I kɛ ye weku ɔ tsuo hi ma nɛ a tsɛɛ ke Tonga a mi, zugba kpɔ nɛ wo bɔle lɛ kakaaka 170 lɛ ngɛ lejɛ ɔ. E ngɛ Pacific woyi je ngɛ pusinɔ he blɔ. Wa be electricity kɛ lɔle, nɛ wa be he lo nya níhi tsɔ hulɔ. Se wa ngɛ nyu ngɛ wa we ɔ mi, nɛ wa lɛɛ kungwɔhi hulɔ. Ke sukuu ha blɔ ɔ, i kɛ ye nyɛminyumuhi enyɔ ɔmɛ wa ya yeɔ bua wa papaa ngɛ wa ngmɔ ɔ mi. Wa duɔ ɔ kɔdu, hiɛ, kooko, kɛ agbeli. Ye papaa duɔ ɔ ngmɔ si ní nɛ ɔmɛ kɛ hyɛɛ wa weku ɔ nɔ, se e tsuɔ ní tsumi tsɔwitsɔwi kpa komɛ hulɔ. Nihi ngɛ zugba kpɔ nɛ ɔ mi ɔ ngɛ bu nɛ mi kuɔ kɛ ha Baiblo ɔ, nɛ wɔ hu jã nɔuu. Wa yaa sɔlemi daa. Se kɛ̃ ɔ, wa susuɔ kaa blɔ nɛ wa maa gu nɔ kɛ ná si himi kpakpa ji kaa wa ma hia kɛ ya hi ma nɛ sika ngɛ lejɛ ɔ mi.

 Benɛ i ye jeha 16 a, ye tsɛko ɔ ha nɛ wa hia kɛ ya hi California, ngɛ U.S.A. I ná we lɛ gbɔjɔ ɔ, ejakaa a ní peepee ja ekpa kulaa! E ngɛ mi kaa wa si himi kɛ wa sika sane pee kpakpa bɔɔ mohu lɛɛ, se jumi ngmlikiti kɛ tsopa yaya kɛ ní tsumi pɔ he ngɛ kpɔ ɔ mi wawɛɛ. Wa pɔɔ tu pɛmi he numi nyɔnyɔɔnyɔ, nɛ nihi nɛ waa kɛ mɛ ngɛ kpɔ ɔ mi ɔ yeɔ gbeye kaa juli ma ba tua mɛ. Nihi fuu hɛɛɔ tu kɛ poɔ a he piɛ, nɛ a kɛ kpataa pɛ hulɔ. Pɛ nɛ ɔ eko te si nɛ a fia ye gugue mi tu. Tu tɛ ɔ ngɛ ye gugue mi kɛ ba si mwɔnɛ ɔ.

 Benɛ i ngɛ nɔ tsami sukuu yae ɔ, i suɔ nɛ ma pee ye ní kaa sukuu bi kpahi nɛ a ji ye juami bi ɔmɛ. Bɔɔbɔɔbɔɔ ɔ, i ngɔ ye he kɛ wo okplɔɔ ngmɛmihi nɛ a ngɛ hoo, dã demi, basabasa peemi, kɛ tsopa yaya kɛ ní tsumi mi. Bɔɔbɔɔbɔɔ ɔ, cocaine numi ba tlɔ ye he. I bɔni jumi bɔ nɛ pee nɛ ma nyɛ ma he tsopa yayahi. E ngɛ mi kaa ye weku li ɔmɛ yaa sɔlemi wawɛɛ mohu lɛɛ, se a kɛ ga womi ko ha we mi ngɛ blɔ nɔ nɛ ma gu kɛ da juami bi a nɔ nyɛmi ɔ nya a he. Behi fuu ɔ, polisihi ba nuɔ mi ngɛ ye basabasa peemi ɔ he je. Ye Si Himi Puɛ Kulaa! Nyagbenyagbe ɔ, a ya wo mi tsu.

