Benɛ Yesu tsa nyumu ɔ nɛ e nane kɛ e nine fuufuu ɔ ta a, Yesu ya nɔ nɛ e hi Farisi no ɔ we ɔ mi be bɔɔ. Yesu to he hɛ kaa nihi nɛ a fɔ mɛ nine ɔ a ti ni komɛ ya ngɛ nikɔtɔmahi a sihi he hlae nɛ a maa hi. Enɛ ɔ he ɔ, Yesu ngɔ jamɛ a he blɔ ɔ kɛ tsɔɔ mɛ he si bami he ní.

Yesu de mɛ ke: ‘Ke nɔ ko kpee yo, nɛ e tsɛ mo kɛ ya lejɛ ɔ, ko ya hi yimɛ a je. Eko ɔ, a tsɛ nɔ ko nɛ hɛ mi ngɛ nyami pe mo. Kɛkɛ ɔ, nɔ nɛ tsɛ nyɛ ni enyɔ ɔmɛ tsuo maa ba, nɛ e ma ba de mo ke, “Ha nɔ nɛ ɔ blɔ.” Jehanɛ ɔ lɛɛ zo o kɛ ma ya hi nane si je ɔ.’​​—Luka 14:8, 9.

Yesu tsa nɔ ke: ‘Lɔ ɔ he ɔ, ke a tsɛ mo ɔ, yaa nɛ o ya hi nane si je, konɛ ke nɔ nɛ tsɛ mo ɔ ba a, e ba de mo ke, “Ye huɛ, ba yimɛ a je.” Enɛ ɔ ma ha nɛ o hɛ mi maa ba nyami ngɛ nihi tsuo nɛ o kɛ mɛ hii si ɔ a hɛ mi.’ Pi su kpakpa kpo nɛ e sa nɛ a je ɔ he munyu nɛ Yesu ngɛ tue. E tsɔɔ nya ke: “Ejakaa nɔ tsuaa nɔ nɛ woɔ e he nɔ ɔ, a maa ba lɛ si, nɛ nɔ nɛ baa e he si ɔ, a ma wo e nɔ.” (Luka 14:10, 11) Yesu ngɛ e tue buli ɔmɛ he wami woe nɛ a ba a he si.

Enɛ se ɔ, Yesu tsɔɔ Farisi no nɛ tsɛ lɛ ní yemi ɔ nɔ́ kpa ko nɛ e he hia kaa e kase. E tsɔɔ lɛ okplɔɔ ngmɛmi nɛ sa Mawu hɛ mi. Yesu de lɛ ke: “Ke o tsɛ nihi ní yemi piani, loo gbɔkuɛ ɔ, koo kpee o huɛmɛ, loo o nyɛmimɛ, loo o weku li, loo niatsɛmɛ nɛ ngɛ o paka mi. Ke o pee jã a, mɛ hu a maa kpee mo; kɛkɛ ɔ, e ngɛ kaa a wo mo nɔ́ nɛ o pee ɔ he hiɔ. Ke o ngmɛ okplɔɔ ɔ, tsɛ ohiatsɛmɛ, glɔtsɛmɛ, pɔ̃tsɛmɛ, kɛ hɛ yuyuili mohu; nɛ Mawu maa gbaa mo; ejakaa mɛɛ a be nyɛe maa to mo nane mi.”​​—Luka 14:12-14.

Pi nɛ Yesu ngɛ tsɔɔe kaa ke wa ngmɛ okplɔɔ ɔ, e sɛ nɛ waa fɔ wa huɛmɛ, wa weku li, aloo wa kpɔ mi bimɛ nine. Mohu ɔ, e ngɛ tsɔɔe kaa ke wa ngmɛ okplɔɔ nɛ wa tsɛ nihi nɛ a be nɔ́ ko, kɛ glɔtsɛmɛ, kɛ hɛ yuyuili ɔ, wa ma ná jɔɔmi babauu. Yesu de wetsɛ ɔ ke: “Ligbi ɔ nɛ ni kpakpa amɛ maa te si kɛ je gbeje ɔ, Mawu maa to mo nane mi.” Nyumu ko nɛ lɛ hu a fɔ lɛ nine kɛ ba ní yemi ɔ kɛ Yesu kpa gbi, nɛ e de ke: “Nihi nɛ maa ye ní ngɛ Mawu matsɛ yemi ɔ mi ɔ, a gbaa mɛ pɛ.” (Luka 14:15) Nyumu ɔ na kaa e ji he blɔ ngua kaa Mawu ma tsɛ nɔ ko ní yemi. Se kaa bɔ nɛ Yesu maa tsɔɔ ngɛ nɔ́ hetomi nɔ́ nɛ nyɛɛ se ɔ mi ɔ, pi nɔ tsuaa nɔ nɛ e bua jɔ nine fɔmi nɛ ɔ he. E de mɛ ke:

