Ngɛ Yehowa Odasefohi a blɔ fa mi ɔ, womi ko be nɛ e he hia pe Baiblo ɔ. A kaseɔ Baiblo ɔ daa, nɛ a kɛ tsɔɔ nihi sane kpakpa nɛ kɔɔ Mawu Matsɛ Yemi ɔ he ɔ. (Mateo 24:14) Akɛnɛ a kɛ Baiblo tsuɔ ní daa he je ɔ, a Baiblo se kɛ we. Enɛ ɔ he ɔ, Yehowa Odasefo ɔmɛ bɔ mɔde kaa a maa pee New World Translation of the Holy Scriptures ehe nɛ a je lɛ kpo jeha 2013 ɔ saminya, konɛ e pee fɛu nɛ e se hu nɛ kɛ.

A suɔ nɛ Baiblo ehe ɔ nɛ hi he wami. Lɔ ɔ he ɔ, a tsɔ Odasefo komɛ kɛ je a womi fiami he nɛ ngɛ Wallkill ngɛ New York, U.S.A. nɛ a ya na womi peemi ní tsumi ko nya dalɔ. E de Odasefo ɔmɛ ke, “Baiblo ɔ nɛ nyɛ ngɛ hlae ɔ eko be je mi.” E de hu ke, “Ngɛ anɔkuale mi ɔ, a peeɔ Baiblohi fuu konɛ e pee nihi fɛu, se a pee we nɛ a se nɛ kɛ. Enɛ ɔ ngɛ aywilɛho wawɛɛ.”

New World Translation Baiblohi nɛ a pee jeha komɛ nɛ be ɔ ekomɛ be he wami kulaa​—be komɛ ngɛ nɛ ke je mi dɔ la a, kɛkɛ e se mi toto ɔ kpɔɔ, aloo e mi gbaa enyɔ. Enɛ ɔ he ɔ, a bɔ mɔde nɛ a hla níhi a mi ngɛ womihi kɛ gluu nɛ ke a kɛ tsu ní ɔ, e ma ha nɛ Baiblo ɔ se maa kɛ ngɛ si fɔfɔɛhi tsuo a mi ɔ he. Níhi a mi hlami nɛ a pee ɔ ye bua mɛ nɛ a pee Baiblo ɔ slɔɔtoslɔɔto komɛ, nɛ a kɛ ha Yehowa Odasefo komɛ ngɛ ma ekpaekpahi a mi konɛ a kɛ tsu ní nɛ a hyɛ. A kɛ tsu ní ngɛ hehi nɛ pu tsoɔ wawɛɛ, kɛ hehi nɛ fiɛ ngɛ wawɛɛ kaa Alaska.

Nyɔhiɔ ekpa se ɔ, a kpale Baiblo ɔmɛ kɛ ba, nɛ a hyɛ mɛ saminya. Wa womi kpɛli ɔmɛ pee tsakemi komɛ, nɛ a kpale pee Baiblo ehehi, nɛ a ngɔ kɛ mane ni ɔmɛ ekohu. Ngɛ enɛ ɔ peemi mi ɔ, a ka Baiblohi 1,697 ngɛ ma slɔɔtohi a nɔ ngɛ si fɔfɔɛ slɔɔtohi a mi. Kakaaka komɛ pɛ lɛɛ pee basaa. Kaa nɔ hyɛmi nɔ́ ɔ, a je Baiblo kake he ngɛ kpo nɔ nyɔ mi, nɛ hiɔmi nɛɛ lɛ kɛ ya si mɔtu, nɛ kake hu nɔ nyu mi nɛ e se kɛ ngɛ nyu ɔ mi. Bɔ nɛ Baiblo nɛ ɔmɛ pee ha a ye bua nɛ a na bɔ nɛ womihi nɛ a kɛ pee Baiblo ɔ he wami ha ngɛ.

Benɛ a ngɛ Baiblo ɔ kae nɛ a hyɛ ngɛ jeha 2011 mi ɔ, Odasefo ɔmɛ ya he womi kpɛmi klama ehehi nɛ a kɛ ma tsu ní ngɛ Wallkill, U.S.A, kɛ Ebina ngɛ Japan. Klama nɛ ɔ nɛ a he ɔ ma nyɛ ma ha nɛ a pee Baiblo babauu. Jehanɛ ɔ, Baiblohi nɛ a maa pee ngɛ he enyɔ ɔmɛ tsuo ɔ maa pee nɔ́ kake.