 Ngɛ jeha 1997 mi ɔ, ligbi ko nɛ i ngɛ tsu womi he ɔ, nyumu ko nɛ lɛ hu a wo lɛ tsu ɔ na kaa i hɛɛ Baiblo. E ji bloonya ligbi. Tonga bihi fuu buɔ bloonya ligbi ɔ kaa e ji ligbi klɔuklɔu. E bi mi kaa i le nɔ́ nɛ Baiblo ɔ de ngɛ Yesu fɔmi he lo. Se i li he nɔ́ ko. E tsɔɔ mi Yesu fɔmi ɔ he munyu nɛ a ngma ngɛ Baiblo ɔ mi ɔ. Se i nɛ kaa a wo kusumi slɔɔtohi nɛ yaa nɔ ngɛ bloonya be ɔ mi ɔ a ta ngɛ ngmami ɔ mi. (Mateo 2:1-12; Luka 2:5-14) E pee mi nyakpɛ wawɛɛ, nɛ i suɔ kaa ma le ní kpahi nɛ Baiblo ɔ tsɔɔ. Nyumu ɔ yaa kpe nɛ Yehowa Odasefohi peeɔ daa otsi ngɛ tsu womi he ɔ, nɛ i to kaa i kɛ lɛ maa hi yae. Jamɛ a be ɔ mi ɔ, a ngɛ Kpo Jemi womi ɔ kasee. E ngɛ mi kaa i nui nɔ́ fɛɛ nɔ́ sisi mohu lɛɛ, se i na kaa a tsɔɔmi ɔmɛ tsuo daa si ngɛ Baiblo ɔ nɔ.

 Benɛ Odasefo ɔmɛ tsɔɔ kaa a suɔ nɛ a kɛ mi nɛ kase Baiblo ɔ, i kɛ bua jɔmi kplɛɛ nɔ. Jamɛ a be ɔ ji kekleekle be nɛ i kase Baiblo ɔ si womi kɛ kɔ paradeiso nɛ maa ba zugba a nɔ ɔ he. (Yesaya 35:5-8) I yɔse kaa loko ma nyɛ ma sa Mawu hɛ mi ɔ, jã i pee tsakemihi nɛ sa ngɛ ye si himi mi. I ba na kaa Yehowa Mawu be blɔ ngmɛe nɛ i kɛ ye jemi bami yaya amɛ nɛ hi Paradeiso nɛ e wo he si ɔ mi. (1 Korinto Bi 6:9, 10) Enɛ ɔ he ɔ, i fia ye pɛɛ si kaa ma ye ye he nɔ, ma kpa sigaleti numi, ma kpa dã demi, nɛ ma kpa tsopa yaya kɛ ní tsumi.

 Ngɛ jeha 1999 mi ɔ, loko be maa su nɛ a maa ngmɛɛ ye he ɔ, nikɔtɔma amɛ je mi kɛ ho tsu womi he kpa ya. I kɛ Odasefo ɔmɛ kpi hu jeha kake kɛ se sɔuu. Se i fia ye pɛɛ si kaa ma ya nɔ ma pee tsakemihi. Ngɛ jeha 2000 mi ɔ, amlaalo ɔ ke e be mi blɔ ngmɛe nɛ ma hi United States, enɛ ɔ he ɔ, a wo mi blɔ kɛ ho Tonga ya.

 Benɛ i ya su Tonga a, i bɔ mɔde nɛ i hla Yehowa Odasefo ɔmɛ a se blɔ, nɛ i kɛ mɛ tsa Baiblo ɔ kasemi nɔ. Ye bua jɔ nɔ́ nɛ i ngɛ kasee ɔ he, nɛ ye bua hu jɔ wawɛɛ benɛ i na kaa Odasefohi nɛ a ngɛ Tonga a kɛ a ní tsɔɔmi ɔmɛ tsuo da Baiblo ɔ nɔ kaa bɔ nɛ Odasefohi nɛ a ngɛ United States ɔ hu pee ɔ.

 A le ye papaa wawɛɛ ngɛ kpɔ ɔ mi ejakaa e hɛɛ blɔ nya ngua ngɛ e sɔlemi ɔ mi. Enɛ ɔ ha nɛ sisije ɔ, ye weku li ɔmɛ a nya kpɛ a he nɛ a mi mi fu kaa i kɛ Yehowa Odasefo ɔmɛ ngɛ bɔe. Se pee se ɔ, ye fɔli ɔmɛ a bua jɔ kaa Baiblo sisi tomi mlaahi nɛ i kɛ ngɛ ní tsue ɔ ngɛ mi ye bua nɛ i ngɛ tsakemihi pee ngɛ ye si himi mi.

