Yehowa Odasefohi bɔɔ mɔde kaa a ma ha nɛ kake peemi nɛ hi mɛ nitsɛmɛ a wekuhi a mi, nɛ jã kɛ̃ nɛ a bɔɔ mɔde kaa a maa ye bua nihi konɛ kake peemi nɛ hi a wekuhi a mi hulɔ. Yehowa Odasefohi ngɛ bu kɛ ha Mawu kaa lɛ ji weku Sisi Tolɔ. (1 Mose 2:​21-​24; Efeso Bi 3:​14, 15) Mawu mlaahi nɛ ngɛ Baiblo ɔ mi ɔ ye bua nihi ngɛ je kɛ wɛ nɛ a gba si himi pee bua jɔmi.

 Wa bɔɔ mɔde nɛ waa kɛ ga womihi nɛ ngɛ Baiblo ɔ mi ɔ tsuɔ ní, ejakaa a yeɔ bua wɔ nɛ wa peeɔ hunomɛ, yigbayi, kɛ fɔli kpakpahi. (Abɛ 31:10-​31; Efeso Bi 5:22–​6:4; 1 Timoteo 5:8) Nile munyuhi nɛ ngɛ Baiblo ɔ mi ɔ yeɔ bua wekuhi nɛ a be jami kake mi ɔ, nɛ a hiɔ si ngɛ tue mi jɔmi mi. (1 Petro 3:​1, 2) Mo susu munyuhi nɛ nihi nɛ a pi Odasefohi nɛ a hunomɛ loo a yihi ba pee Odasefohi ɔ tu ɔ he nɛ o hyɛ:

•   “Jeha ekpa nɛ sɛ hlami ngɛ wa gba sisi himi ɔ mi ɔ hyi kɛ pɛ kɛ abofu sɔuu. Se benɛ Ivete ba pee Yehowa Odasefo no se ɔ, e jeɔ suɔmi babauu kpo, nɛ e toɔ e tsui si. Tsakemihi nɛ e pee ɔ baa wa gba a yi.”​—Clauir, e je Brazil.

•   “Benɛ ye huno Chansa kɛ Yehowa Odasefohi bɔni Baiblo ɔ kasemi ɔ, i te si kɛ wo lɛ, ejakaa i susu kaa Odasefohi kɛ mi gbami baa wekuhi a mi. Kɛ je jamɛ a be ɔ mi ɔ, i ba na kaa Baiblo ɔ ye bua nɛ wa gba si himi ɔ pee kpakpa.”​—Agness, e je Zambia.

 Ke wa ngɛ fiɛɛe ha nihi ɔ, wa tsɔɔ mɛ kaa ke a ngɔ nile munyuhi nɛ ngɛ Baiblo ɔ mi ɔ kɛ tsu ní ɔ, e maa ye bua mɛ konɛ

•   A kɛ nile nɛ hla nɔ nɛ a kɛ maa sɛ gba si himi mi

•   A nyɛ nɛ a da haomihi nɛ a kɛ maa kpe ngɛ a gba si himi ɔ mi kekle jeha a mi ɔ nya

•   A le bɔ nɛ a kɛ nganyɛmɛ kɛ ngatsɛmɛ maa hi si ha

•   A le bɔ nɛ a maa to a sika he blɔ nya ha

•   A kpa pɛmi

•   A le bɔ nɛ a kɛ a sibi a tɔmi maa pa ha

•   A le bɔ nɛ a ma tsɔse jokuɛ ɔmɛ ha

 Be komɛ ngɛ nɛ e kɛ pɛ baa gba si himi ɔ mi. Kaa nɔ hyɛmi nɔ́ ɔ, ngɛ jeha 1998 ɔ mi ɔ, níhi a mi hlami ní tsumi ko nɛ a tsɛɛ ke Sofres ɔ bɔ amaniɛ kaa, ke a ngɔ gba si himi 20 tsuaa 20 ɔ, e mi kake kɛ haomi nguanguahi kpe benɛ gba si himi ɔ mi nɔ kake ba pee Odasefo no.

