihi nɛ daimoniohi ngɛ a mi ɔ po ye a he. Ke mumi yayami ɔmɛ ngɛ kpo jee ɔ, a kpaa ngmlaa ke: “Mo ji Mawu Bi ɔ nɛ.” (Luka 4:41) Se Yesu kãa a hɛ mi, nɛ e ngmɛ́ mɛ blɔ nɛ a tu munyu hu. A le kaa Yesu ji Kristo ɔ nɛ, se Yesu sume nɛ a pee a he kaa a jaa anɔkuale Mawu ɔ.