A fɔ mi ngɛ Montreal, nɛ ji ma nɛ kle pe kulaa ngɛ Quebec kpokpa a nɔ ngɛ Canada. I ngɛ nyɛmimɛ etɛ, nɛ wa fɔli ɔmɛ je suɔmi mi kɛ tsɔse wɔ ngɛ Rosemont. He nɛ wa hi ɔ ngɛ bua jɔmi, nɛ wa ná we nyagba ko.

 Benɛ i ji jokuɛyo ɔ, ye bua jɔ Baiblo ɔ he wawɛɛ. I kai kaa benɛ i ye jeha 12 ɔ, ke i ngɛ Yesu he ní kanee ngɛ Sane Kpakpa amɛ a mi ɔ, ye bua jɔɔ he wawɛɛ. Suɔmi kɛ mi mi sami nɛ Yesu je kpo kɛ tsɔɔ nihi ɔ ta ye tsui he, nɛ i de ye he ke ma pee ye ní kaa Yesu. Aywilɛho sane ji kaa benɛ i ngɛ wae nɛ i kɛ nimli yayamihi bɔni bɔmi ɔ, jamɛ a suɔmi ɔ nɛ i ná a laa.

 Ye papaa ji la fialɔ. E haa mi e saxophone ɔ nɛ i kpãa, nɛ e ha nɛ i ná suɔmi kɛ ha la fiami. Akɛnɛ ye bua jɔ la fiami he he je ɔ, e kɛ we kulaa nɛ i ba kase guitar fiami. Be bɔɔ se ɔ, i tsɔ la fiami kuu ko, nɛ wa ya fiaa lahi ngɛ he nya buamihi a sisi. Ni komɛ nɛ a he biɛ wawɛɛ ngɛ la fiami ní tsumi ɔ mi ɔ ba de mi kaa a suɔ nɛ a ye bua wɔ konɛ waa ya wa hɛ mi. I ba ná ní tsumi ngɛ la pomi ní tsumi he ko nɛ he biɛ wawɛɛ ɔ mi. Ye la amɛ su tsitsaa, nɛ a pɔɔ fiami ngɛ hleedio nɔ ngɛ Quebec.

 Kɛ je jamɛ a be ɔ mi ɔ, i susu kaa nɔ́ ko hia we mi ngɛ je mi. Niheyo tsuãa ji mi, i he biɛ, nɛ i ngɛ sika fuu náe ngɛ ye ní tsumi ɔ mi. Ke je na a, i ya gbɔleɔ ye kpɔhi a mi, a tsɛɔ mi kɛ yaa tiivi kɛ hleedio nɔ, nɛ nihi haa nɛ i ngmaa ye biɛ ngɛ a womihi a nɔ. Ke je jɔ ɔ, i ya fiaa la ngɛ hehi, nɛ i yaa okplɔɔ ngmɛmihi a sisi. Bɔ nɛ pee nɛ ma ko nu pɔtɔtɔɛ he ɔ, i bɔni dã numi, nɛ bɔɔbɔɔbɔɔ ɔ, i bɔni tsopa yaya hu numi. Ye je mi bami puɛ, nɛ pi ye kɔmɔ ji nɔ́ ko.

 Nihi fuu ná nɛ a ngɛ kaa imi ejakaa a naa mi kaa nɔ ko nɛ e ngɛ bua jɔmi. Se ngɛ ye mi ɔ, i nuɔ he kaa nɔ́ ko laa, titli ke imi pɛ i ngɛ he ko. Ye bua jɔɛ, nɛ i pee yeyeeye. Nyumu enyɔ komɛ nɛ i kɛ mɛ tsuɔ ní ɔ ba nu AIDS, nɛ a gbo. Ye tsui po wawɛɛ! E ngɛ mi kaa ye bua jɔ lami he mohu lɛɛ, se ye bua jɔɛ je mi bami nɛ piɛɛ he ɔ he.

 E ngɛ mi kaa i ná níhi nɛ i ngɛ hlae ɔ lɛɛ, se i le hu kaa níhi nɛ ngɛ nɔ yae ngɛ je ɔ mi ɔ hí. Mɛni he je nɛ a yi dami sane ɔ? E peeɔ mi nyakpɛ kaa Mawu pee we nɔ́ ko ngɛ ní yayahi nɛ ngɛ nɔ yae ɔ he. Ngɛ anɔkuale mi ɔ, behi fuu ɔ, i sɔleɔ ha Mawu konɛ e tsɔɔ mi nɔ́ he je. Be ko nɛ i ya fia la ngɛ ma slɔɔtoslɔɔtohi a nɔ nɛ i ba ngɛ ye he jɔe ɔ, i bɔni Baiblo ɔ kanemi ekohu. E ngɛ mi kaa i nui níhi nɛ i ngɛ kanee ɔ fuu a sisi lɛɛ, se i yɔse kaa je ɔ nyagbe su ta.

