Betania ma a ngɛ Oliv Yo ɔ beleku je, nɛ e kɛ Yerusalem a kpɛti kɛmi maa pee si tomi enyɔ. (Yohane 11:18) Yesu ya Betania nɛ e ya slaa Maria kɛ Marta. Maria kɛ Marta a ji nyɛmimɛ, nɛ a ngɛ nyɛminyumu ko nɛ a tsɛɛ lɛ Lazaro. Akɛnɛ a huɛ ji Yesu he je ɔ, a kɛ bua jɔmi he lɛ atuu.

E ji he blɔ ngua nɛ a ná kaa Mesia a ba slaa mɛ. Oya nɔuu nɛ Marta ya sɛ kpata a mi, nɛ e bɔni niye ní ngɔngɔɛ ko hoomi ha Yesu. Benɛ Marta hɛ dɔ nɛ e ngɛ ní ɔ hooe ɔ, Maria lɛɛ e hii si ngɛ Yesu kasa nya nɛ e ngɛ lɛ tue bue. Be bɔɔ se ɔ, Marta ba de Yesu ke: “Nyɔmtsɛ, nɛ ye nyɛmi ɔ si ní tsumi ɔ tsuo ngɔ fɔ imi nɔ kake too ye nɔ nɛ i ngɛ tsue ɔ, anɛ e hɛwi mo lo? Lɛɛ de lɛ nɛ e ba piɛɛ ye he.”​​—Luka 10:40.

Se Yesu kã we Maria hɛ mi, mohu ɔ, e wo Marta ga ngɛ bɔ nɛ e ngɛ e he haoe tsɔ ngɛ he lo nya níhi a he ɔ he. E de lɛ ke: “Marta, Marta! O pee siɛii, nɛ o ngɛ o he haoe ngɛ níhi fuu a he, se nɔ́ kake lɛ hia. Nɔ́ nɛ hi ɔ, lɔ ɔ Maria hla a nɛ, nɛ nɔ ko nɔ ko be kpɔe ngɛ e dɛ.” (Luka 10:41, 42) Yesu ngɛ tsɔɔe kaa e sɛ nɛ a puɛ be babauu kɛ hoo ní fuu be mi nɛ nɔ́ bɔɔ ko pɛ nɛ a maa ye.

Marta hɛɛ juɛmi kpakpa. E suɔ nɛ e maa pee Yesu nibwɔ. Se e juɛmi tsuo nɛ e kɛ ma niye ní ɔ nɔ ɔ ha nɛ níhi nɛ e ma nyɛ maa kase ngɛ Mawu Bi ɔ ngɔ ɔ ngɛ lɛ bɔe! Yesu ma nɔ mi kaa nɔ́ nɛ Maria hla a mohu ji nɔ́ kpakpa, e ma ná he se daa, e maa pee ní kasemi kɛ ha wɔ tsuo, nɛ wa hɛ be nɔ jee gblee.

Pee se ɔ, Yesu tsɔɔ e kaseli ɔmɛ nɔ́ kpa ko nɛ e he hia wawɛɛ. Kaseli ɔmɛ a kpɛti nɔ kake de Yesu ke: “Nyɔmtsɛ, tsɔɔ wɔ sɔlemi kaa bɔ nɛ Yohane hu tsɔɔ e kaseli ɔmɛ ɔ.” (Luka 11:1) O ma kai kaa benɛ Yesu je e sɔmɔmi ní tsumi ɔ sisi ɔ, e tsɔɔ bɔ nɛ e sa nɛ a sɔle ha ngɛ e Yoku ɔ Nɔ Fiɛɛmi ɔ mi. (Mateo 6:9-13) Se eko ɔ, kaselɔ nɛ ɔ be lejɛ ɔ benɛ e tsɔɔ ni kpa amɛ ɔ, enɛ ɔ he ɔ, Yesu ma oti ɔmɛ a nɔ mi ekohu. E ngɔ nɔ́ hetomi nɔ́ ko kɛ tsu ní nɛ e kɛ ma nɔ mi kaa e sɛ nɛ a kpa sɔlemi.

