Yoku ko ngɛ Pagsanjan ma a mi ngɛ Philippines nɛ nyu jeɔ mi kɛ pueɔ si, nɛ nihi slaa si kɛ ba hyɛɛ. Ma nɛ ɔ mi nɛ ye papaa nɛ a tsɛɛ lɛ ke Nardo Leron hi kɛ wa. Ye papaa wa ngɛ ohia si himi mi. Be nɛ e na kaa ma nɔ yeli ɔmɛ, polisi ɔmɛ kɛ nihi nɛ e kɛ mɛ tsuɔ ní ɔ yi anɔkuale ɔ, lɔ ɔ ha nɛ be fɛɛ be ɔ e mi mi fuɔ nɛ ke e ngɛ munyu tue ɔ, e kpaa ngmlaa kɛ woɔ nɔ yi.

 Ye fɔli ɔmɛ tsu ní wawɛɛ konɛ a nyɛ nɛ a hyɛ a bimɛ kpaanyɔ ɔmɛ a nɔ. Behi fuu ɔ, ke a ho ngmɔ mi ya ngɛ yoku ɔmɛ a nɔ ɔ, a bɛ we mi mla. Enɛ ɔ he ɔ, i kɛ ye nyɛminyumu nɔkɔtɔma Rodelio hyɛɔ wɔ nitsɛmɛ wa he nɔ, nɛ behi fuu ɔ hwɔ yeɔ wɔ. Wa ná we be nɛ waa kɛ ma fiɛ ngɛ wa jokuɛ mi. Ke o ye jeha kpaago pɛ o ma bɔni ní tsumi ngɛ ngmɔ mi. Wa tlooɔ ngmɛ ngɛ kotoku mi kɛ kpleɔ yoku ɔ. Behi ngɛ nɛ tloomi ɔmɛ a mi jiɔ wawɛɛ nɛ wa nyɛ we tloomi, ke e ba jã a, wa gblaa ngɛ zugba.

 Wa papaa gbeɔ wɔ wawɛɛ, se ke wa na nɛ e ngɛ wa mami gbee ɔ, e dɔɔ wɔ pe nɔ́ fɛɛ nɔ́. Wa bɔɔ mɔde kaa wa ma kpata mɛ, se wa nyɛ we. I kɛ Rodelio wa ma wa juɛmi nya si kaa ke wa wa saii ɔ, wa ma gbe wa papaa. I ná jinɛ wa papaa suɔ wɔ!

 Yi wu tso ní nɛ wa papaa peeɔ wɔ ɔ ha nɛ ye bua jɔɛ kulaa, lɔ ɔ he ɔ, benɛ i ye jeha 14 ɔ, i hia kɛ je we mi. Benɛ i je we mi ɔ, i hwɔɔ gbɛjegbɛhi a he, nɛ i bɔni wii hu numi. Nyagbe ɔ, i ya tsu ní ngɛ lɛ ko mi, nɛ i kɛ nihi ya slaa si ngɛ he nɛ nyu ɔ jeɔ yoku ɔ mi kɛ pueɔ si ngɛ ɔ.

 Jeha bɔɔ ko se ɔ, i bɔni Yunivɛsiti yami ngɛ Manila. Se Hɔ kɛ Hɔgba a, i kpale ɔ kɛ yaa Pagsanjan nɛ i ya tsuɔ ní, enɛ ɔ he ɔ, i ná we be tsɔ nɛ i kɛ kaseɔ ní. Si himi ɔ mi ba wa ha mi, nɛ e ngɛ kaa nɔ́ nɛ i li nɔ́ he je nɛ i ngɛ je ɔ mi, nɛ ke i nu wii ɔ hu, ye yeyeeye peemi ɔ nya bɛ si. Lɔ ɔ he ɔ, i kɛ tsopa komɛ kaa methamphetamines, cocaine, kɛ heroin bɔni ní tsumi kaa e maa hi lo. Tsopa yayahi nɛ i bɔni numi ɔ ha nɛ i kɛ ye he woɔ ajuama bɔmi mi. I na kaa nihi ngɛ ohia yee, nihi yi dami sane, nɛ nɔ́ nami pɔ he. I piaa amlaalo ɔ ngɛ níhi ka jã nɛ ngɛ nɔ yae ɔ he. I bi Mawu ke, “Mɛni he je nɛ si himi ɔ pee kikɛ ɔ?” Jamihi nɛ i kpa a mi ɔ tsuo nyɛ we nɛ a ha mi sane bimi nɛ ɔ heto. I kɛ tsopa yaya tsu ní wawɛɛ konɛ ma je ye juɛmi kɛ je ye haomi ɔmɛ a nɔ.

 Ngɛ 1972 ɔ mi ɔ, sukuu bi nɛ a ngɛ Philippines ɔ pee kake nɛ a tsɔ atuã kɛ si amlaalo ɔ. I ya piɛɛ atuã tsɔmi kuu nɛ ɔmɛ eko a he, nɛ wa pee basabasa. Polisi nuu wa kpɛti nihi fuu, nɛ nyɔhiɔ komɛ a se ɔ, amlaalo ɔ muɔɔ sojahi kɛ ba da polisi ɔmɛ a nane mi ngɛ ma a mi tsuo.

