Benɛ Yesu ya ye ligbi 40 ngɛ nga a nɔ se nɛ e yaa Galilea a, e kpale ya gu Yohane Nɔ Baptisilɔ ɔ ngɔ loko e ho. Benɛ Yohane na Yesu ɔ, e de nihi nɛ a ngɛ lejɛ ɔ ke: “Hyɛ, Mawu To Bi ɔ nɛ woɔ je ɔ he yayami ɔ kɛ yaa a, lɛ ji nɛ ɔ nɛ. Nɔmlɔ nɛ ɔ he nɛ i de ngɛ ke, ‘Nɔ ko ma ngɛ ye se, se e pe mi, ejakaa e ngɛ loko i ngɛ’ ɔ nɛ.” (Yohane 1:29, 30) E ngɛ mi kaa a fɔ Yohane loko a fɔ Yesu mohu lɛɛ, se Yohane le kaa benɛ a ngɔɛ e hɔ lolo po ɔ, Yesu ngɛ hiɔwe kaa mumi mi nɔmlɔ.

Mo kai kaa otsi bɔɔ nɛ be ɔ, Yesu ya Yohane ngɔ kaa e baptisi lɛ. Se jamɛ a be ɔ mi ɔ, Yohane nyɛ we nɛ e ma nɔ mi kɛ ha e kaseli ɔmɛ kaa Yesu ji Mesia a. Yohane de ke: Jinɛ ‘imi nitsɛ i li lɛ, se i kɛ nyu ba ngɛ nihi baptisie bɔ nɛ pee nɛ Israel ma a nɛ le lɛ.’​—Yohane 1:31.

Yohane de nihi nɛ a ngɛ lɛ tue bue ɔ nɔ́ nɛ ya nɔ benɛ e baptisi Yesu ɔ. E de mɛ ke: ‘I na mumi ɔ nɛ kple si kɛ je hiɔwe kaa lahuɛ ba ma e nɔ. Imi hu jinɛ i li lɛ, se Mawu, nɔ nɛ tsɔ mi ke ma ba baptisi nihi ngɛ nyu mi ɔ lɛ de mi ke, “Nɔ nɛ nɔ nɛ mumi ɔ ma ba ma a, lɛ ji nɔ nɛ maa ngɔ mumi klɔuklɔu ɔ kɛ baptisi nihi.” Nɔ́ nɛ ɔ ba mi jã pɛpɛɛpɛ nɛ i na, lɔ ɔ he nɛ i ngɛ odase yee ke Yesu ji Mawu Bi ɔ nɛ.’​—Yohane 1:32-34.

E nɔ jena benɛ Yohane kɛ e kaseli ɔmɛ a kpɛti nihi enyɔ a hii si ɔ, Yesu ya e ngɔ ekohu. Yohane de mɛ ke: ‘Mawu To Bi ɔ ji nɛ ɔ nɛ!’ (Yohane 1:36) Nɔuu nɛ Yohane kaseli enyɔ ɔmɛ a nyɛɛ Yesu se. A kpɛti nɔ kake ji Andrea. E maa pee kaa Yohane nɛ́ e ngma nɔ́ nɛ ya nɔ nɛ ɔ lɛ piɛɛ Andrea he ɔ nɛ. Yohane nɛ ɔ, Yesu weku no ji lɛ, ejakaa e mami ji Salome, nɛ Salome nyɛmiyo ji Maria. Salome nɛ ɔ, e huno ji Zebedeo.

Benɛ Yesu plɛ e he nɛ e na Andrea kɛ Yohane nɛ a ngɛ e se nyɛɛe ɔ, e bi mɛ ke: “Mɛni nyɛ ngɛ hlae?”

A bi lɛ ke: “Tsɔɔlɔ, jije o hii?”

Yesu he nɔ ke: “Nyɛɛ ba nɛ nyɛ ba hyɛ.”​—Yohane 1:37-39.

Nɔ́ nɛ ɔ ya nɔ maa pee gbɔkuɛ ngmlɛ eywiɛ, nɛ Andrea kɛ Yohane a kɛ lɛ hi si kɛ ya si benɛ du bu. Andrea bua jɔ kaa e na Mesia a. Pee se nɛ e ya na e nyɛmi Simon nɛ a tsɛɛ lɛ hu ke Petro ɔ, e de lɛ ke: “Wa na Mesia a.” (Yohane 1:41) Andrea ngɔ Petro kɛ ya Yesu ngɔ. Níhi nɛ ya nɔ ngɛ lɔ ɔ se ɔ tsɔɔ kaa Yohane hu ngɔ e nyɛmi Yakobo kɛ ya Yesu ngɔ, se Yohane bɔɛ enɛ ɔ he amaniɛ ngɛ e womi ɔ mi.

E nɔ jena a, Yesu na Filipo nɛ je Betsaida a. Betsaida ngɛ Galilea Wo ɔ yiti je ngɛ he nɛ Andrea kɛ Petro a je ɔ. Yesu de Filipo ke: ‘Ba nyɛɛ ye se.’​—Yohane 1:43.

 Filipo hu na Natanael nɛ a tsɛɛ lɛ hu ke Bartolomeo ɔ, nɛ e de lɛ ke: “Nɔmlɔ ɔ nɛ Mose ngma e he sane ngɛ mlaa womi ɔ mi, nɛ gbali ɔmɛ hu tu e he munyu ɔ, wa na lɛ. Lɛ ji Yosef bi Yesu nɛ je Nazaret ɔ.” Natanael he we yi, nɛ e de Filipo ke: “Anɛ nɔ́ kpakpa ko maa je Nazaret lo?”

Filipo de lɛ ke: “Ba nɛ o ba hyɛ.” Benɛ Yesu na Natanael nɛ ma e ngɔ ɔ, e de ke, “Israel no ngmingmiingmi ji nɛ ɔ nɛ; sé ko be e he.”

Natanael bi Yesu ke: “Jije o le mi ngɛ?”

Yesu de lɛ ke: “I na mo pi mwɔnɛ; i na mo ngɛ ngmɔkɔ tso ɔ sisi tɔɔ loko Filipo tsɛ mo.”

Natanael nya kpɛ e he nɛ e de Yesu ke: “Tsɔɔlɔ, niinɛ, mo ji Mawu Bi ɔ! Mo ji Israel matsɛ ɔ nɛ.”

Yesu bi lɛ ke: “Akɛnɛ i de mo ke i na mo ngɛ ngmɔkɔ tso ɔ sisi ɔ, lɔ ɔ he nɛ o he ye ɔ? O maa na ní nguahi nɛ pe enɛ ɔ.” Kɛkɛ nɛ Yesu wo mɛ si ke: ‘I ngɛ nyɛ dee anɔkuale mi ke hiɔwe nya ma bli, nɛ nyɛ maa na Mawu bɔfo ɔmɛ nɛ a ngɛ kuɔe kɛ ngɛ imi, Nɔmlɔ Bi ɔ ye ngɔ bae, nɛ a ngɛ kpalee kɛ ngɛ yae.’​—Yohane 1:45-51.

Be bɔɔ se ɔ, Yesu kɛ e kaseli ehe ɔmɛ a je Yordan Dɔgba a mi kɛ ho Galilea ya.