Yairo na kaa Yesu tsa yo ɔ nɛ muɔ ngɛ bee ngɛ e he ɔ. Eko ɔ, e pee lɛ kaa ‘jamɛ a be ɔ mi ɔ, e bi ɔ gbo,’ se nɔ́ nɛ e na a ha nɛ e he ye kaa Yesu ma nyɛ maa ye bua lɛ. (Mateo 9:18) Anɛ Yesu ma nyɛ maa ye bua e biyo ɔ niinɛ lo?

Benɛ Yesu kɛ yo ɔ nɛ e tsa lɛ ɔ ngɛ munyu tue ɔ, nyumu komɛ je Yairo we ɔ mi nɛ a ba de lɛ ke: “O biyo ɔ gbo; mɛni he je o pa ngɛ tsɔɔlɔ ɔ nya dooe?”​​—Marko 5:35.

Ao! Mɛni aywilɛho sane po ji nɛ ɔ! Nyumu nɛ ɔ paa nɛ a buu lɛ wawɛɛ ngɛ ma a mi ɔ, piɔ lɛɛ e ní pee mɔbɔ. E biyo kake pɛ ɔ gbo. Yesu nu amaniɛ nɛ ni ɔmɛ ba bɔ Yairo ɔ, nɛ e plɛ nɛ e ya hyɛ lɛ nɛ e wo e bua ke: “Koo ye gbeye; mo he ye kɛkɛ!”​​—Marko 5:36.

Kɛkɛ nɛ Yesu nyɛɛ Yairo se kɛ ho e we ɔ mi ya. Benɛ a ya su Yairo we ɔ mi ɔ, a na kaa we ɔ mi tsuo pee hoo. Nihi nɛ a ngɛ we ɔ mi ɔ a ti ni komɛ ngɛ ya foe, ni komɛ ngɛ awe nyae, nɛ ni komɛ hu ngɛ kɔmɔ yee. Yesu sɛ we ɔ mi nɛ e de nɔ́ ko nɛ pee ni ɔmɛ nyakpɛ. E de mɛ ke: “Jokuɛ ɔ gbo we; mahe kɛkɛ e ngɛ hwɔe.” (Marko 5:39) Benɛ a nu nɔ́ nɛ Yesu de ɔ, a muɔ lɛ, ejakaa a le kaa jokuɛ yo ɔ gbo. Se Yesu maa ngɔ he wami nɛ Mawu ha lɛ ɔ kɛ tsɔɔ mɛ kaa nihi nɛ a gbo ɔ ma nyɛ maa te si ekohu kaa bɔ nɛ a tsɛ̃ɔ nɔ ko kɛ jeɔ mahe mi ɔ.

Enɛ he ɔ, Yesu ha nɛ ni ɔmɛ tsuo je kpo ngɛ tsu ɔ mi, nɛ e ba piɛ lɛ, Petro, Yohane, Yakobo, kɛ jokuɛ ɔ fɔli ɔmɛ pɛ. Yesu kɛ ni enuɔ nɛ ɔmɛ sɛ tsu nɛ a to jokuɛ ɔ ngɛ mi ɔ mi. E pɛtɛ jokuɛ ɔ nine si nɛ e de ke: “‘Talita kum.’ E sisi ji, ‘Jokuɛ yo, i ngɛ mo dee ke tee si!’” (Marko 5:41) Amlɔ nɔuu nɛ e te si nɛ e bɔni nyɛɛmi. Benɛ Yairo kɛ e yo ɔ na nɔ́ nɛ ba a, a bua jɔ wawɛɛ! Bɔ nɛ pee nɛ a ná nɔ mi mami kaa jokuɛ ɔ ba wami mi niinɛ ɔ, Yesu de mɛ ke a ha lɛ nɔ́ ko nɛ e ye.

Yesu de Yairo kɛ e yo ɔ kaa a ko ya de ni kpahi nɔ́ nɛ e pee ɔ kaa bɔ nɛ e deɔ nihi ke e tsa mɛ ɔ. Se ngɛ lɔ ɔ tsuo se ɔ, bua jɔmi sɔuu ha nɛ jokuɛ ɔ fɔli kɛ nihi nɛ a na nɔ́ nɛ ya nɔ ɔ gbɛ sane ɔ kɛ fĩa “lejɛ ɔ zugba a nɔ tsuo.” (Mateo 9:26) Ke mo nɛ a tle o suɔlɔ ko si ɔ, anɛ o bua be jɔe kaa o maa bɔ nihi amaniɛ lo? Enɛ ɔ ji si enyɔne nɛ Yesu tle nɔ ko si nɛ a tu he munyu ngɛ Ngmami ɔ mi.