 I bɔni gbɛjegbɛhi a he hwɔmi ekohu, se akɛnɛ i piɛɛ he nɛ a tsɔ atuã kɛ si amlaalo ɔ he je ɔ, i yeɔ gbeye kaa a maa nu mi. Akɛnɛ i be sika nɛ ma kɛ he tsopa yaya he je ɔ, i bɔni jumi. Nyagbe ɔ, i kɛ sikatsɛmɛ kɛ nibwɔhi nɛ a baa ma a mi ɔ náa bɔmi nɛ a woɔ mi hiɔ. Ke ye je mi bami nɛ ɔ ha nɛ i gbo po pi ye kɔmɔ.

 Jamɛ a be ɔ mi ɔ, ye mami kɛ ye senɔ nyumuwi ɔmɛ a kpɛti nɔ kake kɛ Yehowa Odasefo ɔmɛ ngɛ Baiblo ɔ kasee. Ye papaa mi mi fu wawɛɛ, nɛ e sã womihi nɛ a kɛ kaseɔ Baiblo ɔ. Se a fĩ si nɛ a ha nɛ a baptisi mɛ kaa Odasefohi.

 Ligbi ko ɔ, Odasefo no ko kɛ ye papaa sɛɛ Baiblo ɔ mi si womi nɛ tsɔɔ kaa be maa su nɛ a maa ye dami sane ngɛ je ɔ mi tsuo ɔ he ní. (La 72:12-14) Ye papaa bua jɔ munyu nɛ ɔ he wawɛɛ, enɛ ɔ he ɔ, e to kaa e ma hla níhi a mi kaa e ji anɔkuale lo. Benɛ e ngɛ Baiblo ɔ kanee ɔ, pi si nɛ Mawu wo kaa matsɛ yemi ko ma ba ye dami sane ngɛ zugba a nɔ ɔ pɛ nɛ e na. E na bɔ nɛ Mawu suɔ kaa hunomɛ kɛ tsɛmɛ kɛ a weku mi bimɛ nɛ hi si ha. (Efe. 5:28; 6:4) E kɛ we kulaa nɛ e kɛ ye nyɛmimɛ ɔmɛ tsuo ba pee Yehowa Odasefohi. Akɛnɛ i kɛ a he kɛ he je ɔ, i li nɔ́ nɛ ngɛ nɔ yae.

 Ngɛ jeha 1978 ɔ, i hia kɛ ya je Australia. Se ngɛ ma nɛ tue mi jɔmi kɛ sika ngɛ mi nɛ ɔ mi po ɔ, i ná we bua jɔmi. Loloolo ɔ, i ngɛ dã kɛ tsopa yaya nue. Jamɛ a jeha a, Yehowa Odasefohi ba slaa mi. A tsɔɔ mi ngɛ Baiblo ɔ mi kaa be ko maa ba nɛ tue mi jɔmi maa hi zugba a nɔ. Ye bua jɔ nɔ́ nɛ a tsɔɔ mi ɔ he, se ye yi mi tɛ̃ mi ngɛ a he.

 Be bɔɔ ko se ɔ, i kpale kɛ ho Philippines ya konɛ ma ya ye otsi ko ngɛ lejɛ ɔ. Ye nyɛmimɛ ɔmɛ de mi ke wa papaa pee tsakemihi fuu nɛ amlɔ nɛ ɔ, e be kaa bɔ nɛ e ngɛ sa a hu. Se ye papaa he tai nya he je ɔ, i sume po nɛ ma na e hɛ mi.

 Ye senɔ yoyo ɔ da Baiblo ɔ nɔ kɛ ye bua mi nɛ i na nɔ́ he je nɛ nɔ́ nami kɛ dami sane nɛ a yi ɔ pɔ he ngɛ je ɔ mi ɔ. E pee mi nyakpɛ kaa jokuɛ yoyo wayoo nɛ be níhi a si kpami tsɔ ko ɔ nyɛ nɛ e ha mi ye sane bimi ɔmɛ a heto. Benɛ ma kpale kɛ ho Australia ya a, ye papaa ha mi You Can Live Forever in Paradise on Earth a womi ɔ eko. E de mi ke: “Womi nɛ ɔ maa ye bua mo nɛ o maa na o sane bimi ɔmɛ a heto.” E de mi ke, ke i ya su Australia a, ma ya hla Yehowa Odasefo ɔmɛ a se blɔ ngɛ lejɛ ɔ.