Womi peemi he enyɔ ɔmɛ bɔni New World Translation momo ɔ eko peemi ngɛ jeha 2012 sisije ɔ mi. A pee nɔ́ nɛ e se mi ngɛ yumu, kɛ nɔ́ nɛ ngɛ tsutsuu ɔ eko. A ngɔ hlɔba ehe ko nɛ a tsɛɛ lɛ polyurethane ɔ kɛ pee. Se a ngɔ gluu ko nɛ a kɛ tsu we ní gblee kɛ kpa hlɔba a he nɛ a ngɔ bo ko kɛ ngmɛ nɔ. Enɛ ɔ ha nɛ Baiblo ɔmɛ a se mi toto ɔ kokloɔ. Sisije ɔ, a bɔ mɔde kaa a ma nyɛ maa pee he nɔ́ ko lo, se e hí, lɔ ɔ he ɔ, a kpa peemi.

Nihi nɛ a tsuɔ womi nɛ ɔmɛ a he ní ɔ a ti nɔ kake yɔse kaa nyagba ko ngɛ hlɔba a nɛ a kɛ tsu ní ɔ he, nɛ e maa ye kaa a ma ná e nya tsaba. Jinɛ a ma nyɛ ma ngɔ womi nɛ he wa kɛ pee Baiblo se mi toto ɔ, se a ya nɔ nɛ a hla blɔ nɛ a ma nyɛ maa gu nɔ kɛ pee Baiblo nɛ e se mi toto ɔ ngɛ bɔdɔɔ nɛ e ngɛ fɛu hulɔ. Benɛ a ngɔ nyɔhiɔ eywiɛ kɛ ka gluu slɔɔtohi kɛ bo slɔɔtohi ɔ, nyagbenyagbe ɔ, a na eko nɛ ma nyɛ ma ha nɛ a je ní tsumi sisi ekohu​—a na nɔ́ nɛ ma ha nɛ Baiblo se mi toto ɔ maa pee bɔdɔɔ nɛ e be kokloe.

Ngɛ September 2012 mi ɔ, a ha nɛ wa womi peemi ní tsumi he ɔmɛ tsuo kpa Baiblo momo ɔ he ní tsumi, a ha nɛ a gba nɔ́ nɛ a pee momo ɔ tsuo nɛ e ta, nɛ a mlɛ kɛ ya si benɛ a je New World Translation ehe ɔ peemi sisi. A to kaa a ma je ehe ɔ kpo ngɛ October 5, 2013, ngɛ jeha kpe nɛ Watch Tower Bible and Tract Society of Pennsylvania a maa pee ɔ sisi.

Soha nɛ ji, August 9, 2013 ɔ, a ngɔ Baiblo ehe ɔ nɛ a to blɔ nya ngɛ kɔmpiuta nɔ ɔ kɛ mane womi peemi ní tsumi he ɔmɛ tsuo, nɛ e we jena a, a bɔni Baiblo ɔ fiami nɔuu. A gbe kekleekle níhi nɛ a pee ɔ nya ngɛ August 15. Otsi kpaago nɛ nyɛɛ se ɔ, ní tsuli nɛ a ngɛ Wallkill kɛ Ebina a tsu ní nyɔ kɛ pia, nɛ a fia Baiblo 1,600,000 nɛ a kɛ mane, nɛ nihi nɛ a ya jeha kpe ɔ tsuo ná eko.

Baiblo ehe ɔ nɛ a pee ɔ ngɛ fɛu, nɛ a pee konɛ e se nɛ kɛ mohu lɛɛ, se wami munyu nɛ ngɛ mi ɔ he jua wa wawɛɛ. Benɛ yo ko nɛ e ngɛ United States ɔ nine su e nɔ́ nɔ ɔ, e ngma ke, “Baiblo ehe ɔ ha nɛ amlɔ nɛ ɔ lɛɛ i nuɔ Baiblo ɔ sisi saminya.”