‘Nyumu ko ngmɛ okplɔɔ ngua, nɛ e kpee nihi fuu. E tsɔ nɔ ke e ya de nihi nɛ a kpee ɔ ke, “A gbe nɔ́ tsuaa nɔ́ nya; nyɛɛ ba!” Se mɛ tsuo a bɔni a nya jemi kakaaka. Kekleekle nɔ ɔ de tsɔlɔ ɔ ke, “I he zugba ko nɛ ma kɛ pee ngmɔ, nɛ e hia kaa ma ya nɛ ma ya hyɛ; i kpa mo pɛɛ nɛ o na ha mi!” Nɔ kpa ke, “I he na blablɛ enuɔ, nɛ i yaa nɛ ma ya ka mɛ ma hyɛ; i kpa mo pɛɛ nɛ o na ha mi!” Nɔ kpa hu je e nya ke, “I kpee yo, nɛ lɔ ɔ he ɔ i be nyɛe maa ba.”’​​—Luka 14:16-20.

Pi níhi nɛ e sa kaa a kɛ jeɔ a nya ji nɛ ɔ! Loko nɔ ko ma he zugba loo lohwe ɔ, e ya hyɛɛ kekle loko e heɔ, enɛ ɔ he ɔ, ke nɔ ɔ wo nɔ́ ɔ he hiɔ ɔ, e ma nyɛ ma ya hyɛ be kpa. Ngɛ nɔ etɛne ɔ blɔ fa mi ɔ, pi kpaako nɛ e yaa kpee yo ɔ. E ngɔ yo ɔ momo, lɔ ɔ mɛni nɛ ngɛ lɛ blɔ tsie loko e ke e be nyɛe maa ya okplɔɔ ngmɛmi nɛ e he hia nɛ ɔ sisi ɔ? Benɛ nyɔmtsɛ ɔ nu kaa nihi nɛ e fɔ mɛ nine ɔ ke a be nyɛe maa ba a, e mi mi fu nɛ e de tsɔlɔ ɔ ke:

“Jee kpo esɔ kɛ ya gbɛjegbɛ ɔmɛ a nɔ, kɛ blohu ɔmɛ a mi ngɛ ma a mi, nɛ o ya ngɔ ohiatsɛmɛ, glɔtsɛmɛ, hɛ yuyuili, kɛ pɔ̃tsɛmɛ kɛ ba hiɛ ɔ.” Tsɔlɔ ɔ ya tsɛ mɛ kɛ ba, se loloolo ɔ blɔ fuu piɛ. Lɔ ɔ he ɔ, e nyɔmtsɛ ɔ de lɛ ke: “Jee kpo kɛ ya blɔ ɔmɛ a nɔ, kɛ blohu ɔmɛ a mi, nɛ o ya nyɛ ni ɔmɛ a nɔ nɛ a ba hiɛ ɔ, konɛ ye we ɔ mi  nɛ hyi tɔ. I ngɛ nyɛ dee ke, nihi nɛ a kpee ɔ, ke a ti nɔ ko sa e nya ye niye ní nɛ ɔ fii!”​​—Luka 14:21-24.

Munyu nɛ ɔ tsɔɔ kaa Yehowa hu gu Yesu Kristo nɔ kɛ fɔ nihi nine konɛ a ná he blɔ ngɛ hiɔwe Matsɛ Yemi ɔ mi. Yuda bi, titli ɔ a jami hɛ mi nyɛɛli ɔmɛ ji nihi nɛ a fɔ mɛ nine kekle. Se a kpɛti nihi fuu kplɛɛ we nine nɛ Yesu fɔ mɛ ɔ nɔ. Se lɔ ɔ tsɔɔ we kaa e be ni kpahi nine fɔe. Yesu ngɛ tsɔɔe kaa hwɔɔ se ko ɔ, e maa fɔ Yuda bi nɛ a ní ngɛ mɔbɔ, kɛ ma je li nɛ a jaa Yehowa a nine. Enɛ ɔ se ɔ, e maa kpale fɔ nihi nɛ Yuda bi naa mɛ kaa a sɛ ngɛ Mawu hɛ mi ɔ hu nine.​​—Bɔfo Ɔmɛ A Ní Tsumi 10:28-48.

Ngɛ anɔkuale mi ɔ, Yesu munyu ɔ ma nɔ́ ko nɛ nyumu ko nɛ lɛ hu a fɔ lɛ nine de ɔ nɔ mi. Nyumu ɔ de ke: ‘Nihi nɛ maa ye ní ngɛ Mawu Matsɛ Yemi ɔ mi ɔ, a gbaa mɛ pɛ!’