 I kane Baiblo ɔ he ko nɛ tsɔɔ kaa Yesu ha hwɔ ligbi 40 ngɛ nga nɔ. (Mateo 4:1, 2) I de ye he ke, ke imi hu i pee jã a, eko ɔ, Mawu ma je e he kpo kɛ tsɔɔ mi. Lɔ ɔ he ɔ, i to be nɛ ma kɛ ha hwɔ. Benɛ e piɛ otsi enyɔ nɛ ma je hwɔ hami ɔ sisi ɔ, Odasefohi enyɔ ba si ye sinya a, nɛ i ha nɛ a sɛ ye tsu ɔ mi kaa nɔ́ nɛ i ngɛ mɛ blɔ hyɛe. I hyɛ a kpɛti nɔ kake nɛ a tsɛɛ lɛ ke Jacques ɔ hɛ mi, nɛ i bi lɛ ke, “Kɛ wa ma plɛ kɛ le kaa wa ngɛ nyagbe ligbi ɔmɛ a mi kɛɛ?” E bli e Baiblo ɔ, nɛ e kane 2 Timoteo 3:1-5 ɔ kɛ tsɔɔ mi. I bi mɛ sanehi fuu, nɛ a je Baiblo ɔ mi kɛ ha mi ye sane bimi ɔmɛ tsuo a heto. Enɛ ɔ ta ye tsui he wawɛɛ. Benɛ a kɛ mi ba tsa ní sɛɛmi ɔ nɔ bɔɔ ɔ, i ba yɔse kaa e he be hiae nɛ ma ha hwɔ hu.

 I kɛ Odasefo ɔmɛ bɔni Baiblo ɔ kasemi. Nyagbenyagbe ɔ, i ba sɛ ye yi bwɔmi gagaa a, nɛ i bɔni asafo mi kpe ɔmɛ tsuo yami ngɛ Matsɛ Yemi Asa a nɔ. Bɔ nɛ nyɛmimɛ ɔmɛ nya ye he ha a hu ha nɛ i ba ná nɔ mi mami kaa anɔkuale ɔ ji lɔ ɔ nɛ.

 Bɔ nɛ pee nɛ ma nyɛ nɛ ma ngɔ níhi nɛ i ngɛ kasee ɔ kɛ tsu ní ɔ, e he ba hia nɛ ma pee tsakemi ngua komɛ ngɛ ye si himi mi. Kaa nɔ hyɛmi nɔ́ ɔ, e sa nɛ ma jɔɔ tsopa yaya kɛ ní tsumi, nɛ ma kpa ye je mi bami yayami ɔ. Jehanɛ hu ɔ, e sa nɛ ma susu ni kpahi a he mohu pe nɛ ma fo imi pɛ ye nɔ́ mi. Akɛnɛ i ngɛ bimɛ enyɔ nɛ imi pɛ nɛ i ngɛ a nɔ hyɛe he je ɔ, e sa nɛ ma ná deka kɛ ha mɛ nɛ ma tsɔɔ mɛ Yehowa he ní. Enɛ ɔ he ɔ, i kpa la a fiami, nɛ i ya hla ní tsumi ko nɛ ba si ngɛ factory ko.

 Benɛ i ngɛ tsakemi nɛ ɔmɛ pee ɔ, i ná we lɛ gbɔjɔɔ kulaa. Ke i kpa tsopa yaya a numi ɔ, ye he mi dɛ mi, lɔ ɔ he ɔ, be komɛ ɔ, i kpaleɔ ya nuɔ ekohu. (Roma Bi 7:19, 21-24) E ye ha mi wawɛɛ kaa ma ngmɛɛ je mi bami yaya a he. Jehanɛ hu ɔ, ní tsumi ehe nɛ i ngɛ tsue ɔ haa nɛ pɔ tɔɔ ye he, nɛ hiɔwo ɔ hu sui nɔ́ ko. Enɛ ɔ ba jɔ̃ ye kɔni mi. Sika nɛ i kɛ ngmlɛfia enyɔ pɛ náa benɛ i ji la polɔ ɔ, jehanɛ ɔ lɛɛ, e heɔ mi nyɔhiɔ etɛ loko i náa jamɛ a sika a.

 Sɔlemi nɛ i sɔleɔ ɔ ye bua mi nɛ i nyɛ pee tsakemi nɛ ɔmɛ. Baiblo ɔ nɛ i kaneɔ daa a hu ye bua mi. Ngmami pɔtɛɛ komɛ ye bua mi wawɛɛ. Ngmami ɔmɛ a kpɛti kake ji 2 Korinto Bi 7:1. Ngmami nɛ ɔ wo Kristofohi he wami kaa a “fɔ he lo mi kɛ mumi mi mu fɛɛ mu ngɛ [a] he.” Ngmami kpa ko hu nɛ ye bua mi nɛ i na kaa ma nyɛ ma pee tsakemi ji Filipi Bi 4:13. E de ke: “Ejakaa i nyɛɔ peeɔ níhi tsuo kɛ gu nɔ nɛ e woɔ mi he wami ɔ nɔ.” Yehowa Mawu bu ye sɔlemi ɔ tue, nɛ e ye bua mi nɛ i ba nu anɔkualehi nɛ ngɛ Baiblo ɔ mi ɔ sisi, nɛ i kɛ tsu ní. Enɛ ɔ ye bua mi nɛ i jɔɔ ye wami nɔ kɛ ha Yehowa. (1 Petro 4:1, 2) Ngɛ jeha 1997 ɔ mi ɔ, a baptisi mi kaa Yehowa Odasefo no.

 Kaa i pee we tsakemihi ngɛ ye si himi mi ɔ, eko ɔ, jinɛ mwɔnɛ ɔ, i be je mi. Amlɔ nɛ ɔ, i ngɛ bua jɔmi ngɛ ye si himi mi! Yehowa jɔɔ mi nɛ i ná yo kpakpa nɛ a tsɛɛ lɛ ke Elvie. Waa kɛ wa be tsuo sɔmɔɔ Yehowa, nɛ wa tsɔɔ nihi Baiblo ɔ. Enɛ ɔ haa mi bua jɔmi, nɛ ye tsui nɔɔ ye mi. I naa Yehowa si wawɛɛ kaa e gbla mi kɛ ba e ngɔ.​—Yohane 6:44.