Nihi nɛ a baptisi mɛ kaa Yehowa Odasefohi se a fiɛɛ we ha nihi hu, nɛ eko ɔ, a kɛ Odasefohi kpa bɔmi ɔ, wa kua we mɛ. Ngɛ anɔkuale mi ɔ, wa bɔɔ mɔde kaa wa maa ye bua mɛ konɛ a ná Mawu jami he bua jɔmi ekohu.

 Ke nɔ ko pee yayami nɛ hɛdɔ ngɛ he ɔ, pi kaa ja a fie lɛ kɛ je asafo ɔ mi kokooko. Se ke Odasefo no nɛ a baptisi lɛ kɛ pee e su kaa e kɛ je mi bami he mlaahi nɛ ngɛ Baiblo ɔ mi ɔ be ní tsue, nɛ e tsakee we e tsui ɔ, waa kɛ lɛ kpaa bɔmi aloo wa fieɔ lɛ kɛ jeɔ asafo ɔ mi. Baiblo ɔ de ke: “Nyɛ je nɔmlɔ yayami ɔ kɛ je nyɛ kpɛti.”​—1 Korinto Bi 5:13.

 Nɛ ke a fiee nyumu ko kɛ je asafo ɔ mi, se e yo kɛ e bimɛ lɛɛ loloolo ɔ, a ji Yehowa Odasefohi hu nɛɛ? Mawu jami mi huɛ bɔmi nɛ ngɛ e kɛ e weku ɔ a kpɛti ɔ puɛɔ, se wekukpa nɛ ngɛ e kɛ e weku ɔ a kpɛti ɔ mi pui. Gba si himi ɔ, kɛ ní kpahi nɛ a peeɔ ngɛ weku ɔ mi ɔ maa ya nɔ.

 Nihi nɛ a fie mɛ ɔ ma nyɛ maa ya wa asafo mi kpehi. Ke a suɔ ɔ, asafo mi nikɔtɔmahi ma nyɛ ma je Ngmami ɔ mi kɛ ye bua mɛ. Oti ɔ ji kaa a maa ye bua nihi nɛ a fie mɛ ɔ konɛ a kpale ba pee Yehowa Odasefohi ekohu. Ke a fie nɔ ko kɛ je asafo ɔ mi, nɛ pee se ɔ, e kua je mi bami yaya, nɛ e bɔ mɔde kaa e kɛ Baiblo mlaahi ma tsu ní daa a, a ngɔɔ lɛ ngɛ asafo ɔ mi ekohu kaa Yehowa Odasefo no.