Yesu ya Yerusalem konɛ e ya ye He Tsukɔmi Kaimi nɛ a tsɛɛ ke Hanuka a. A yeɔ gbijlɔ nɛ ɔ kɛ kaiɔ benɛ a tsukɔ sɔlemi we ɔ he ɔ. A tsukɔ sɔlemi we ɔ he ejakaa jeha komɛ nɛ be ɔ, Siria Matsɛ Antioko nɛ to nɔ eywiɛ nɛ a tsɛɛ lɛ hu ke Epifane ɔ ye Yerusalem nɔ. E ma bɔ sami la tɛ ngɛ bɔ sami la tɛ ngua nɛ ngɛ Mawu sɔlemi we ɔ nɔ kɛ ha e mawuhi. Pee se ɔ, Yuda osɔfo ko bimɛ kpɔ Yerusalem kɛ je Siria bi ɔmɛ a nɔ yemi ɔ sisi, nɛ a tsukɔ sɔlemi we ɔ he kɛ ha Yehowa. Kɛ je jamɛ a be ɔ mi ɔ, Yuda bi ɔmɛ kaiɔ nɔ́ nɛ ɔ daa jeha ngɛ Chislev we ligbi 25 nɔ. Chislev nyɔhiɔ jeɔ sisi ngɛ November nyɔhiɔ ɔ mi, nɛ e baa nyagbe ngɛ December mi.

Jamɛ a be ɔ mi ɔ, fĩɛ ngɛ yee wawɛɛ. Yesu ya be ngɛ Salomo ablanaa a nɔ ngɛ sɔlemi we ɔ. Yuda bi komɛ ya bu e nɔ, nɛ a bi lɛ ke, “Kɛ yaa su mɛni be nɛ o ma ha wa yi mi maa pee wɔ sikɔsikɔ ngɛ o he? Anɛ mo ji Kristo ɔ? De wɔ anɔkuale ɔ koo!” (Yohane 10:22-24) Mɛni Yesu de mɛ? E de mɛ ke: “Tse i de nyɛ momo nɛ nyɛ he we yi!” Yesu gba we mi kpoo nɛ e de mɛ ke lɛ ji Kristo ɔ kaa bɔ nɛ e de Samaria yo ɔ ngɛ vu ɔ he ɔ. (Yohane 4:25, 26) Se kɛ̃ ɔ, e tsɔɔ mɛ nɔ nɛ e ji momo, ejakaa be ko nɛ be ɔ, e de mɛ ke: “I ngɛ nyɛ dee anɔkuale mi ke i ngɛ loko a fɔ Abraham.”​​—Yohane 8:58.

Yesu suɔ kaa mɛ nitsɛmɛ a ngɔ níhi nɛ gbali ɔmɛ gba kaa Kristo ɔ ma ba tsu ɔ kɛ to níhi nɛ e ngɛ pee ɔ he konɛ a da lɔ ɔ nɔ kɛ yɔse kaa lɛ ji Kristo ɔ. Enɛ ɔ he nɛ be komɛ ɔ, e deɔ e kaseli ɔmɛ ke a ko de nɔ ko kaa lɛ ji Mesia a nɛ. Se piɔ lɛɛ, Yesu gba mi kpoo nɛ e de Yuda bi nɛ a sume e sane ɔ ke: “Tsaatsɛ he wami nya nɛ i tsuɔ ní nɛ ɔmɛ, nɛ níhi nɛ i tsuɔ ɔ yeɔ ye he odase. Se nyɛɛ lɛɛ nyɛ he we yi.”​​—Yohane 10:25, 26.

Mɛni he je nɛ a he we yi kaa Yesu ji Kristo ɔ? Yesu de ke: “Se nyɛɛ lɛɛ nyɛ he we yi, ejakaa pi ye tohi ji nyɛ. Ye to ɔmɛ buɔ mi tue; i le mɛ, nɛ a nyɛɛɔ ye se. I haa mɛ neneene wami, nɛ a be gboe gblegbleegble. Nɔ ko nɔ ko be nyɛe ma kpɔ mɛ ngɛ ye dɛ. Tsaatsɛ ha mi nɔ́ ko nɛ pe níhi tsuo, nɛ nɔ ko nɔ ko be nyɛe ma kpɔ ní nɛ ɔmɛ ngɛ Tsɛ ɔ dɛ.” Kɛkɛ nɛ Yesu tsɔɔ mɛ huɛ bɔmi nɛ ngɛ e kɛ e Tsɛ ɔ a kpɛti ɔ. E de mɛ ke: “I kɛ Tsɛ ɔ ni kake ji wɔ.” (Yohane 10:26-30) Benɛ Yesu ngɛ munyu nɛ ɔ tue ɔ, e ngɛ zugba a nɔ, nɛ e Tsɛ ɔ ngɛ hiɔwe. Enɛ ɔ he ɔ, Yesu kɛ e Tsɛ ɔ be nyɛe maa pee nɔmlɔ kake too. Mohu ɔ, a hɛɛ yi mi tomi kake, nɛ kake peemi ngɛ a kpɛti.

