Ee, Yehowa Odasefohi yeɔ bua nihi ke oslaa ba. Kaa bɔ nɛ Baiblo ɔ tsɔɔ ngɛ Galatia Bi 6:10, wa yeɔ bua Odasefohi kɛ nihi nɛ a pi Odasefohi ngɛ oslaa be mi. Baiblo ɔ de ke: “Waa pee nihi tsuo kpakpa daa, titli ɔ, nihi nɛ waa kɛ mɛ hɛɛ hemi kɛ yemi kake ɔ.” Wa bɔɔ mɔde hu kaa wa maa wo nihi nɛ oslaa ná mɛ ɔ a bua, nɛ wa jeɔ ngmami ɔ mi kɛ yeɔ bua mɛ.​—2 Korinto Bi 1:3, 4.

 Ke oslaa ko ba a, asafo mi nikɔtɔmahi nɛ a ngɛ he nɛ oslaa a ba ngɛ ɔ bɔɔ mɔde kaa a ma hla asafo mi bi ɔmɛ a se blɔ konɛ a hyɛ kaa a ngɛ slɔkee lo, nɛ a le yemi kɛ bua mi nɛ a we asafo ɔ mi bi ɔmɛ maa hia. Asafo mi nikɔtɔma amɛ ngɔɔ níhi nɛ ya nɔ, kɛ bɔ nɛ a tsu he ní ha a he amaniɛ bɔmi kɛ ya haa Yehowa Odasefohi asafo ɔ ní tsumi kɔni nɛ ngɛ he nɛ a ngɛ ɔ.

 Ke asafo nɛ ngɛ he nɛ oslaa a ba ngɛ ɔ be nyɛe nɛ e ye bua a, Yehowa Odasefohi asafo ɔ Blɔ Tsɔɔmi Ajla Toli ɔmɛ toɔ blɔ nya nɛ a kɛ níhi nɛ hia nihi nɛ oslaa ná mɛ ɔ ya haa mɛ. Jã kɛ̃ nɛ kekle Kristofo ɔmɛ pee kɛ ye bua a sibi benɛ hwɔ ko ba a. (1 Korinto Bi 16:1-4) Yehowa Odasefohi asafo ɔ ní tsumi kɔni nɛ ngɛ he nɛ oslaa a ba ngɛ ɔ hlaa Oslaa Be Mi Yemi Kɛ Buami Ajla Toli konɛ a hyɛ yemi kɛ buami nɛ a kɛ ma ha a he blɔ nya tomi nɔ. Odasefohi nɛ a je he kpahi ngɔɔ a be kɛ níhi nɛ a ngɛ kɛ yeɔ bua.​—Abɛ 17:17.

 Yehowa Odasefohi asafo ɔ ní tsumi kɔni ɔ ngɔɔ sika nɛ a nine suu nɔ ɔ eko kɛ ya yeɔ bua nihi nɛ oslaa ná mɛ ɔ. (Bɔfo Ɔmɛ A Ní Tsumi 11:27-30; 2 Korinto Bi 8:13-15) Akɛnɛ a wui nihi nɛ a jeɔ a suɔmi mi nɛ a yeɔ bua a hiɔ he je ɔ, a ngɔɔ sika nɛ a to kaa a kɛ maa ye bua nihi nɛ oslaa ná mɛ ɔ kɛ ya yeɔ bua mɛ, nɛ a kɛ tsu we nɔ́ kpa ko. Waa kɛ yemi kɛ buami níhi nɛ wa nine suu nɔ ɔ tsuɔ ní saminya.​—2 Korinto Bi 8:20.