 Tsakemi kake ko nɛ e peemi ye ha mi wawɛɛ ɔ kɔ da ko nɛ nihi pɔɔ numi ngɛ wa kpɔ ɔ mi ɔ he. Nihi nɛ a ngɛ Tonga a babauu ngɔɔ a be fuu ngɛ otsi ɔ mi kɛ nuɔ dã ko nɛ a tsɛɛ ke kava. E ji dã ko nɛ a kɛ kuadaa tso sisi poku pee. Amlɔ nɛ ɔ nɛ i ba su ye ma a mi ɔ, i pɔɔ he ja jemi he nɛ a juaa kava ngɛ ɔ yami daa gbɔkuɛ, nɛ i ya nuɔ dã nɛ ɔ. Be komɛ po i nuɔ hluu nɛ i li he nɛ i ngɛ. Nyagba kake ji huɛmɛ nɛ i kɛ bɔɔ nɛ a be bumi ko kɛ ha Baiblo sisi tomi mlaahi ɔ. Bɔɔbɔɔbɔɔ ɔ, a ye bua mi nɛ i na kaa ye ní peepeehi hao Mawu. I pee tsakemihi ngɛ ye si himi mi bɔ nɛ pee nɛ Mawu nɛ kplɛɛ ye nɔ nɛ ma ná e dɛ mi jɔɔmi.

 I bɔni Yehowa Odasefohi a kpe ɔmɛ tsuo yami. Akɛnɛ i kɛ nimli nɛ ɔmɛ nɛ a ngɛ mɔde bɔe kaa a maa sa Mawu hɛ mi ɔ bɔ he je ɔ, lɔ ɔ ye bua mi nɛ i nyɛ da kahi a nya. A baptisi mi kaa Yehowa Odasefo ɔmɛ a kpɛti nɔ kake ngɛ jeha 2002 ɔ mi.

 I ná Mawu tsui si tomi nɛ a tu he munyu ngɛ Baiblo ɔ mi ɔ he se wawɛɛ. Baiblo ɔ de ke: “Yehowa . . . ngɛ e tsui si toe ha nyɛ, ejakaa e sume nɛ a kpata nɔ ko nɔ ko hɛ mi, mohu ɔ, e suɔ kaa nihi tsuo nɛ a tsake a tsui.” (2 Petro 3:9) Jinɛ Mawu ko nyɛ kpata je yaya nɛ ɔ hɛ mi momoomo, se e to e tsui si be babauu bɔ nɛ pee nɛ nimli slɔɔtohi nɛ imi hu i piɛɛ he ɔ nɛ a kɛ lɛ nɛ ba ná huɛ bɔmi. Ye bua jɔ wawɛɛ kaa ngɛ Yehowa yemi kɛ buami nya a, amlɔ nɛ ɔ, imi hu ma nyɛ ma ye bua ni kpahi konɛ a ba le Mawu.

Yehowa ye bua mi nɛ ye si himi pee kpakpa ekohu. Amlɔ nɛ ɔ, I ju we nihi a níhi kɛ ya wo tsopa yaya he hiɔ hu. Mohu ɔ, i bɔɔ mɔde kaa ma ye bua ye kpɔ mi bi ɔmɛ konɛ a kɛ Yehowa nɛ pee huɛ. Yehowa Odasefo ɔmɛ nɛ i kɛ bɔ ɔ ha nɛ i ba ná yo nɛ i suɔ lɛ wawɛɛ nɛ a tsɛɛ lɛ ke Tea. Wa fɔ binyumu kake, nɛ wa ngɛ bua jɔmi kaa weku. Wɔ tsuo wa pee kake kɛ ngɛ nihi nɔ́ nɛ Baiblo de kɛ kɔ hwɔɔ se neneene si himi nɛ tue mi jɔmi ngɛ mi ngɛ paradeiso ɔ mi ɔ he ní tsɔɔe.