Dɛbi, wa tsakee we Baiblo ɔ. Mohu ɔ, ke wa na kaa wa hemi kɛ yemi ko kɛ Baiblo ɔ kɔ we ɔ, wa peeɔ tsakemi.

 Wa kase Baiblo ɔ jehahi babauu loko wa bɔni New World Translation of the Holy Scriptures ɔ peemi ngɛ jeha 1950 ɔ mi. Waa kɛ Baiblo sisi tsɔɔmihi nɛ ngɛ ɔ tsu ní, nɛ lɔ ɔ nɔ waa kɛ wa hemi kɛ yemihi da. Mo susu nɔ hyɛmi ní bɔɔ komɛ nɛ tsɔɔ níhi nɛ Yehowa Odasefohi heɔ yeɔ kɛ je blema a he nɛ o hyɛ ke ji e kɛ nɔ́ nɛ Baiblo tsɔɔ tutuutu ɔ kɔ lo.

1.   Nɔ́ nɛ wa heɔ yeɔ: Mawu pi Triniti. July 1882 Blɛfo gbi Hwɔɔmi Mɔ ɔ de ke: “Nihi nɛ a kaneɔ wa womi ɔmɛ le kaa wa he Yehowa, Yesu, kɛ Mumi klɔuklɔu ɔ ye, nɛ wa deɔ kaa tsɔɔmi kaa Mawuhi etɛ lɛ bla pee nɔ kake, loo kaa bɔ nɛ ni komɛ deɔ ɔ, Mawu kake nɛ e gba e mi etɛ ɔ dɛ ngmami ɔ nɔ kulaa.”

     Nɔ́ nɛ Baiblo ɔ de: ‘Yehowa wa Mawu ɔ, lɛ pɛ ji Mawu.’ (5 Mose 6:4) “Kɛ̃ ɔ, wɔɔ lɛɛ Mawu kake too nɛ ji Tsɛ ɔ, lɛ pɛ wa ngɛ. Lɛ nɛ bɔ níhi tsuo, nɛ lɛ nɛ ha nɛ wa ngɛ wami mi. Wa ngɛ Nyɔmtsɛ kake hulɔ; lɛ ji Yesu Kristo. E nɔ Mawu gu kɛ bɔ nɔ́ tsuaa nɔ́, nɛ lɛ nɛ ha nɛ wa ngɛ wami mi.” (1 Korinto Bi 8:6) Yesu nitsɛ de ke: ‘Tsɛ ɔ pe mi.’​—Yohane 14:28.

2.   Nɔ́ nɛ wa heɔ yeɔ: A be nihi piie ngɛ hɛl la mi kɛ ya neneene. A kɛ June 1882 Blɛfo gbi Hwɔɔmi Mɔ ɔ munyuyi nɛ ji, “Yayami He Hiɔwo Ji Gbenɔ” ɔ da Roma Bi 6:​23 ɔ nɔ. Baiblo sisi tsɔɔmi nɛ a kɛ tsu ní ji, King James Version ɔ. Jamɛ a Hwɔɔmi Mɔ ɔ de ke: “Munyu nɛ ɔ ngɛ heii, nɛ e sisi numi yi. E ngɛ nyakpɛ kaa nihi babauu nɛ a kplɛɛ nɔ kaa Baiblo ɔ ji Mawu Munyu ɔ tsɔɔ tsɔɔmi nɛ kɛ Baiblo ɔ kpa we gbi, nɛ a he ye kaa Baiblo ɔ tsɔɔ kaa yayami he hiɔwo ji piimi ngɛ hɛl la mi kɛ ya neneene.”

     Nɔ́ nɛ Baiblo ɔ de: “Nɔ nɛ peeɔ yayami ɔ, lɛ nɔuu lɛ ma gbo.” (Ezekiel 18:​4, 20) A be nihi nɛ a teɔ si kɛ woɔ Mawu ɔ piie ngɛ hɛl la mi, mohu ɔ, “a hɛ mi ma kpata pɛsɛpɛsɛ kɛ maa ya neneene.”​—2 Tesalonika Bi 1:9.

3.   Nɔ́ nɛ wa heɔ yeɔ: Mawu Matsɛ Yemi ɔ ji nɔ yemi nitsɛ, pi nɔ́ ko nɛ ngɛ wa tsui mi. December 1881 Blɛfo gbi Hwɔɔmi Mɔ ɔ tu Mawu Matsɛ Yemi ɔ he munyu ke: “E ngɛ heii kaa ke a to matsɛ yemi nɛ ɔ sisi ɔ, e ma kpata matsɛ yemihi nɛ a ngɛ zugba a nɔ tsuo a hɛ mi.”

     Nɔ́ nɛ Baiblo ɔ de: “Matsɛmɛ nɛ ɔmɛ a yi nɔ ɔ, Mawu nɛ ngɛ hiɔwe ɔ maa to matsɛ yemi ko sisi, nɛ e se be poe gblegbleegble. Matsɛ yemi nɛ ɔ, nɔ ko nɔ ko be nyɛe maa ye e nɔ; e ma kpata matsɛ yemi kpa amɛ tsuo a hɛ mi, nɛ e maa hi si kɛ maa ya neneene.”​—Daniel 2:​44.

 Dɛbi, loloolo ɔ, wa ngɔɔ Baiblo sisi tsɔɔmi slɔɔtohi kɛ tsuɔ ní ngɛ wa fiɛɛmi ní tsumi ɔ mi. E ngɛ mi kaa wa haa nihi New World Translation ɔ eko nɛ a wui he hiɔ mohu lɛɛ, se wa suɔ kaa waa kɛ nihi nɛ a bua jɔ Baiblo sisi tsɔɔmi kpahi a he ɔ hu maa kase ní.