Nɔ́ nɛ Yesu de ɔ wo Yuda bi ɔmɛ a mi mi la, nɛ a mwɔɔ tɛ ekohu kaa a maa fia lɛ. Se enɛ ɔ wui e he gbeye. E de ke: ‘I pee ní kpakpahi babauu nɛ nyɛ na. Níhi nɛ i pee ɔ, Tsɛ ɔ nɛ tsɔɔ mi. Te nɔ́ nɛ he nɛ nyɛ ngɛ hlae nɛ nyɛɛ fia mi tɛ ɔ?’ A ha lɛ heto ke: ‘Tsa pi kpakpa nɛ o pee ɔ he nɛ wa maa fia mo tɛ ɔ, se mohu musu nɛ o bɔ ɔ he. Nɔmlɔ adesa kɛkɛ ji mo, se o peeɔ o he mawu.’ (Yohane 10:31-33) Yesu de we gblee kaa mawu ko ji lɛ, lɛɛ mɛni he je nɛ a ke e bɔ musu ɔ?

Yuda bi ɔmɛ he ye kaa Mawu pɛ lɛ ngɛ he wami nɛ Yesu ke e kɛ ngɛ nyakpɛ níhi pee ɔ. Kaa nɔ hyɛmi nɔ́ ɔ, Yesu de ngɛ e “to” ɔmɛ a he ke: “I haa mɛ neneene wami.” Se Yuda bi ɔmɛ le kaa adesa ko be nɛ e ma nyɛ ma ha nɔ ko neneene wami. (Yohane 10:28) A hɛ je nɔ kaa Yesu de ke e Tsɛ ɔ lɛ ha lɛ he wami ɔ.

Yesu fa e he ke: ‘A ngma ngɛ nyɛ mlaa a mi [ngɛ La 82:6] ke, Mawu de ke, “Mawuhi ji nyɛ.” Nimli adesahi nɛ Mawu tsɔ nɛ a ngɔ e sɛ gbi ɔ ba ha mɛ ɔ po Mawu tsɛ mɛ ke mawuhi. Lɛɛ imi nɛ Tsɛ ɔ hla mi, nɛ e tsɔ mi je ɔ mi ɔ, kɛ peeɔ kɛɛ nɛ ke i de ke Mawu Bi ji mi nɛ́ nyɛ deɔ ke i bɔ musu ɔ?’​​—Yohane 10:34-36.

Adesahi nɛ a yi dami sane po Baiblo ɔ tsɛɛ mɛ ke “mawuhi.” Enɛ ɔ he ɔ, jinɛ e sɛ nɛ Yuda bi ɔmɛ ko de ke Yesu tɔ̃ kaa e de ke “Mawu Bi” ji lɛ. Yesu ya nɔ nɛ e de nɔ́ ko nɛ a be nyɛe maa je he atsinyɛ. E de ke: “Ke i tsu we níhi nɛ Tsaatsɛ ke ma tsu ɔ, lɛɛ nyɛ ko he mi nyɛɛ ye. Se ke jamɛ a ní tsumi ɔmɛ  i tsuɔ ɔ, lɔ ɔ lɛɛ ke nyɛ he we imi nitsɛ yi po ɔ, níhi nɛ i peeɔ ɔ, nyɛ he ye mɔ. Kɛkɛ ɔ, nyɛ maa le si kake nyɔngloo kaa Tsɛ ɔ ngɛ ye mi [‘Tsɛ ɔ kɛ mi pee kake,’ NW], nɛ imi hu i ngɛ Tsɛ ɔ mi [‘i kɛ Tsɛ ɔ pee kake,’ NW].”​​—Yohane 10:37, 38.

Enɛ ɔ ha nɛ Yuda bi ɔmɛ a mi mi fu, nɛ a ka kaa a maa nu Yesu, se e je a dɛ slɔkee. Yesu je Yerusalem nɛ e ho Yordan Pa a se ya ngɛ he nɛ Yohane baptisi nihi ngɛ jeha komɛ nɛ be ɔ. Lejɛ ɔ kɛ Galilea Wo ɔ dɔ si je ɔ kɛ we.

Nihi fuu ya Yesu ngɔ nɛ a de ke: “Yohane pee we okadi ko lɛɛ, se níhi tsuo nɛ e de ngɛ nɔmlɔ nɛ ɔ he ɔ, anɔkuale sisiisi.” (Yohane 10:41) Enɛ ɔ he ɔ, Yuda bi fuu he Yesu ye.