Yesu de ke: ‘Waa ngɔ lɛ kaa nyɛ ti nɔ kake ya e huɛ ngɔ nyɔ mi kpɛti ya de lɛ ke, “Ye huɛ, paa mi abolo etɛ. Ye huɛ ko nɛ nyɛɛ blɔ ba to mi, nɛ i be nɔ́ ko nɔ́ ko nɛ ma ha lɛ nɛ e ye!” Waa ngɔ lɛ kaa nɔ nɛ ngɛ tsu ɔ mi ɔ he nɔ ke, “Koo doo ye nya! A nga sinya a momo, nɛ i kɛ ye bimɛ hwɔ si; i be nyɛe ma te si ba ha mo nɔ́ ko hu.” I ngɛ nyɛ dee ke, ke kaa e huɛ nɛ e ji ɔ he je nɛ e be si tee nɛ e ba ha lɛ nɔ́ ko po ɔ, akɛnɛ e ngɛ e nya doe kpamisa he je ɔ, e maa te si kɛ̃, nɛ e ma ha lɛ nɔ́ tsuaa nɔ́ nɛ e ngɛ hlae ɔ.’​​—Luka 11:5-8.

Pi nɛ Yesu ngɛ tsɔɔe kaa Yehowa sume nɛ e maa bu wa sɔlemihi tue kaa bɔ nɛ nyumu ɔ nɛ e tu e he munyu ngɛ nɔ hetomi nɔ́ ɔ mi ɔ pee ɔ. Mohu ɔ, e ngɛ tsɔɔe kaa ke huɛ ɔ nɛ jinɛ e sume nɛ e maa ye bua nyumu ɔ ye bua lɛ, akɛnɛ e ya nɔ nɛ e bi yemi kɛ buami he je ɔ, lɛɛ ke wa bi wa hiɔwe Tsɛ nɛ ngɛ suɔmi ɔ hu nɔ́ ko ɔ, e ma ha wɔ hluu. Yesu ya nɔ nɛ e de ke: ‘I ngɛ nyɛ dee ke, nyɛɛ ya nɔ nɛ nyɛ bi, nɛ a ma ha nyɛ; nyɛɛ ya nɔ nɛ nyɛ hla nɛ nyɛ nine maa su nɔ; nyɛɛ ya nɔ nɛ nyɛ si, nɛ a ma bli ha nyɛ. Ejakaa, nɔ tsuaa nɔ nɛ biɔ ɔ, a haa lɛ; nɔ tsuaa nɔ nɛ hlaa a, e naa; nɛ nɔ tsuaa nɔ nɛ e ma si ɔ, a ma bli hla lɛ.’​​—Luka 11:9, 10.

Yesu ngɔ nɔ́ ko nɛ tsɛmɛ be pee gblee kɛ pee nɔ́ hetomi nɔ́ kɛ ma oti nɛ ngɛ e munyu ɔ mi ɔ nɔ mi. E de mɛ ke: ‘Tsɛ te nɛ ngɛ nyɛ kpɛti, nɛ ke e bi bi lɛ lo, nɛ e maa ngɔ sinɔ ngɔ pee lo ngɔ ha lɛ? Aloo ke e bi bi lɛ hlui, nɛ e ma ha lɛ nyingmogblakoto? Ke nyɛ nimli yayamihi po nyɛ le bɔ nɛ nyɛ haa nyɛ bimɛ ní kpakpahi ɔ, nyɛ Tsɛ nɛ ngɛ hiɔwe ɔ lɛɛ e maa ngɔ mumi klɔuklɔu ɔ kɛ ha nihi nɛ biɔ lɛ ɔ hluu pe kikɛ nɛ ɔ po!’ (Luka 11:11-13) Hyɛ bɔ nɛ munyu nɛ ɔ woɔ wa bua ha kaa wa Tsɛ nɛ ngɛ hiɔwe ɔ pee klaalo kaa e maa bu wɔ tue nɛ e ha wɔ wa hiami níhi!