Benɛ Yesu na kaa Farisi bi ɔmɛ kɛ Herode se nyɛɛli ɔmɛ ya so e yi nɔ kaa a maa gbe lɛ ɔ, e kɛ e kaseli ɔmɛ a sã a he si nɛ a ho Galilea Wo ɔ nya ya. Nihi babauu je Yerusalem, Tiro, Sidon, Galilea, Yordan Pa a se kɛ Idumea kpokpa a nɔ kɛ ba e ngɔ. Yesu tsa nihi fuu. Enɛ ɔ ha nɛ hiɔtsɛmɛ fuu ba e ngɔ. A mlɛ we po nɛ Yesu nitsɛ nɛ pɛtɛ a he, kɛkɛ nɛ mɛ nitsɛmɛ a bɔni e he pɛtɛmi.​​—Marko 3:9, 10.

Ni ɔmɛ a he hiɛ babauu. Lɔ ɔ he ɔ, Yesu de e kaseli ɔmɛ kaa a hla lɛ ko ha lɛ nɛ e maa hi mi ngɛ pa a nɔ bɔ nɛ pee nɛ ni ɔmɛ ko tɔtɔ lɛ tsɔ. Ke e hi lɛ ɔ mi ɔ, e ma nyɛ maa tsɔɔ ni ɔmɛ tsuo ní, nɛ e ma nyɛ maa hi yae nɛ e hi bae ngɛ pa a nya, konɛ e ye bua nihi fuu.

Kaselɔ Mateo to he hɛ kaa nɔ́ nɛ Yesu pee ɔ ha nɛ ‘nɔ́ nɛ Mawu de kɛ gu gbalɔ Yesaya nɔ ɔ ba mi.’ (Mateo 12:17) Mɛni gbami nɛ Yesu ha nɛ e ba mi ɔ?

‘Hyɛ, ye tsɔlɔ nɛ i hla a ji nɛ ɔ nɛ; i suɔ lɛ, nɛ i náa e he tsui. Ma ngɔ ye mumi ɔ ke wo e mi, nɛ tue gblami nɛ i to ha ma je li ɔmɛ ɔ, e maa fiɛɛ kɛ tsɔɔ mɛ. E be pɛe; nɛ e be ngmlaa kpae, nɛ nɔ ko be e gbi nue ngɛ magbɛ nɔ hulɔ. Gla nɛ e mi dɔ momo ɔ, e be mi kue, nɛ kane nɛ ngɛ tsoe sulii ɔ, e be gbee. E ma tsu ní nɛ ɔ hluu kɛ yaa si e ma ha nɛ dami sane yemi ma he si. Nɛ ma je li tsuo maa ngɔ a hɛ kɛ fɔ e nɔ.’​​—Mateo 12:18-21; Yesaya 42:1-4.

Ngɛ anɔkuale mi ɔ, Yesu ji tsɔlɔ nɛ Mawu kplɛɛ we e he nɔ́ ɔ nɛ. Yesu ye dami sane, se jami hɛ mi nyɛɛli ɔmɛ ngɔ a kusumi ɔmɛ kɛ plɛ dami sane yemi hɛ mi kɛ bu si. Akɛnɛ Farisi bi ɔmɛ ngɔɔ Mawu Mlaa a kɛ tsuɔ ní ngɛ blɔ nɛ maa da mɛ nɔ he je ɔ, ke nɔ ko be he wami ngɛ Hejɔɔmi ligbi ɔ nɔ po nɛ́ e sa nɛ a ye bua lɛ ɔ, a pee we jã! Yesu ha nɛ nihi ye a he ngɛ blema kusumihi nɛ a pee tloomi ngɛ ni ɔmɛ a nɔ ɔ he kɛ tsɔɔ kaa Mawu yeɔ dami sane, nɛ jehanɛ hu ɔ, Mawu mumi ɔ ngɛ e nɔ. Enɛ ɔ he je nɛ jami hɛ mi nyɛɛli ɔmɛ suɔ nɛ a gbe lɛ ɔ nɛ. Mɛni hɛ mi si puemi munyu po ji nɛ ɔ!

Ke a ke “e be pɛe, nɛ e be ngmlaa kpae, nɛ nɔ ko be e gbi nue ngɛ magbɛ nɔ hulɔ” ɔ, mɛni lɔ ɔ tsɔɔ? Ke Yesu ngɛ nihi tsae ɔ, e ha we nɛ ni ɔmɛ loo daimonio ɔmɛ nɛ a “je lɛ si kɛ tsɔɔ.” (Marko 3:12) E sume nɛ nihi nɛ a nu e he kɛ gu akeake nɔ.

 Jehanɛ hu ɔ, Yesu hɛɛ sɛ gbi nɛ maa wo nihi nɛ a ní ngɛ mɔbɔ nɛ a ngɛ kaa gla nɛ e mi dɔ ɔ a bua. A ngɛ kaa kane nɛ ngɛ tsoe sulii, nɛ e miɔ nɛ e ma gbo. Yesu ku we gla nɛ e mi dɔ mi, nɛ e gbi kane nɛ ngɛ tsoe sulii hulɔ. Mohu ɔ, e je suɔmi mi nɛ e ye bua he si bali. Ngɛ anɔkuale mi ɔ, Yesu ji nɔ nɛ je ma amɛ tsuo ma nyɛ maa ngɔ a hɛ kɛ fɔ e nɔ kaa e maa ye bua mɛ!