Spania Gbi Sisi Tsɔɔmi Kuu ɔ Hia Kɛ Ho Spain Ya
Yesu de ke a maa fiɛɛ Matsɛ Yemi ɔ he sane kpakpa a kɛ ha nihi ngɛ zugba a nɔ tsuo. (Mateo 24:14) Kɛ je jeha 1909 ɔ, Yehowa Odasefohi tsɔɔ Baiblo kasemi níhi a sisi kɛ ya Spania gbi mi, konɛ a kɛ ye bua nihi babauu nɛ a nu Matsɛ Yemi sɛ gbi ɔ ngɛ a je gbi mi. Akɔtaa bumi tsɔɔ kaa amlɔ nɛ ɔ, gbi nɛ nihi babauu tuɔ ngɛ je ɔ mi ji China gbi, lɔ ɔ se ɔ, Spania gbi nɛ nihi tuɔ wawɛɛ. Nihi nɛ a tuɔ Spania gbi ɔ a yibɔ maa pee ayɔ 500.
William nɛ e piɛɛ Spania gbi sisi tsɔɔmi kuu ɔ he ɔ de ke, “Spania gbi ɔ ji gbi nɛ a tuɔ wawɛɛ ngɛ mahi babauu a mi ngɛ je ɔ mi. Enɛ ɔ he ɔ, oti nɛ waa kɛ ma wa hɛ mi ji kaa wa maa tsɔɔ níhi a sisi kɛ ya Spania gbi mi konɛ e ta nɔ tsuaa nɔ nɛ maa kane ɔ tsui he.” Bɔ nɛ pee nɛ wa nyɛ nɛ waa su oti nɛ ɔ he ɔ, a hla gbi sisi tsɔɔli kɛ je Argentina, Colombia, El Salvador, Guatemala, Mexico, Puerto Rico, United States, Uruguay, Venezuela kɛ Spain ma a mi nitsɛ.
Jehahi babauu nɛ be ɔ, jinɛ Yehowa Odasefohi nɛ a ji gbi sisi tsɔɔli ngɛ Argentina, Mexico, kɛ Spain ɔ yeɔ bua Spania gbi sisi tsɔɔli nɛ a ngɛ United States ɔ. Se ngɛ jeha 1993 mi ɔ, a ha nɛ Spania gbi sisi tsɔɔli ɔmɛ hia kɛ ya Puerto Rico, nɛ gbi sisi tsɔɔli ɔmɛ tsuo hi he kake kɛ tsu ní.
Ngɛ March 2012 mi ɔ, a to kaa Spania gbi sisi tsɔɔli ɔmɛ nɛ a kpale hia kɛ ya Yehowa Odasefohi a ní tsumi kɔni nɛ ngɛ Spain ɔ. Edward nɛ e piɛɛ gbi sisi tsɔɔmi kuu ɔ he kɛ ya Spain ɔ de ke, “Pi nimli, kɛ níhi nɛ a kɛ tsuɔ ní, kɛ gbi sisi tsɔɔli ɔmɛ a níhi pɛ nɛ waa kɛ ya, se mohu wa ngɔ nɔ́ ko nɛ e he hia wawɛɛ nɛ ji gbi sisi tsɔɔli a womihi nɛ ngɛ wa womi to he ɔ tsuo kɛ ya.” Womihi maa pee 2,500 kɛ Spania Baiblo slɔɔto lafahi abɔ lɛ ngɛ Spania gbi sisi tsɔɔli ɔmɛ a womi to he ɔ.
Benɛ a ngɛ a he nyae ngɛ Spain ɔ
Spania gbi sisi tsɔɔli ɔmɛ ya su Yehowa Odasefohi a ní tsumi kɔni nɛ ngɛ Spain ɔ ngɛ May 29, 2013, nɛ a nyɛmimɛ nɛ a ngɛ lejɛ ɔ nya a he wawɛɛ. A ngɔ gbi sisi tsɔɔli, womihi, kɛ klamahi nɛ a kɛ tsuɔ ní ɔ tsuo kɛ po Atlantic Wo ɔ kɛ ya Spain. Se akɛnɛ a to níhi a he blɔ nya saminya he je ɔ, nihi nɛ a kaneɔ Odasefo ɔmɛ a womi ɔmɛ ngɛ Spania gbi mi ɔ a nine su womihi a nɔ pɛpɛɛpɛ nɛ e ko bi ngɛ a yi. Edward de hu ke, “Matsɛ Yemi sɛ gbi ɔ he hia wawɛɛ, enɛ ɔ he ɔ, wa suɔ nɛ nihi babauu nɛ a tuɔ Spania gbi ɔ nɛ a kane wa womi ɔmɛ.”