Yomoyo ko nɛ a tsɛɛ lɛ Odval ngɛ Mongolia. E li jeha pɔtɛɛ nɛ e ye, se e susu kaa a fɔ lɛ ngɛ jeha 1921 ɔ mi. Benɛ e wɛ ɔ, e hyɛɛ lohwehi a nɔ kɛ haa e fɔli. E ya sukuu jeha kake pɛ. E li ní kanemi. Se lingmi nɛ ɔ, womiyo ko nɛ e mi fonihi ngɛ fɛu ye bua lɛ nɛ e ba le Mawu, nɛ e kase si himi kpakpa nɛ nihi nɛ a buɔ Mawu tue ma ná hwɔɔ se ɔ hu he ní. E bua jɔ nɔ́ nɛ e kase ɔ he wawɛɛ.

Womiyo nɛ ɔ nɛ Yehowa Odasefohi pee ngɛ jeha 2011 mi ɔ slɔɔto enyɔ lɛ ngɛ. Womiyo enyɔ ɔmɛ tsuo ngɛ fɛu, se kake mi ningma amɛ hiɛ pe kake.

A tsɛɛ nɔ́ nɛ e mi ningma amɛ hiɛ ɔ ke, Bu Mawu Tue Nɛ́ O Hi Si Kɛ Ya Neneene. E be kɛe nɛ a maa pee womiyo nɛ ɔ ngɛ gbihi 583 a mi. A tsɛɛ kaketsɛ ɔ hu ke, Bu Mawu Tue, nɛ a maa pee lɔ ɔ hu ngɛ gbihi 483 a mi. Moo ngɔ kɛ to womi nɛ ji, United Nations Universal Declaration of Human Rights nɛ a tsɔɔ sisi kɛ ya gbihi 413 a mi ngɛ October 2013 ɔ mi ɔ he nɛ o hyɛ. Jehanɛ hu ɔ, a gba womiyo enyɔ nɛ ɔmɛ maa pee ayɔ 80.

Ngɛ Brazil ɔ, benɛ yo nɔkɔtɔma ko nine su Bu Mawu Tue womiyo ɔ eko nɔ ɔ, e de ke: “E ji bua jɔmi kaa nihi ngɛ nɛ a susuɔ ni komɛ kaa imi a he. I ngɔɛ nyɛ womi tɛtlɛɛ ɔmɛ, ejakaa i li ní kanemi. Se womiyo nɛ ɔ lɛɛ, i suɔ.”

Brigitte nɛ e ngɛ France, nɛ e li ní kanemi ɔ de ke: “Daa ligbi ɔ, i hyɛɛ foni ɔmɛ nɛ a ngɛ womiyo ɔ mi ɔ.”

Odasefo no ko nɛ e je South Africa hu ngma ke: “I nɛ́ womiyo kpakpa ko nɛ maa ye bua mi nɛ ma kɛ tsɔɔ China bi anɔkuale ɔ kaa womiyo nɛ ɔ. I kɛ univɛsiti bi komɛ sɛɛ ní, nɛ i kɛ nihi nɛ a li ní kanemi hu sɛɛ ní​—lɔ ɔ ji kaa, i kɛ nimli slɔɔtohi tsuo sɛɛ ní. Bu Mawu Tue Nɛ́ O Hi Si Kɛ Ya Neneene womiyo ɔ yeɔ bua mi nɛ i tsɔɔ Baiblo mi anɔkuale ɔ saminya. I nyɛɛ nɛ i ngɔɔ hɛngmɛfia nyingmi etɛ pɛ kɛ duɔ anɔkuale ɔ ngɛ nihi a tsui mi.”

Yehowa Odasefohi kɛ nyumu ko kɛ e yo nɛ a ya sukuu bɔ nɛ sa kaseɔ ní ngɛ Germany. Benɛ nyumu ɔ na womiyo ɔ, e de ke: “Mɛni he je nɛ o ha we mi womiyo nɛ ɔ kekle ɔ? E haa nɛ i nuɔ Baiblo ɔ mi munyu komɛ a sisi saminya.”

Yo ko nɛ mumui ji lɛ ngɛ Australia de ke: “I kɛ jami ko mi yihi nɛ a buu mɛ kaa a ngɛ klɔuklɔu hi we kake mi jehahi babauu. I nyɛɛ nɛ i hɛɛ kɛ suu osɔfo ɔmɛ a he pe nɔ fɛɛ nɔ. Se a ti nɔ ko nɔ ko tsɔɔ we mi nɔ́ nɛ Mawu Matsɛ Yemi ji. Fonihi nɛ ngɛ womiyo nɛ ɔ mi ɔ ye bua mi nɛ i nu munyu nɛ ngɛ Mateo 6:​10 sisi saminya.”

Yehowa Odasefohi a ní tsumi kɔni nɛ ngɛ Canada a ngma ke: “Benɛ Sierra Leone bi komɛ nɛ a ngɛ Canada ma nɛ ɔ mi ɔ na Bu Mawu Tue womiyo ɔ ngɛ Krio gbi mi ɔ, a ti nihi fuu de kaa Yehowa Odasefohi ngɛ mɔde bɔe wawɛɛ ngɛ Baiblo sɛ gbi ɔ nɛ a ngɛ fiɛɛe ɔ he. A ti ni komɛ hu de ke, ‘Nyɛɛ lɛɛ, nyɛ susuɔ nihi a he, se jami kpa amɛ lɛɛ, pi a kɔmɔ ji nɔ ko.’ ”