Հոբ 15:1-35
15 Եղիփազ թեմանացին պատասխանեց՝ ասելով.
2 «Մի՞թե իմաստուն մարդը փուչ գիտությամբ կպատասխանի+
Կամ մի՞թե իր որովայնը արևելյան քամիով կլցնի+։
3 Միայն խոսքով հանդիմանելը օգուտ չի տա,
Եվ սոսկ խոսքերը ինքնին անօգուտ կլինեն։
4 Բայց դու այնպես ես անում, որ Աստծու հանդեպ վախը ուժ չունենա,
Եվ Աստծու առաջ ամեն խորհրդածություն ցածրացնում ես դու։
5 Քո հանցանքն է սովորեցնում քո բերանին,
Եվ դու չարամիտ մարդկանց լեզուն ես ընտրում։
6 Քո բերանն է քեզ ամբարիշտ հայտարարում, և ոչ թե ես,
Եվ քո շուրթերն են պատասխանում ընդդեմ քեզ+։
7 Մի՞թե դու առաջին մարդն ես, որ ծնվել ես+,
Կամ մի՞թե նախքան բլուրներն+ ես ծնվել երկունքի ցավերով։
8 Մի՞թե դու լսում ես Աստծու մտերմիկ զրույցը+
Եվ մի՞թե իմաստությունը քեզնով ես սահմանափակում։
9 Դու ի՞նչ գիտես, որ մենք չգիտենք+։
Ի՞նչ ես հասկանում, որ մենք չենք հասկանում։
10 Մեզ մոտ և՛ ալևոր, և՛ տարեց կա+,
Որ քո հորից էլ մեծ է օրերով։
11 Աստծու մխիթարությունները բավական չե՞ն քեզ համար,
Կամ էլ խոսքերը, որ քնքշությամբ ասվել են քեզ։
12 Ինչո՞ւ է սիրտդ քեզ տանում,
Եվ ինչո՞ւ են աչքերդ պսպղում։
13 Ոգիդ Աստծու դեմ ես դարձնում
Եվ բերանիցդ խոսքեր հանում։
14 Ի՞նչ է մահկանացու մարդը, որ մաքուր լինի+,
Կամ ի՞նչ է կնոջից ծնվածը, որ ճիշտ լինի։
15 Ահա նա իր սրբերին էլ չի հավատում+,
Եվ երկինքը մաքուր չէ նրա աչքին+։
16 Առավել ևս նա, ով գարշելի է ու ապականված+,
Այն մարդը, որը անարդարությունը ջրի պես է խմում։
17 Ես կհայտարարեմ քեզ. լսի՛ր ինձ+։
Ես սա եմ տեսել, ուստի թույլ տուր պատմեմ դա։
18 Այն, ինչը իմաստուններն+ են պատմում,
Եվ ինչը իրենց հայրերից ստանալով՝ նրանք չթաքցրին։
19 Երկիրը միայն նրանց էր տրվել,
Եվ նրանց միջով ոչ մի օտար չէր անցնում։
20 Ամբարիշտն իր բոլոր օրերում չարչարանք է կրում,
Այն բոլոր տարիներում, որ պահված են բռնավորի համար։
21 Նրա ականջներում սարսափազդու բաների ձայն կա,
Խաղաղ ժամանակ կողոպտիչը հարձակվում է նրա վրա+։
22 Նա չի հավատում, որ խավարից հետ կգա+.
Նա պահվում է սրի համար։
23 Այս ու այն կողմ թափառելով՝ նա հաց է փնտրում. ո՞ւր է այն+։
Նա գիտի, որ խավարի օրը+ պատրաստ է ու շատ մոտ է։
24 Վիշտն ու տառապանքը սարսափեցնում են նրան+,
Հաղթում են նրան, ինչպես թագավոր, որ պատրաստ է հարձակվելու։
25 Քանի որ նա իր ձեռքը մեկնում է Աստծու դեմ
Եվ փորձում է ինքն իրեն բարձրացնել Ամենակարողից+,
26 Քանի որ համառություն անելով*՝ նա վազում է նրան ընդառաջ
Իր վահանի հաստ ելուստներով,
27 Քանի որ իր երեսը ծածկում է ճարպով
Եվ իր ազդրերին ճարպ է դնում+,
28 Նա բնակվում է այն քաղաքներում, որոնք պիտի բնաջինջ լինեն,
Տներում, որոնցում մարդիկ չեն բնակվելու,
Որոնք դատապարտված են քարակույտեր լինելու։
29 Նա չի հարստանա, և նրա հարստությունը չի ավելանա,
Ոչ էլ երկրի վրա կտարածի ամբարիշտների ձեռք բերածը+։
30 Նա խավարից չի կարողանա փախչել,
Բոցը կչորացնի նրա ոստը,
Նա կոչնչանա քամու պոռթկումից, որ դուրս է գալիս Նրա բերանից+։
31 Թող նա չհավատա դատարկությանը՝ ճանապարհից շեղվելով,
Որովհետև փոխարենը միայն դատարկություն կստանա։
32 Նրա օրը դեռ չեկած՝ այն կփոխհատուցվի,
Նրա ընձյուղը փարթամ չի աճի+։
33 Որթատունկի պես նա իր խակ խաղողը դեն կգցի
Եվ ձիթենու նման իր ծաղիկները կթոթափի։
34 Հավատուրացների հավաքույթը անպտուղ է+,
Եվ կրակը կխժռի կաշառակերության վրանները+։
35 Նրանց մեջ չարիք է հղիանում, և չար գործեր են ծնվում+,
Եվ նրանց որովայնը խաբեություն է պատրաստում»։
Ծանոթագրություններ
^ Բառացի՝ «խստացնելով պարանոցը»։
