Թվեր 36:1-13
36 Հովսեփի որդիների տոհմերից Մանասեի որդի Մաքիրի+ որդի Գաղաադի որդիների հայրական տոհմի գլուխները եկան Մովսեսի և տոհմապետների՝ Իսրայելի որդիների տոհմերի գլուխների մոտ, ու խոսեցին նրանց հետ՝
2 ասելով. «Եհովան պատվիրեց քեզ՝ մեր տիրոջը, որ երկիրը վիճակով ժառանգություն տաս+ Իսրայելի որդիներին, և մեր տերը Եհովայից պատվեր ստացավ, որ մեր եղբայր Սալպաադի ժառանգությունը տա նրա աղջիկներին+։
3 Եթե Իսրայելի որդիների մյուս ցեղերի որդիներից որևէ մեկը նրանցից կնության առնի, ապա կանանց ժառանգությունը կվերցվի մեր հայրերի ժառանգությունից և կավելացվի այն ցեղի ժառանգությանը, ուր նրանք կնության կգնան, և այն կվերցվի մեզ վիճակով տրված ժառանգությունից+։
4 Երբ Իսրայելի որդիների համար Հոբելյան լինի+, կանանց ժառանգությունը կավելացվի այն ցեղի ժառանգությանը, ուր նրանք կնության կգնան, և նրանց ժառանգությունը կվերցվի մեր հայրերի ցեղի ժառանգությունից»։
5 Այդ ժամանակ Մովսեսը Եհովայի կարգադրությամբ Իսրայելի որդիներին պատվիրեց. «Հովսեփի որդիների ցեղը ճիշտ է ասում։
6 Սա է այն խոսքը, որ Եհովան պատվիրել է Սալպաադի աղջիկների վերաբերյալ+՝ ասելով. «Նրանք կարող են ամուսնանալ այն մարդկանց հետ, ովքեր իրենց աչքին հաճելի կլինեն։ Միայն թե պետք է ամուսնանան իրենց հայրերի ցեղի տոհմում+։
7 Իսրայելի որդիների ոչ մի ժառանգություն չպետք է մի ցեղից անցնի մյուս ցեղը, քանի որ Իսրայելի որդիներից յուրաքանչյուրը պետք է պահպանի իր նախահայրերի ցեղի ժառանգությունը։
8 Եվ ամեն մի աղջիկ, որը ժառանգություն կստանա Իսրայելի որդիների ցեղերի մեջ, պետք է ամուսնանա իր հոր ցեղի տոհմից որևէ մեկի հետ+, որպեսզի Իսրայելի որդիներից յուրաքանչյուրն իր նախահայրերի ժառանգությունը ստանա։
9 Ոչ մի ժառանգություն չպետք է անցնի մի ցեղից մյուսը, քանի որ Իսրայելի որդիների ցեղերից յուրաքանչյուրը պետք է պահպանի իր ժառանգությունը»»։
10 Սալպաադի աղջիկներն արեցին այնպես, ինչպես որ Եհովան պատվիրել էր Մովսեսին+։
11 Սալպաադի աղջիկները+՝ Մաալան, Թերսան, Էգլան, Մելքան և Նոան, ամուսնացան իրենց հոր եղբայրների որդիների հետ։
12 Նրանք ամուսնացան Հովսեփի որդի Մանասեի որդիների տոհմերում, որպեսզի նրանց ժառանգությունը մնա իրենց հոր ցեղի տոհմում։
13 Սրանք են այն պատվիրաններն+ ու դատավճիռները, որոնք Եհովան Մովսեսի միջոցով պատվիրեց Իսրայելի որդիներին Մովաբի անապատային հարթավայրերում՝ Հորդանանի մոտ՝ Երիքովի մոտակայքում+։
