Dɛbi, Yehowa Odasefohi suɔ hiɔ tsami, lɔ ɔ he ɔ, a yaa hiɔ tsami he. Wa bɔɔ mɔde kaa wa maa hyɛ wa he nɔ saminya konɛ wa ná nɔmlɔ tso mi he wami kpakpa, se be komɛ ngɛ nɛ wa ‘hia dɔkita’. (Luka 5:31) Ngɛ anɔkuale mi ɔ, Yehowa Odasefo ɔmɛ a kpɛti ni komɛ ji dɔkitahi kaa bɔ nɛ Luka nɛ hi si ngɛ kekle Kristofo ɔmɛ a be ɔ mi ɔ hu ji dɔkita a.​—Kolose Bi 4:14.

 Se hiɔ tsami blɔ nɔ tomi komɛ ngɛ nɛ a kɛ Baiblo mlaahi kɔ we, nɛ wa kuaa lɔ ɔmɛ. Kaa nɔ hyɛmi nɔ́ ɔ, wa ngɔɛ muɔ ejakaa Baiblo ɔ kplɛɛ we muɔ nɛ a maa ye kɛ wo nɔmlɔ tso ɔ mi kɛ ná he wami ɔ nɔ. (Bɔfo Ɔmɛ A Ní Tsumi 15:20) Jã kɛ̃ nɛ Baiblo ɔ kplɛɛ we hiɔ tsami blɔ nɔ tomihi nɛ kɛ mumi yayamihi kɛ ní tsumi ngɛ tsakpa a nɔ.​—Galatia Bi 5:19-21.

 Se hiɔ tsami blɔ nɔ tomi babauu ngɛ nɛ a kɛ Baiblo mlaahi kɔ. Lɔ ɔ he ɔ, nɔ nitsɛ nɛ mwɔɔ e yi mi kpɔ ngɛ nɔ́ nɛ e suɔ ɔ he. Odasefo no ko maa kplɛɛ tsopa loo hiɔ tsami blɔ nɔ tomi pɔtɛɛ ko nɔ, be mi nɛ Odasefo no kpa ma kua jamɛ a hiɔ tsami blɔ nɔ tomi ɔ nɔuu.​—Galatia Bi 6:5.