Ծննդոց 7:1-24
7 Դրանից հետո Եհովան ասաց Նոյին. «Դու և քո ամբողջ ընտանիքը+ տապան մտեք, որովհետև իմ առաջ քեզ եմ արդար տեսնում այս սերնդի մեջ+։
2 Ամեն մաքուր անասունից յոթական վերցրու քեզ մոտ՝ արու և էգ+, իսկ ամեն անմաքուր անասունից՝ ընդամենը երկու հատ՝ արու և էգ,
3 ինչպես նաև երկնքի թռչուններից յոթական վերցրու՝ արու և էգ+, որպեսզի ողջ երկրի+ երեսին նրանց սերունդը կենդանի մնա։
4 Եվս յոթ օր, ու ես երկրի վրա քառասուն օր ու քառասուն գիշեր+ անձրև+ կբերեմ և իմ ստեղծած ամեն արարածի կսրբեմ երկրի երեսից»+։
5 Նոյը ամեն ինչ արեց այնպես, ինչպես Եհովան պատվիրել էր իրեն։
6 Նոյը վեց հարյուր տարեկան էր, երբ ջրհեղեղ եղավ երկրի+ վրա։
7 Նոյը, իր որդիները, իր կինն ու իր որդիների կանայք տապան մտան նախքան ջրհեղեղի+ սկսվելը։
8 Ամեն մաքուր անասունից, ամեն անմաքուր անասունից, թռչուններից և երկրի+ վրա ամեն շարժվողներից
9 զույգերով՝ արու և էգ, մտան տապանը՝ Նոյի մոտ, ինչպես որ Աստված պատվիրել էր Նոյին։
10 Յոթ օր հետո ջրհեղեղի ջրերը եկան երկրի վրա։
11 Նոյի կյանքի վեցհարյուրերորդ տարվա երկրորդ ամսում*՝ ամսվա տասնյոթերորդ օրը, այդ նույն օրը ջրերի հսկայական անդունդի* աղբյուրները ճեղքվեցին, ու երկնքի ջրարգելակները բացվեցին+։
12 Երկրի վրա հեղեղը տեղաց քառասուն օր ու քառասուն գիշեր+։
13 Հենց այդ օրը Նոյը, նրա որդիները+՝ Սեմը, Քամը և Հաբեթը, Նոյի կինն ու նրա որդիների երեք կանայք իր հետ տապան+ մտան։
14 Նրանց հետ մտան բոլոր գազանները՝ ըստ իրենց տեսակի+, բոլոր ընտանի կենդանիները՝ ըստ իրենց տեսակի, բոլոր թռչունները՝ ըստ իրենց տեսակի+, բոլոր թևավոր արարածները+ և երկրի մյուս բոլոր կենդանիները*՝ ըստ իրենց տեսակի+։
15 Նրանք երկու-երկու մտնում էին տապան՝ Նոյի մոտ, ամեն տեսակ մարմնից, որի մեջ կյանքի ուժ և շունչ կար+։
16 Ներս մտան արու և էգ ամեն տեսակ մարմնից, ինչպես որ Աստված պատվիրել էր Նոյին։ Այնուհետև Եհովան դուռը փակեց նրա հետևից+։
17 Ջրհեղեղը քառասուն օր տևեց երկրի վրա։ Ջրերը շատացան ու բարձրացրին տապանը, և այն սկսեց լողալ երկրից բարձր։
18 Ջրերը սաստկացան և ավելի ու ավելի շատացան երկրի վրա, իսկ տապանը լողում էր ջրերի+ երեսին։
19 Ջրերը այն աստիճան հեղեղեցին երկիրը, որ ծածկեցին երկնքի տակ գտնվող բոլոր բարձրաբերձ լեռները+։
20 Մինչև տասնհինգ կանգուն ջրերը բարձրացան լեռներից, և դրանք ծածկվեցին+։
21 Այսպիսով՝ բոլոր մարմինները, որ շարժվում էին երկրի վրա, մեռան+, այսինքն՝ թռչունները, ընտանի կենդանիները, գազանները, մյուս բոլոր փոքր արարածները, որոնցով լցված էր երկիրը, ինչպես նաև բոլոր մարդիկ+։
22 Բոլոր արարածները, որոնց ռունգերի մեջ կյանքի ուժ և շունչ կար, այսինքն՝ ցամաքի վրա եղած ամեն արարած, մեռավ+։
23 Այդպես նա սրբեց երկրի+ երեսին գոյություն ունեցող ամեն արարածի՝ մարդուց մինչև անասուն, մինչև երկնքի թռչուն ու մյուս բոլոր կենդանիները*, և նրանք վերացան երկրի վրայից։ Միայն Նոյն ու իր հետ տապանում լինողները վերապրեցին+։
24 Ջրերը հարյուր հիսուն օր բարձրացած մնացին երկրի վրա։
Ծանոթագրություններ
^ Երբ իսրայելացիները Եգիպտոսից դուրս գալուց հետո Եհովայից ստացան սուրբ օրացույցը, այդ ամիսը դարձավ ութերորդը և կոչվեց բուլ։ Տե՛ս հավելված 18։
^ Այս արտահայտ-ը վերաբ. է մթնոլորտում եղած ջրային մեծ ամպհովանուն, որը շրջապատում էր երկիրը և որը 1։6, 7-ում նկարագրվում է որպես «տարածության վերևի ջրեր»։
^ Տե՛ս 1։24-ի ծնթ.։
^ Տե՛ս 1։24-ի ծնթ.։