 Yesu gba kɛ fɔ si kaa nihi nɛ a kɛ níhi nɛ e tsɔɔ ɔ tsuɔ ní ɔ, a weku li maa te si kɛ wo mɛ. (Mateo 10:32-​36) Yi nɔ Sane Ngmalɔ Will Durant ngma kaa ngɛ Roma nɔ yemi ɔ mi ɔ, “a poɔ Kristofohi a nya kaa a ngɔɔ mi gbami kɛ baa wekuhi a mi,” a nɛ jã kɛ̃ nɛ a poɔ Yehowa Odasefohi hu a nya mwɔnɛ ɔ. Se anɛ Yehowa Odasefohi ngɔɔ mi gbami kɛ baa wekuhi a mi lo?

 Benɛ kojomi he nɛ ji, European Court of Human Rights ɔ ngɛ nya pomi munyu nɛ a kɛ fɔ Yehowa Odasefohi a nɔ kaa a ngɔɔ mi gbami kɛ baa wekuhi a mi ɔ mi hyɛe ɔ, a tsɔɔ kaa weku li nɛ a pi Odasefohi ɔ mohu nɛ a ngɔɔ pɛ kɛ baa weku ɔ mi ke a kua kaa “a ma je bu kpo kɛ ha he blɔ nɛ a weku no ɔ ngɛ kaa e ma nyɛ maa hla jami nɛ e suɔ ɔ.” Kojomi He ɔ de hu ke: “Si fɔfɔɛ nɛ ɔ pɔɔ bami ngɛ weku mi bimɛ nɛ a be jami kake mi ɔ a kpɛti, nɛ pi Yehowa Odasefohi pɛ nɛ a kɛ si fɔfɔɛ kaa kikɛ kpee.” b Ke a te si wo Yehowa Odasefohi ngɛ a jami ɔ he je po ɔ, a bɔɔ mɔde kaa a kɛ Baiblo mi ga womi nɛ ɔ ma tsu ní. Baiblo ɔ de ke: “Nyɛ ko pee nɔ ko yayami kɛ to yayami nane mi. . . . Ke e maa hi ɔ, nyɛɛ bɔ mɔde nɛ nyɛɛ kɛ nɔ tsuaa nɔ nɛ hi si ngɛ he jɔmi mi.”​—Roma Bi 12:17, 18.

 Odasefo ɔmɛ kɛ Baiblo mi blɔ tsɔɔmi kaa ‘a kɛ nɔ ko nɛ e le Nyɔmtsɛ ɔ pɛ nɛ sɛ gba si himi mi’ ɔ tsuɔ ní. Enɛ ɔ tsɔɔ kaa a kɛ nihi nɛ ngɛ a hemi kɛ yemi ɔ mi pɛ nɛ sɛɛ gba si himi mi. (1 Korinto Bi 7:​39) Fami nɛ ɔ je Baiblo ɔ mi, nɛ e ji ga womi kpakpa. Kaa nɔ hyɛmi nɔ́ ɔ, munyu ko nɛ ngɛ womi ko nɛ a tsɛɛ ke, Journal of Marriage and Family nɛ a pee ngɛ jeha 2010 mi ɔ de ke, “nihi nɛ a sɛ gba si himi mi nɛ a ngɛ jami kake mi ɔ,” a gba si himi peeɔ kpakpa pe nihi nɛ a be jami kake mi ɔ. c

 Se Odasefohi wui nihi nɛ a ngɛ a jami ɔ mi ɔ he wami kaa a je a hunomɛ loo a yihi nɛ a pi Odasefohi a he. Baiblo ɔ de ke: “Ke nyumu nɛ le Kristo ngɛ yo nɛ lɛɛ e li Kristo, se kɛ̃ ɔ, yo ɔ kplɛɛ kaa e kɛ lɛ maa hi si ɔ, nyumu ɔ ko ngmɛɛ e he. Ke yo nɛ le Kristo ngɛ huno nɛ lɛɛ e li Kristo, se kɛ̃ ɔ, nyumu ɔ kplɛɛ kaa e kɛ lɛ maa hi si ɔ, yo ɔ kó kua lɛ gbami.” (1 Korinto Bi 7:​12, 13) Yehowa Odasefohi kɛ fami nɛ ɔ tsuɔ ní.