Yesu de si abɔ ngɛ e fiɛɛmi ní tsumi ɔ mi kaa he si bami ji su ko nɛ e he hia wawɛɛ. (Luka 14:8-11) Enɛ ɔ he ɔ, be tsuaa be ɔ, e hlaa nihi nɛ a baa a he si nɛ a suɔ kaa a ma sɔmɔ Mawu ɔ. Se jamɛ a be ɔ mi tsuo ɔ, nihi fuu kpa we a yayami ɔmɛ peemi.

Farisi bi ɔmɛ kɛ mlaa tsɔɔli ɔmɛ yɔse kaa yayami peeli ji nihi nɛ a buɔ Yesu sɛ gbi ɔ tue. A tu munyu kɛ si Yesu ke: “Nyumu nɛ ɔ kɛ yayami peeli bɔɔ, nɛ e kɛ mɛ yeɔ ní po.” (Luka 15:2) Farisi bi ɔmɛ buu a he kaa a nɔ kuɔ pe yayami peeli ɔmɛ, nɛ a buu yayami peeli ɔmɛ kaa a nane si zu. Jami hɛ mi nyɛɛli nɛ ɔmɛ ngɔɔ Hebri munyungu nɛ ji ‛am ha·’aʹrets’ ɔ kɛ tsɛɛ yayami peeli ɔmɛ kɛ tsɔɔ kaa a bui mɛ. ‛Am ha·’aʹrets’ sisi ji “zugba mi nimli.”

Se Yesu lɛɛ e buɔ yayami peeli ɔmɛ, nɛ e peeɔ mɛ kpakpa. Nihi nɛ a ní ngɛ mɔbɔ, kɛ yayami peeli ji nihi nɛ a suɔ kaa a maa bu Yesu tue. Se kɛ Yesu pee e ní ha kɛɛ ngɛ munyu nɛ a tu kɛ si lɛ ngɛ yayami peeli nɛ e kɛ mɛ ngɛ bɔe ɔ he?

Wa maa na heto ɔ ngɛ nɔ́ hetomi nɔ́ ko nɛ taa nɔ tsui he nɛ ngɛ kaa nɔ́ nɛ Yesu kɛ tsu ní ngɛ Kapernaum be ko nɛ be ɔ mi. (Mateo 18:12-14) Yesu tu munyu kaa nɔ́ nɛ Farisi bi ɔmɛ da ngɛ Mawu hɛ mi, nɛ a ji Mawu tohi nɛ a ngɛ slɔkee, nɛ e ngɔ yayami peeli ɔmɛ kɛ to tohi nɛ a laa he. Yesu de ke:

“Waa ngɔ lɛ kaa nyɛ ti nɔ ko ngɛ to lafa, nɛ́ kake laa a, mɛni e maa pee? E ma si to nyingmi nɛɛ kɛ nɛɛ ɔmɛ ngɛ nga a nɔ, nɛ e ma ya hla nɔ́ nɛ laa a kɛ yaa si e maa na lɛ. Ke e na lɛ ɔ, e naa bua jɔmi, nɛ e kɛ lɛ fɔɔ e konɔ, nɛ e kɛ lɛ baa we mi. Lɔ ɔ se ɔ, e tsɛɔ e huɛmɛ, kɛ e paka bi, nɛ e deɔ mɛ ke, ‘I na ye to nɛ laa a; nyɛ ha nɛ wa nya!’”​​—Luka 15:4-6.

Mɛni ji nɔ́ hetomi nɔ́ nɛ ɔ sisi? Yesu tsɔɔ mi ke: ‘I ngɛ nyɛ dee ke, jã nɔuu lɛ bua jɔmi maa ba hiɔwe, ke yayami peelɔ kake tsake e tsui, pe dali nyingmi nɛɛ kɛ nɛɛ kɛ se, nɛ mɛɛ lɛɛ tsui tsakemi he hia we mɛ ɔ.’​​—Luka 15:7.

Tsui tsakemi he munyu nɛ Yesu tu nɛ ɔ gbɔ Farisi bi ɔmɛ a tsui mi. A buɔ a he dali nɛ a susuɔ kaa a hia we tsakemi ko. Benɛ Yesu kɛ tó tsuli kɛ yayami peeli komɛ ya ye ní be ko, nɛ Farisi bi ɔmɛ a ti ni komɛ tu e he munyu nyanyaanya a, e de mɛ ke: “I bɛ nɛ ma ba tsɛ nihi nɛ da, se mohu ni nɛmɛ nɛ peeɔ yayami a he i ba.” (Marko 2:15-17) Akɛnɛ Farisi bi ɔmɛ buɔ a he dali nɛ a tsakee we a tsui he je ɔ, a ha we nɛ hiɔwe bɔfo ɔmɛ a bua nɛ jɔ. Se ke yayami peelɔ ko tsake ɔ, bua jɔmi baa hiɔwe.

 Enɛ ɔ se ɔ, Yesu kpale ngɔ nɔ́ hetomi nɔ́ ko kɛ tsu ní kɛ ma bua jɔmi nɛ baa hiɔwe ke yayami peelɔ ko tsake ɔ nɔ mi. E ngɔ nɔ́ ko nɛ ma nyɛ maa ba ngɛ we mi kɛ to he. E de ke: “Waa ngɔ lɛ kaa yo ko ngɛ sika hiɔ yi nyɔngma, nɛ kake laa. Mɛni e maa pee? E maa su kane, nɛ e maa bɛɛ we ɔ mi, nɛ e ma hla sika a fitsofitso hluu kɛ yaa si e maa na. Ke e na a, e ma tsɛ e huɛmɛ, kɛ e paka bi, nɛ e ma de mɛ ke, ‘I na ye sika nɛ laa a; nyɛ ha nɛ wa nya!’”​​—Luka 15:8, 9.

Yesu tsɔɔ nɔ́ hetomi nɔ́ nɛ ɔ mi kaa bɔ nɛ e tsɔɔ nɔ́ hetomi nɔ́ nɛ kɔɔ to nɛ laa a he ɔ mi ɔ. E de ke: “Jã nɔuu lɛ Mawu bɔfohi ma nya, ke yayami peelɔ kake tsake e tsui.”​​—Luka 15:10.

Moo po bɔ nɛ Mawu bɔfohi a bua jɔɔ ha ke yayami peelɔ ko tsake e tsui ɔ he foni ngɛ o juɛmi mi nɛ o hyɛ! Enɛ ɔ ji nɔ́ ko nɛ sa kadimi wawɛɛ, ejakaa yayami peeli nɛ ɔmɛ nɛ a tsake ɔ, a ti nihi nɛ ma ná blɔ nya ngɛ hiɔwe Matsɛ Yemi ɔ mi ɔ ma ná he blɔ ngua nɛ nɔ kuɔ pe hiɔwe bɔfo ɔmɛ po! (1 Korinto Bi 6:2, 3) Se enɛ ɔ dɔɛ hiɔwe bɔfo ɔmɛ. Enɛ ɔ he ɔ, ke yayami peelɔ ko tsake e tsui nɛ e kpale kɛ ba Mawu ngɔ ɔ, kɛ e sa nɛ waa pee wa ní ha kɛɛ?