YI 6
Bi Nɛ A Wo E He Si ɔ
-
A PO YESU, NƐ PEE SE Ɔ, A KƐ LƐ YA SƆLEMI WE Ɔ
Yosef kɛ Maria a kpale we kɛ yɛ Nazaret, mohu ɔ, a ya nɔ nɛ a hi Betlehem. Benɛ Yesu ye ligbi kpaanyɔ ɔ, a po lɛ kaa bɔ nɛ Mawu Mlaa nɛ e kɛ ha Israel bi ɔmɛ ɔ tsɔɔ ɔ. (3 Mose 12:2, 3) A pɔɔ binyumuhi biɛ womi ngɛ jamɛ a ligbi ɔ nɔ. Yosef kɛ Maria wo a bi ɔ biɛ ke Yesu kaa bɔ nɛ bɔfo Gabriel de mɛ ɔ.
E kɛ we nɛ Yesu ye ligbi 40. Jije e fɔli kɛ lɛ maa ya jehanɛ ɔ? A kɛ lɛ maa ya sɔlemi we ɔ ngɛ Yerusalem nɛ e kɛ he nɛ a ngɛ ɔ kɛ we ɔ. Mlaa a tsɔɔ kaa ke a fɔ binyumu nɛ e ye ligbi 40 ɔ, e sa nɛ bi nyɛ ɔ nɛ sã bɔ kɛ tsukɔ e he ngɛ sɔlemi we ɔ.—3 Mose 12:4-8.
Maria ya pee jã. E ngɔ lahuɛhi enyɔ kɛ sã bɔ ɔ. Enɛ ɔ tsɔɔ wɔ si himi mi nɛ Yosef kɛ Maria a ngɛ. Mlaa a tsɔɔ kaa e sa nɛ a ngɔ jijɔ bi kɛ lahuɛ kɛ sã afɔle ɔ. Se ke bi nyɛ ɔ be nyɛe ma ha jijɔ kɛ lahuɛ ɔ, e ma nyɛ maa ngɔ lahuɛ loo beleku lahuɛ enyɔ kɛ ba. Lɔ ɔ ji nɔ́ nɛ Maria nyɛ nɛ e kɛ ya.
Nɔmoyo ko ba Yosef kɛ Maria a ngɔ ngɛ sɔlemi we ɔ. A tsɛɛ lɛ ke Simeon. Yehowa Mawu je kɛ tsɔɔ lɛ kaa e maa na Mesia a nɛ a wo e he si ɔ loko e ma gbo. Jamɛ a ligbi ɔ, mumi ɔ ngɔ Simeon kɛ ba sɔlemi we ɔ, nɛ e ba na Yosef kɛ Maria kɛ a bi ɔ. Simeon wo jokuɛyo ɔ.
Benɛ Simeon wo Yesu ngɛ e kɔni bɔkɔ mi ɔ, e na Mawu si ke: ‘Mawu Ope, jehanɛ lɛɛ o ye o siwo ɔ nɔ; lɔ ɔ he ɔ, ha nɛ imi, o tsɔlɔ ɔ ma gbo ngɛ tue mi jɔmi mi. Ejakaa kpɔlɔ ɔ nɛ o wo si ke o ma ha je ɔ, i na lɛ kɛ imi nitsɛ ye hɛngmɛ paa. Lɛ ji la nɛ maa tsɔɔ ma je li ɔmɛ blɔ kɛ ba o ngɔ; nɛ e maa wo o ma Israel hɛ mi nyami.’—Luka 2:29-32.
Benɛ Yosef kɛ Maria a nu nɔ́ nɛ e de ɔ, a nya kpɛ a he. Simeon jɔɔ mɛ, nɛ e de Maria kaa a hla e bi ɔ “kɛ ha nihi babauu a hɛ mi kpatami, kɛ nihi babauu hu a yi wami hemi ngɛ Israel,” nɛ e maa ye kɔmɔ wawɛɛ kaa nɔ́ nɛ ha gbɔ e mi mi.—Luka 2:34.
Jamɛ a ligbi ɔ, nɔ kpa ko hu ba sɔlemi we ɔ. A tsɛɛ lɛ ke Ana. E ji gbalɔyo yomoyo nɛ e ye jeha 84. E nane pui ngɛ sɔlemi we ɔ gblee. Benɛ e su Yosef kɛ Maria kɛ a bi ɔ he ɔ, e bɔni Mawu yi jemi, nɛ e tu bimwɔyo ɔ he munyu kɛ tsɔɔ nihi tsuo nɛ a ngɛ lejɛ ɔ.
Moo hyɛ bɔ nɛ Yosef kɛ Maria a bua maa jɔ ha! Atsinyɛ jemi ko be he kaa enɛ ɔ tsuo ma nɔ mi kɛ ha mɛ kaa a bi ɔ ji Nɔ Nɛ Mawu Wo E He Si ɔ niinɛ.