 I bu ye papaa ga womi ɔ tue nɛ i ya hla Yehowa Odasefo ɔmɛ a Matsɛ Yemi Asa nɛ kɛ he nɛ i ngɛ ɔ he kɛ we ɔ ngɛ Brisbane. I kplɛɛ nɔ kaa a kɛ mi nɛ ba kase Baiblo ɔ. Baiblo ɔ mi gbamihi komɛ kaa nɔ́ nɛ ngɛ Daniel yi 7 kɛ Yesaya yi 9 ɔ ye bua mi nɛ i ba na kaa Mawu Matsɛ Yemi nɛ a yeɔ dami sane ngɛ mi ɔ, maa ye je ɔ tsuo nɔ hwɔɔ se. I kase kaa wa ma ná bua jɔmi ngɛ Paradeiso ɔ mi ngɛ zugba a nɔ. I suɔ nɛ ma sa Mawu hɛ mi, se i ba na kaa loko ma nyɛ ma pee jã a, ja i ná he nɔ yemi su, i kpa tsopa yaya kɛ ní tsumi, nɛ i tsake ye je mi bami ɔ. I kɛ ye plã a hi si hu, nɛ i kpa tsopa yayahi kɛ ní tsumi. Benɛ ye hɛ kɛ nɔ fɔmi ngɛ Yehowa mi ɔ mi ngɛ wae ɔ, i sɔle konɛ e ye bua mi nɛ ma pee tsakemi kpahi nɛ piɛ ɔ.

 Bɔɔbɔɔbɔɔ ɔ, i ba yɔse kaa nɔ́ nɛ i ngɛ kasee ɔ ma nyɛ ma tsake nɔ ko si himi. Baiblo ɔ tsɔɔ kaa ke wa bɔ wa he mɔde ɔ, wa ma nyɛ maa “wo su ehe ɔ.” (Kol. 3:9, 10) Benɛ i ngɛ tsakemi nɛ ɔmɛ pee ngɛ ye si himi mi ɔ loko i ba na kaa nɔ́ nɛ a de mi kɛ kɔ ye papaa he kaa e pee tsakemi ɔ ji anɔkuale. Ngɛ nɔ́ nɛ e pee wɔ ɔ he je ɔ, jinɛ e sa kaa i ko ná e he abofu kɛ ninyɛ, se mohu ɔ, i suɔ nɛ wa dla wa kpɛti. Nyagbe ɔ, i ngɔ ye papaa he tɔmi kɛ pa lɛ, nɛ i je e he ninyɛ nɛ i ná kɛ je ye jokuɛwi a si ɔ kɛ je ye mi.

 Benɛ i ji niheyo wayoo ɔ, i nyɛɛɔ nihi a se kɛ peeɔ níhi nɛ sɛ. Enɛ ɔ ha nɛ nɔ́ nɛ Baiblo ɔ de ɔ ba mi ngɛ ye blɔ fa mi​​—huɛ yaya bɔmi ha nɛ i pee ní yayamihi. (1 Kor. 15:33) Se i ba ná huɛmɛ kpakpahi ngɛ Yehowa Odasefohi a kpɛti, nɛ a ye bua mi nɛ i ba pee nɔmlɔ kpakpa. Huɛmɛ kpakpa nɛ ɔmɛ a kpɛti nɛ i ná yo nɛ i suɔ ngɛ. A tsɛɛ lɛ ke Loretta. Wa pee kake kɛ ngɛ nihi ye buae konɛ mɛ hu a ná Baiblo ɔ he se.

 I naa Yehowa si kaa kɛ gu Baiblo ɔ nɔ ɔ, e ye bua ye papaa nɛ e ba pee huno kpakpa, kɛ Kristofo no nɛ he jɔ. Jinɛ i hyɛ we blɔ kaa ye papaa ma tsake kikɛ. Benɛ a baptisi mi ngɛ jeha 1987 ɔ mi kaa Yehowa Odasefo no ɔ, ye papaa fua mi wawɛɛ. Lɔ ɔ ji kekleekle be nɛ ye papaa fua mi!

 Ye papaa kɛ ye mami tsuo ngɔ jeha 35 kɛ se kɛ tsɔɔ nihi anɔkuale ɔ nɛ ngɛ Baiblo ɔ mi ɔ. E ba pee nɔ ko nɛ e kɛ ní tsumi fiɛ we kulaa, nɛ́ e susuɔ nɔ he. A ba le lɛ kaa nɔ ko nɛ e yeɔ bua ni kpahi. Kɛ je benɛ ye papaa tsake ɔ, i ba ná bumi kɛ suɔmi kɛ ha lɛ. Ye bua jɔ kaa e bi ji mi! E ngɛ mi kaa e gbo ngɛ jeha 2016 mi mohu lɛɛ, se ke i kai lɛ ɔ, ye bua jɔɔ ejakaa Baiblo ɔ ye bua i kɛ lɛ tsuo nɛ wa pee tsakemihi ngɛ wa si himi mi. Amlɔ nɛ ɔ, e he ninyɛ nɛ i ná be ko nɛ be ɔ he nini nyafii po be ye tsui mi. Ye bua jɔ hu kaa i ba le Yehowa Mawu nɛ ji ye hiɔwe Tsɛ ɔ, nɔ nɛ wo si kaa e maa po nyagbahi nɛ ngɛ wekuhi a mi ngɛ je ɔ mi tsuo a se ɔ.