Ծննդոց 13:1-18
13 Դրանից հետո Աբրամը իր կնոջ հետ և իր ողջ ունեցվածքով դուրս եկավ Եգիպտոսից ու գնաց Նեգև+. նրա հետ գնաց նաև Ղովտը։
2 Աբրամը շատ հոտեր, ոսկի+ և արծաթ ուներ։
3 Մի բանակատեղից մյուսը տեղափոխվելով՝ նա Նեգևից գնաց դեպի Բեթել՝ դեպի այն վայրը, որտեղ սկզբում եղել էր իր վրանը՝ Բեթելի և Գայիի+ միջև՝
4 դեպի այն վայրը, որտեղ նա սկզբում զոհասեղան էր շինել+։ Այնտեղ Աբրամը կանչեց Եհովայի+ անունը։
5 Ղովտը, որ գնում էր Աբրամի հետ, նույնպես ոչխարներ, խոշոր անասուններ ու վրաններ ուներ։
6 Բայց երկիրը նրանց չէր բավականացնում, որ միասին բնակվեն, քանի որ նրանց ունեցվածքը շատացել էր, և բոլորը միասին չէին կարող բնակվել+։
7 Ուստի վեճ բռնկվեց Աբրամի հոտերի հովիվների և Ղովտի հոտերի հովիվների միջև։ Այդ ժամանակ քանանացիներն ու փերեզացիներն էին ապրում այդ երկրում+։
8 Աբրամն ասաց Ղովտին+. «Խնդրում եմ, թող իմ ու քո, իմ հովիվների ու քո հովիվների միջև վեճ չլինի, քանի որ մենք եղբայրներ+ ենք։
9 Չէ՞ որ ամբողջ երկիրը քո առաջ է։ Խնդրում եմ, առանձնացիր ինձանից։ Եթե դու ձախ գնաս, ես աջ կգնամ, իսկ եթե աջ գնաս, ես ձախ կգնամ»+։
10 Ղովտը բարձրացրեց աչքերը ու տեսավ Հորդանանի ամբողջ Շրջանը*+ մինչև Սեգոր+։ Տեսավ, որ (նախքան Եհովայի կողմից Սոդոմի ու Գոմորի ոչնչացվելը) այն ոռոգվող տարածք էր՝ Եհովայի+ պարտեզի նման, Եգիպտոսի երկրի նման։
11 Այդ ժամանակ Ղովտն իր համար ընտրեց Հորդանանի ամբողջ շրջանը և իր ճամբարը արևելք տեղափոխեց։ Այդպիսով՝ նրանք առանձնացան իրարից։
12 Աբրամը բնակվում էր Քանանի երկրում, իսկ Ղովտը՝ այդ շրջանի+ քաղաքների մոտ։ Ի վերջո, նա իր վրանը կանգնեցրեց Սոդոմի մոտակայքում։
13 Սոդոմի մարդիկ չար էին և ծանր մեղքեր էին գործում Եհովայի դեմ+։
14 Այն բանից հետո, երբ Ղովտն առանձնացավ Աբրամից, Եհովան Աբրամին ասաց. «Բարձրացրու, խնդրեմ, աչքերդ և քո կանգնած տեղից նայիր դեպի հյուսիս ու հարավ, արևելք ու արևմուտք+,
15 որովհետև ամբողջ երկիրը, որ տեսնում ես, քեզ ու քո սերնդին եմ տալու հավիտյան*+։
16 Ես քո սերունդը երկրի փոշեհատիկի չափ եմ դարձնելու, այնպես, որ եթե մարդ կարողանա հաշվել հողի փոշեհատիկները, ապա հնարավոր կլինի հաշվել նաև քո սերունդը+։
17 Վեր կաց, շրջիր այդ երկրով նրա երկարությամբ ու լայնությամբ, որովհետև այն քեզ եմ տալու»+։
18 Եվ Աբրամը շարունակեց բնակվել վրաններում։ Հետագայում նա եկավ ու բնակվեց Քեբրոնում+՝ Մամբրեի+ մեծ ծառերի մոտ, և այնտեղ զոհասեղան շինեց Եհովայի+ համար։
